Zingciang January 24,2013 in Kabul Khawpi a kum khat, khattang lungzuan sial ka zoh na ding ahita hi ! Thildang genna ah, kumkhat bangmah tham hikei mah leh, Kabul – kum 2 omna ding ah, akimkhat zohna ahih ban ah,leitung a mun lauhhuai leh mauna gam ahihman in, gen neitak hisam in ka koih hi.Lungzuan sial ding mai a vahoh zaw hisam keng e, sawlkal sakol lawng-ok ihih sam man in,leh kanau te Delhi a sinlai nei te zoh ngakna kawm a, leipi a va giak zual kineih khat zaw ka hihi.
Lungzuanna zaw eikia I omziak kia le hizaw lou in, I lungsim ngaihtuah na leh thil I muhdan hi tangpi zaw hi. Atangpi a ngaihdan in, om awl hiauhiau a,lungmuangtak a mualdawn a dak a lungzuan ding sak bawl kibang hi. Tuabang hih ci tuaklou hi, bangziak hiam cih leh,tuabang hun, adiak in, ei singtangmi ten kimu ngei lou hi. Eilam la lunglawng taktak phuaktu te,asem gim leh a langlang a diangte na hi zaw uhi. Huaite lak a khat, Pu T.Thangkhum kici in,lungzuan na thu ana gen hi:
‘It leh ngaihteng kim leng vangkhua ah,
Lungjuan lai-a na abaang ding hiam?
It leh ngaih kimlou, lungjuan lah bang lou,
Kah lah bang thei lou.’
ana ci hi.Leitung ah it leh ngaih kim phitphet hun aom thei kei ding a,hucibang ahihziak in, lungjuan leh kahna te a beithei kei ding, acihna hi lel hi. Leitung hinkhua pen kipeh gaivek ahihman in,bangmah ‘hici kei deuh leh’ cih louhna mun om ngei lou ding hi. Tuacibang ding a Siamtu’n a siam mah hilel hi.Eden huan a nupa masa te gamtat khelh ziak a,leitung hamsiat a om,ahamsetu in a hamsiatna alakkhiak mateng hiai leitung hinkhua pen kikheng mawk lou ding hi.
Bangziak a Taliban kici ten,Kabul khawpi leh Afghanistan gam lak sawm a,niteng phial a bomb puaksak a, rocket khawng kapkap uhiam cih pen, azan nitak a America te lentheihna cikhat ‘drone’ kici ten a tenna gam ua bomb aksi kiak a akiaksak ziak uh na hi jel hi.Bangziak a America ten ba hucia hih uhiam ci le,Taliban kici sahkhua gindan a kulmut a,amau banglou teng melma a ngai a,thah vek ding lung sim nei a gamta te’n,mi tampi gam tuamtuam athah ban ua,America te khawpi,New York a World Trade centre a suksiat ziak uh ahihi.Bangdia huai Twin Tower hiai ten va susia uhiam ci jel leng,aziak tampi om zel ding.Bei ngei lou ding. Taliban te makai Alqaida heutu Osama Bin Laden bang leng huailai a Afghanistan luahtu Russia te doudia America te mah in training a piak sa uh,sum leh pai zong apiak uh ahi.Ei pau upa tak in, a ‘uitui’ uh hong bei ciang in, hong kimelma den ta uhi.
Agam la zaw deuh ah enle hang, America ten khovel pumpi sum koihkhawmna(World Bank) apan loan tampi petmah la un,sum bat haupen gam ahi reng ua, huai sumte a research bawl bawl un, gamtuamtuam a misiamte kaikhawm in,galvan hoih taktak bawlkhia uhi.Huai galvan a bawlkhiak te uh amau zatding a a bawlkhiak sang un, apung a zuak ding a abawl uh tamzaw hi. Huai te azuak theihna ding ua,nam khat leh namkhat kina sak uh, akinak ciang ua va dianglut un, kilemna deih cih pian a,aguk a galvan va zuak zel uh hi.Nidang pek apan,Asia gam a sum leh pai a ahuh tampen uleh a thuzoh pen uh Pakistan te a hi. Pakistan te kiang Taliban/Alqaida te douna dia galvan tampi leisak un,alei zohlouh te u le bat khawng a pia uh.Bat aneih sung uh, a ut adah ua apei uh ahi.Hucihlai a India bang leng hong helhel un,Nuclear tungtang bang a amau panpihna liauliau a sanction beisak ci un,kintak a agalvan uh hon zuak pah lel uhi.
Hiai te ka gen uttak le ahi kei zaw ua, tunitak a kei leh kei, ka tuma leh tuni neukhat ka etkak na apan,kumkhat sung keikia a kava omkhiak a bang va semkhia ka hiam cih lam ka en a,sawlkal nasep baan lam,kei mimal toh kisai lam ahi zaw ka gen ut. Hundang khat a ka gentak sa bang in, hun awl hauh ziak a,nasep khiak cih tamtuan loupi hin ka mu hi. Kabul ka tun ma in,Delhi apan ka ngaihtuahna ah,kava tung ding a,Army te Mess ah an kine dia,eikia room khat a ki om dia,hun awl tamding ahih cian,tangthu,kei mimal tangthu(autobiography) gelh khiak kitum leh ka ci hi.Laptop neukhat Toshiba model ka nei a,Office zoh ciang,weekend ni khawng in, keimai a tu in,lunglut takin ka gelh ziahziah ding kakisa hi.Ka pan deksek a,ka pat dek ve cian,thildang hihtuak,simtuak om hiam cin ka kithoi a,adiktakin gen le,pat louh teitei sawm in ka om hi.Hucih huncia ahoihlou lam a honna support tuh ‘zingsang khong le hun a omlaw kei dia, nisuaktung lungsim pailai le om ven cia..’cih bang ahi. Tutan in leng,huai ngaihtuahna in ka lungsim ah na sem lai hi. ‘dam aleh kumkhat bang om zenzawn lai hiven,dam in I gelh di cu..’ci a Setan ka lungsim a tu phenphan lai in ka mu hi.
Kum khat paita sung in Delhi 5 vei ka pha a,Kabul apan Delhi lenna in dakkal 2 sa tawmzaw akileng a,zing dak 9:30 a ihong kipat cian,Delhi a sun an nek alem geih hi. Lenna niteng a leeng om gige hi. Airline tuamtuam,Air India toh sim in 5 bang om hi.Huaiteng lak ah,kamin kibatpih ‘Kam Air’ lemtang leh fel kasa pen hi ! July kha in ka inkuan un,Pu L.Keivom paukam tak leh Mizoram ah pilgrimage in kava pai ua, huai toh kiton in hun sawtpitak kana kidek kenkan namun Shillong bang leng kava pha uhi.Mizoram ka zinna Lushai pau a gelh ding ka tum a,para 2 hiam ka zou a,ka hon gelhgelh ciang in,Lushai pau gelh ka hiam,Paite pau gelh ka hiam ka thei zou non kei a, ka din tawp hi.Laimal kibang, thumal zong kibang tampi petmah om a, akibatlouhna tawmcik omte paipih den haksa pi ahong lehsuah hi.
I gam leh nam,I hinkhua uh- taksa lam leh khalam ah,lungzuanthu leh singtang gam ngaihna thu amalmal a sim in kumpaita sung in article 30 sa tamzaw ka gelh khia hi. Ka laigelhte,research basis hilou, kei mah ngaihtuahna leh katuahkhak thilte ngen ahi a, houcik bang mah leh,eilam a mimuanhuai leh zahtakhuai kasak mahmah ka tuah khak te’n, ‘na laigelhte kana sim zel a,nuam kasa thei mahmah,hon gelh zelzel in’ ci bang a om ua,akamsiam uh sangkha lel mai inle ka kingai kei a,ka ngaihtuahna ah,’tuciang a pensioner laigelh sim ding zawngzawng pawl bang leng omthamta hi ngut a,naupang zawte ngaihtuahna leh aneu lai ua akhosakna singtang hinkhua khong asim khak non ciang ua,nuamsakna nei sam uh hi ding hi tah’ ka ci hi.Hucibang lak ah, laigelh khawng ana sim kha mahmah dia ikoih te’n na sim khawllou un, asim dia le I lamet louh himhim ten ana sim ua, ana kipahpih uh tuh,thaman mu ka kisa a,en lah nuamsa, amau lah nuamsa hih theihna omsun ahi cih kamuh dan ahi.
Niteng a hotdam a om ka hi cih ka kiphawk lailai in,April 15-16,2011 a Taliban ten Kabul Khawpi dakkal 17 sung mahmah a douna uah,ka tenna ding inthak kibawl,luah nailouh, luah ding a kakisaksak lai tak, rocket in a building,ka tenna ding bang mahmah a kha a, ka lupna gei mahmah a tukverh kilhbelhna tengteng bang a leengzak a,abuilding pumpi leh a gei a building tukverh glass teng bang a gin in a khawng zak a,katup bang a ka ut hun a huai a valut man hileng,katuah ding kava khonung muh a,ka kituahlut ding hon phallou ka Security Officer uh(IPS of 1985 batch) pa tungtawn a ka Pathian in ka hinna hon hondam ahi cih ka phawk khia hi.Hiai tungtang ‘Black Sunday) ci in saulou ka gelh om hi. Hucibang tuk a galkapna aom non kei tadih.Ahihhang in,suicide Bomb puak ngaih mahmah te zak zel ahi.Niteng thiltung hisim maimah ahihman in, va lauh luat dan leng aom kei.Kei bel,ka ompih vaite 200 lak ah,alau loupen din ka kikoih hi,Pathian kalam a apan ziak in. ‘Ka sih in leng ka hin in leng Pathian a kahi’ Paula in a cih bang a cih mai lel ding hi, asan tuh, sihna leh hinna toh kisai in, ei a ihih theih omhetlou takpi ahih man in.Hizah in zou phot ni.