NON MANTAMUN BAWL VE!
By Vungzamuan Valte, Columnist Zogam.com

English te`n“Familiarity breeds contempt” chizensam ua, kimeltheih pen a sia hipah kei mahleh, kimaingngalna diklou in kimelmakna piangsak thei zouzen hi. Royalty ichi hiam, royal family ichihte khong mituam mawng mawng ekneilou hithahah laizang lou unchin, ei mimawlte toh sisan naisan nei mah hi ua, himahleh kikoihtuamse ua, sangtuanse kisakna nei ua, royal blood ichih khong piangtawmsak mawkmawk uhi. Class apart ichih dandeuh omsak ua, executive class chihtanpha piangkhia hi, bangziakin; nek le tak zonna, silh le ten, inten louten, neih le lam kibanglou ahihna ah, anei leh anei mah kituakpen ua, aneiloute bel, amaute gamtatna ah kichimoh pah hi. Tua ziakin, a nei mah in anei lawmbawl ua, ngaizawng ua, zi leh pasal dingin deihgoh pah uhi. Vaite hinkhua ensin le, namniam achihte uh simmoh taktak ahihna uah, namniamte bel asangzawdeuh te`n nengniam den uhi, kiguizop ding bangtuh sihtuk a zadah hitaget zel uhi. Exclusivity, kihuituamna, tuamzawdeuh a kipolhna om naknak a, colony, complex chih tanpha neituam sek uhi. British leh European te`n colonization a hahbawl mahmah lai un, Portugese colony, British colony, Dutch colony etc. chi ua, Englishte a hong omlai nasan un, tuam ten hilhel se uhi. Raja kichite nasan kihisak mahmah laizang ua, compound lianpipi ah teng depdap vial uhi, huaimah dungsun in Governorte khong tolten himah le uh, huangsung lianpipi luah demdom ua, India President ngialhouh zahpihhuai saksim in aomta hi, khemkhem chih dia hoih ahi.

Mun hoih, etlawm, mualdawn, huihkhisiang leh tuisiang amuhnate uah sapte teng naknak ua, Aizawl nasan ah Durtlang mualsang tung ah tolten uhi, Missourie ah Lal Tibba kichihna, mualtung sangpek ah teng mawk ua, tunitan in a kaltouh hautak mahmah hinazenpi, kituam koih utna in gim le tawl khoksalou aduam; hih teitei mawk uhi. Lal thupi chia I gen minthangte zong minautang kiang ah om hitale uh, bangpiluai hilou maithei ahihna uah, kihuituam ua, royal academy e, bang e, omsak uhi. India gamsung a Raja kichite ngialhouh, Britishte hunlai in a tate uh Europe lam ah lai sinnsak ua, kithupisak ngial uhi, Meitei lengte nasan kisan mahmah ua, kizawn` thoh tut tut hialmah uhi. Huaite omdan kichingkha ahi hiam, Pu G.S Haupu MLA achin tunglai in a zinna te`n zawng tut tut sek ua, ka nuih za theilua eingal. Nidanglai deuh in zaw, saplian achihte uh a khualzin chiang un, zawn` ek pen a phurlamtak uh ahia, kipahsak sawmna ahitangpi, banah wanombah chikhat ahi, apil kiukiau khenkhat te`n a nungdelh chiang un hamphatna mukhanak ahihziak un. Sapte khualzin, zankhat lel agiahna ding uh bungalow bang dia sum seng zen a bawl ngai ahia? Khualzin leltak, mite inn ah giahsak theihlouh adiam? Tham tham e, himahleh om aka, a kituamseh ut ziak uh ahi naknak, distance maintain chihdan ahi. Banghang a distance maintain ngai ahia ichih leh, poimoh mah hitaget zel, mihingte kha I kimuhtam chia kimantamun bawlpahpahte ihihziak ahipen. Kimaingal ichih chia khanvual, lawmta, unau hilou hang a, status kipiak, dinmun kitheihsiam poimoh anahi daih eivoi. Huchilou hileh, mihing chiatchiat, a thahat le hisamlou, bang dia lau laizang ding, bang dia zahtat laizang ding, vuaksuk ek dia enlah kiompah ding hiven, kousuk zial. Uniform service te ensin le, Armyte khong, officerte colony tuam om, office a chamber tuam kikoih, sepoyte kha ensin mah ve, paching huaizah zouzai, alu uh metgiausak ua, mihai etkol takzet uhi, regimented, disciplined ahihziak un, a khe ut tatpuak tatpuak maidan ahi uhi, a gaal et-te a ding in haihuaipi ahingei ding, himahleh asung a omte a dingin, aloutheilou thilpoimoh ahitlat.

Ei zosuante sung ah zong kithupisakna, lian kisakna om mahtham hi, tuitawgal kapte bangchu a medal uh lasuah lasuah maidan hi unchin, galkap hi uhia pawtpua chihbel gentam ngaikei. Hausate ngialhouh kisial on on sek ua, a thangpaih chiang un, a phungmin uh, a pute thupina, a pate thupina genmangmoh hialsek uhi, tei toh lum toh luum zenhial mah uhi. Thau aneih chiang un, thupi kisa in hanla, bangla sa in a kawlchiang, a thaulawng uh gin dumdum sek mah uhi. Hausa khanggui chi ua, mi naran te khong mou dingin zadah mahmah thousam hihtuak uhi, kisimmohna dan in ngai ua, nou khong te` batphak ding ka hi sam ua, zummoh na mahmah uchia, hon mantamun bawl na mahmah uchia, uipi hon sa maw?? Chihdandeuh omlawtel dan ahi, tunitan in om lai adiam a, mou man gen louh tamtak omlai ding hi.

Huchidan kituamsehna poimoh mah hiam, ahiding mah hi hiam, chih sutsin le chidan ihi. Nektak zonna khat peuh peuh ah, heutu na sem aomlou theilou ahi hi, makaihtu muanhuai poimoh hi, lamkaihtu leh inntekpan a pang aom kulmah hi. Huchidan a, poimohna diak neite kha facility tuam, midangtoh kichiahpiah loudeuh a, akihuituam siam uh poimoh himawk dan ahi. Huchidan hikei leh, ki-uizuih haw haw ding, hih tumta leng neilou a kilawm polh mawk ding hihang. Company khong ah manager, group manager chihdandeuh in, mohpuakna kiguan siusiau ua, project sepsuah ding kipia ua, timeline bawl zawmah uhi, huaite tung ah supervisory authority omsawn inchin, huchia kizahtat tuahna leh kigulauhna in meipeisak a, thanem tuam omtheilou, meitalzen a pan ngai asuak hi. Office staff te toh kihou hetlou ding, kimaingal louh ding chihna hipah kei mahleh, kinel luat pen thil hoih hilou hi, tung a te zahlouhna, kimaingalna dikou, theilumlet kisakna, asia apha muhsuakna, maimah aw; chia kimuhsitna lungsim piangsak hi. Khenkhatte amak mahmah bel, staff te khong toh laithai khong peuh, tep leh dawn peuh hihsuk nuanua kiom takpi a, bang ngaihdan anei duam chihbel haihvual hilou hial hi, distance maintain ichih hiai khong ahi. Official dealing ah, semkhawm ihia, seppih muanhuai ahi ua, aneu alian in mohpuakna kineichiat hi, kihou ding, kikup ding, genkhawm ding, ngaihdan leh muhdan kidottuah ding mah ahi, office pawllam bel a siang vilvel keileh I seppihte mah in advantage zong ding ua, I nunglam ah bang bang hiam hih nilouh uh zong hikhamohlou hial ding hi. Kimaingalna dan hunchiang I neihsak ding ahi hi. Ahia official thilloupi a, nangmah mimal hamphatna ding zong a power abuse/misuse gigepa na hih lehbel hon maingap mahmah ve uh, hon ngeibet ngam hial maithei uhi. Khenkhat leuleu, nekkhawm takkhawn na mun ah kidam selou, buaichihtakpi a buai, tagah nawimuh, apheizawng a inn tung gige omtazen ua, mi`n, bang achi muh mah duam maw? A ngaina kha vanglak te`n zaw ngaimahtham unchia, kibatpih om kha naknak ahihchia.

Mihingte I pianken kibanglou hiven, mel le puam zong kibang hetlou hi, lungsim putdan zong kibanglou takzet mawk hi. Khenkhat te a paunuam, khenkhat te a nuihmai, khenkhat te hehphut phut, khenkhat te tuanrang, khenkhat te ze-awl chihchunepte, mouvan teng pawsuah ding bangmai, huai I kibatlouh natak ahi a bukimna, thepthup in. Kibang neunou mawk in, mel bang kihaih deuhreng leng chu buaihuaipi suak ding hi, zite bang haih, I zite bang in hon haih, Kumpi David leh Solomon te hizenlou chu, huchithahah laizang kei ni maw. Khawvel ah, mihing kuamah akhutzia uh kibang omlou, a paidan uh kibang omlou, a khut veidan uh kibang geih omlou, a awsuak uh kibang geih omlou, a mit-hah uh kibang chiah omlou, a nuihmai uh kibang sise lou, kibang lua ichihte zong belhchian dawl tuanlou hilai dep, a genes uh kibanglou chihna hilel mai. Huaiziaktak ahi, pa neu trengtrang khat in, mi a thuzawh mahmah theihna ziak; a lungsim zang hiven maw. Pa lian eng ong, thahat mahmah in, pa neuchik nung zui duaiduai, zui huuthuut, kap nelnul thei laizang hi. Lungsim ngaihtuahna zang pangkaite mah tungnung ua, khovel peizoupen ua, adeih uh zong muzoupen uhi, zi hileh bang hileh. Pa neuchik khat in aw ngaihdeuh mai nei inchin, a aw bang thum zawmah, mi influence baih mahmah laizang thei hi, Adolf Hitler palian eeuu uau ahikei, Napoleon le pa vantang nuai a mi ahi, khovel peilumlet zoutuak mahmah heet-haat vial uhi, mite mai a taiselou, aw leh lungsim zang a mihing maktaduai teltel a utna lamlam ua taisak duamuam thei leh a hinna tanpha uh piakhia ding a kituh lulut zawzen thok uhi. Hypnotism zaw ahikei, asiam himhim ua ahi, lungsim khauhtak nei, huai a-full potential a zangkhate ahi uhi. Gam la di, namsang ihi, ei nuai ah gamdangte koih ni..achihchiang ua mipite puk duamduam maidan ahi uhi. Himahleh, hiaite`n kha weakness neisam uh ahi, huai a weekness te uh sel chihtakpi in sel ua, lungsim venglou khong himaimah akei ua. Alexander the Great in apa sakor hangsantak mai kuamah in a khoihtheihlouh uh, a miitang a en kilkel, aman ni kawk chenchen kawm a ensak vengveng inchin, a sakor kiginlouhlaitak a bohthut, atung tuang chu hider mai, a lungtang in a ngapthoh mahmah ziak ahi, apa nasan in lamdang sa. Himahleh hiai Alexander, khovel pumpi laksawmpa nangawn in weakness nei inchin, khamtheih zongsang himaimah. Kiselzou ahingei ding ua, asihnung kum zatampi nungin kitheisuah pan hi. Mahatma Gandhi hinkhua ensin le, amah kidektheihna, kuhkalna leh mipite hiip theihna talent hoihtak nei ahi, himahleh, atak leh avei a om mihing tampi te`n (numei nungjui hau mahmah) a weaknes liahkhuh ua, mipite musaklou hial uhi, huchi in India mipite a dingin messiah bang phial asuak maimah hi. Kihuituamna omlou hileh bel, eh eh eh chih chih ding tampi omkha ding hi, numei naupang chih chik a ompihsek chih mahtak. Nehru zong kiselsiampi khat hi inchin, Edwin Mountbatten toh unhealthy relationship nei ahi chitinten omtakpi ua, Lord Mountbatten in India te Independence piak-khiak ding hun kumkhat in advance top mai chi uhi, Royal family, royal blood, royal prestige poimoh ngaihpen ua, huai India mi toh minsiat taktak khak ding laulua, azi lah hingal si, huchidan hikei leh Nehru in zi dingin nei taktka maithei chi uh aihbang.

Nungak tangvalte zong kisel siampi hi unchin, pasalte bang, a .... aw uh nempha zawzen, ngeingai. Kon muh tung apat, nang maw...... awling keuh keuh a genngamlou hilai, midang khong sawl sawn, zawlthu pat-tung ding zaw hamsa ahi ngei di, ka experience ta achithei kitam hetlou ding eive. A maingal himhim khenkhat ki-om mahleh, huchidan a maingal gelgal, pau zatzat te zong a deihpente kiang uah paukhial tuhtuh khanak uhi, gen ding pen theilou a, a min khong uh sam khial maimah chih zong omdan ahi. Banghang hiam chihleh, mihingte I kimaingal luat ma-teng a hoihzaw, leh a nuam zaw himaimah, I suangtuahna gam, I lungsim I lunggelna gam kha thupizaw ana hi maimah. Hiai in hon deih maizen lehtuuu, ka si thok di, chih mahtak, si leh bang a phatuam diam? Kamsung a lei zong kipetkha thei himahleh, numeite mai ah nunnem duaiduai thei mahmah hangin, kamsung hon sawk le uhzong kikei peuhmah kenchia. Numeite lahchu, ek neilou ziazang in om meuhmauh thei ua, I kimaingal luat ma hoihzaw liang veh.“YARROW UNVISITED” chih lavui gelhtu William Wordsworth in genchiang mahmah, a gam nopdan, luikuam nuamtak, leilawn kikhung zihziah, huai lak a phialphiak (swallows) nupa leh palou kivialleh hehute` nopsakdan a suangtuahna ah, amitkha in mu hi, khitui kaizen in lungleng hial a, khakham veitheih hial leh kilawm hi, tungsunni tumkuan, meikai thiithiaite ziakin lunglen` simthu genchimlah hialthok hi, a sun mumang ahi, a suangtuahna. Yarrow a muh nungin “YARROW VISITED” chih gelhnawn leuleu a, hou gaivek maimah hi, a masala di omnawnlou chu.

Huchidan deuh ahi mihingte hinkhua, ngaihzawng neihma in ngaihzawng nei mahmah leng zaw, chi chi mai, a neih chiang a lah ningkitel pah, khen thithe theizel. Kingaih lai, kizahtattuah lai, kimelh giaugiau lai anuam zaw hunte himaimah, kimaingal luat chia chu, a masala bei daih, hou gaivek, numeite pilvan` kul. Zi leh pasal in I hong kinei a, I weakness sel theih lah hitalou, e, e, eee, huchi di hon sa maizen leng aw, kon nei kei mah di chu aw..aw..aw! chih hita, kinak, kivuak, kisat a poimohna zong omgun khenkhatte a dingin. Weaknesses kinei chiat inchin, ahia I mimal hinkhua uah, kikhekna poimoh ihihlam a kitheilou ngenta ihi zawmah laizang uhi. Pasal nei hinazenpi lah nupi hihlam kitheimahmah lou, mohpuakna leng theilou, nupi nei hinazenpi palak om reng sawm mai, nupite sang a khanvualte ngaipoimoh zaw, kholai ngaizaw, insung a nektak zon` ding lunggelna a omlou, neihtheih ahi chia neitei ringot kitam ahi. Ahi, tenpih leh khosakpih I hon neih chiangin, I weakness tuak uh hong kilangkhia a, selvual ahinawn keihial, I ki-compromise hia, I ki-balsialnuai, ahihke`h kiphakhen, huai kha hidaih mai. Mihing nih omkhawm, chikmah a leng tengkhawm kha ngeilou na nanachu, huchithei mah ahi, lungsim kimattuah, kiniamkhiak, paukituh louh, nasephoih/siam kituh leh hoihnate kipiaktuah a damdoi hoihpen ahi, I hoihlouhna te suppress teitei poimoh hitaget, huai kha nupa hinkhua ahi daih mai. Mualsuah zoulou a kikhen leng tam, tate mai a zahlak leng tam, lungsim lunggelna piching mah poimoh pen hi. Ahia, damsung  a suanglom giktak puak kumkhua ding zaw haksa mah hi, ngakhe zaw mai in, incorrigible devil neikha na hih leh, na navak zaw ngei ding. Koltang sak ke`n, nang leng koltang nilouh ke`n, thil tengteng a kikhel vek ma in.

Zi leh tate kikar ah distance maintain haksapi ahi, nu leh pa te pahtakhuai ka sak mahmah na bel, a zite uh kizahtaksak zou ua, a lauhthoh ziak uhia chih kitheilou. Ta te`n bel ahon maingap takzet uh poimoh hi, huai dingdan mah ahi, khovel ah pa tampi piang mah leh apa ding uh adang omlou hi, hon ngai ngoih ngoih uh-henla, hon poimoh gige le uh I deih, ahia independence a kisin uh zong poimoh mahmah zel. Amau kia a giahkhiak hun neihsak, innsung van kep, avan uh kepsiangthou dan, annhuai, puansawp leh adang dang a kisin ding uh ahi. Huai dingin distance maintain ngai a, mohpuakna piak ngai hi, itlouh ziak hilou in, itluat ziak ahih ding ahi, theihsiamsak ding. Numeite ahong nupi ua, chitel aw, nipnep tel, dohthei chauh, na nu leh pa ten bang hon sinsak ahitel ua??? Chia I tate mi`n a simmoh khak ding uh lauhuai mohlou hial hi. Numei tamtakte, pasal nei hibuang sam a, zan mohpuakna chauh semsuah thei chihtelawi kha, salh, tai, vuak leh paisak ahi naknak uh, ahang bel innsungkuan bawlna ichihpen namai hilou hial hi, theihtawp suah a pangte nangawn vuaksuak theilai uhi, felpumhlum, gensiat bei ichite zong ta neilouh ziaka a it ngoih ngoih te`n khen thei laizang uhi, lungsim leh taksa a kisakkholna omloupi a, pasal neihtei ringot chu, a tuahtuah uh, a tuah du mah ahi mah ke! Nu leh pa te mohpuakna hidaih dan eihchu, distance maintain dan chiang theilou a, ahih ding teng uh hihsak vek in, pichinna gam a tun kei achi ve ua. Tapa, tanu piching eu-uau nei hizenpi, lah pawtna teng a ka tate`n ann a ngawlkha du, chia inn delh duaiduaite mahmah eive, nuching paching ka sak mahmah te, felval akei ua!

Distance maintain dan huntawk aom hi, khenkhat leuleu kithupisak, kiliansak, kichapousak lawi om thei ua, a theiloute tung nangawn ah sappau khong vaipau khong zang zalzal thei uhi. Inveng, insak inkhang te nangawn ngeingaih lou in khosa veva ua, kuate ahi mai, a inlengte uh, hamchituam tuam a ham omthei uhi, kalsang tawina ahi kei. Panpihtu naipenpen te I insak inkhang te ahi uhi, neih leh neihlouh thu hilou in, kikawmtuah ding ahi, prestige issue ahi kei, na ekthakna uh akinai emmai, hon theilumlet lua uhi. I gamsung ah, I nam sung ah exclusivity ichih dandeuh nidangpek apat aom hi, ke`n zaw ka lawmbawl ngap kei, ka neih le lam toh kituak kei, chih hun theih poimoh hi, high class te chetdan a chet tei ringot in kongou asu kei, na nu leh pa te khosakna phawk in, mobile handset thupi na tawi ziakin na thupi tuan kei, na giahna mah ah giak ding lah na hi ngal a. Bike a na tai vurvur sangin khe in pai lechin na damthei zaw ding, a petrol man ding bek lohsuah na hih kei inchu, nangmah kikhem nilouh ke`n. Exclusive club ichih khat om leuleu a, huaichu SAPTUAM HEUTUTE AHI, saptuam a poimohna neite, upa level tan tungte exclusive nawn mahmah leuleu uhi, a mau lak ah bel saptuam thulou houlim sese louh hoih hi, fanatic simpian ahihna uah. Simlei vai pen pampaih theih hilou hiven, saptuam hin saplouh hileh, exclusivity uangbawl kei hamham leng hoih ding hi.

Huai ichih hangin, mahni dinmun toh kituak loutak a om khak baihlamtak hinchin, I omlouhna ding mun a omkhak gun chang bang omthei zel mah hi. I innsung ah ahong vaklut lou dingpi maingalsak kha ek, chih bang, khensiam ngai lua ana hi maimah. Na kimeltheihpih hoihtak in, na nopna, na dahna, na siatna, na nupa kikar, na tate, na sungte, na neih na lam thei lumlet sipsip mawk hi. Huchidan hi a, kizop khakpih louh dingpi na kizopkhakpih a, melma na bangkawsung a na maingalsak khaak in tuu, hon tawlem den ding hi. Huaipa, huainu ka thei, amah maw, huchi khachi eive, a gen utte maw zahmoh thei lua, numei ngai ahi, azi toh kituak lou, veih nem lua, sum hau lua uh, kina den uh, tate`n sikha lauh a lau uh, azi vua vua, kithupisak, kiliansak, zu a dawn, azi huchi khachi ahi, negu tagu ahi e, bang e, ahoihlam himhim gen ding theilou, gen ut selou, lah phuahtawm zeldimthubawl tampitak ziar khia, tangkoupih zaizai. Huchidante kha azatute kipahna, alungdamna uh, leh a fel hihna, atamzawte kipahpih lam hizawmah lai. Huaiziakin, I hinkhua ah thil selguk ding chii aom dia, I innsung thuguk I selguk chii aom dia, nupa kirar, sanggam te toh kikar, official thil, I tate dinmun, abang teng hileh huchidan a selgu chiltel theite mipiching anahi dan eive ua!

Mizote society ah, kuahiam khat in“hiainu huaipa na theingei hia” Chita leh (huaipa/huainu midukdaklou deuhmai hileh zong)“Aw! Hria e, ka hria alawm, an ni chu an fel ania, feltak anni ringot mai” chi trang trang du eihbang. Ei society ah chu, zeldim thubawl lel khong I sungkhat-laina te nasan, thil a theihphak bat uh leng hikhollou, kholai thuthang maimai khong, gospel truth chia, a puangkhe masatu hih kituh zawzen. Gen ding I theih kei leh genlouh ding bek thei tel le! Zuau gen hiam kigensiat ziaka Olympic Gold Medal muhna ding om hileh bel thutuam, huai leng hisam lou. A thuhim in, mi`n ahon lawmbawl, ahon deihsak chiangin ki-itna ahi naknak, huai itna pen I pampaih a, I lehkhup ding hilou dan ahi. Sap ten“talking behind the back/hitting below the belt” chih khong kampau nei ua, betray chihdan deuh in friendship khong zong sabotage theih ahi hi. Sangak palai chih om hiven, sihal pil ichi mai dichu. Lohtak nei ahihlam uh bel theihna omlou, himahleh midangte maipha zong hizawsop laitel ua, hehpihhuai uh sa ke, amau kitawlem pahlian ahih chiang un.

Ahi, khanlohna khat, lungput kikhekpumhlumna poimoh sa ing, huchilou in zaw!

NON MANTAMUN BAWL VE! Ki-chih khak asam viau di zuhia, rok chaw.