SINGGUITHAK (Cinnamon)
Written by Vungzamuan Valte, Columnist Zogam.com
Tanglai apan a kigen minthang singguithak (cinnamon) Bible nasan ah tuangkha hilhial namah a, spice te lak ah a kumlui penpen khat ahi hi. Nidanglai pek in Egypt ten dawntheihte namtuisaktu dingin hahzat mahmah uhi. Damdoi chikhat leh tawldamna tuntu chi ua ngaisang mahmah lel uhi. Cinnamon chia khovel pumpi in a theih, China, India, Sri Lanka, Indonesia, Brazil, Vietnam leh Egypt gamte ah omtangpi hi, damdoi leh nektheih limsaktu (spice) in hahzat mahmah chiat uhi. Ancient Egypt ah misi avui ding chiang un apum zutna in nei ua, China ten BC hunlaipek in tonic, aphrodisiac chihdan in nei ua, pathian biakna nasan ah (incense) zang uhi. Cinnamon themneng tawi ua dawite (devil) hawlmang chihialmah uhi. BC hunlai in Greek te leh Roman ten hahzat mahmah napi in, a hong kipatna sut hetlou ua, Venetian te sumdawnna hoihpen ahilam bel thei mahmah uhi. Khovel pumpi a khualzinmite leh mihangsan masate nasan in hiai cinnamon enlah in discovery leh gamlakna nasep kipan ua, Indian Ocean tuikulh gam khong ah khuaivaitung banghial thok uhi. A zonpen uh bel, Cinnamon, Cardamom, pepper, ginger, turmeric chih khong hitangpi a, tumlam gam ah mihausate loungal in hiaidan spice te nei zoulou uhi.
South India leh Sri Lanka ah khovel pumpi a gamthupi kisateng hong kisungkhawm ua, Portugese te tungmasapen uhi, hiai Portugese te hauhsakna thuguk Dutch ten theikhia ua, 1600 AD lakvel apat gam nih te kikar ah kimuhsiamlouhna piangdok hial hi, Spice War kichi huaisetak a kidouna piangsak hi. Dutch ten vualtungtuanna ngah ua, himahleh East India Company (British) hong kipan leuleu in 1780 vel apat Dutch te thuneihna suhsak uhi, sumdawnna akhutsung uah koihta uhi. Tuaziakin, awl awl in British Empire India ah hong piangkhia ahi zaw hi.
Singguithak ichih a hoihna om ahingei ding, huchitel a kituh ngaihial chu, India leh Sri Lanka ah bel meh leh ann ah helnak mahmah ua, gawivui in mehtheih, nekthei chiteng ah helmahmoh uhi. Damtheihna lam ah poimohna liantak nei ahihna thei kilkel ua, Dalchini chi ua, Garam Masala chih khong mehlak ah khak ahitangpi. Damlouh hitaan hun in (cold or flu) damdoi suaksak ua, singpi limsaktu in zang ua, perfurmed candles, incense leh thau (oil) namtui ding nasan in zang uhi. Singzungthak chituam tuam on hiven, Sri Lanka ah Cassia achih u`n natna chituam tuam damsak thei chitel uhi, massage na ah zong zangpangkai mahmah uhi.
Ahoihna te ensin leng maw:
1. Blood suger level regulate thei chiteltawk ve uh.
2. Sisan a thau tam (harmful cholesterol) kiamsak chi uhi.
3. Infection daltu, bacteria lauhuai thattu, ulcer kiamsaktu chi uhi.
4. Guh natna (arthritis/osteoporosis) damdoi hoihtak ahi chizenhouh ve uh.
5. Food Preservative ichih (nektheih leh dawntheih) himhim a kemsiangthoutu hi a, selou in sawtkuam omsak thei hi.
6. Calcium, Iron leh manganese paai kikeih hiven, mihing taksa a dingin hoihdiak chi uhi.
7. Numeite hunbi thuaknuam sak (menstrual), naupaitheihna lam leh hormone balance saktu ahi chizouzen akei ua.
8. A gim namtui in mihingte lungsim thathousak a, theihtheihna (memory) khangsak a, taksa tawldamna pia chi uhi.
9. Sungnatna chituam tuam ah damdoi hoihtak ahibok.
10. Anti-oxidant quality aneih ziakin Cancer prevention a dingin hoih chi ua, sisan a dingin hoih ahina ah weight loss omsak thei leh anti clot agent chikhat ahi chizawmah ve un.
11. Odour neutralizer, massage therapy, fungus fighter, E-coli fighter, ha leh hani damdoi, insect repellant, Virus fighter, Alzheimer’s leh Parkinson’s natna nasan ah poimohna nei chi uhi.
Hiai tengteng zaw a damsak ding chih gintakhuai lawtel kei, ahia hoihna nei leh zatna nei hikei leh sisan naisan suah in gamdangmi hiai singguithak kituh in hong kibalkham keihial unchin, nektak zonna leh hausakna ding ngaihsutna in lamdangtak in kalsang tawi in kuankhelou ding uhi. Amsterdam khopi sung ah spice a sumdawngte zintun inn thupi mahmah, tua hunlai in spice toh gold akikim in kikhek tuah uhi chizouzen ua, gold toh kitehkhin hilhial mah hi. Huchidan mah hiding hiven, kum khat, kum nih sung vingveng khong tuipigal a sumdawngte a tunkik chiang un, mithupi, mihausa, mihangsan chi ua, hero’s welcome, khaih, inn tungzoulou in nasatak in lawm nilouh sekmah uhi. Bang hang a hiai singguithak thu suikha mawk ihia le?
Nidanglai deuh 1970`s hunlai in, vai sumdawng ten I gam ah singthak om ahi chih thei ua, hong luh gulgul sekmah uhi. A kg a zuak hilou in, a mound (40 kgs) a kizuak hizawmah laidep hi. Huchituktel a van manpha I gam ah piang himawk inchin, capitalize loupi a mangthangsak I hi dua aw? Chih lunggimna tak khat omthei zenhouh hi, ei ki exploit khialkha ihi hia, ahih keileh miten hon exploit? I gamsung ah Sialbu, Mualnuam, Khuanggin, Sinzawl, Kangkap, Lungchin, Suangdai, Mualnuam, Songtal leh akiim akiang a gamteng ah, Cinnamon agam agam ah piang maimah hihtuak, kuate chiin lah hilou, kuate khoi lah hilou, kuate tuh lah hilou a.. Singngat apat khualzin mite leh sumdawng miten haksa haksa in bawng toh sakor toh pangin pawsuah sek ua, singngat a sumdawng hausate kiang ah pesawn sek uhi, khenkhat ten Lamka ah khia ua, tawm chikchik in zuak mawk uhi. Naupang hon in bel tepthoh, nekthoh chih khong in kiseuh nuaunuau sek a, damdoi ding leh nektheih a helding ahihlam kiphawk louhial himawk dan ahi hi. Laizial dan a I tepchiang in khum dii dii a, nakvang bang, awmsung bang vangsuk hiai hiai theimah tham hi. Singngat gamsung ah Likhailui kichi om hiven, luipang khong a kung lianlou chikchik pou teltu sek a, kizungkarh khia in a zung khum mahmah banah, thak timtiam a, limpeuhmah zaw hiven, tuchiang in a kepdan kisiamlou ahihna toh beimang siang kiikei hialthok hi.
Tuahunlai in, Sialbu khua ten bangchi lak ua, Mualnuam khua ten bangchi lak ahi ua? A kungpi phuk unchin, huchia a hawng khawk himaimah uhi. A kung I phuk chia bel bei ding mah ahi hi. Singkung piching a phakna dingin kum 8 or 10 khong ngai ahihna ah, a harvest dan technique ichi hiam, a kep dingdan theiloupi ngenta kihimaimah. Gam teng lou ding a vatmai a haltum ihih zawkmah chiang un, extinct hilhial mah hiding dan ahi. I gamsung a thil hoih leh manphate muh ding omnawnlou suaksak hihang. Singguithak kung pen in, huchidan a I gamsung lei leh tui, banah khawlum leh vot ngeih mahmah a, gamlakpi a pouthei (wild) ahih maizen leh, chiin chi hilou hiam, farm bawl ding hilou hiam? Chih ngaihsut theih mahmah kha inchin, sumnak mai ban ah I gamsung a sing le louhingte kepbitna dingin zong phatuam mahmah leh kilawm. Harvesting chihpen, a theilou bulom ngenta lak ah, huai gamlakpi a singpou tei maimai, I phukpuk zialzial te lak ua khat hitei mai hinchin, a hawng (bark) zuaktheih chihzenhouh chu, singtangpa a dingin zaw maigop gop dingmah ahi hi. Phuksuk mengmeng a, a tamtheipen ahawng khok khiak mengmeng a phoukeu, akeu chia inn puak tun, huchia tapsak gei, khintung peuh a hakkeu pah, huchia sumdawngte ahong kuan ding uh ngak khinkhian ahi lel mai. Kg a bangzah sak ding, bangchi zuak ding chih ngaihsutna omlou, mi`n hong leisak kei leh vok ann ding a zong zattheih hisamlou, pammaih khatel na eive, lawmte.
Cinnamon ichih pen singkung pangngaitak ahi, a hawng langkhat khok ding, langkhat hawi ding, huchileh silou dingdan ahi hi, phuk ding hiloudan hihtuak. Huchia, kumnawn chia a hawng langkhat khok nawn ding, kumlui a kikhoksa lampen avun in tuamkiknawn ding, huchia harvesting cycle omthei ding chihdan ahi hi. Ahia, scientific harvesting chih khong chu kahase, singtangpa theihdan dan a hihsuk miatmiat ahihna ah, mangthang hilhel tel, pammaih tak e. I gam ah singguithak ching (cultivate) thak leng bang achi dia, sumnak asuak thei diam? mawk zuak lou in, gawivuisa (powder) or processed sa in zuakkhe leng India mi hiaizah ten a nek uh, a poimoh uh, ki supply senglou ding hi. I khankhiakna ding ua sumnak khat ahithei diam? Ngaihsuttak sa ing.
