‘REST IN PEACE’ HITHIAT LOU DIING UHI
~Vanlallian Valte

Htn S Chingnu, mi hawkdak lua ahi kei. Kei le chiangkuanglou in ka khosa kumkhua biik kei. Himahleh Septawmber kha bul ahong hih diing kuan in, khepi chin lengkhe dek phial in kisuihkhakna ka tuak ton uhi. Huchibanga vangsiatna mulkimhuai tawpkhawk ka tuah uh a nop louh dan pen, kongzing a silipar gui paltan toh tehkak ningniang vual ahi lou. Gil mahmah a, Kahpih dekdek ihi. Ahia, Kou kia’ tuah hilou kia thamlou, a huaise zaw tuak le tampi om ahihna ah kingaihsiat ngot ngaihna omlou hi. "Vachih' ham za'ng e!"

Heutunu’ khepi va velchian sin him dih ua – tumalam a asuihkhak pen khepi taklam ahi chih na chian diing hi. Khe veilam leh taklam i khen theih bang le hamphatna tungtuan ahi. Vei - tak hilou a, hong hi ngeingei lou ding hi. Vei-le-tak khen thei lou zatam lai ah, asia-apha khen thei te hihang. Kitheihmoh bawl bel thutuam in koih ni. Siamtu zahlou; thutak paai lou; angmasial; diktatna ngaihdau leh; mahni kideihkhop luat ahi, i tu dinmun a hon ding sak tu. Galmuh phak tua gamchiam gamla lai nah e! Midangte' hih fuh dan suut a thapaih hun hinawnlou hi.

Khepi chin ka suih kaau chiil in bel, AIIMS Hospital a Emergency Ward, ICU, Operation Threatre leh Trauma Centre, Safdarjung Hospital khawng mitkha in mu dundun maimah hi. Khonung a ka gel thakthak chiang in: “Huai lai in ka khepi in hon omlouhsan bang hitaleh khezung dangte bangchiin a khosa mahtak d’ua aw? Kituak diamdiam a om in, vai khat a saat uh hiam ahihkeileh, hausa (ka zuau) khepi dinmun a ding nuam chiat in gamteng a tokbuai maimah d’uam, gel ngam la’ng e! Khe muuk in a kawkna munmun kitung hiven, khezung omlai sun teng in mun tuam chiat kawk mawk le uh buaihuai na’nchia!” chichiing.

Lamka Khopi kipan a 2,562.7 km a gamla singgam ah nektak zong in khosa mahleng, khohun kikhengvel te’n kipatna mun lam ngaihna apuangsak zel. Delhi khopi ah le phavang nitum kuan chia’n tungleng va zata singdawn a chiak zaizai muh di hong om saam ta. Whatsapp kawmkawma nitaklam ‘fellowship’ nei ahi d’uam maw? Seppatni zingsang hilou a Septawpni nitaklam ahihlam thei tei ahi uhia? Zingni-thaini hunte -om-awl, neklim leh vadang gensiatna diing in a beisak sam d’uam?

Ka khepi chin thak liklek pen kivontawi khol kei mahleh, khovak mu nuam sam dia ngaihsun in huihkhi siang khollou dong diin ka pawtkhiak pih beubau hi. Ka putu un, paak-huan nuam huntawk khat sunga suangpek tung ah ka khawl tawldam hithiat uhi. Gawllek a umpawng gah kikhai tuttut te, “Pawng khat, pawng nih, pawng thum ...” chia baan sim mai louh zaw hih di kinoh lua om tadih lou hi. Hun toh kiton a pai pha sa’n inlam thuthang ka dapkual zela, “Kikhailum om nawn/awklum om zel/khaugui natna hii laang/tualthat 4th grade" chih khawng hitel hi. Ni, kha leh aksite awk in valh zel mahleh, mihingte zaw valh nawn mahmah kei leh chi hang!

Awklupna toh kisai tulai’ tuailai te lungput khat hia ka muh: Khangthak te lak ah thil lamdang lua hia koih lou leh poi lua ahihdan manbaan lou tam hi. A khawkzaw sem bel pawlkhat te’n guuk ngaihsanna khat nei, fashion conscious, adventurous, paa sakna leh trend khat dan maimai a koih ki om hi. Damkum tamsimta khat kingaisia in hong awklum taleh, awklum dia upata sa in, zahpihhuai sakna om mawk hi. “A upat-pat toh, awklum tei vial!” peuh chi uhi.

Piching te kia kibuaipih tuah khop hang a – naupangte Toupa' lam ngat pih ding thudon lou leh, khristian tuailai hun adia chiil lou hi kha ve ni (kei tel in.) Child evangelism i ngaikhawk nawn uh aw...unaute! Pathian' itna leh ahehpihna genvuallouh a thuuk: a thilhihtheihna thupidan tehpih bei ahih lam phawk lou khangnou a tam ngei mai ... Amaute lamhilh dia kilawmte lah khovel thupina te'n nisim in lam chiteng ah hon kai buai zou ta!

Confidential online & offline depression counselling bawl theihna om henla, huai ah lamtuamtuam a hihna nei leh ‘kipedeuh’ te bang ‘panel’ ah om le uh bang achi dia? Saptuam chih a missions committee, Youth & child worker; student organisation leh; youth assotiation te’n phatuam ngaihna phatuam suah poimoh mahmah hi. Lamka Damdawi Inn bang ah ward/councelling centre chitak deuh chihtaak gen diin omlai leh a gahsuang muhtheih a hong kilang di hiveh aw!

Khris sisan a leisa - mahni hinna hihchimit bel buaina leh haksatnate suk vaivenna hilou in, a huaise zaw pawdoktu lah ahi ngal a. Pathian in i thuak zohlouh ding haksatna hon guan lou hi. Hinkhua a haksatna i tuah te leh tuah touh zel lai dingte zaw ei hoihna dia amah’ hon got hi nuam mahmah. Khelh kisiik a Pathian kiang a ngaihdam ngen tuh ngaihdamna tang sa ahi. Pathian in ngaidam khin hizenpi, mahni kingaihdam theih louh zaw, Pathian muan ngam louhna ahi.

Sisuun inkuan leh a tanau-laina te uh theikha lou ka hihman in kamsiam ka suah thei kei - suunpih thei lou ka hi mai di. Misi pen le thei ngei lou ka hihna ah, a pammaih dan gen di ka thei bok kei. Himahleh, a sihdan pen puaknat chihtak in ka pawna a, "Poi mahmah!" hon chi sak hi. A RIP ding uh laan nguut-ngut mah le omzia anei nawn kei. Hong ‘Live in peace’ kiik thei himai le uh chihhuai lua hi.

Lungkiak hun a hon khamuan, hon hanthawn, lamdik hon hil a muvanlai tha hon guan thei, lei mihingte Pathian' hatkhum a hinna piak ahih bang ua Khasiangthou theihsak a kigelh Laisiangthou bu, minkim a nei hial ta te hilou ihi ua hia? Version tuamtuam bang neih thuah lai hang a! Huan, hinkhuaa tongkhong kisakna thu suut siam, gelh siam leh gelh ngiatngiat peihte' laigelh sim chiatchiat di tampi omta. Huaite thawn koih mai ding i d’uam? Pastor, saptuam upate, mipil-misiam te leh pa chingkam kuahiamkhat va zuan le hon tawpek louhial ding uh hiveh aw!

Huan, mi huchibang kuahiam khat khauhual a kigawlkhai geigoi, lei veipeh tehtuh (chi chitchiat le) leh tehtheih-tehmoh teh niapnuap lim khawng etnophuai lou selua, hamhaih man in - "Navaak-huai mahmah e!" chih khak dekdek in a om. Thubuai-labuai suichet tuak om a, lemlak phoulat in phatuamna nei ding ahih ngal ke’n zaw, lemlak koihlat zaalbawl nawn kei ni, Kingaise saam dangte mahni hinna gaakmit diing in tawsawn thei hi.

Hon suangtu ka pu a damlai in, a chinat lam ka thei ngei kei. Kum 97 val vingveng dam hi. “Gimlua ahih kei leh, omnuamlou khawng mawk gen lou ahi,” kichi hiven – gimluat nei lou ahi dia, agen za kha om lou. Himahleh, khepi a gawlgak lamtak bel ka mu kha ta. Zun-im phatna dia tua bang a hih saam midang le ka hon theihbeh toutou hi. Ginna dampih zaw kihi peuhmah inte – kei mahmah in le a phattuamna ka chian. Kizoitawn lou simpi bang hi: zunthakna hiam, kimkiang nai deuh gaak hileng bel thukhat. Awle, i gen nop pentak zaw, “gawl gaakchiip kichi, natna nasan in a kihtaak uh, en bangdia huchi ngamthoh bawl ihi maImah ua le?” chih ahi.

"Sungkulh baang zuut sapsap diin, numei pawngsualte’ hihna tualniam tuan se!" chi uhi – “Simmoh leh bawl gentheihna chiteng thuak uhi. Lemtang masa ah, tualthat leh suamhat te’ khutthak nulna tuak gun uh.” Kingaihsiat ziak hiam, midang gelgawt a kinei ahihkeileh, kuahiam vauna dia zang a, hihfuh kha chitchiat awklumte’n a tangtawn mun diing uh a tunma ua kha guk sung bang suangkulh tang teitei di, chih hileh zaw – suailou in numei pawngsual te nasan in simmoh sawn lai ding uhi.

Taan hun bikhiah abei chiangin, sihna Chiaugal - hinna singliim liap a tutkhawl misiangthou pungkhawmte leh tung thangvan kongkhakpi galdon ding ua, ki-selfie louhna dia pammaih sa in, uiteme tutkha mah bang ding un ka ngaihsun hi. Tua kongkhakpi hon hun chiang in a ging kilawmna amau diin bil-ap huai pi houh hong suak kha ding lah ahi ngal a! Ahi, Vaihawmna ni hong tung diing a, i Toupa ma ah ohlai khauhual toh kua ahia ngampa tak a ki-pose zehzah ngam mahmah diing? Unau ki-ngaihsun in.

VV'Laidiip@111117