PATHIAN DEIHDAN

-L.T.Ngaihte, Kabul

Pathian deihdan ‘om’ tuam hidin na ngaihtuah ngei hia ? Huci bang hileh, ’bang’ hidin na ngaituah a ? Hiai dotna houcik bang na pi in, I dawndan in thu paw lian mahmah hi. Mihing tamzaw ngaihdan in, tullel a ka omna gam, Afghanistan a Taliban te bang, ‘mihai, paikhial, mi mawkthah thah, buaina bawl ut himhim’ dan a koih ahi uhi. Ahihziakin, tomkha agen in, amau pawl kaan a Pathian deihdan  zawng leh sepkhiaksawm omlou ana hizel uhi. Pawl dang khat, Kolkata pansan a om, ‘Missionary of Charity’ kici, Mother Teresa pat khiak, tagah gentheite kema, kuamah etkawl utlouh damlouhna lauhhuai ‘phak’ natna a nate, kilohtheih TB natna a nate bang, enkawltu ahi uh. Hiaite bang leng Pathian deihdan mu kisa a pangte ahi zel uhi. Hucibang zel in, USA in Al Qaida, Osama Bin Laden lamkaihna nuai a khovel gam pumpi huap a kipawlkhawmte a dou pat lai in leng, Pathian deihdan sem in akingai uhi. Osama Bin Laden in lah, America leh tum lam gamte gingloute (infidel) ci in, amau te leitung a pan beisak tuh Pathian deih lam a hi ci’n ana ngai leuleu hi,huai tum in hahpan in ana pang hi. Leitung a Pathian namtel a kigen minthang Israel ten Palestine te gam thagum a hong luah ua, agam a nateng sate nohkhia ua, kidoupih ua, migam khat a amau gam di va bawl ua, Pathian deihdan ci mai mah uhi. Pathian deihdan a angaih uh, semkhe ding in sihngam in apang ua,tun gamkhat Israel kici a nei ua, agam kim a gamdang a ngai mahmah om het kei mah le uh, Pathian deihdan a gampiak a a ngaih man un, taikhiak sawm non lou uhi. Naicik ah gen lut le, eilam a gamnuai mi ci a pawl tampi om, Manipur lel a 50 phial bang om dite’n, a om nasan uh Pathian deihdan hi’n a sutciat ding uh. A tualthah te natan uh Pathian deihlam hisak tou zel lai ahi uhi ! Pathian deihdan thei kisa zenpeuh te sang a mi lauhhuai zaw, leitung ah omlou hi.

Hiai pawl tuamtuam ten, avek ua agintak khawm utuh Pathian KHAT kia a omcih ahi thethup hi. Huai omzia bel, Pathian kibang avek ua bia uh cihna ahi. Ahih leh, Pathian khat cauh om ngala, bangcidan a adeihlam hici khawp a kibanglou a mu thei aduam leh, cileng,ngaihtuah taktak hong ngaisim kha ding hi. Leitung a sahkhaw lian pen te, Christianity,Judaism,Muslim,Hinduism,Buddism,Jainism etc. tengteng in leng Pathian KHAT kia om mah ahi ci uhi.

Tulel a mihing tamzaw tham in, eilak huapin, Pathian KHAT omin,munkhat a tu, adeihsakte kiang a ni sasak, a deihsaklouh deuh te kiang a vuah zusak, a utpeuh damsak, a ut peuh cina sak, aki pahpihte hausa sak, ahucilou te gentheisak,a utut sisak, a utut damsak, gam khen khat  votsak, mundang khat lumsak. Hicikhawng hih a, niteng, zanteng a buai abuai dan khaw koih hileng kilawm hi. Ahihkeileh, niteng a ka thumna, kipahthu kagenna, Pathian ni teng a amah be dia ka va kuanzel, kua hi mahmah ahia ci a ngaihtuah na himhim leng pe ngeilou, mi nana biakziak ua va bia, mi a thumziak ua va thum, min thohlawm apiak ziak ua vapia, min a zuih ziak ua vazui, mi alaam ziak ua valam, mi a phur ziak a vaphur. Ahitak pen buaipih lou, adik mah hia, ahihkeh ahilou pi khat hia cih bang le sut ngei himhim lou ihi uhi. ‘Na zuihpa na theih nak leh, lungngaihna ding omkei’ ci in, Pathian zui kici gaih, Pathian a ingaih pen bang ahia cih mawngmawng ngaihtuah ngeilou !

Pathian pen, thil tengteng siampa leh omsakpa, leileh van a thuneihna tengteng neipa, sing leh suang leh gamsa leh mihing tengteng neipa, tuinuai thukpen a gamsa mit a muh theih leh muhtheihlouh te natan neipa, lei a leivui leh piaunel tengteng zong anei pa ahicih I kihilh dan uleh I gintakdan uh ahi. A dik ngei ding. A hoih leh ahoihlou bawlpa, mial leh vak bawlpa, hinna leh sihna tung a thunei, mialna leh vakna tung a thunei, ahi ici uhi. Huci ahihleh Pathian in deih a neidiam ? Pathian in taksap a nei himhim diam ? Pathian in mihing lak apan deih a nei himhim diam ? Bangkim neipan, kua kiang bang a deih himhim dia ? Setan (Diabol) mahmah leng amah bawl himawk ahih cia, migiloute beisak din mihingte panpihna apoimoh dia hia ? Ahihkeileh, huai Setan kolbulhna apan mihingte lakkhiak zohlouh anei thahah dia hia ? Hucibang Pathian in, ‘huai nahih kei leh gawtmun ah kon koihdi, nasih phet cian’ aci dia hia ? ‘Hucia ka poimoh nahih keileh Van-gam kon kaisak kei di’ khong ci vel maimai ding in na gingta hia ? ‘Ka kiang a cih taktak a nathum louh ziak in na laisimna ah kon fail sak’ ding bang ci din na gingta hia ?

Bible mahmah ah, mihingte tuh Pathian melpu a siam ahi cih akigelh hi. Mihing siam masak na ah, tungman a bawl, huai sung a hinna/naakna piak ahi. Huai naakna mah tuh mihing hinna, Pathian toh kibatna ahi pen hi. Muhtheihlouh ahih ziak in ‘kha’ bang le ici thei.  Mel leh puam a kilatna hizawlou in. Huai naakna icih hiam hinna I cih hiam, kha i ci hiam pen mihing tengteng a kibangvek hi lel hi. Amanphat dan zong kibang vek hi. Aneu alian, atek akhang, azawng apha. Hiai hinna (life) pen tuh Pathian hilel hi. I vek ua Pathian kihi, ahon judge te le mihing mah hi, a hon siamtangsak tute leh hon siamtangsak lou tu te leng mihing te mah ahi. Mihing ngaih a hoih hetlou, Pathian ngaih a hoih mahmah omthei lou hi. Huaiziakin, Greek ten pau-upakhat ‘Vox Populi Vox Dei’ (Mihing ‘aw’ tuh Pathian ‘aw’ ahi) ana ci na mah uhi. Damsung a aki kem siam deuh, a kidekzou deuh, ataksa poimoh ngaihsak deuhte lel mah midamthei hilel ua, hinkhua nuamzaw deuh in zang uhi. Hucimah bang in, hinkhua a neklehtak, teplehmuam a kidektheiloua, taksa toh kituaklou tam nekhate damtheilou lel ua, hinkhua haksadeuh in zang lel  uhi.

Hihtheihna leh thuneihna hiai I hinkhua ah omvek hi. Ahoihpen hihna ding leh a sepen hihna ding in zalenna mimal in zalenna kinei hi. Azat hun leh phat isiam leh louh ah kinga hi. Bu kim a siamsa ihi. Apoimoh hiam a kimlou om lou hi. Inn hoihtak a lamsa bang ahi. Huai inn ah nitak ciang a light nadeih cian, Electrict Department te kiang va gen gen ngai non lou in, na insung a amekna ding mek lecin hongvak geih mai hi zaw hi. Hucibang in, tui na poimoh ciang in, a hekna mun vahek geih le cin tui hongkai liahliah mai ding hi, Water Resources Ministry te kiang va gen gen ngai lou in. Tuacibang a bukimsa a kibawl tuh mihing hinkhua ahi. Huaimah tuh Pathian ahi zaw. Nakim-nakiang a mite na ngaihsaka, amau a ding a nahin a, na it a, amau a ding a phatuam nahih leh Pathian lungkimsak hilel nahi zaw hi. Mi natung a kipahleh Pathian natung a kipak, mi natung a a lungkim kei ua leh,Pathian na tung a lungkimlou ahi lel zaw hi.

Huaiziakin, tuni a eilak a Pathian thu-awi kici a ilak a ki itna leh ki hehpihnate, thudikna leh ginom nate omlou icih in, Pathian I theihsiam louh man uh hi ding cih ka ngaihdan ahi. Min guta, negu, diktatlou  a hon ngaih ua leh huai mah tuh Pathian ngaihdan ahi. Eilawi in bel, kua hon sinsak pat hiam theihzoh louh khat in, ‘min hon ging lel mah le uh Pathian in hon ging ta thou, min hon it keimah leh Pathian in hon it thou’ ci zawng in I keelpan ua, Pathian a tuam a, mun gamla pi khat a om bang in thuhilhna ana om hi. Hiai pentak mahmah etthak tuak kasa hi. Aziaktuh,ahon na hilh masate’n ana theisiam veklou uh hidin zong gintakhuai lahlou hi, laisiam taktak leh ngaihtuahna nguntak nei natam samlou kha ding ahih man un.

Eilawi bang bel, Pathian thu-awi nuam law mahmah te ihi ua, kisinsakna diktak ana mukha hileng, leitung a mihoihpen te ihih uh gintak huai mahmah hi. Huaiziakin, I ki zaksak tung na, insung ban ah, naupang Sanday School te a poimohna lian mahmah ahi, kaci thak nuam hi. Picin nung a tamveipi kihilh sang in, neulai a kihilh in thugen zaw hi. Kizaksak tung na in Pathian bang hihiam cih theisakna (information) pia hi, huai theihsakna in ginna (beliefs) bawl hi. Huai ginna in I khosakdan (behaviours) bawl nawn leuleu hi. Hiaiteng thum ah, amasa adik kei ngeingei leh a nungzuite dik thak theilou hi mawk hi. Amasa adik nak leh, aban ate hong dik ding a, eimah a Pathian om leh midangte a Pathian om hong kimu tuah ding ua, huci in, I khawtang hinkhua te uah, muhtheih in itna leh kituahna, diktatna leh ginomna, lemna leh muanna a omthei ta ding hi.

(290113)

???????