S. CHINGNU IN LIANI PARTE TOH LE HON MUANGMOH NGEITA
Written by Vanlallian Valte
Hilou hileh, Hoihkim pandukan ah hiai bang in hon sawlseh ke’nte:
Galsial bang a lianu’n ka dotchimlouh itluat VV,
Liani Parte toh Ngattui Vangkhua a na Zouvakhu koplen helhel nun uh lawibang a than niin kei diin khimpi zing e! Na lehluan simthu – hawmsiam a ka don hi hiam dit tangpal aw? Bangteng hileh, na lungkimna hiven, hon kipahpih louhngal kei diin ‘upaai chhaina’ ahi ta! Lanva Luikam a i tongchiamte ngilhdan zong hon sinsak vanglak tanla hounem!
Nang kiang kia a kipumpiak kumkhua,
Lelliang Chingnu
Thil omdan: “Singngat mipite aw, zingchiang Zomi Namni ahihtoh kiton in mahni nampuan chiat intung ah khaiparh dia nget leh theihsak na hi uh. Kuapeuh hiai thusuah thudonlou; palsat zousiah gaptoih ahi sin!” chih ahihmawk ziak a namdang te’n le dialpan khatpeuh a khaiparh tei ngial kum uh, a kha 06na bang hi nawnta hi. Lamzamuan loukuan peihlou beltak in zingthou a, Crocin tang bangzahhiam leh tuithawl lukhung a koih; dialpan khat toh taltang gaak in lumkiik tep. A inkuanpihte’n loukuan diin phawng sese lou uhi. Sanglian taget lah chu – a leipi ua loudai mun khat bawng in phuse zut! Lawmpa ning kitel gawp inchin, huaimun ah signboard lian huntawk tak: SIBAWNG! chih taak khedong!
Huchibang khawng ahih nimnem lai in nitak khat nungak heldiin Bethel Veng valnou vommam hiuhiau khat in Zion Veng lam maimit suan veng e. Laltin detvak kiukiau kianga tu samsau khat galmuh ing gual aw! Laisim awlmoh chituak hi. Sikul tamzaw teng phial a, sinlai naupangte’ kumkim exam sawnglai ahihtoh valnoute kungtung ah heldi ngaknou giautauna huaisetak in tung hi. G Pauzalal in huchibang a laisim tha-it khat kawk kawm a, “Kon sap sak diam?” a chih lai bang phawk zawzen hang! Zenzen! Guntuh tak a laisim hihbuai ngai thrah lou!
Huchiin, Zion Veng nusia’n Station Veng ah ka lehlut suk zawta ngala. ‘Lian Medical Store’ neitu Pa Lian, T Vumzalian in malbang hon kou nilouh. Khua a noplouh toh paibaih tum hiven, dawr khakpih diin zot chihtak in hon zawn hi. Dawr khak khin a inn uah ka bang malam a, zin nungak kivontawi lahlou tutphahsau, minih-tuttheihnate ah ana tangtut lelat. (Pa Liante’ mikhual hilou in, T Ginkhopau te inn a ki-nga, tanaute veh a pawt hizaw chih kon behlap zual petmah.) Khaih! ‘Liani Parte’ achihchih uh ana hi reng akamawle! Ka lunglutna uh kibang – laa lam ahi: amah lasak siam, ken a ngaihkhiak nuamsa chihmahtak kihouthei viau ngal maidan ka hi uh.
Inteknu Zasiam (ka nuneu) in, “Lalboi, khosiat toh na lawm va kha malam tanla…” hon chia, ka ‘yes!’ puak pah zotzot hi. Lamliandung ah buaina thupilua gen ding tuak kei mahleung, Pa Pau te inn zotna lampeng pen naal petmah a lawinu ngialhouh paisiam lou in dinkhawl veu hi. “Hon len in…” chi. Ken, “Hon zui ning maw…” chih laa sa phot ve …” ka chih leh, “Na sual reurou telmai!” chiin nui lualua. Ahuchihna lam ah, kitotah dektak a, hon pumkawi top – poiremchang sak sim in a om! – Hiai sa’h naalpha zawdiak leh chichiing! Bangchichihiamin kongtual tan ka kihamtang tou thei khong uhi. Sawt ka tu kei. “U Lalboi, nangle zankhat zalmangpha…zingchiah hong nawn in aw…”
Kiginni zan-kikhop tawp in laitual ka va leng nawn nguttak hi. Hoh hak hon sa. A mitmul phektham hial leh kilawm akaa! Naupangte laisimna tohbuai louh di paulap in pangkhang ah ka kisuan ua. Guiter tum in, Pathiani zing kikhop a alasak di te ka practice uhi. Theihtaisa ngen hiven siam pah; ken ka second voice na mun di khawng etfel ahi lel hi. Guiter hon hupmitsak a, “U Lalboi, kon muhchiil kipan in ka lungsim tengteng…” Kongkhak hong kihong guih a, naupangte laisim khin hong kihuihtheu hiphiangsan uh e! ‘Kumbayah my Lord!’ leh ‘Toupa ah na nu leh na pa te thu mang in…’ chih laa khawng sa’n ka phaphet kei uhi.
Zua’ saulim zuan a tuanglam ka zuih lai in gawllek ah thil khat kipei vevelh om hi. Lamdang lua sa’n kawlphe-khawnvak in ka khoh sok hi. Ngaidih ua -numeite tennuainung, sandaang, amalam a ‘rose’ paaklem omte ana hileltak. Leitual loupa tung ah samkilh nih leh nauphiik-lukhu di hileh kilawm nungakte awmphaw, a sandaang mah kiphah dedak hi. ‘Taisan ngai phut hitawk mah leh phoulat sese!’ chiin chiangkang in ka dawtpulh a, dawklou deuh lah kawmthawi lawmlawm louhna mun a dailing kahiang ah ka koihhoih sak thinthen hi. Zing tuitawi kawm a va gukzon khualkhual khamohlou di ahihman in.
Lenkawl ah Khawlnizing etlawm puangkhe diin kawlninou hong kiheisuah beambeam. Genlawksa bang in Liani biakinn kai dia tawnkual; nehnuh leh mainuh, nuhtheih-nuhmoh a kinuh khit in mualtung a biakbuuk ka tung thei khong uhi. Phatna laa 03: (Hon zui ning maw/Zion Vangkhua/Lungin lawp veng) siamtak in awi liahliah. Thugentu Rev (L) Liankhosiam ahihziak adiam, Pa B Luaizakham leh Singthangpa nasan lusu lou mawk uhi. Kikhoptawp in hulliap ah ka ding ua, Pa Paute’n LP ka pawtsuakpih hon phalsak uhi. “Zawn ngai in bel hong om kei unla…” chiin hon chiamnuih ua, nunu’n nitak-ann nesa a paisak pan di ahihdan hilh hi. Nu Zasiam in, “Na kilawm lua uh!” hon chi. A pasal zaw nervous sim rock!
Singpisan, balpi leh thangkhuai zialzou phet aktahon ann-ngiam ka tah e… “chirik-chirik!” chia zaila awi in. Aktal lianpen nitaklam kuanglai phiat diin akbawm vuak ah ka tuamkhum hi. LP in nunu sam sathau nilh in hiahsak a, tunnu’n, “Na U zaw bang hon thei adiam theihsiam haksa ka sa. Ka lung gimlua ahi Liani. Biakna limsak; zu-le-saa kibual lou leh; laithai kaaplou chia ngaihphatluat lai in, tulai teng nitaklam chia nam philphel chiing hi. Taihilh lah phatuam kei! Boih nang thugen houh ngeingaih deuh di hiveh aw…” chi seihseih ven aw! “Nu, tulai tangvalte zaw thei khang maw…bangteng hileh thumna toh pang le…” Ka khutbuh sana HMT Kohinoor ka melh mun simta!
Parte in, “U, i nu’n na pupu theihuan a thei va pua un…’ achi ve, hong ou, kisa ni!” chi hi. Maizen! naupanghon – Paneu’ tate, Puneu’ tate, sanggamte tate leh a lawmte uh kithalawp pen in hong pang uhi. Sulnung: Vungluai kudam/sing-beam lepsang tung a tutkhawm; Leisiatna naai a pupu theihuan fang; khokhung mawltual nawl a khawdak; khiangpi phunga tutkhawl; tumlam mitsuan a, Guite kual galdon; Tuivai lui luan kualkawi dan kikum; tungleng vasate giahphual zuan a koplen helhelte gandon; the Hill Model High School campus mual, loupa tung a bokzaal a suahdoh lam maimit suan.
“Parte, endih - kon kawkmuhna mun: khogal mualdung a hon maingat, singnou leh sainou pouna lak teng Upa K Nengkhan' loutul ahi. Huai loutul khung a vausing na mu dia, etlawmtak in paallun sek hi. Pak chichih lai ah sevaupallun tuk a etlawm a om diam? Sakhi nupa in vaupaak pulh taan chimmoh uh. Sakdeuh a mualdawn a mawngkung lawk pha thei ten hi. Veilam ah na mit suanphei le chin naupang maigep nimnem, phulalene puan-aktual; among bang kizialton netnat zawzen silh te’n gamkatna nung ah bigai bot ua, tuaikisel sik in, aipaak etlawmtak te maltameh diin bot sek uhi. Gamla zaw - Sialnah khonuai a Parmawipu’ loutul ah singzual limchi thei mahmah ahi…”
Aktalsan in kuangpi a thai khit in nitak kikhop daak ging chiaichiai hi. Kou lawmta bel ka vialdianna uh tawlsim ka hi diing ua, uinougim namlai te mah toh inngak in ka pang uhi. Liani in um-le-bel hemkichian a, annek-kuangte sawp hi. Ken singpitam khiat kawm in vok-ann huan bibilh. Lamnu’n, “U, eigel pi naak bat hang e! b Mite’n hong mu le uh le ‘honsa’ ngeingei d’u maw?” chi ta nilouh! Aman hon kawi a, “U… ka gennop hiai ahi, nang loungal…” chi pan kiangkiang, tunu deihtak, Pari (Thangroupar Ngaihte) in, “Pupu Lal, ken na kiang a ka gennop chu maw…immh…nektheih hon leisak tave!” chi hi. Ka kiuh fok ta de aw!
Kikhawmte tawpta, lawmnu kha dia pheiphung suan mai zaw a cholera telmai! Khaman zaan ahia, gawpi nuai ka tun un dumde leng sawsouh uhi. Liani in akholam ua zansawt nung a naungek kapging peuh om theihzelna mun toh tehkhin inchin gimneih in nei hi. Ah! ka dek hong ki-khoih zouh! Bil langnih khutvot diakduak in hon zuut mahleh muh di himhim omlou. Huih nung lou napiin gawpi kung kisawi in kihekging nguatnguat. Liansangpui te innuai a bawng hon bok khepkhupte thakhat in thou ua, meital zen in taisia dumdum uhi. Uital mangbang kisa bauhging in kongzing zelsuak. Evan P Thawnkhansuan te inmai ka tun un sidaak hong ging a, sihhoihlou-a-sii meltheihluat khat ana hilaizang!
Khenna’ng kawlni hongsuak a, kawm kuva khing in kambal khuah veng. Sisuunna Inn kipan bus parking ka dairek hit hi. Lengkhawm zanhak ka hihtoh kei sakmel muh kilamen nawn chiahlou Liani ka angsung ah hong belh threks. kidiik suisui hi. “Abangchi e? Chiangpi malta keu chip kha na hihiam?” ka chihleh hehlem kipang in ka awm hon tupsak khempeuh hi. “U ei…nang tellou a hinkhua zat mai di zaw, aw…ahithei kei!” Kikhelah tak a ka khutte uh khawlbu thahatna in hon kaihkhen khit in Chingnu kiang a kigenveng didan ka lunggelna lam ah ka silipar gui ka suitan thahah hi. Huai nungsiah Singngat Bazar hi nawnlou in Paltan Bazar kichi den ta hi.
S Chingnu in midang toh hon muanmoh lak a tallang deuh mi 06 : (1) Sanggam et VL Muani (2) V Doutluang zineihni a guiter ka tumsak Lian&Rose Sisters (3) Damhoihching – ka khutchin hon tansak lai tuakkha chitchiat. (4) Rajdoot Hotel a singpi leh sang ka khilai – Lun Simte (5) Dongzakai Cinema Hall a Hindi film, “Khel Khel Mein” ka etpih; Phailian a Don Bosco School pialpheina bul a ‘speed breaker’ sang deuhmai ze-huatnu - Biak Hanghal, leh (6) SA Road a ka zintunna, tupa deihtak S Sanglian te inkong kipan a Kangkap Centre tan dong kawng a hon kawiden sek Lianlunching ahi uh. Hiai teng lak ah Lianlunching incident ah kigenveng haksa pen hi. Exservicemen building lui kipan in khe in ka pai ua Lanva lei bul ah ka va kihoulem thei pan uhi, huiha!
Kigenveng thei zel mahleng, hun hongpai zel ah, simlei huihnung velte’n muntuam tuak lah a hon tun ta ngal a! Koppih aneih kuan in hichiin hon chi hi: “Migiloupa, ngilh na haksa kei ngeimai...himahleh, ka laikung muuk in solkha zatam albang man nu'an zong na sakmin lou chim moh e! Na vang ngaihman a zan ihmutmoh hun hongtun chiang’ laidal ah, ‘Lungdeih VV’ chih gelhdim leng maw, kei diin maimit siin nuamtuam - Nang a hisek: Chai”
*****
(Theihtuak: Laigelh, phuahtawm pumluum ahi chih kon behlap zual petmah!)