GAMDANG AH ~By Vungzamuan Valte
THUMAPI: India hmarsak ah kitengsam hiven foreign zin chu haksa louhial hi, Bangladesh ah, Burma ah, Nepal ah, Bhutan ah, China border ah, ut hun hun a hohtheih ziang hiphial hi. Neulai in Mizoram toh Manipur kawmtuahna lam ah Burma gam kitawn hiven Burma Palikte kituakkha veu hi, foreigner kihilel ahihchia lauhuai mohlou. Sum, sana leh thil manpha himhim kikeng ngamlou hial hi. Moreh lam ah Tamu lutlechin foreign zin na hi mai, nai mahmah maw, kiginkhawl luat ngailou hial, khua alumlua a hiven. Khatvei lawmpa`n Tamu bazaar ah Nepali nungak melh nilouh venchin, hon khawmialpih dektak, 1986 ahi.Champhai apat Rihkhawdar ah hohlechin foreign zinkhinhizel mai, haksa kei lua.Himahleh, tuipigal (UK/Europe) a khualzin pen, lenna a dakkar sawm phial len ngai ichih chiangin kilometers 8000 phial phazou hi, lohchingtak a zinthei dingin kisakkholhna neu nou nou poimoh omtham dan aka hia.

Gamdang a khualzin` dingin kisakkholhna nasatak, lungsim leh taksa mahmah, banah sum leh pai kiningching neih masak kisam hi, official a zinte bel a zia om mahmah. Lungsim a phurna leh lametna sautak omloupi a khualzin pen a thawn maimai suahsak theih hi.Khualzin zihzeh haksa ahihna ah, I zinna ding gam, hohna ding khua leh I phaak utna munte theihchet masak poimoh mahmah hi. Laibu tungtawn, internet tungtawn leh travel agency te tungtawn khong in gamsung kivaipuak dan, security lam toh kisai, pai ding dan, tunna ding, mun poimoh te, a mi leh sa te khosak dan, a history uh, khua lum leh vot dan, nek leh taak, sum leh pai zekdan, damtheihna lam etc. theih masak kul hi. Khualzin mite a dingin paper work tamtak saifel ding om a, tuate lak ah passport poimoh masapen hi, tua khit in visa. Hiai laibu neu ah akimsipsip in min, behmin (surname), pa/nu min, temporary address, permanent address, contact nos. (Domestic and abroad) te chiangtak leh kimtak a gelh kiphamoh hi. India gamsung apat na pawtkhiak chiangin gamdangmi (foreigner) suak chin a, na passport loungal kingakna ding leh pansan ding neilou hial na hi, kembit thinthen in (passport mansak pen mi mangthang suahna kalbi lianpen pen ahi).

THEIHTUAK: Na kingakna ding hotel advance booking bawl in la confirm masa in, kikhemna leitung ahihziak in. Damdawi poimoh chiteng aoriginal prescription kichiantak toh keng teitei in, gamdang ah damdawi kilei thei pahpah louhial hi. America ah US Dollar kizang mahleh, Europe ah kizang louvial hi, tua ziakin kumpinu gam (U K) ah Pound Sterling, Europe gam dangte ah Euro leh Switzerland ah Swiss Franc. India sum ken` thaman omlou hi,  keng sese ke`n. Authorised money exchanger tampitak omsam mahleh, a money value (exchange bawl man or commission) kibanglou hial hi, tua ziakin Thomas cook te khong bank sangin hoih zawtham hi. Zinkhiak masangin sum apoimoh ding zah kitheichian lou hi, ahia sumtang in US dollar 5000 value tan na keng thei chih thei in. A hoihpen zaw, advance booking bawltheih peuhmah advance a bawl masak hoih hi, gamdang ah sum senna ding tam peuhmah a, tui nangawn (bottled water) dollar/Euro/Pound 3 khong hitel inchin, mun khenkhat ah zun thak man zong om nalai settawk hi. Machine janga payment bawl ngenta hizawmah a, dawr hileh, bus/metro/train ticket lakna ah ATM machine dandeuh ah khiaklut ngenta ahi, cash payment latu ding mihing koih khollou uhi.

KHOLAK VAKNA: Mi tei leh maingal na hihleh, cycle khelh theihding munteng ah om hi, tai vialvial theihna remchang tak ahi, sum na save mahmah ding. Khenkhat te`n gari hire in amau kihek ua, tua zong chiinchi mahmah lel. Nek theih, leh nek theihlouh nei mi na hihleh, kisakhawl masa in, na duhzawng muh haksa mahmah maithei, chinese, Thai ann nethei te bel munteng phial ah buailou hial uhi. A buaihuai mahmah bel, gam khenkhat ah sappau zang ut bilbel lou ua, buai taktak theih ahi, pau tuamtuam theite bel mipil hizel mai. Leilokdan, pronunciation, a suahkhiakdan kibang hetlou hial a, nihvei thumvei I gen nung a zong man (theisiam)  pahpah lou, kihou theilou, kimantuah lou chih omthei a, kipaasak tak a heh mawk ding hilou hial hi, numeite ngial houh hehkhum hiam awki-sangtak a houpih ding hilaizang louhial hi, palikte sam ziang ding uhi, thong (suangkulh)sung tuntheihna naipen pen ahi.

HIAITE THEI IN: Meltheihte number leh address pua in, Indian Mission or High Commission or Trade Centre te address leh phone number nei teitei in, panpihtu naipen pen ahi, suahtakna bulpi zong hi hi. Mi lak ah nakpipi in kikou kuaukuau, haang loiloi thahah keihial in, phone zong gingsak kuaukuau ke`n, phone nazat chiangin kidam deuh in, zong aziak omlou in mawk nuihkhiak lualua chiing ke`n, mihai hon sa-kha ding ua, hon en kheukhou kha ding uh. Lampi napailai in mawk khawl ke`n, et ut, muhnop na neih leh lamgei ah ki-hemkhia masa in, cycle lane ah mawk din eeuu uau thahah ke`n, na thuakthawn kha ding. Gamdang a khualzin te`n limlak ding kihau hi, limlak theihna leh theihlouhna mun omsak ua pilvan kul mahmah, gamdang policete photo(limlak) ngenmasa lou in mek mawk ken na camera na mansuah kha ding. Poimohna ziakin mi nahoupihchiangin, Hey, Hallo, Aaree, Bhai, Mr., Mrs., Bahadur chih khong zat ding ahi himhim kei, kamnem leh maitaitak a “excuse me” chihmasak ding ahi, “Thank You” toh beisak  teitei in, polite law tuau tuau chihdan hizenhouh lou hi, kiniamkhiakna ahisam kei, chindan ngeina ahi, tuachilou in zaw kuamah na houpih bun keihial ding. Mi na theih ngeilouh te mawk chiamnuih ke`n, kuahiam khat nasem na tuah khak leh kihemkhia in, a nasepna uh zahtakna piak pen paidan ngeina ahi.

HUN POIMOH DIAK: Mihing mawk vialvak omsam mahleh, hun nei mahmah lou ngenta hihtuak maimah ua, na buaina neu neuh neuh hon ngaihsak manlou ding uhi, mahni kitoudelh theih pen felna ahi, na pawtna, na vakna, na gamtatna munte ah felloutak in van tampipi keng ke`n, travel light chih motto in nei chinten in. Lenna sung, bus sung, train sung, longpi sung etc. ah kizenlou tak leh mite a dia nawngkaihuai tak in van tampipi kai hnur hnur zenhouh ke`n, no one will lift a finger for you, self-help is the best policy. Sum leh pai kembit tinten in, mawk zatthang peuhmah ke`n, loan lak zualna ding omlou hi, koltaan theih ahi, pilvan kisam. Sum neih teng pocket khat ah koih peuhmah ke`n, mansak khaak theih ahi, guta lata omna mun tam mahmah sam hi, suamhat omna mun zong tam hi, zaan sawt nung in pilvang semsem in, nangmahkia (single) in khuapi sung ah vialvak thahah ke`n, target hoih mahmah na suak lel ding. Van lei ding chiangin a price tag enkimvel masa in, van leilouh ding lakkhiaksak chihthahah pen buaitheihna ahi, pilvang in.

GAMTAT DAN: Vaigam a gamtatdan pen chinchilou hial hi, no smoking zone ah laizial tep ke`n, dustbin ah niin paih inla mawk paihthang zelzul ke`n, queue ah mi adin leh phusia sese ke`n, dohtheitak in nahun ding ngakin. Lenna sung ah nektheih, dawntheih hon peding ua, na duhpen genziau inla, kidamtak in dawn in, buaisiat ziaka zahlak theihna mun ahi. Wine cap honsa in ngen zaw mai in, a hong theilou pa hih sese sangin. Immigration lam saitute mawk nawk hial ke`n, kamdam tak leh maitaitak in a thu uh mang lel zaw in, hon dotnate uh kichiantak in dawng lel in, a thuneihna mun uh ahi chih thei in. Mi gam ah VIP treatment chih lamet selouh ahoih hi, na van kikep inla, nang leh ngang kizentak in kivaisai zaw in, a poimohlou a sum senna pumpelh ahoih, chihbel mi na zat himhim leh sum higeih geih dan ahi. Tourist dan a khualzinte a dingin group a kuankhawm, tunkhawm leh khawsakkhawm ahoih, kihuhtuah theih poimoh mahmah hi. Damlouh hitan omthei a, sum mansak leh buaitheihna lam tuamtuam ah theihkhawllouh haksatna tuahkhak theih laizang hi, a peuhmah thu in group a omkhawm` pen chidampen a, sum zong heklou deuh mah hi. Casino khong lunggulh sese ke`n,LIDO show na et ut leh lawm muanhuai nei in, Porn show leh red light area ah hohlouh chidampen hi, minute a sim a sum senna ahi chi uh. Na room ah TV channel omte kha pilvang tak in, bang bang hiam om utviau ahi, SMS khak sese ke`n, senna ngen senna ngen ahi chizel ua. Mite sumdawnna leh sumzekdan thupi in nasalua hi.

NEK LEH TAK: Restaurant ah dawntheih tampeetmah a open takin dawn uhi (mantam se), himahleh adeihte a dingin beer/wine bottle khat Euro 3 a leitheihna departmental stores munteng ah om hi. Scotch a kiman lawtel chihthu ziakin zing leh zaan in dawn sese ke`n, khenkhatte a huntawk theilou om mahtham ua, enjoy dia zin ivele chithahah uhi, khemkhem saksim in a om.Na hotel sung ah puan nawtna, safe, fridge, tea/coffee maker a om ngei ding, tuate na zat dinga kikoih ahi, himahleh fridge sung a thil kikhoih teng baan laksuah ke`n, sensor om inchin na bill ah kibehlap ziang ding hi, pilvang in. Puansawp ding na neihleh kisawp zaw in, puansawp man khat ah Euro 10 nuai omlou hi, phuilouh sum haute tellou. Tui mantam lawtel mahmah chi`n buai ke`n, tape tui siangthou lawtel mahmah ahi, bottle nei inla huai ah kipuak zel mai in (wine sangin tui a mantam zaw ngal a). Hotel room service pen omlou toh kibang phial hi, freedom sangin privacy ngaisang zaw ua, mi vabuaisak leh mi room a lut mawk mawk kilawm moh deuh hiau. Bazar ah dinner leh lunch ne zaw in, hotel ah burger khat lel Euro 13 khong Pound Sterling 10 khong a na lei sangin.India a hotelte danin lah nek leh tak a mantawm kei hial ngal a, eiloi..singtangpa…nekdan khong in deihthusam in netaktak le dinner khat man kipesenglou thei dinmun chihkhong omthei ding hi`n maw. Karese, India mah nuam.

Public transport leh kithuzakna: Vialvak na dingin Taxi charge sanglua hi, miteng in afford zoulou, bus, metro, tram, train ah daily pass la in tuang ziau in, nuamlou thahah keihial. Motor cycle, cycle leh adang dang zong dakkar sim a khelhtheih om hi, kuaman gumang seselou. Phone, camera  leh adang dang charge theihna universal charger kineih in, tualou in zaw napekbuai petmah kha ding, gam tuam tuam ah charger pluck point tuam mawk a, lei zual ding omlou hial hi. Connectivity poimoh petmah ahihna ah mobile network pen local service providers mah hoihpen hi, gam neuchik chik na totkual lel leh zong border na cross peuhmah chiangin call charge pen STD suak a, sum bei zungzung hi, na passport zangin local sim la ziau in. Gam khat apat gamdang na lut chiangin a sum zat uh kibanglou thei a, border ah khekziau ding dan ahi, sumnen (coins) pen zangkhin zaw mai in, na kuahkhak vanglak leh a tawntung a puak ngai ding hi, money exchange ah coin kheklou uhi (van giksak leltak, coins gik ahihchia).

Tua atung a kigente mi tampite ading in houthou, haihuai thou chih ahi ngei ding, adiakin sum neih ziaka enjoyment zongte a dingin. Hitamahleh, nunglam sabah chi le, khualzin tei zenzente a ding ka khualna ahi zaw. Himah e, India sum toh na sum zatdan tehkhin gige ke`n, na amhai thawn lel ding, himahleh kidamtheih poimoh mahmah zel. Chilkon pan pen poi lawmlawm lou hi, sep ding teng sem, muh ding teng mu, enjoy lou tuan hetlou chih omthei takpi hi. Sum zekdan leh gamdang a khosakdan kon taklat pen sum nei, mihausa leh khualzin gigete a dingin zaw poimohhet ke`nteh, mataw..(sutzop ding). A peuhmahthu aa bangdia huailam gamten toilet (ekbuk) a baltin leh keupi koihlou asettawk ua oi, tuikapna lah omlou, back to innocence, vaimimbul koih le uh hoih di aka. Huai toilet paper kia koihmawk a taw uah banggim a nam temtuam mah diam maw, teptettut kawm a siangthou aduam maw, eiloi tawpol neite …khong bang suak di?? Chih khong leh a dang dang……

Kumpinu toh: Het!

Heathrow Airport London

London Bridge

Natural flowers in the streets of London

Tourists on sightseeing (cruise on the Thames)