A GAM: Himachal Pradesh a district khat Sirmour kichi Doon Valley leh Outer Himalayas kawmtuah (Uttarakhand gamgi) ah om hi. A district letdan 2825 Sq. Kms hi a, district headquarter dingin Nahan khua nei uhi. Nahan khua pen mualtung (1000 meters) ah om a, mihing 30000 khong lel khosa uhi. Raja Karam Prakash in 1621 AD in (kingdom) lalgam bawlkhia a Laltutphah dingin nei hi. Hiai Lalgam neitu Raja Shamsher Prakash hunin British Imperial Legislative Council Member dingin lut a, awl awl in Britishte thunuai ah koih in om hi. Huchi in India gam in zalenna a muhtoh kiton in Indian Union ah leh Himachal state sung ah district khat dingin laklut ahi hi. Sirmour District sung ah Sub Divisions 4, Paonta Sahib, Rajgarh, Renuka Ji, Sirmour om ua, Giri luidung nuamtak in tawm a, Jamuna river in zong UP toh gamgi ah tawnkha a, Tons river kichi zong vuuk in a tawm tuisiang mahmah luang hian hian hi. Dehradun apat lampi nuamtak 50 kms lel leh Chandigarh apat lampi hoih mahmah zui in hiai district luttheih tuak tuak hi. Nahan pen district headquarter himahleh Doon Valley a om Paonta Sahib pen khawpi zaw leh commercial centre hi a, industrial/business centre leh a minthang mah mah Paonta Sahib Gurudwara omna zong ahi hi. Legislative Assembly seat 5 (Pachhad, Nahan, Sri Renuka Ji, Paonta Sahib leh Shillai) om a, Pachhad leh Sri Renuka Ji te schedule Caste te a dia reserved seats ahi uhi. Sri Renuka Ji ahihleh natural lake mualsang tung ah om min hi a, hiai lake minsuang a akhua min ding a phuak uh ahi hi.
MI LEH SA: Mun lianzawtham Singtang dawn (Giri Par leh Giri war), singtang gam mahmah ngenta hi a, mualsang tak tak om ngek ngok ua, guam keen leh thuuk taktak hi vengvong ngenta, khosakna ding munhoih tamlou hial hi, tuaziak mah ahi Himachal Pradesh state sung ah backward district khat a sim ahihna. A mihing omte` tang a tuan a tengte kichi ua, Nepali melpu ua, Vai-sakhua bia ua, mihoih thei ngial uhi. A gamsung uah guktak laktak chinglou ua, kithah kimat om ngellou a, guihtheih khamtheih hihzongsang leh galvan tawi migilou muhding om mahmah lou hial uhi. Aryan Race hi ua, eilam melpu louhial ahihziak un Mongoloid mi China apat kipan tuh hipeuhmah lou ahi uh. Himahleh singtangpa na nana chu I khosakdan leh netkat zondan ah kibatna tampi om veve hi. Kel, beram, ak, vok leh bawng khoite hi ua, zing leh zaan a lungle`n kaithou ding akpa khuangging ngokngok zakding tam mahmah hi. Mualdawn mualsang tung apat nitak chia khapivak mahmah in lung asuleng ve. Hindu, Muslim, Sikh te tenna, gam thawveng, galmuang leh kithutuahna gam ah duty khak bel vualzawlna ahi peuhmah.
GAM ETKOLNA: Milip Lakh 5 lel himahle uh Tehsil 6, Block Development office 6, Municipalities 2, Nagar Panchayat 1 leh Panchayat 229 om hi. Head post office khat om a, 15 sub post offices, 126 branch post offices, 49 Commercial bank branches, 17 co-operative + Land development banks leh 126 Patwari circles nguttak om uhi. Michih in sorkar apat hamphatna, panpihna leh awlmohna muphaban ua,tuaziakin, sungkuan tengin gam neitu hihna lai neichiat uhi. Gam pen aneu leh alet thu hilou in, kineitusak mahmah ua, a pipute uapat a gam luahsa uh iit chihtakpi in iit ua, kep chihtakpi in keem uhi. Kumkhat sungin thumvei bang livei bang haichithak tuh ua piangsak zou gige uhi. Tuaziak mah ahi, khawpi lam a-lunggulh louhna santak uh, atek akhang, teeng khiukheu ua, sipaih pang, sepna neite zong pemkhia seselou hial uhi, ka khua leh tui, ka pipute khang a ka gam leitang uh, chitinten thei uhi. Sisan a belh tenton mah bangsak uhi. Siing (ginger), tomato, wheat, vaimim, bee chituam tuam, gobi, malta, sipi khong chingtangpi ua, khawpi ah thawnkhe zung zung uhi. Bawngnawi mahmah hahbawl in zuakkhe tamthei ngial uhi. Vaimim pen zuak seselou ua, inntung ah phahziazua in keusak uhi (khintung khindang omlou), grinder in hekzan (powder) suah ua neekpen in nei uhi. Sorkar in keem thazoh mahmah lel, Conservator of Forest, Chief or Superintending Engineer (PWD/PHE/Power) leh state sorkar office lian taktak om lemlum mawk! Simla ah ki-concentrate vetlou dan eive. Government school piching taktak, government colleges piching taktak, leh District Hospital mumaltak te`n a gam neitute kuhkalna, chihtakna te kilangsak sem sem hi.
Environment and Forest: Sing leh lou kepna, gamsa leh ganhing humbitna ah ettontak ching mahmah, zawng leh vasate lungmuangtak in tenkhawmpih thei ua, Nahan lampi Haryana apat I lut-touh leh gamhing dipdip in hon muak a, lampidung teng ah singkung lianpipi simsenglouh amual amual in dum kiikiai uhi, anuai liim damtheihhuai diak hileh kilawm hial hi. Khua a om sun sunte sing leh lou in tuammang phial thei dinmun ahi, Nahan khua pen mualtungdawn a om himahleh a khawpi kimkhat zong kilanglou hial in forest area mah bangzou thok. Khua votsak a, tui paisak a, huih piangsak a, menchim omsaklou hi. Nahan khuasung ah Doon Valley etsukna walking track saukuamtak om a, gari tailut sese louhial, lungmuangtak a walking theihna ahi, banah reserve forest mit in a muhphak tantan om meuhmouh te`n forest department te poimohna a langsak sem sem hi. Dolsing hahchiin ngial ua, forest department te sum nak ahitakpi ve. Himalay mualsang lam ah bel sing pougina theilou a, a om sunsunte humbitna naa poimohtak hileu leu, a gam toh kituak a piang, pine, deodhar leh cidar te kembit uhi. Huan huchi ahi a, I gam ah reserve forest omsak le, hausa gam hisakvek kei le, village reserve khong mahmah puahpha thak thei leng chihhuai natel e.
TAXATION: Gam khantouhna toh kisai in taxation ngaipoimoh mahmah ua, computerized system (centralized) border check gate ah koih uhi. Gari lut leh pawt, van lut leh pawt chiamteh sipsip ua, tax kipesa leh kipelou theisuah chet chet maidan uhi. UP border a check gate khat ka muhna ah gari neu nasan entry tax la ua, a crore a crore a tax gate khat lel apat tax mukhia akei ua. Manipur ah (Mao Gate ah) computerized check gate om hileh, bangzahta in nuam ding hiam, Noney or Jiribam ah khat mah, tua-gel kaan le kipoimoh lou hi a, haksa hetlou, mi khat leh nih lel in Manipurte poimoh sarkar run na di sum la lut zung zung ding akei ua. Beer bawlsuahna lian taktak koihsak ua, Tax sang taktak la ua, phatuam lawtel dan zaw hi.
SKILL DEVELOPMENT: Employment exchange ah ki-register thei ding skill tuamtuam nei khangthak tamtak seksuah lemlumtu bel Industrial Training Institutes (ITI) leh private engineering college ahi. Border naizek (Haryana) ah zirna ding institutions tampetmah a, ITI leltak hiai Sirmour District neuchik sung ah 7 tak om hi. Trade tuam tuam a zirsuahte` sep ding industries tamkuamtak zong omta ua, laisin a college kaisese lou in sepna ding ngaihven pah ziang thei uhi. Ei gam ah ITI leh Engineering colleges tamsem poimoh mahmah hi, skill development omlou in tulai khovel ah sepna muh kinephuai lou hial hi. Khangthakte a ding in mechanical, electrical, electronics, machine tools, leh specialized courses sintheihna ding institution tamsem, hoihzawsem leh latest technology zang a sintheihna poimoh lua hi.
INDUSTRIES: Policy hoih in state changkangsak thei a, Himachal Pradesh in Industrial Policy mumaltak duang in paipih lel lel hi. Tuaziakin, phualpi sorkar in Tax exemption pia a, huai chance hoihtak mansuahlou in industrial house tampitak lut zungzung hial uhi. Hiai mun neuchik (Doon Valley region) Sirmour District sungleltak ah tunichiang in Chemical Industries simsenlouh, Iron and steel units, Pharmaceutical Units (Ranbaxy, Akron, Mahaan Boisys, Mankind Pharma, Zee Laboratories, Mahaan group etc.) Liberty shoes, Reebok, Kwality group, Cement Factories tamkuamtak, Packaging units, Blue star, Malwa Cotton, Brewaries leh adang dang gensenglouh ding om uhi. Hiai industries te`n khangthak siamna neite lalut zung zung ua, factory lianlou ah mi 200-300 khong leh aliandeuh te`n 500-600 khong employ thei uhi. Synergy achih uh siam lawtel dan ahi uh, employment opportunity create ua, trained/skilled manpower sekkhia ua, policy pichingsak uhi, sepna ding mulou aa vialvak tamthahah lou hial uhi. I gam ah skilled manpower tamsem om le, Meiteite haina (helpawlte) a bei chik chik chiah, industries tamtak poimoh ding a, South East Asia toh kizopna hong hoih peuhmah (trans Asia Highway/Railways) phot leh, nasa inchia. Huchilou him inle skill manpower kitasam mahmah hi. A diktak in bel North East ah zong phualpi sorkar in Tax Exemption pekhinsa ahi, law and order mahmah aka??
HYDRO POWER: Giri lui apat Indira Gandhi hunlai in Hydro power lakhia ua, tunitan in kizang thei lai hi. Vuuk in a tawm Tons lui kangngeilou ah mual vutvang ua leinuai feet 300 a thuuk ah turbine Nehru hunlai in koih khin uhi, tua tui mah zangin akhanglam ah (leinuai) turbine dang khat koihnawn ua power pesuah nawn leuleu hi, Jamuna lui toh kizomsuk ua, huaimun ah barrage thum ngut omsuksak lai uhi. Tua teng teng in power generate suk suk ua, a zohchiang in Haryana leh Delhi ah irrigation + water supply (drinking water) pezawmah laidep hi. Power deihtawk a lakkhiak khitsa, hiai canal aa tui a thukdan feet 60 ahi chitel ua, kiaklup khak ding lauhuai mohlou, Delhite tuinek petu ahihchu. I gam ah lui (river) hoih taktak inei, Khuga dam ibawl ua, power lah pelou, tuinek ding lah pe dek dek, irrigation canal phusia sia, kikhiak in a om ngei. A dang ibawl nawn chiang un pilvang mahmah ni, dam bawl theihna ding mun dang tam peuhmah. Thautui neilou, suankuangthei neilou, lah power kiningching mahmah, a mipite hampha uh sa ke, Himachalte mahmah.
LEI HAUHSAKNA: Himalay mualtung ah bangmah apiang tuan kei, leinuai hausakna nei kiikeeilou gam ahisam hi. Mualdawn saang tungpek pek ah Lime stone omna mun khenkhat a omsam chihmanthu. Keense lakpi ah lampi bawltawm ua huai limstone te, tehmohlouh dingin sihtanpha ngaap in lakhia uhi. Hiai limestone lakkiakna mun mualdawn ahihziak in environment lam sai a nekzongte a ding in soisel theih thil ahi. A mipite a ding, nekzonna panpihtu leh industry te vaaktu ahihziak in khaamna kampau leh khaamtu busy bodies omsak sese lou uhi. Cement factories, toothpaste, cosmetics (powder) etc. bawlna dia thil manpha mahmah suaksak uhi. Ei gam ah bel, a om hiam chih dapkual (explore) ding leltak le, ka gam uh, ka hauhsakna uh, ka sing leh louhing te uh etc. etc, gen kheukhou, a omloupi le hizawmah thei.
COMMON COMMUNITY SERVICES: Gan khoi nam hi ua, bawngnawi co-operative society nei uhi, khonkawm ua, mun poimoh teng ah processing plant koih uhi. Processing leh packaging bawl ua, mantam zaw in zuakkhia uhi. Sorkar hatna ziakin computerization diktakin zang ua, common services centres mun poimoh teng ah nei uhi. Chihbel, citizen te`n government toh kisai khempeuh (Land revenue, house tax, municipal tax, road tax, vehicle tax, driving license, renewal, electricity bill, water bill, permits, certificates etc.) window khat ah pelut thei ziang uhi, kizen mahmah linlian. Ei gam ah zong omsak le thil hitheilou hikei hial, sorkar pen citizen centric ahih phot kiphamoh hi, welfare state hihsakna ding in.
TRANSPORT AND COMMUNICATION: Mun tamzaw gam haksa peetmah leh mualsangtung, mihingte tenna taklou himahleh, khua 900 (census villages) vel om lak ah khua teng phial ah gari lut thei hi, tuisiang dawn ding tungkim sipsip hi, electric paisuak sipsip hi. A gam et in lampi hoih ngaihna omloupi zaw hi, gari truck leh bus taisuak gige mawk, telephone (mobile) network muhlouhna om himhim lou, lamdang. Main arterial road te ah km 30 or 40 zoh in PWD rest house hoih huntawk koih zel ua, khualzin na nuamtuan mahmah hi. I Rest house neih sunsunte tomkuk leh buahsak/suksiat dingin en kei ham le.
MUN POIMOHTE:: Nahan pen Hill Station chihtaak ahikei, himahleh a khaw-gal mualtung ah resort nuamtak hiai khawsuak sumdawngmi leh daktor khenkhat kithuah te`n bawlkhia uhi. Renuka Ji pen natural Lake hi a, forest department te`n enkol uhi, resort nuamtak chiklaipeuh a mi 100 val tuntheihna mun thawvengtak om hi. Hiai lui a sangate man lou ua, nek zong ne lou uhi, limchithei peetmah. Hiai tuisung ah sai chia mahmah tortoise kum 400 a upa om hi, avangkim in huih diik dingin kilaamsuah duang duang zel. A mun him him secret dan in koih ua vaite a ding in mun poimoh khat suaksak zou hial uhi, khualzinmi tamthei ngial uhi. Zawng, sakhi, sangal, gialbem, savom, sakeibaknei anu leh apa, gulpi, sava chituam tuam khumkhawm ua, chiau chelchul, hawk zuazua, ham nguaunguau, ruum ngulngul, chimul thousakthei gampalakpi ah tampeuhmah. Sava chi tuam tuam a season a season in kikhengtuah hehu ua, keke keu leh tuiva-tuitu khong haam kuunkuun sek uhi.
Renuka Ji apat mualtungsang kahtou le Sangra lam kitungtou a thawveng mahmah, mel 70 khong ah Haripurdwar mualsang ah khua nuamtak om hi, hiai mualsangtung ah tuinek ding kiningchingtak om zenhouh a lamdang sakna toh kidim thei zenhouh hi, sukluan hizawmah lai. Vuk in phalbi chia a tuamna gam ahita, Himalay mualsang vuk in a tuamna munte kigaldoh chenchen. Beram khoi khat in 600 nei a beram mulmetpa zaw ahi ngial ve. Vok gamlakpi ah ta hulhul ua, gamvok di kisa hial, ek asuah khak di lauhuai mohlou.
Paonta Sahib pen Jamuna lui kam a om ahia, by the rivers of Babulon (luigei) dandeuh ahi. Hiai district sung a town lianpen leh commercial centre hi a, Sikh te Gurudwara poimohtak om hi. Kurbani lunglenhuai taktka zinglam leh nitak chiangin khah gige ua, a thawn in (free) mikhual chiklaipeuh in 400 tan zintun thei gige uhi. Darshan bawl ding, a langgar ua ann huan ding leh donation bawl ding in niteng phial in khovel mun tuam tuam apat ahon hon in tung zung zung uhi. Nektak zonna neilou mi bangzahta a chawmta ua, mi bangzah a panpihta ua, chihte bel ei mimawlte hisapna in phabanlou hial hi. Mahni hinpih mihingte tung a panpihna piak, vaak leh dinsuahsak pen Pathian thu-awna dan in koih hmiah uhi.
Tuachidan deuh, mun poimoh, mite lunglutna ding, tawlngakna ding, leh muhnop ding banglam hiam a I neih uh zaw poimoh mahmah ta hiveh aw, khantouh vai ichi hia, Khuga dam vai ichizel diam ah…..
HP state a gammial district khat toh ei district hon tehkhin ve wa maw:
Colleges = 6
Engineering colleges = 3
ITI = 7
Vety. dispensary = 26
5. Hospitals = 5
6. PHC = 36
7. Dispensary =126
8. Health sub centres = 145
9. Telephone exchanges = 57
10. Primary schools = 907
11. Middle schools = 202
12. High schools = 152
Ahia, ei district sung ah dispensaries, schools, leh adang dang record ah om tam-zaw a maimah diam? Mite`n zaw khantouh lam manoh uh hiveh aw, Independence nungsang himhim, election om teng in (government kum 5 zoh in) khek ziah ziak maidan uhi. Sin theih a om hiam a, lawm te
