LAMKA AH HICHI ZAWDEUH LEH: 
India gamsung a Zomite khopi poimohtak Lamka ahi, khawpi khangtou leh khanghat mahmah ahi chih mit a muhtheih in om hi. Mihing` kibehlap zungzung a, neih leh lam ah khang hat mahmah hi, inn thupi leh gari thupi taktak ding velvual ua, tai khu lunglung uhi. Paupu auto in kongzing leh zinglou teng luahsuak in amik-amak omlou hial in gamtang maimah ua, khe a pai te leh gari neu leh lian hekte a ding in amhaihuai chih chu neepte ahi. Zingsang baihtak in lamlian dungjui in mehzuak nupite kisaan thei mahmah ua, lampi langkhat tuak ah kivual dendon in ameh zuak dingte uh hon zalhkhia ua, lampi kimkhat mawngmawng bei hilhel zou hi. Dorkaite zong duaisan lou lai, avan zuakte uh lamkhaak hial in kaidok ua, foot path beizou hilhel hi. Tipaimukh road kawmtuah ding a one way traffic (diversion) in gari heekte buaisak a, diversion om sese lou hileh phatuam zaw khamohlou ding hi. Inn kiim leh kiang, lampi lian leh neu, vengsung, bazaar lai leh luita te nit chihtak in niin maimah a, hahsiang na nasep omlou hileh kilawm zenhouh hi. Programme tuamtuam nei lah tam, mihing lah pung, neih leh lam lah khang, hihding theilou a vialvak lah tam, I khopi bang loh ding chih lunggel dih ni.

Lampi: Tiddim road pen kongzing poimoh penpen ahihziak in keekletna na sep kul mahmah hi. Bazar leh business centre kikop zawmah a, dimlet nawinawi hial hi. Hiai lampi keeklet ahihmasiah khopi nuam hi ngeingei lou hial ding ahihna ah project thupi penpen a puankhiak kiphamoh hi. Tipaimukh Road junction, Nehru Marg junction leh Dorca`s Hall Junction te ah mihing paitheihna ding Over bridge or underground sub way koih kiphamoh mahmah, contractor te kisan un, sum a tam mai. Mission road, Centre Road, Thangjam road, Rengkai Road te zong puahphat leh keeklet kiphamoh mahmah lel.

Bazar: Zuzuakna, kizuakna leh zuaktheih teng zuakna New Bazar hilaizang inchin, aneu alian te muhphak leh totkhak ahi, hoihlou hial. Khawnawl lam deuh ah kizuakna mun leh zu leh sa zuakna mun suankhiak hileh I khopi siangthou in nuamtuam mahmah ding hi. Sazuakna pen New Bazar ah om maimah a, hiai in thil dang tampi tenkhawmpih ahihna ah, sazuakna pen mun thawveng zawdeuh ah suankhiak hileh hoih ding hi. Khopi sian`thouna toh zong kituaklou deuh hiau hi, tuaziak mah in sazuakna pen khawnawl lam ah koih le hoih mahmah ding hi. Tiddim road paisuak a bazaar om pen khopi sunawngkai tu ahi nawn leuleu, bazaar mun ding, sik zuakna mun, sing zuakna mun, cement zuakna mun, nepnoi zuakna mun, meihol zuakna mun, puan leh kizepna zuakna mun, electric  van zuakna mun, meh zuakna mun etc. kizentak a bikhiah kul ding hi, bazaar hoih taktak mun tuamtuam ah bawlkhe leng phatuam mahmah ding hi.

Van man: Van man bikhiah dan omlou himawk inchin minautangte a dingin haksatna lianpi tun hi. A ser a teh theih teng, a litre a teh theih teng bek chu van man bikhiah dan khat om leh hoih lawtel ding zaw hi a, trade license pekhetute leh sales tax (VAT) authorities te`n enkai le uh, District authorities te`n le enkai mahmah le uh chihhuai peetmah. Petrol pump lah kikhak den, black a lei ngai gige, hiai khong kuate mohpuak ahia? Mipite lei ding saang a black a zuak ding ngaipoimoh zaw te petrol pump khong khaksak hiau ding hizaw lou hiam? Meitei te paidan diklou teng I mitdel sialkhau let renrun ua, I ui hai zuih nawinawi uh kulloupi, haivai mahmah liang e.

Sum pung: Mimal sum neite'n a haksa diakte kiang ah rate bikhiah omloupi in sum pung hawm ziahziah uhi, sorkar in hiaite a rate bikhiahsa om dan in enkai thei leh deihhuai mahmah. Mitampitak, haksatna khukpi a piiluuttu ahia, neih le lam, gou leh gam mansakna lampi lianpen ahi. Khenkhat te`n, huchidan a sum hawm theite, a hauhsakdan uh genmangmoh hial uhi, Lamka leh a kiimlak a inmum leh loumun/gam lehkha (zamabandi) tamkuamtak mi tamlouchik te kiang a om teektuuk ahi chi uhi. Land ownership ceiling (limit) omsak le bel sorkar in suhsakvek thei ding hi a. Tuabel, inkuan thum leh li bek in Lamka zaang teng tang-gai khong ding uh aka. Hiaite pumpelh theihna dingin THRIFT SOCIETY hoihtak bawlkhe le, ahihkeileh private bank om maileh bang achi dia? Thrift society in sum tamlou lou in a neiloute kiang ah percent niam dawmdeuh in pekhe leh changka`nhuai mahmah ding hi.

Siangthou lou: I khopi in sian`thouna ah taksapna lianpi nei hi, drain lah mumal lou, septic tank apat tuihoihlou paihkhiakna ding lah omlou, dustbin leh ni`n paihna lah omlou, mimal chih in I innkong leh I kiim leh kiang lah kihahsiang tuansamlou, khu vengvung mai, namse vutvut mai, thoukang om ut ngial un`teh maw. A poi mahmah bel, Lailam lui I hukdim kiikeei zoh ua le lungkim duaisan nailou, Lanva lui hukdim sawm a kipei-ten a tam a kitam zawmah. Khenkhat ten luilai a boundary wall va bawl, innmun keek keek mai, ektui, niin tui luanglut sak, diaper leh numeite tawphah zatsa khong luisung a paih mawk mawk, plastic lah chu a dim a dim, bangchita di, Lanva lui kap-kap ahi ta. Luigei a tengte gam keek theihlouhna ding chiang bikhiahna, lui a niin pailouh ding chih dan khauhtak bawlkhiak, leh civic action plan neih kiphamoh mahmah. ZYA/YPA/SSPP Hqrs level a tuphah sang taktak neite kisa le uh, kha khat in khat vei social work in Lanva lui hahsiangna naa, zingsang tha in beihpina (cleanliness drive) om zelzel leh phatuam lawtel dingdan zaw hi a. Vengsung tengteng ah dustbin leh niinbawm a niinte a paih zel tu ding neih kisam mahmah, kithawhkhawm a hihtheih ziang ahi, tuamah bangin security guard (night guard/chowkidar) vengchih in nei thei le deihhuai sem.

Auto Stand leh Bus Stand: Parking lot tasam lampang kihita, Auto stand a omlouh ziakin lampi pailai teng in a utna na uah khamding ua, auto pute a ut dandan un gamtang thei uhi. Taxi stand leh Auto stand mun khenkhat bek ah koih dingdan ahi, a tuang ding ten tua mun a ngaak ding, auto puten tua mun a pat mi a pick up ding uhi. Bus stand zong mumal lou lai hi, Singngat lam pai ding teng teng Kawnpi lam ah kipankhe leh, Imphal lam pai ding tengteng Tuibuang lam ah, huai dan hileh bel I khopi nuam tuan mahmah ding hi.

Gam hawmna: Gam zuak a kipei theite hahkat mahmah ua, zong sumbawlna hoih penpen ahi hi. Mimal mal in hiaidan sumdawnna vaisai ua, a pung/meet tam mahmah ahi chi uhi. Kikhemna khat bang mah leh, michih in innmun leh loumun kipoimoh ahihna ah, innmun hawmtute ki-pan (zuan) lou theilou suak hi. Land use (agriculture to residential) khekna omloupi in pucca pata chi`n loumun peuh innmun ding in hawmkhe zungzung vial uhi, nuam sangial uhi, chettheihna khat zong hilel hi. Hiaidan a sumdawnna a enkaitu omlou ahihna ah housing society/agency kiphuhkhiak kul mahmah hi, society registration bawl hileh bel, kikanna khat, rules and regulations om ding a, mumal zawdeuh ding a, innmun man leh leitang man kiam tuan mahmah ding hi, manlang ni, guaite aw.

Sum zatdan: Sum hau mahmah kitamta, sum haute zat dingdan ei gensak kul lou hi, himahleh a neilou te`n zong kinoptal nuamsam ahihna ah, sum zeekdan kisin kuul mahmah leuleu. Bus pai nazenpi a singtang lam hoh ding in gari hire teitei, Imphal lam hoh ding in private gari hire teitei, naupang te kha ding leh pi dingin private gari la tei mawk mawk, neih leh lam in chin hibek leh chihtheih ngoih ngoih tam mahmah hi. Line bus a tuang utlou te, Winger service om ahi, zang maimai un. I genna ziak bel, tourist taxi service, company dandeuh a sai ki-omlou a, gari neitu te`n a hire man a ut zahzah uh hisak mawk uhi. Transport Agency tuam tuam, government apat phalna nei I dinkhiak uh hun lawtel ta hi. Free for all existence, pen hoih nilouh lou hila hi, I regulate theih ding, tuahsia tuahpha hun a kichiantak a kivaisai theihna, sum thu a vaivengtak a receipt kipiak theihna, leh zatman bikhiah hoihtak omna khua leh tui mah piisuak in khangtouhvai zaw hi, manglang ni.

Tui dawn: Tuinak hoih in neihte kembit ni, Khuga dam a tui neekphak diin kaisak sawm ni, Bungmual lam apat luituite a kholna mumaltak leh a distribution points bawlpha ni. Mun khenkhat ah zaan khuakhua a tui kai, a innkhang zek te`n kumkhua a tuingawl, giautau gige, chihte beisak hun lawtel ta. Vengchih ah reservoir koih bek le zaw, huai apat numei naupang te`n tui tawi siausiau ding ua, tuisiangthou leh tui kiningching nei mai dingdan zaw hi hang a, maw.  

Almohhuai dang tampitak omlai, Nitak kikhopna, mipi kipunkhawmna, nopbawlna etc. toh ei Zosuante kituaklou deuh I diam, buaina om kha naak. Biakin a nitak kikhop nasan tulai nawnlou suak ta, ki-et kiimvel na ding a kul leh poimoh tam peuhmah. Khasiat-huai kasak mahmah bel, talent nei mahmah te lak ah, lasak siam, music siamchihtak a siam te, chihtaktak a kisin peih, mitmuh ngekngek tamkuamtak om uhi, huaite a ding platform om thei mahmah lou hial. Biakin kikhopna pen a tangbik om uh hiven, mou khakna leh mou lopna etc. tengteng ah, Pathian La lou saktheihlouh kisa a diam a, amaute chial leng hilou zel uh, nitak khawmial nung a program lah buarchuar zel, hehpihhuai mahmah uh ahi ve.