Sih khamuanna nei nailou te dia huntawp a ngaklahhuai louh diing zahdongin, dakkal khat a km 56 bawrvel a kikhoh haat – huihpiingpei (tropical cyclone), Mahasen ina mullit mahmah ta uhi. Bangladesh leh Myanmar nawk khin May 17, 2013 chiangin India Mal-sak bial le hon nuaithel nengnung di ahihdan leh eimite’ bubitna deuh munte ah leng siatna thupitak tunthei ahihdan thuthang uihnam vel te’n lung liapsak hi. Himahleh, vangphat-huaitakin, hong huaise lou vanglak (Cyclone slowly thuak ka nuam…chih khawng zailaa’n non awi nawn maimah duam maw?) Kum 20 val paita in Bangladesh cylone kahiang in Myanmar leh Mizoram gamgi tuamlak a nawk khak lamtak ka thei chian khopmai – va tuakkha hive’ng.
Zingni-thaini hong hileh, Champhai nusia a, Kelkang, Leithum, Khuangleng, Sazep, Mualbawk, Sesih leh Leisenzou khuate tawnkual a zinkhe di ka hihman un, Bethel veng nungaknou hel diin ka tangkuan kakauh hi. Rengpuii in “Apna khayal rakhna…” chiin ka khutpek hon jutsak hianhian hi. A vaipau theihsun hon sekhia hidia gingta sim in, “Boihte, Vai trawng i hnehsawh khermai kati! Dumka ho thrian thra kawmngeih inei nual ani ang e!” ka chih thahah leh, “Ehe! Min va han hmusit thra duh lo ve a…” chiin a sanggampa John-a’ guiter palleng dawrh khop in hon delh venchin - pangkhang ah hon delhpha a, tuangtung ah ka puuk khawm uhi. Ka bil hek kawm in, “U Lala, ka serious ania, nizan ka mumang ava han chhe rapthlak! Fimkhur molh ang che aw” chi hi.
“Manglam in Rih diil endiin ina kuan hin, lamkim i tun in toso singlim nuai khat ah tutkhawl hang. Thakhatin, meivom hong kiziallum vutvut a, huipi leh piingpei hattak in hon nawk hi. Singlehlou leh hinnanei te hon tuah khawm a, nang koilam a hon tuah hihiam chih leh kei hon ngahkhiakna mun nasan theibunlou in ka hamhaih a, na sakmin lou in ka kapkap mai hi. Kapkhia ka hi diinga, tunnu’n hong phawng. Ihmu nawn ngamlou in nang kia kon gel khovak thrax. Siamtu phawk kawm in va zin inla, keile nang diin ka gin-om gige dia, Champhai hon totkiik nou dia lemlouhna a om zenzen leh hiai mangngilh ken maw: "Ka hmangaih che a, ka hmangaih reng ang che. I lo kalleh hun ah chuan in – ‘tiam tlat e’ te pawh kan ti dun thei ve tawh mahna, ti rawh...U Lal..."
Ruantlang khokhung ah kawlni hong suak a, zing-ann nek khit in Kelkang khua zuan in ka kipankhe nuangnuang uhi. Mizoram a dia lamphei saunapen ahihziak kia hi diin ka gingta sengkei; tutung sau diak hileh kilawm nah e! A bang chi ahi? Nunglam etkiik ziak a chikhuam suah di hileh, Bethel veng kawn tuamlak ka galdot vungvung nilouh khawng, ngaihdam vual hi mahmah kei ve ning! Nungkaih vei sasa’n maban sawn zel in kho tuamtuam ka tawn kual uhi. Khuangleng khua a ka tunnate’ khindang ah gilmul kivanna, lungmuanna leh damtheihna om hiin ka mu. Ka zin masak a ka puak scooter clutch wire zang phatum mahmah hihtuak uhi.
Sumdawng dia ka zin chiang un, pawlkhat in damdawi pua; thousilen, puanten, puanza leh puanthaan pua bangle omsek. Huailai in scooter clutch wire Lamka ah malkhat Rs. 05 vel hisap in ka lomlak thei ua, Mizoram ah Rs. 100/- per malkhat bangin ki-khawng thei hi. Singtang khua, lamlian in le a totlouh, scooter khat le omlouhna khua tata ah khotnop hi. “Bangdi chi phiangsan hi uh hiam?” na chi uh ahi maithei. Huai cluth wire te sikkhau tou theitawp dia kibawl hiven, sakhithaang, sakuhthaang leh ngalthaang khawnga a thaangkual/thaangkhau diin hoih mahmah; kijuk kin a, awksa gamsate kipektol/pektan mawk thei thahah lou uhi. Zin tunna te mal 02 ka thawnpiak leh kipak ahi d'ua, 02 mah leibeh uhi. ‘Ekhai! nangni in ni bawk a…” chia malkhat Rs. 50 hisap a pesuk, khep tampi met veve.
Khuangleng khua kipan in Sazep ah ka giaklut uhi. Nitak ann nekhin, giahkhawmna te’ taptung a tualsingpisan khiat panpan, piingpei leh huihpi kithuah hattak in hon zial ta mai! Kilamthak himahleh ka omna inn uh kisoi liing zotzot, inkal khawng puak mawmot maimah. Tukvelh ah ka khodak ua; sikul leh biakinn tung lanva huihpiin hawk duatduat hi. Singkung lianpi khat ah phaitamte intung langva pek khat kizial gaak venchin, nungaknou puanveh siamlou mah bang hi. Vuah in tam leh tawm hun nei a; mallianpipiin ke tuktuk; khatveivei gial toh kithuah phiphilh hi. Huihpi ahihleh, nunnem deuh hun chih neilou in mauging honhon hi. Nitak dak 08 vel a kipat in a jing nawn dak 09 tan vel beizom ziahziah. Rengpuii' mumang gen hon phawksaka, hiai di mangmat ahi diam, aihkeh, ki-itlua hinapi, kou bawltheih khen ah khovel huihnungte’n gibang hon khen di houh ade aw! Anihtuak le himaithei! Aselam kipia in Itna Vangtah laa a hiai teng kia ka sanon zihzeh hi:-
Khending simthu n'ong lel mai maw, Aw nang na hi itna simthu ong hilh. Itna vangtah n'ong piak bangin, Ngilhtheihna zong hong pia’n aw ngaih.
Huai khua ah tangval khat leh lawm Thanga hiai bangin kihou ngei uhi:-
(Maruti car 800 kithan mahmah lai hun ahi)
Mipa : Manipur ah Maruti car a om ve em?
Thanga : A siamchhuahna hmunpui a lawm.
Mipa : Manipur a pui ve em? Inn engzat vel nge ni ang le?
Thanga : Pui vak lo ve, Aizawl ang lek khi ani vel ang.
Khua khat ah, lawmpa’ tun-inn putek damlou ana gimsia hi. Siatni-phatnia kidelh tuah namte ihih uh hampha ka kisak kawmkawm in 'damlou veh dan leh kepdan bang le etthak tuak om hiveh aw' ka chi hi. Damlou’ sungkuante diin khamuanhuai mahleh damlou bangmah gen ngaplou adiin thuak haksa viau maithei: laizial khu, buuk khu leh zabel khu a uuk lunglung; dainai louneih kum, Zubelmual zau, khosakte' Sakeijang zaupi' chih khawnga houlim bengseng; gimlua a hihlam thei zenpia, damlou vamuhpih/houpih teitei tum, “Na hon thei hia?” peuh chichi; chimtakhuai mahmah diin ka gingta. Amah kia a om: omtop lunggulh mahmah kimlai, chiimbuai nilouh hikha ni. Simlei ah khiaklah di takngial le nei nawnlou ahihmel kuan a thei a?
Damlou gim, nakvang nih kia deihkhop nawn lou; a kam toh zang kop; haksataka hatla hawk-hawk in, tui duhpen in nei khel khollou ding hi. Huchia a hulakna poimohtak khat a tui tulh ek! Dangtak ziak hilou in dongkholh a sak luat ziak in thaneih teng toh valh tuma panla le himaithei ahi. Patjam kawt a muk dep kawtsak zaw le, dem khang. Dangtaklou ahihdan kemtute theihsak tum in a lu sing taleh pomkip sem uhi. Tui duhloulua’n a kam chiip taleh, a biangki langniha meksak ek; sikkeu neu nih khawng a holh in a kam kamkaak mawk; tui tulhnon – tulhnon. Gimlua kisa, a mitsit diaudiau chiang banga, a bilbuka sam kongkong, sawi noknok. Zaitha nei kei mahleh lungsim halh a diin bengseng in nuammoh nanchia! Awlmoh kisakna lam ah, damlou a dia huathuai taka soisatu hihkhak theih hitah chih khawng maimai hiveh aw ken kana ngaihtuah.
Simlei luah di kuamah omlou hi. I hindan a kibatlouh dungzui in sihdan le kibang hetlou ding hi. Sihsual sapsap daidide om ua; taalbuai om uhi. Khenkhat siguih ua; khenkhat lah si diaidiai bang a kilang om uhi. A paisandi te kianga thukhak nei a om ua; nei sese lou le om. Mangbang taka Pathian min lou a si a om lai un, mangbang napi bangmah genthei lou a laitat om uhi. Sihkuan a paukam leh khoheidante, i ngaihkhawk khat uh ahi. Himahleh, sihnung chianga paina di, paidan di leh tenna mun diing tungtang ah poimohna nei lianpen chitchiat lou hi. Damlaia sialepha theihna siangtak leh deihtelna sangpen toh hinkhua zatdan – lungput leh thilhihte in sihnung hinkhua ah gennei zaw leh kilawm maw. Bangtenghileh, a poimohpen zaw Toupa Jesu ahi, chih mangngilh kei ni lawmte.
(Theihtuak: Phuahtawm hilou nawn)