TUILIAN E! KHUA KHAAL E! MENCHIM E! THEPTHUP E!
Written by Vungzamuan Valte, Columnist Zogam.com
AHUN HUN A THILTUNG ZELZELTE: Kum 100 bangzah hiam paita in I khangthu ah Mautaam, Singtaam, Vuahpi, Gialpi, Tuilian, Menchim leh adang dangte ziaka mangbatna, sihna, manna, pemkhiakna chihte record mumaltak omkei mahleh huntampi ah tungsek takpi uhi. Kabaw Valley, (Kaley) leh Tahan gamkuam ah I pipute teeng ngei ua, kum 300 lam nuamtak in khawsa uhi, himahleh galhatzaw ten nohdok ua mualtung lam manoh uhi, chih I theihdan tangpi ahi hi. Ahia, Chindwin luipi khang mahmah in, gam lianpitak tuummang ngei a, phaizang leh akiim akiang teng nawkdarh hemhuam ngei ahi chih bel leitung khangthu ah om lawtel mahmah zel hi. Bible a Tuichiim kigenpen zong leitung khangthu sutte muhdan in Euphrates luipi leh Tigris luipi te earthquake nasatak ziakin kikhakbing ngei a, leisai thupitak in hudim ahihchia tuichim bawltu ommah ahi, anaklam ah, chihbel om veve. Kum 60 val paita in Assam gam ah Earthquake nasatak aom ziak in Brahmaputra luipi in alampi khek top ahi chihbel mitmuh a zong dik hizel, Dibrugarh khawpi tangthu kansuite gendan in. Tuivai luipi ichih zong Vak-Vai takpi a, luanna ding mumaltak zong neilou in alang alang ah kivialleh koikoi zenhouh hi, (Lamka to Khawkawn lampi ah Tuivai lui atawmpen in Thumvei kikan tel hi, Kawlian lam ah Livei), eiloi a gamsung a tengmite a dingin hoih lehlam zawzen hi (Tuivai nga, Tuivai tengkol etc.), ahia lui khat hisam a, bang dinga luanna mumaltak zong neizoulou hiam ichihleh, a luana ding lampi kihubing ngeizaw himahmah tel inchia.
TAI KAWIKAWI: Huchimah bangin, khangthu suttu ten Singtaam nasatak atun ziakin I pipute nekding tasam in mualtunglam manoh ahi uh, chih zong om leuleu. Hisia, natsia zong lengmun mahmah sam a, pulnatna ichih zong anai theipen a genin, Khanthuam Sukte hunin nasatak in leng ngei hi. Chin Hills ah 1880`s laivel in kial nasatak (famine) tung hingei ding hiven, Kawlte gamsung ah nekding zongin thahatna suangin sih leh sih chia luh tuntun hun nei ua, suak leh sal deihman, gallu lak utman hisese lou in, nektak haksatluat mahmah ziak ahi, bawng, kel, lawi chih khong guksak sek hizaw dan ahi uhi. Huai ziaktakin ahi, I pipute toh Britishte a kimaituahna ziaktak uh, kiphasak na mahmah u`chia chihtoh, huchia I gamsung luhkhia ahi uhi. Mangsum Guite hatlai in zong a galtaina lam ah Phaitong khua sat-ngei hi, kum tamkuam galmuang in khosa mah le uh, Singtaam kial nasatak ziakin Teikhang khua ah pemlut uhi, huaimun ah Khanthuam Sukte leh Pawigal 1816 in tuakkha ahi uhi.
Pi leh pu te hunin, Kial ziak leh Gal ziakte in pem kawikawi ua, hinna tampipi taan uhi. Huihsia hisia te ziakin sihna leh manna tuak ua, tunitan in ganpul hilengte ziakin neih le lam mangthang sak lailai tel hihang. I gamsung history ah 1870`s sungin Chin Hills leh Lushai Hills apat mihing 2000 vaal Meitei gam kilut hi chih chiamtehna hoihtak om khinkhian hi, kial (famine) ziak ahi hi, tua hunlai in Vaipheite khenkhat Teddim lam manoh pawl zong om hidan un kigen hi, a tamzaw bel Manipur lam mah manoh uhi. 1950`s in Mautaam kialpi ziakin kihawtkualna thupitak piang leuleu a, Lushai Hills apat Guite kual, Singngat bial leh lamka zaang kidenna hangin, politics lam a khanlohna toh kizomtou in, nam kikar ah kimuh siamlouhna piangdok hialthok hi. Kial anasat luat ziakin Haichiin, Songtal etc. khuate khong ah rosot (ration/supply) khia in India lenna kivialleh thithe. 1979 kum in kial chikhat vuahtui omlouh ziak in I gam ah tung hi, himahleh government panlakna ziakin haksa lou in kithuak mualsuah lian hi. Tuivai, Tuitha, leh lui liankuam kuam kangzousim ahihna ah ngamat nuam zawzen hial hi, tengkol bel bei kiikeei hialthok a TUIKEP kipaw lutlut hialmah hi. Himahleh, tua kum mah in lamdangtak in, gialpi nasatak in kia a, inntung teng dengvang hemhuam hial, bubitna ding vaang mahmah, mualtung teng ngou phephua, guamkuak sungteng vukkhal toh kibang zouzen, tuiluang teng hudim, kha 6 sung mawngmawng giallom tuisuak moh tazen, tuiching saupipi bawl hialthok, lamdang!. Singkung teng giaugawp giigeei, anah teng heugai sipsip, vasa leh gamsa ten thuak nak ngial uhi, si phengphung zawzen uhi.
NATURAL FORCES: British ten 1935 in Tuivai tung ah (Khuanggin-Sinzawl) suspension bridge ngou velvual kahpasik a kibawl hon bawlsak uhi, 1976-1981 kikar in khualzinna lampi ah kitawn mun mahmah hiven, ahia kimaingap louhial hi, saulawtel mahmah, sanglawtel mahmah, anuai apat mihing akpi chia in kimuthei hi. Tuili dum keeikuai ki-ensuk ngam mahmah louhial. Luseite mihangsan khenkhat, huai leitung apat ki-dive suk ngam om chi ua lamdang kisa mahmah. Tuilian aom taktak hunin leilawn tung apat NILIAP (umbrella) in kiholh pha chi ua, nasat chilawtel zuazua akei maw, chimul thouzou akei! Lusei ten LEIMAWI chi ua, eilam ten LEINGOU chi uhi, hiai leilawn thupitak mai vuahpi leh huihpi kithuah in Sialbu te gamlak nawk ek hihtuak venchin, Menchim in mualpang tuahsuk a, singkung lianpipi toh alompi in luangsuk nuanua tazen chi uhi, huchi in LEIMAWI/LEINGOU a bulompi toh nawksuk a, hahtak a apan hangin Britishte khauhual pheipi chiachia a kiphan in zong thuakzoulou in kitan maita hi, aging bangzaw ngaihpha mahmah chihial uhi. Huchi in, I gamsung a thil thupi leh kikawmtuahna muanhuai lakmang ahita hi.
Imphal Valley pen tuinuai ah omngei hiven, Lamphel phaizang khong dawplak ngenta ahi hi, 1989 kum in Imphal River luangleet in khawsung muntampitak tum ek mawk hi, Tribal Colony, Checkon, Lambulane ichihlak ah nasadiak hi. Lamphel leh Langol kikar tuichiim tung hiven, mualpang ah pai doidoi ngai zawzen hi. Imphal airport paina ding in Rickshaw kizen mahmah leuleu. 1996 kum in Champhai toh Aizawl kikar ah vuahpi a hahzuk luattel mahmah ziakin menchim muntampi ah om zeezuua hial hi, kikawmtuahna buaisak mahmah. Huai ichih hangin South Mizoram lam bel lampi bei-gaiphial anahi maimah, vuahzu tamlua in lei tolhsak a, menchim ziakin amual amual muhphakteng phial kekse hemhuam zouhial mah hi. Lawmte khat G Luaihnun SBI a sem hiven, Saiha lamzuan a pailai kar khat sung a omna kithei zoulou hialmah hi.
Tunaideuh in Mount Kailash lam ah vuk kikholkhawmna munpi vuahpi (cloud burst) in pumtuam a, tuichiim mualsang tung apat kikhohkhia in mihing sangtampitak tuahmang hial hi, inn leh lou simsenglouh nawksia in minute 15 sungin taimang hiau hi. Huchimah bangin, J & K ah tuichiim tung nawn leuleu a, kum 60 sung hinkhua azangkhate nangawn in tuachibang tuichiim lauhuai theiphaban louhial uhi. North East lam ensin le, kar khat zong vuahzu hoihlou hinapi in (vuahchiin) Gauhati kuamlak khong tuilian in tuamkimvel maimah mawk hi, Meghalaya a Barapani (Umroi) ah tui kang kekeuh sim hiven, chikchiang in a dim nawn mahmah diam maw? Chihthu houlimna vantang a neite zong zuaugen asuak ua, tuitamlua, lauhuai ahi chi in khahkhe hialthok uhi. Shillong khua khong ah khualum lua, global warming ahi chikheukhou uhi. Lamka ah zong khua-lumlawtel ta, Aizawl leng huchibok chihte kikupna thupipen asuak maimahta hi. Delhi leh khopi zawdeuh aomte ngialhouh, kare, tukum zaw lum uangdiak sa ke! Chi kheukhou mai, houlimna pen asuak ta.
KHAWLUM LEH VOT: Global warming, climate change, Ozone depletion chih khong ei ZoSuante a dingin thil hou maimai ahingei ding, I nekzonna toh leng kituak moh hilhel. Climate change, global warming, Ozone layer vangheuhou chia tangkoute a tangpithu in summuhna hoihtak neitute ahinak nak uhi. Carbon footprints, carbon credit, chih tungtang khong ah sum tampipi mutoihtoih thei company tamkhop om uhi. Mite kitaitehna asang khopmai, gamchangkang zawdeuh ten a changkang loudeuhte a gelgawtna uh adiam, carbon emission kiamsak ding chiden tel ua, thermal power omlou hileh electric omlou ding a, agam uh zawng semsem ding ahi hi. Leitung kipei kipei in huih nungsak a, huih in ocean current bawl a, huchia tuilum leh tuivot aomna te uh kikhek-tuah zelzel ten boruak (huih) tuipaisak a, vuah zusak ahi hi. Khovel pumpi aa tuipi lianpenpen Pacific Ocean in tumlam manoh in warm ocean current, South American continent ah puak teltul sek hi, tua in Latin America lam ah vuahpi zusak durdur sek a, kum 4 sung huchidan in paipai lel hi, EL NINO kichi hi, Little Boy chihna ahi hi. Banghang hiam chih theihbut zong hilou in, hiai warm ocean current kilehpei mawk a, Indonesia lam mahnoh in kum 4 sung mah paikual nawn leuleu hi, huai in South Asia (South East Asia) lam ah vuahpi zusak leuleu hi, LA NINO (Little Girl) chi uhi. Huchia huihkhua leh tuikihawt ten I leitung khosakna peilamdang gige ahihna ah, vuahtui tam hun, vuahtui tawm hun kihelh thithe anahi zenhouh hi. I ommun a, lawm lawm tel tukum zaw, bangchi maimah leng adiam, lum lawtel, vuahtui om mahmah lou, ahihke`h vuahzu den maimah, tuilian vutvut mai, menchim tamlua ichihte khong ataang-atuan a om koikoi anahi leltak dan alim ka. Lamka zaang ah Khuga lui kiching neeinooi hiven, huai dam tui in lamdanna tun ding mah ahi hi, lampi kibawl kibawl a, mualpang teng kimetmai ahihchia menchim omden ding mah ahi hi, tangsang teng metgiau gaivek ihihchia khua lumdeuh ding mah ahi hi, tuipaitu ding leh huih samsuahtu dingteng giausak gaihvek ihih maimah chia. Khasi papi kipilsak hon in, Shillong a lum lawtelta, nidang abang nawnkei, chia akizap zap ziak un a phatuam dingpi omlou hi, construction leh concrete dimta, singkung lian teng bei hulhul chih khong theinuamlou ua, khawpi akhanlet chia huih leh nisate`n lamdan`na neiteisam ahizaw uhi.
ENVIRONMENT: Nidanglai aa gammang teng beisipsip ta, I tenna khuate zong lian deuhdeuh, concrete tam deuhdeuh, huaite ziakin nisa khauh in khua lumsak mah ahizaw hi. Huchi ahi a, I gamsung a mual, guam leh suang teng pheklek gawp, gammang teng imetmai banah, tangtung teng mulukolh ibatsakte tengteng localize issue mahmah ngenta ahi uhi. I gamsung ah sing leh louhingte kembit in, tuinakte puahpha in, leh I inn kiim leh kiangte ah sing leh gua khong dimsak leng, anuai liim vot ngeingai ding ahizaw hi, global warming ziak hizawlou hi. Concrete kiphah demdom ibawl chiangin nisa sasak velvul a, concrete in heat absorb zawmah a, reflection khauhtak nei zawmah hi, heehuu tel. I huangsung chiat ah singnou suan in, innmun sung a gam neuchik bek ah huanhai chiing leng phatuam mahmah ding hi, leinuai a tui alutna ding bek. Khawpi zawdeuhte ah house plot khat sung ah 1/3 bek gamhawi nei hamtang ua, dan (law) zuihna zong ahi hi (build up area permit). Nidang deuh lai in, I khuate gammang laka inn tamlou chik om liikliak lel, inn zong dawk hamham, singkung lianpipi pou ngeingoi ahihna ah khualum loudeuh ahi naknak zaw hi, global warming lamlam hizawlou in. Building bye law/regulation omsak kul mahmah lel hi, green belt ichi hiam, house plot khat sung ah gam neuchik bek hawi dingdan, leh hawktui paina ding mumaltak bawlkhiak poimoh hi, huchilou inzaw hawktui in mihingte ahon taimang khong ding, lamlian teng ah hawltui luang nawinawi den ding, ektui toh bang toh.
Ai-vuahzu khawng: Tulai a tuichiim tung, vuahchiin ichihte aom ngeimawng ahi ua, thillamdang lua hilou hial hi, Ai-vuah ichih khong nidang lai deuh in kar khat (7 days) chiin sek ahizaw, nupi papite hun-awl, tawldam hun ahi naknak. Vaimim nawnung em a, vaimim hot kawm a, kanpuak leh vaimim man huan khong nek nuaunuau hun ahi, mimzu tangzu chihmahtak toh. Loukhou mite a dingin nuhpi zoh in louphuai zougeih ua, huchi in Ai-vuah masa in delh hi, buhkung in ngeihpha ngial ua kuhngum pah tingteng uhi, buhvui kipansaktu ahi hi. Ai-vuah in aisate pawtkhesak a, vuahnuai ah nekding vialzon sak hi, phalbi hongtung ding khualna in kinekthau sawm ahizaw uhi, papi taimadeuh ten tom ziauziau lel uhi. Ai-vuah in tui khangsak a, luiliante apat nga hong kah ua, papi lunggel thei ten leen toh ngawi toh nga tampipi man tektuk sekmah uhi. Ahia, vuahnuai a gamtang peih loute bel, tapsaktung a karkhat sung phial kikhum bichilh leh tutnileng ahi leltak.
PLANNING: Huaiziak in, khua ahong lum deuh a, climate change ziak chi chi kei ni, ei mimal mal in mohpuakna nei hizawlim hang. Tui ahong khang a, tazen de, mahmah tel, khawvel beiding mah abang maimah a, chikei ni, huihpi gialpi ithuak ua, lamdang lua chikei ni, ataang atuan a huchisek mah hi. Laitui khua zong menchim in khuhmang dildel ngei a, meithainu kia suakta ahi chih tangthu a neite ihi. Bangladesh leh Burma a huihlum in hon nawk hiam, huih temperature sang taktak in hon buluh zialzial hizawlou in, eigam sung, ei huangsung, ei khawsung I kepdan dikloute ziak in I gamsung ah Global Warming, Climate Change etc. omsak hizawlim hang. I gam, I leitang, I huihkhua, I inten, I louten, I khua leh tui toh kituak dingin, PLAN leh POLICIES mumaltak, local level hitaleh, district level hitaleh, State level te ah bawldan I siam mahmah akul leh poimoh ahizaw hi. Pipute hun in bel, khua akhaal leh peemkhiak hiziau, kialpi tung leh peem ziau, hisia leng leh peemsan daih, gaal piang leh kibuluah a taimang hiau, tuichiim tung leh mualsanglam delh! Tunichiang in, tuachidan hinkhua pen hithei nawnlou ahihna ah, I tenna gam, I khua le tui, I kepbit siam mahmah uh akiphamoh, leh apoimoh penpen asuakta hi.
KHAIH KHAIH KHAIH: Khawpi liandeuh ah flyover leh lampi kibawlden hiven, build up area pung hulhul, concrete in agam pumtuamta, leinuai a tui tawm deuhdeuh, pump khiak haksa deuhdeuh, khualumsak deuhdeuh. Bangziak in ichihleh centralized AC building khong, AC gari ngenta, sungkuan khat in AC nih le thum neita, fridge lah tam deuhdeuh, ahia CFC Gas hahzat ziaka Ozone layer vangsak heuhou .… chia tangkoute`n, tua bang gen uh ahia? ichihleh, ozone layer le kikhuibing kiknawnta chivial laizang uhi, kua ten va khui u`leng adiam a? Heat nasatak a pekhetu tamtak kikol lemlum ahihchia, insung nangawn ah computer pumkawi kawi ihihna uah, khua zaw lumdeuh ding mah ahi hi. Anyway, diesel gari hahzatluat ziaktak in suspended particles boruak aa dimlet ichihpen mihingte a dingin lauhuai penpen hi, CNG ziakin Delhi khawpi khong ah Air pollution kiamsak zou mahmah hi. Gauhati leh Imphal ensin leng, Air Pollution sangdiak dingin gingta tinten ing, leivui toh diesel meikhu kihah hel mahmah tel ei! Factory tamtak om zawmah lai leh bang asuak diam? Pollution control mah kul hi, Lamka ah zong kuldiak, noise control nasan I thupibawl uh hunta. Natural calamity, disaster etc. aom tou tou, aom zelzel dingte hilim uhi. Himahleh, mihing ten technology hoihzaw zangin hiai mihingte tung a thuneihna huaisetakte kipumpelh thei laizang hi, abulpi pen zaw gamsung a sing leh louhing, leh tuinakte kepbit ahi hi. Environment protection ichih, eimah mimal chiat in ihihtheih alim ka! Singkung khawng I huangsung uah suan le.