LUNGLIAP HUAI LUA:By Vungzamuan Valte. 
Kuahiam khat in thil hon gen/gelh taleh, kou hon gensia, kou hon kaap, hon enghou, hon suminsia...chihdandeuh lam ngen a ki-en mawk hang a…lamdang!
Amhaihuai lua ahi, hichidan in ngaihdan neithei leng bang achi dia?
Positive criticism leh destructive criticism om ahihdan theisiam kawm in, huchidan hi a, I gamsung ah politician kumlui leh thupi mahmah om hang a, kum 30 vaal khong political arena a tualleng hi inchin, politics, economy, social, religious, Philanthropic, Development, Khuga, Thanlon, Singngat, Lamka, Lampi, Tui nek, kawlphemei, damdoi inn, skul, sanitation, mini secretariat, police, Nam sung kivaipuakna, zogam thu, kaam gotna, sports toh kisai, nektak zonna, public ground, IAY, Un employment loan, Petrol leh diesel, gas, land reforms, gam neih, Tuivai, Tipaimukh, delimitation, Pherzawl, Behiang, Guite road, cultural issues, PTC, YPA, SSPP, Congress, ZNC, sum leh pai, VIP culture, Law and order, Tiddim road keklet ding, etc. etc. hiai thute i gen leh I gelh chiang ua, kuahiam khat kawk, kuahiam khat hetkha, gensia, engkou, su-minsia etc. etc. chia la pahpah hang a, dik khinlou hial ahi. Heutu ten a theih ding ua poimoh mahmah bel, a nopna ningzukhum (zarzouna) kia hilou ahi, a haksatna, mipi sou dopna, gensiatna, leh minsiatna toh thuneihna akithuah a paikhawm kawmkawm ahi chih. Criticism leh opposition a om louh chia paikhelh khak baihlam mahmah ahi hi. Nungjui muanhuai ten zong mite gen leh sakte, a huat aa huat thoh maimah lou in, ehei, hiai ah lampi dik leh hoihzaw a om vaw oi, ki-enthak ni, kisa thak ni, bawl hoih thak ni, hiai bang, huai bang policy pankhia ni, chia kikup leh maban sawn dingdan kalbi I suan` zawk ding uh ahi. Hon chou maw! bang kisa e! I chih chih mawk leh, I zogam maban ding bing deuh deuh ding, mial deuh deuh ding, khu deuhdeuh ding, uih deuhdeuh ding, se deuhdeuh ding, keu deuhdeuh ding ahi hi.
Delhi ah VIP tam lawtel mahmah unchin, VIP culture ek nin a ning atam a tam maimah uhi, AAP ten huai sou dom ua, nasemhoih mahmah CM paihkhia top hulhual uhi. Delhi ah mitsi kawmin suang lawn le chin, kuahiam khat a dengkha ngeingei dia, ahilou tawpin leng ui bek akha ding hi, huai ui zong a neitu VIP khat hizawmah lai ahi, chi uhi. Police te nasepna haksa mahmah ahi hi. Maruti 800 neihtunglai in ka innkuan un Pa Dongzathang te veh ung, 1999 ahi, ka tanu neulai hiven, air conditioner lah omlou, khua lum chihtakpi a lum maimah, PM paidek chi ua, lampi dakkar khat phial kikhaak zenhouh hi. Naungek pen kipek mai, kap ekek mai, chihngaihna omlou, kipom lumdek man akei maw, traffic jam in sunzom zawmah, baa huai PM le a inn a om khin-khian mailou adiam, laulua ahihleh pawt khia-khia kei leh, chia I ommun a kiphun phun maisam dan ahi.
India a thitung I gen chiang in tulai in Robot PM I gen sauhsauh ua, Manipur thu I gen chiang un Zero Ibobi ichi zel ua. Huchimah bangin, politician kumhlun i neihten a mi leh sate uh, a phungvuhna tangte, gelgotna mute, a khut nung leh sulnung uh, a nasepsate uh, a department puaksa te uh, a telkhakna te uh, i society sung leh gamsung kivaipuakna, saptuam heutu hihna, district incharge hihna, pa Thang om kei leh Paite te bang suak di etc. etc... kigensenglou ding hi. Ahi, topic khat kuahiam khat in hon genpan dekdek leh, telkha gun, banghiam khat houlim sin le, telkha zel, hileh le maw, thuneihna in minsiatna leh gensiatna le kengtel ahi, chih theih luat kiphamoh lua hi. Amah pentak eite a dia poimoh lawtel mahmah ahihdan leh a tellou a bangmah houlimna le om theilou ahihdan kilang semsem hi. Himahleh, kiphat phat ding keleu a khovel a piangkhia kihivek khollou hidan ahi, thukiselgu, thudik leh tang a thei kiukiau ten a hon genkhiak ding mah uh ahi, mahni kiphat leh sakhi ngal ah bangmah a bel.. chih khong tapsaktung a meilum awi kawm a gen kunkunte ihih si ua. Phatna, pahtawina leh lalnate toh ngaihdan kikelki taktak I maituah hun om ding mah ahi hi, a hoih hi ichih chih sung a mi`n va-uk a hon len`mangsan akei ua hia. Huaiziak in, huchidan thute a om hun chiang in leng, kei, kou, hon gensiatna ahi chi pahpah tel kei le, huchihtel zaw diklou lawtel mahmah hiveh aw. Kiveipai kha ahi, ak khomial nuai a pai doidoi mah bat in a om sek.
Policy mumaltak paipih nei in, mipite kaithruai le, gen le sak, houlim vangtang te apat sinlai la le, land reforms (gam neitu chiamtehna teng computerized vek ding), land ceiling laws (mimal in gam neihtheih zah bikhiahna), customary Laws (codified ding), ADC reforms (Sixth Sedul), administrative reforms (officials te responsibility suhsakna te beisak ding), Chieftainship (mipite` gamneitu hihsak ding), Widening of Tedim Road, Construction of Guite Road, Khuga dam puahphatna, Tourism, grant leh panpihna hawmkhiak dan, old age pension scheme paidan, education lam puahphatna, damtheihna lam a panlakna etc etc. khong ngaipoimoh penpen thei le.Hiaite kha kigensiatna hizenhouh louhiaL ahi. La a sa thei ten hon sa ding ua, thu a gen thei ten hon gen ding ua, laphuak siam ten hon phuah ding ua, a gelh thei ten hon gelh zel ding ua, a sem thei ten hon sem zel ding ua, ahi, thuk khat kia om leuluau ding, miidang teng phiatmang ding, pausaklou ding, kamhup ding, chih om theisamlou hi, belpi I suan` theihna ding in thuk (suang) thum bek a poimoh hi. Suangpi zong suannou neuneu in a doukip ahisam ve.
Saipi a lian mahmah chih i thei, a kitom chiang in a neuzawte, sing leh gua, leh loupa ten a thuak zelzul ua, tua mah bangin, I etna ah etletna (microscope)aa en kawm in, thu leh la him him a thutuun leh genkhiakte pivangtak in en thei le. Mitsik a hem et maimah ahih chiang in, thupoimoh tak le thuleelou suahsak theih ahi. Khenkhat te, min sialzen a kikawk ek, thagum suah ngam hi-awmtak a khauhpai mahmah ki-om mawk a, hoih louhial hi. Eh, hiai pa`n, Oh, huan pa`n, kei hon kawk ei ve, kou hon enghou ei ve, dou theih teng a dou ding ahi, chia kitom on-on lou in, pan`khawm hatna ahi chih theisiam kawm in kalsuandan kisin zaw le, bang achi dia? Politician te nungjuite, khatehneng tangkhate, angsung angtang khate, kisuankhe ngeiloute, naa piak a omte etc. I hihna ah adik mah genkhia in, kaam I lei leh ka lei ahi, chimai leng, I hahpanna agahlou a lohching ihi lel vaw oi. Government fund zatna ah a angtangtuam deuh om mah hi, deihsakna tangte, hiai bawlkhiak ahi chihlam sangin hiai scheme, huai project, hiai agency tungtawn a bawlkhiak ahi chizaw leng maw. Nupi kamching khenkhat ten, hiai election le om veu kei leh ka chi mai, unau laina, innsak innkhang hon kimelmasak, saptuam sung nasan hon lok, chi uh ai`hbang. Politics saidan, election tuhdan kisiam lah deuh adia aw, personal tak a kila mawk, sungkuan khong kikhen mawk, I deihte belh ding mah ahi, mahleh election a bei toh kiton a beisak dan I siam ding ahi. Hiai ten hon vote lou vial chia I paipai mawk leh I nam sung ah kideidanna lian semsem ding ahi. Sahang khat a om louh chia sahang dang piang maidan ahi, kuahiam omlou hileh ichih chih pen, omlou hitakpi leh a felzaw, nam huaikhawm siamzaw a piang maimah diam? Etdan chituam tuam om thei ahihdan theitek leng.
Fan club a poimoh keihial, naa sem hoih peuh le, mipite`n makaite zathuap ding ua, zong mathuap ding a mansa ngen ngen ahi zawmah uhi. Pan la thak leng, Kumthak ahihna toh, lemna kumpi maisuan kawm in, pheuphung suankhawm leng maw. I nam, I gam itna ziak bek hi.
Kipak lua ing.
Gelhtu: VALTE VUNGZAMUAN, IRS dated: Shillong, 21.1.2014