WILD FLOWER by Vungzamuan Valte.

Wild Flowers (Dolly Parton)
The hills were alive with wildflowers
and I was as wild, even wilder than they
For at least I could run, they just died in the sun
And I refused to just wither in place

Just a wild mountain rose, needing freedom to grow
So I ran fearing not where I'd go
When a flower grows wild, it can always survive
Wildflowers don't care where they grow

And the flowers I knew in the fields where I grew
were content to be lost in the crowd they were common and close,
I had no room for growth
I wanted so much to branch out

I uprooted myself from home ground and left
Took my dreams and I took to the road
When a flower grows wild, it can always survive
Wildflowers don't care where they grow

I grew up fast and wild and I never felt right
in a garden so different from me
I just never belonged, I just longed to be gone
so the garden, one day, set me free

Hitched a ride with the wind and since he was my friend
I just let him decide where we'd go
When a flower grows wild, it can always survive
Wildflowers don't care where they grow

Hiai la hoih sakna kumsawt ahita, lungsim khoih leh gentampi nei la-giltak khat ahi hi. Ei singtangmite lungsim leh ngaihtuahna ah gen thupitak nei hi`n theihtheih in om hi. Kum 100 valzek paita  sutkik leng, gam awng omna peuh zuan in, sa leh gal lauhna ziak in zohngeu nounei mahbangin I pipute alang lang ah tai koikoi ua, mual leh guam a tunkhakna peuhpeuh uah gamsa lak leh gammang lakpi ah khosa uhi. 1886 AD lakvel in British ten Burma a uk utoh kiton in awl awl in I Zougam mialpi hon nawkdarh ua, inten louten neihdan leh khosakdan mumalzaw hon chituh uhi. Chihbel, Chittagong lam apat, Cachar lam apat, Manipur lam apat leh Kabaw leh Kalay gam apat beihpi suahkawm in nawktuah leh luhsuah in ki-om hi. Tua hunlai in gammang lak, mualdawn tung, luiguam thuktak, kawl kensepi leh gamsate tenna lak a khosa ahihna uah kithuzat haksa a, tua ziakin unau zong melmak kisuah uhi. Sa leh gal in kineih tazen uhi. Kum 300 khong paita in pau chituam tuam apiankhiak toh kiton in kihoutheilhna bei a, namdang, midang leh melma kisuah maizen uhi. A tamzaw leh thahatzawte vualtungtuanna hun hi a, sal a amatte nangawn uh ami leh sa ding un suaksak pahpah uhi. Huchidan hinkhua ahihziakin, khua khat leh khat kikawmtuah nangawn hamsatakpi a, khualzin khiak leh gamvak zong a kihtakhuai mai banah, thil hithei taktak lou suak a, gam leh leitang mahmah banah mihing mahmah zong kituhden hilaidep uhi. Himahleh, hai-chi huih in a lenpih dandeuh a mun gamla, mite gam, meltheilouhte khua leh tuipigaal gamdang a chi-khah neih leh khosakna  dinkhiak dingdan om mawngmawng lou suak hi.

Britishte ukna nuai ah khanlohna namenlou piangkhia a, leitung buppi kidoupi khatna ah ei Zosuante zong sangtampi mahmah Tuitaw gal kap in kuankhia ua, mittui naptui toh akhua leh tui uh banah a ittakte uh nawsia in tuipigaal lam manoh in zinkhia uhi. Britishte khosakdan, kizepdan leh gamdang a mihingte hinkhua zatdante hon theikhia ua, boot, sipaih khekortom, pheituam, puanaktual, samsih leh adang dang hon pawsuah ua, tuate achangkang masate hi uhi. Huchi in hun hong paizel ah British sorkar a nasem, sipaih nasem leh sep theih theih sem dingin I mi leh sa te diangkhia uhi. Wild flowers masate hi ua, achi uh mundang leh gamdang ah hon khahkhia ua, suan leh pak kithehdarh panpan hi. Tuate banah, Missionary te ziakin nasatakin khanlohna piangsak a, I leitung khosakdan leh nektak zondan ah kikhekna lamdangtak piangsak a, laisin pen a poimohna chituh kituhkip mahmah a, I mimasate hinkhua ah kilang mahmah lel hi.

Himahleh, khovel kivaipuakna danin hon khen a, sim leh hmar, suah leh tum a tengte Gam tuam (India leh Burma) leh state tuamtuam ah kikhenzak zenhouh hang. Nampi hiding lai zenpi mite nekchimit theihhial dingin mun tuamtuam ah kithehdarh in kikhosa likliak leltak hi. A neusak sawnsawn dingin politics ah khanloh khelhna leh unau melhaihna piangdok zenhouh a, Sungkuan khat, beh khat (clan) leltak khong Nation khat kisa in kihuituam se hang. Pau a tuam zek ziakin Tribe tuam kisa leltakte hihang, nambing politics ziakin tunitan in melma leh gal kisuah lailai tazen hang. Tuate kar ah mihing hong pungtouzel in, ei Zosuante lak ah gamdang a laisin ding, sipaih pang ding leh nekzonna te ziakin  mihing tamlouchik gamdang leh khua tuam tuam ah kikhenzak thei in ki-om hi. Mimasate hinkhua I etkik chiangin I makaite phattak mahmah uhi, aziakbel pau leh ham theihlouhna gam a zinkhiak leh khosak chihpen mullithuai peuhmah hi, banah u leh nau omlouhna a khosakpen thil namai hilou hial hi, pasal` zoh taktak ngailawtel dan ahi hi.

Burma lam a khosa unaute a gam kivaipuakna uh ahoihlouh ziakin khosakna, nek leh tak zonna haksa tuanse a, haksatna mah in kuhkalna guan a, neih leh lam zonna ziakin sumdawng takpi uhi. India gam paikan in mengmuhphaklouh gamdangte ah Zogam pallun sak zouhialta uhi. Lushai Hills a unau tamtak zong  haksatna ziak mahin Manipur leh asehvel ah taikhia ua, haksatna ziak mah in khosakna kipzaw Lamka leh asehvel ah dinkhia uhi. Tuate lak ah, a khua leh tui nawse ngam, nektak zonna a kalsangsuan kitatsatlou hialin omtou tou a, Imphal khuapi meiteite tenna, I pipute`n nek leh tak genlouh, zan khat giah ding genlouh, tuisik zong a ngahzohlouhna mun uah 1960`s apat khotualtakin khosa theita uhi. India khuapi Delhi nangawn ah 1960`s leh 1970`s in Phamta Pu Jelshyam leh Pu Haukhum Hauzelte` khosa masa ua, 1980`s apat phamsa Pu N. Gouzagin, MP ahih nungsang himhim kitatsatlou hialin kibehlap zung zung mai hi, tuiluang kangtheilou mah banghialthok hi, veng khenkhat ngialhouh ah kineisaktu dinmun leh Zogam Puram dinkhethei hial dinmun kisuakta hi. Ahi, I ngaihtuah thak chiangin, 1960`s apat Shillong khuapi a laisin, sipaih nasem leh nekzong kitatsatlou hial in ki-om toutou a, tunichiang in mi a sang a sim ki-omta hi. India khuapi mun tuamtuam ah kithehdarh tou zelzel in nasatakin khankhiakna piang maimah hi. Nam a simtaklouhte, mi lak a theihphaklouhte, tunichiang dinmun in mite` huphurh theih ding hial a tam kisuak mawk hi, lamdang.

Nam khangtouzaw leh nam lianzaw te I et chiangin kum sang khat sanga tamzaw civilization pai toutou ngenta hi ua, ei bel I civilization pen primitive mahmah, gamsa leh mihingte kikar a sa chikhat (Wild and savage tribes, between human beings and beast, more akin to …) chia 1777 AD  vel a Britishte cheptehte kihiteltawk hi. I khantouhdan I nungsui chiangin, I khangthu sui ding tamlouhial himahleh WILD FLOWERS ichih, apak-chi huih in a mut leng zelzel a, gamdang leh mun awng teng a akitheihzak theih mah bangin, ei zong munhoih leh leihoih gam hisese kei lehzong, chi kituh in, chi kikhah in kikhangtou mahmah lel hi. Mizoram ah mite nekchep leh nelhsiah, Burma gam ah khangkhe zoulou leh haksatna gensenglouhte ziak, leh Manipur ah nekzonna a haksatluat ziak khong, eite a dia vualzawlna naak anahi maimah adiam, chih khong lungsim suangtuahna ah lang neuh neuh sek hi. Aziakbel, tuni chiang in UK, USA, European continent, Australia, Malaysia, Philippines, Singapore, Japan, Indonesia, Thailand etc. ah khawtual mahmah thei ding khop, Khodou Pawi zangthei dingkhop munteng ah mihing ki-om tamawk hi`n maw. Zosuante` leitung buppi luahsuak thei hial ding hihang ei, tuban kum 100 hong pai lai leh I dinmun ding uh nasalawtel dan ahi hi.

I leitang luahna sung ah Zogam pianglou zong, Cannan gamnuam leh hoih ei a ding in sehsa leh bawlkholhsa om mahmah ahi.Makai mi hangsante, a teite, mailam hun musaute leh mahni khua leh tui taisan ngapte ziakin tuabang dinmun hong piang hizaw hi. Pak etlawmtak gamlak ah pak hi, amah kia in pak lihliah lel hi, tua pak in a chi hon khah a mundang leh gamdang ah pak-chi hoih huih, vasa, tui leh gamsate tungtawn in vatuh a, pak kilawm mite kipahna, mite muhnop leh mite lungdamna tuntu ahi naknak. Ei Zosuante zong pak kilawm gamdang leh namdangte laka hon paksuahsaktu I makai masate hi ua, chi hoih anatuhte leh khang sawn sawn ding khualna nei a mahni innlum, khua leh tui, lawm leh vual, mual leh guam, zouhuih siang leh zousiktui siang, u leh nau, nu leh pa, ni leh gang te tengteng taisan ngap, salpha nu, salpha pa te panlakna thupi isa a phattak leh lallukhu khuksak tak ahi uhi. Mi tamtakte a khua leh tui uh nawsia ngaplou a tul maimah tampitak om ding ua, pak khia lehluah thei ding hinazenpi pak suah lou leh gahsuah lou om thamtham ding uhi. Khenkhatte leuleu, a sungkuan ten a phalkhollouh uh, khouhtheih khouhmoh a zong a khouhzohlouh uh, sapna awnem zak ziaka haksatna chiteng palsuah zou tamkuamtak zong omtham uhi. Tuachibangte tate hong pal-suah ua, a pak kilawm uh mite muh ding leh mite theihphak in pakkhia ua, kilawm tazen hi. Tuabang kar ah, khangthak akibehlap tou tou ding kitatsatlou a I om touh theih zel na ding un gamdang a khosakdan I siam zong kisam mahmah leuleu hi. Khanthak ten I leitung pianna nu leh pa, eite a dia a hahkatna uh, a thuakgimna uh, sum leh pai, neih leh lam a senna uh, lungsim leh chihtaktak a hon kepnate uh I vuaksuaksak louh hamham, I khasiatsak louh uh I mohpuakna lianpenpen uh hileuleu hi. Siamtu Tung Pathian in A Hon Vualzawlnate, A Hon Makaihnate mangngilhlou a A Mah Min Thupi I Pahtawi a Thupina I paik den a kul Leh poimoh lianpen pen ahi chih mangngilh kei ni.