SHINE SINGNGAT ICHIH CHIH BANG HI PEUHMAH HIAM~ Vungzamuan Valte
Sign Board khat ah “kisiik in vangam a naita, a naita, a nai mahmah ta”, chih kigelh hiven, a geizek ah “Sian`thouna khantouhna chikhat ahi” chih kigelh leuleu. Koi zawpen I hinkhua a dingin a practical zaw a? Sapten “cleanliness is next to godliness”, chihialthok ua ngaipoimoh peetmah uhi. I gam, I khosung, I vengsung, I kiim leh kiang, leh I innsung te`n sian`thoumel a pu hia? I kicheina a hoih leh siat chu thutuam, I sapum tuammawitu dingpen in a kilawmsak hia, hih melse zawsop hia? Chihte ngaihtuah neuh neuh hun ahi hi. Coat suit leh tie toh kholak vak zatzat, lah lupna niin nemnum, nam veng vung khong a khosa ihi maimah diam? Mite muh a fel leh singthou hi-awmtak, lah a inn ua ekbuk mumaltak le bawl peihlou, kibualna ding le bawl samlou chih khong ihi maimah duam? Pathianni chiang a vahui tuk hial a kicheinalh, puansilh kilawmtak leh high heel khong toh paipuak gapgap, lah innsung a um leh bel, annkuang etc. kem siangthou mahmah louhial, ui leh ak toh kibang a khosa ihi zenhouh diam?

Gamdangte khosakdan, USA te jet fighter neihzah khong gen a hotel singpi dawn kawm a pau laanlaan thei, cold war a beikhit nungdaih a USSR leh USA te kingiik ngiik uh ahi, Super power USA kia ahihlai a leitung a Super Power tegel kidoudek uh, galvan sekkhawm uh, Armageddon a hong suak mai diam maw? Chih khong gen a thulaklouh, chilphuan kaizen a thapai peih, lah mahni insung, mahni in kiim leh kiang buah nianua, nemse vungvung, insung khong a meikhu zaam nguai nguai,taktung a khindang khong a inkhing kai tuttut toh khosa ihih khak ding lauhuaipi ahi.

Mahni tate etkol leh makaih sang a kholak ngai zaw, mahni tate khong Pathianni chiang a kibualsak peihlou lai, tate kepna leh insung kepna banah sian`thouna sang a biakin kai ngaipoimoh zaw, committee a kuan ngaipoimoh zaw, Imphal/Lamka hoh ngaipoimoh zaw, tate gamkuanpih, leh naseppih (lamkaih) sang a khawlak a vakthapsak maimah I tam lai viau kei maw? I taksa in sin`thouna a poimoh mahmah, I kizepna le a sianthou ding ahi, I innsung leh I kiim leh kiang I suk siangthou ding ahi, damtheihna ahiziak in. I nek leh tak a siangthou ding ahi, I um leh bel a siang ding mah ahi, I sisan petu ahihziak in. I tuinek ding koihna a siangthou ding ahi, I tuinek zong a siangthou ding ahi, I hinna petu ahihziak in. Na innsung, na lupna, na tutna te kem siangthou in, na leitung hinkhua na zattamna pen ahihziak in. Tui sianglou leh nek leh tak sianglou, um leh bel, keu leh kuang sianglou te`n natna hik chituam tuam pai ua, damlouhna tamtak piangsak uhi. Tuinak sianglou I nek ziakin santen, sungkhoh , gulhut, khosik etc. kaipuang a kilohsawn theih hizawmah hi, kipumbuai thei zouzen hi, natna hileng chizawzen hanga, lah ei sian`thoulouh ziak hireng si.

I nek te a pawtkhiak ngai a, sa leh sisan a kizanglou teng ek ichi uhi, I nek leh chu ek om teitei, I dam sung ek nei di, thakhe di, a uih a uih zawmah. Hiai ek te`n natna chituamtuam paai zawmah hi, kep hoih leh koih hoih chii ahi. I tuinak ah ek kitha zouzen hi, lamdang… huaizong septic hilou zawmah, kaikhe hnerhnur, vengsung teng uih vutvut, naak humzen a pelh ngail;ai zawmah, contaminated water kidawn dawn hiven, ektui chisuk mai ni, houh zoutui siang chizensam hang, a test na ah ensak mah le zaw, bang bang hiam laang luai luai di lah aw. Tui toutawite ihih ziak un, a khosuakte hampha ihihdan gengen ni.

Mite`n, I innsung, I huangsung, I vengsung, I khosung nuamsa u`hen, ngai u`hen ichih leh tuh, kep siangthou masak dingdan ahi hi Shillong khopi asiangthou mahmah, a mi leh sa te`n amau in chiat kemsiangthou ua, rong nuh thithe ua, zutzut ua, ek muh di omlou hial hi, a innkong khong uh phiat phiat maidan uh ahi hi. Gam it, khua it, innsung it, zite/pasalte it, tate it, tute it, I kichih ngalsam leh I mun leh mual kemsiangthou in, ei mahmah zong kikem siangthou le, a haihuai hetlou leh haksa hetlou, thupoimoh mahmah khat ahi. Europe gamte ah singthouna a ngaisang mahmah ua, Netherlands gam uktu a Queen u`n kum nih lel paita in Amsterdam khopi a canalte, singthou ngei ahi chih etsakna dingin tui a mipite muhtheih dingin kileuh/kizap ziahziah maidan ahi. Khovel pumpi a mikhual zintamna pente lak a khat Paris khopi ah niin kipaithang na mukei hial ding. London khopi leitung a asiangthou pen pawl a chiamteh ahi, Negrote ava pai ua va hahsiang hizenhouh lou u`hi, amau mahmah in kem siangthou ua, amau zong siangthou ua, changkang ua, damthei ua, pilk zong pil uh aka! Thupil in “Necessity is the mother of invention” anachi hi, sianthouna poimoh takzet ahia, necessity ahi, invention leh innovation bawl ni in, kibawlpha ni, kihahsiang ni. Shine Singngat ichih hiai khong ahi, rong bek nuh ni, kipanta va ui. I lampi sau mahmah nalai hi, kihahsiang siausiau ni, sian`thouna Pathian batna ahi.