KHONUNG PIL ZEKAI LOU
~Vanlallian Valte
Vaipi hi in vaike hitaleh, thilsai khat i neih chiang un, ‘khangsawnte’n hon mohsak louhna diing uh’ hia suangtuahna toh ahong nuam dek panpan sek. Himahleh, muih nakkhem hi. A bulpatna diklou hia, lamkim lungkiakna buannawi a kia? Zion laa peuh sasa zawsop lai hang e! Mualdawn san singseng galdon baan napi, louma paamtuul deuh gige hikha ve ni. ‘Amah’ pa a nei nam, nam hampha hihna koihdap ngam zou khop diin sesum in hon taalkaih khinta. I maivun uh asah huntawk. Khovel thupina in a hon pi zel. Huan, igam ah nektaak bang dia kiningching di - nekzon hahkat te pilna sang in guuk gu siam te khuak chiik zaw hiven! Khonung pil a hamphathuai zah in khonung a bawn pil bun lou hih khak ding thil lauhuai ahi. “Ana huchih kha le zaw/ana khachih louh di hia aw...” chih khit te pansan in bulpat, puahphat, sutzop leh tawpsan tuakte velpha kiik ni.
Eimite zaw, lawm zong phet hilou a belh di zong; mi’ khazaak nuai a mitphelaplap a om ut lel hi tel hang a! Thahat leh hangsan tak a om sangin sawtlou bitna leh cheknok thil baan dap duidui in ikihih-tuailuai zaw uh ahi kei maw? Ei kia a dainawl nasan siik ngamlou ihihleh kisalah veu dah le; i aikohaan na teng uah nampuan diin sudomlen phou palh phingpheng le houh a tawldamhuai zaw mai diam? Khatveivei, “Tulel dinmun sang in bit kei deuh lai le houh lampi ahong om lehlam mai diam?” chih ton om hi. Huapzat luat tum masa lou in, ei kihih hat phot ni. I hihna mah toh tuizang khauh pai giugeu phot ni.
En houh lungsim theihchet louh Gallengte belh hiam, Pisei sauliim a kiang-oih di, OBLIK lungsim hakkol puak khawm pih taktak theihlouh Kte leh Khothangte toh suangthu bang a dinkip di khawng saaikaak vial hang e! Zomi ah bit pen dia gintakna zong lian in zai veh! Mi ngaih viau leh tung-et hiawmtaka, thaldaak lai hang a! I thutak louh luat uh toh kua’n le hon huchi ngaih tuntun di le atel diam ah. Ei sung bing ah kihihhat tuah a, dikna leh hangsanna’n hon huzaap ma zaw... muuk a zipper thuah phot dia le hoih sa mai hiveng aw... Akuakua’n eite hon iit tuntun – hon ngai ngoihngoih hi thahah lou unchin maw, deih tuam nei veu akei ua hia –tuam deih kineih gun.
Limbelh di zong a thapaih ngai lou in neikhin hang. Kum khat sung in ni 365 a om. Laisiangthou sung ah, “Lau kei un...” chih thumal 365 vei kigen hi. A khamuanhuai huntawk mai kei maw, unau? Tangtawn Toupa i bel ding uh. Naak-hawm nuai a kamvang kia hilou in Lungsim leh kha toh, "Ka gam uah nang vaihawm in..." chi ta ni in Toupa' mel liah thei diing te koihkhe le, Pathian hong kigolh nuam pan dia gingta ka hi. Khovel zaw bukim louhna mun ahi a, khuisat hunte tung zel mahleh, taldom leh dekkhuat den dia siam lah ihi ngal kei ua!
Hamai poubaih pawl ka hi mai diam, hatu khat pousa in simlei ah mimbang’n ka piang hi. Himahleh, hanawtna leh halou zaar ka zou pah kei. Meihol gawivui, suaklu kahiang, kawmkuva hawng leh nute’lukhum al-timtiam khawng ah sawtkhop ka kinamtaak hi. Kei pianna pa’n halou vuidip, hiangzau gimsi nam hiuhiau nei ngei ta. Kamsung a ha leh lei in nuam sa tiamtuam kei veh! Colgate toothpaste kichi India a mekpawt-halou kumlui pawl ahi. Thumal nih ‘Colgate’ leh ‘halou’ kimekmat hoih mahmah a, Binaca mekpawt-halou hong suahkhiak in, “Colgate suakthakte” chih hi thouthou. Ahia, radio programe, “Binaca Geet Mala” ahong minthan luat ziak leh Cibaca halou phuan nuam zaw ahihna ah, a halou khotkhiak zah uh nisim in pung hulhul a Colgate te a bel keniam hiaihiai maimah!
Colgate Research & Development khovel a department pil leh siamneel pen lak a khat a hia, dentist te’n le colgate khutsuak taphot muang mahmah in halam noplouhna nei te Colgate choh hial uhi. Hinapi, halou khotkhiak zah kiam duaiduai pen Colgate Sales Department te’ lung-am sak tu ahi. R&D in a khinpihte’ halou bawl velchetna nei ua amau bawlkhiak toh enkaak uhi. A ginmoh khen uah Binaca mekpawt-halou bawm in gong nei lian zaw mawk hi. Khatvei a kimekpawt halou saudan kikim, hanawtna’ mai saudan le kikim - khut taang khat tan khawng himahleh, Binaca halou mekpawt pen thau zaw. Tum lianzaw pen phuan nuam zaw; hek zaw; lei mun ngai hi. Colgate company in bawldikna diin, a quality kheng danglam sese lou in halou bawm’ gong diameter zauh cheuh lel uhi. Huchiin ngeina bang in khantouh lam nawt nawnta uhi. Cogate te’ khonung Feedback Driven Approach zekai lou.
"Feedback” kichi taphot houchik bang a kilang in le kikhengna nasa tak tun thei hi. Mipi kamhup tum lou in, kamka siausiau diin chialna bawl zaw ve ni. Muhdan, ngaihdan, pomdan, comments, reaction, pointer advice leh soiselna nasan zak chimtaak kei ni. Feedback paidan ding: KISS (Keep it simple straightforward) approach. Descriptive a dawn diing khat/nih a om dia, thumal 100 aval louh diing. Dotna dang te atom thei pen hihenla, ‘Yes/No’ a dawn diing hileh. Poimohna nei khollou multiple choices omsak louh. Etsakna diin, “Indian security forces in Sajik Tampak a phaizaang helpawlte a nawkdalh lai un, eilawi in talpakte ‘Zodawn free passage’ i pia uh. I hih dik uhia/hih dik lou?” chih hong kidong leh bangchiin na dawng dia? “Yes or No?”
VV’Laidiip/160817