COVID-19, BAAK LEH BIBLE
-Valte Ginkhenpau
COVID-19:
COVID-19 chih ahih chiang in Coronavirus Disease, 2019 lamtom genna ahi. Hiai natna ahihleh China a khopi khat Wuhan kichi a hong kipankhia a khovel pumpi zelsuak natna lauhuai ahi hi. A khenchiang in hiai natna tuh 2019-nCov chih bang a leng gen in om a, huai tuh December, 2019 kum apan hong puangkhia Novel Coronavirus chihna ahi. Kilohsawn baihlam mahmah natna ahihman in India ah leng sorkal in kilohsawn ding venna in ni sawmnih-le-khat sung a poimoh tenten loungal a kuamah inn kong pawtkhiak louh ding in thupiak bawl hi.
Hiai COVID-19 natna veite a kitheihna tangpi ahihleh chisa, khuh, nak haksa chihte hi a, sungkhoh, gawl naa, taksa naa, thilgim za thei lou, tailak naa chihte bang ah leng theihtheih hi. Khuh, hehthiai leh mi toh kihoulim hunte ah kilohsawn baihlam a, a natna hik pen mun thoveng ah leng amah kia in dakkal 72 hing zou hi. Severe Acute Respiratory Syndrome Coronavirus 2 (SARS-CoV-2) natna zaat ahi hi. Khutsil gige, tuam om, leh kinaineh lua a om louh tuh kivenna hoihpen ahi. Hiai natna a kipat nung April 4, 2020 tan in khovel pumpi a gam 200 val ah milip 1.2 million in veita a, mi 246,000 in damna ngah mahle uh mi 64,700 in sihlohta hi. Manipur ah ahihleh April 4, 2020 tan in a veitu mi nih theihsuah in om a, a veitu masapen numei ngei leng damlam manoh hita hi. A natna pen Reverse Transcription Polymerase Chain Reaction (rRT-PCR) tungtawn leh CT Scan tungtawn in matkhiak theih hi.
Lauhhuai mahmah napi in a veikhate apan kilohsawn natna ahihman in a veikha om louhna mun ah bel lauhhuai hetlou suak hi. Ban ah, a natna veitu khenkhatte'n damna ngah uh chih ahihman in a huntak a panlakna tungtawn a sukdam theih natna ahi chihna ahi.
Baak:
Baak i chih nawituine ganhingte lak a ataktak a leeng thei omsun ahi hi. Ganhing lamdang mahmah khat ahina bel, baak in amah taksa tung ah natna hik chii 100 bang pua hi. Khovel pumpi ah baak chii tuamtuam tampi om a, chii 1,200 bang pha zou hi. Nawine ganhing laklak a tampen zusa hi a, a zom in baak ahi. Baak kichi a lian zaat leh a neu zaat om hi. A neupente Kitti's Hog-Nosed Bat kichi a, grams 1 apan 2 vel lel in gik hi. A lianpente ahihleh Flying Foxes leh Giant Golden-Crowned Flying Fox kichite hi a, hiaite pawl bel kg. 1.6 vel in gik hi.
Amah taksa tung a baak in a puak natna hik khenkhatte ahihleh coronavirus tuamtuamte- severe acute respiratory syndrome coronavirus (SARS-CoV) leh severe acute respiratory syndrome coronavirus 2 (SARS-CoV-2); hantaviruses; lyssaviruses kichi rabies virus leh Australian bat lyssavirus; henipaviruses kichi nipah virus leh Hendra virus; Lassa virus; Ebola virus; leh Marburg virus kichite khawng ahi. Hiaibang natna hikte pen chiltui, huih leh kisukkhak chihte tungtawn in kilohsawn theih hi.
A natna hik puak lam theih louh ziak adiam ah khovel a gam tuamtuam a teeng mihingte lak ah baak sa ne tampi om hi. Eilak bang ah leng baaksa i nekleh zun kiteh lou chihdan bang kigen om hi. Ahi a, khoihkhak tuak leh nek tuak lua ganhing hihchi lou hi. COVID-19 hipi bang leng hiai baak a hong kipan ahi chi pawl om ua, khenkhatte'n lah nawine mah ganhing saphu apan bang leng hikha thei ahi chi leuleu uhi. Mihing bawltawm natna ahi chi pawl bang leng tuh om veve hi. Awl a thudik a hong dawk ngei lamethuai hi.
BIBLE:
Bible, Laisiangthou ah hipi thu leh baak toh kisai tamlou genkhak in om tuaktuak hi. Hipi tungtang mun 100 vel ah kigenkha a, a kigenna mun tamzawte pen Thukhun Lui ah ahi hi. Exodus laibu ah Aigupta gam a gawtna hipi sawm kigen om a (Exodus 7-13), Exodus 32:35 a kigen leng hipi a gawtna hihtuak hi. Pathian thumang loute tung a hamsiatna tung ding chi a kigente lak ah hipi leng telkha hi (Deut. 28:15, 59). Van Pathian in Israel-te kiang ah "na lak uah hipi Ka sawl a" ana chi hi (Amos 4:10).
Khovel khangthu ah leng hipi huaisetak tam veipi ana tung khinta hi. Kum 165 AD in Antonine Plague kichi, Plague of Galen chih a leng om hipi khat ana om ngei a, Asia Minor, Aigupta, Greece leh Italy lak ana nuai ek in huai ah milip million 5 in sihloh hi. Kum 541-542 AD sung in Plague of Justinian (Bubonic Plague) kichi Byzantine Empire leh Mediterranean tuipi pang khopite ah ana tung in huai in milip million 25 that hi. Kum 1346-1353 kikal in The Black Death (Bubonic Plague) kichi hong om nawn get a, Europe, Africa leh Asia gamte nasatak in sukha hi. Huai hun in milip million 75-200 kikal in sihloh hi. Kum 1852-1860 sung in Third Cholera Pandemic kichi in India tel in Asia, Europe, North America leh Africa nawk in milip million 1 in sihna tuak hi. Kum 1889-1890 in Asiatic Flu ahihkeileh Russian Flu chih a om Flu Pandemic hong kipan leuleu a, Central Asia (Turkestan), Athabasca (northwestern Canada), leh Greenland nuai ek in milip million 1 in sihloh hi. Sixth Cholera Pandemic kichi kum 1910-1911 in ana tung nawn a, Middle East, North Africa, Eastern Europe leh Russia nuai ek in milip 800,000 val in sihpih uhi. Flu Pandemic dang khat 1918-1920 kikal in kipan nawn a, hiai in khovel pumpi zelsuak in milip million 20-50 vel in sihna tuak hi. Kum 1956-1958 sung in Asian Flu kichi khat China a Ghuizou a kipan hong kipankhia in Singapore, Hong Kong leh United States hon zel in milip million 2 in sihna tuak nawn hi. Flu Pandemic dang khat, The Hong Kong Flu leng kichi, kum 1968 in Hong Kong khopi a kipan hong laangkhia a, Singapore leh Vietnam loh in kha thum sung in The Philipines, India, Australia, Europe leh United States zelsuak in milip million 1 in sihna tuak hi. HIV/AIDS Pandemic chih theih ding natna tuam khat in kum 2005-2012 sung nasatak in khovel pumpi bei hi. Hiai natna ahihleh kum 1976 a Democratic Republic of the Congo a hong kipankhia hi a, kum 1981 apan sim lel in leng milip million 36 in sihloh khinta hi.
Kum 2019 beikuan December kha apan in COVID-19 kichi hong kigen ging hi. Hiai natna pen hong kipatna ding a muanmoh a gente uh lak ah baak leng telkha hi. I gentaksa mah bang in, baak i chih natna hik tampi pawtu ana hi ngei nguttak hi. Huaiziak bang leng ahikha ding e, Pathian in sa sianglou (Leviticus 11:4) lak ah baak ana telsak in (11:19) Israel-te'n a nek ding bang uh leng ana khaam in a khoih ding uh bang leng deih lou hi (11:8).
Pansante:
1. https://en.m.wikipedia.org/wiki/Coronavirus_disease_2019
2. https://en.m.wikipedia.org/wiki/Bat
3. https://en.m.wikipedia.org/wiki/Bat-borne_virus
4. https://www.biblestudytools.com/topical-verses/bible-verses-about-plagues/
5. https://www.mphonline.org/worst-pandemics-in-history/
6. http://apologeticspress.org/APContent.aspx?article=5440&utm_source=3%2F23%2F2020&utm_campaign=3%2F23%2F2020&utm_medium=email
©Valte Ginkhenpau, 2020