NGALZANG KHUA A KA MUHKHAK HOIHNU KICHI
- Valte Ginkhenpau
Bang kum ahia chih zong thei zou nawn ke'ng. Naupang mahmahlai ka hi chih bel ka thei. Huai kum in ka pa toh Ngalzang khua ka va phakha ua, hun nuamtak ka va zangkha hi.
Ngalzang khua apan ka pemkhiatna uh sawt simta mahleh ka va zinkhak chiang un ka nite inn khawng bang ah ka kinga zelzel uhi. Mun dang a ka tunkhak chiang bang un leng ka ni Zamthei in hon hehsan hileh kilawm hial khop in hon sam teitei sek hi. Ka ni leh gang in hon ngaihnat ziak mah un a tate uh u Muanthang, u Lian, u Niangpi, u Vung, u Haunu leh u Khamnun chihte bang in leng hon ngaina zou ua, amau kiang a om leng nuam ka sa hi. Ka naunu Nenem toh lawmte deihsakna ziak a Delhi ka hohlai un leng u Vung in ka tunna ua pan hong pii in an hon nekpih a, ngaihnatna lianpi toh "na hong tunna ding uh ahi" a hon chihte uh ka thei gigelai hi. U Muanthang bang in ka pa laibu ding Delhi khopi sung mun tuamtuam ah hon va zonsak vitvit zawmahlai hi. Ka u Khamnun bang in hon naubawl in hon pawlsiam ka sa mahmah hi. Ka ni leh gang om nawn kei mahle uh tunitan dong in leng a tate uh toh kou innkuan in kingaihnatna khat ka neiden uhi. Amau innkuan kia hilou in, kou bangmah hilou napi, Ngalzang khosuak hon theikha teng in leng ngaihnatna khat hon nei vek un ka thei a kipahhuai ka sa hi.
A bul a ka gen ka pa toh ka va phak ni uh pen Pathianni hi in ka thei. Hausapu inn a kikhawm khin in ka nite inn lam ah ka pai uhi. Huai hunlai a Hausapu inn bel khotaw lam a om hiven, a khua ngei leng keen huntawk thou ahihna ah, khokhung lam i et touh chiang in mite inn khuamte nungak keeng saang gitget etlawmtak mai toh kibang muh ding om siuhseuh hi. Khua keu sim ahihna ah suangsi toh kithuah leivui kipal tou a, lamnawl khawng ah avangkim in vokpi leh a noute kinui natnat muh ding om hi. Vok ek keu, vui, ham bitbiatleh kilawm, leivui khawng toh kithehpolh muh ding zong om hi. Aktal khawng leh akpi leh a noute kizui bang leng muh ding om a, akallak in khonawl a vasa hamging kiza hiauhiaute'n singtang khua a nopdan hon theisak hi. Huihzang nung hiauhiaute'n i chii keusak sam mahleh a huih himhim siang lawlai ahihman in khopi huih lum thethu toh bel teh theih vual hilou hi.
Huai ni a ka lawmpa kua pentak hi hiam chih tunitan in ka theibun kei. Ka nite inn ah nupi bangzahhiam tel in numei naupang nih hiam ana om ua, ka ni chih louhsiah midangte ka theih a om kei uhi. Pangkhang tau a dingkhia a i khodah chiang in Hausapu inn tel in inn a hunkhop kimu thei a, a gal lehlam a mual omte leng kimu thei zingzeng a, singkung a dim gamlak khawng bang leng kidoh zihziah in muh theih hi. Mi lungzuang theite a ding in hichibangte muh tuh genkhiak theih vuallouh lunglenna tuntu hi ngei ding in ka gingta hi.
Pangkhang apan inn mailam kongkhak a i pawtkhiakleh gua phelkhap a kilemkhawm a bawl innkatau om a, anawl khat ah temtaatna suangham om hi. Innkatau toh kizom in buhbuk khat kilam om a, inn kongkhak pang saklam ah sumtawng om in huai ah leilak a kinga ansukna sum leh sukte kikoih muh ding om a, leitual ah an kisukna a kekhia anhum leh antang ban ah vainel tamlou toh kithuah vaiham muh ding tam lawtel khollou om hi. Ansepna lohpi, anhum leh antang koihtheihna lohbeu ban ah hakvang khawng leng muh ding om hi. Khenkhatte gendan in, huchibang a vaiham omna munte ah uihik om utse hi.
Tua kigenna munte lak khawng a kimawl kawm a kivialleh a ka omlai un ka nite inn a hoh, Lamka lamte chi uh a bang, huai numei naupangte'n mi om louhna deuh lui khat a va kisil ding a utthu uh gen uhi. Huchi in, mi lak a kisil ding zum chih bawl in khonawl, khopua deuh a kizang tam lou lui khat ah kisil ding sawm uhi. A omna mun pen gamlak chih theih sim khat suak ahihman in numei naupang kia huai mun pekpek a va kisil ding in ka nite'n awilou uhi. A huchih chiang in ka nite'n kei leh ka lawmpa'n va zui ding in hon gen ua, ka nial uhi. "Huai numei kisilna ah va zui ut thahah khang!," ka chi uhi. Amau lah amau kia a kisil a hoh ut lou. Kou lah hon sawl chiang ua nial.
Bangtan hiam nung in lem ka sa thei khong uhi. Huchi in, numeite'n tuibel ngou lianlou nih sung a sahbon leh a kisilna van poimohte uh guang in puanza hon vet ua ka kuankhia uhi. Amaute nung ah ka lawmpa toh lamsiik a nahpateh keu leh chiangkang omte peuh peek kawmkawm in ka zui nalnal ua, amau toh kiton helhel a pai ngam lou lampang ka hihmel uhi. Tuinek Luipi pen ka peel phei ua, ka pai zom zel uhi. Kei bel huai a lui gen pen ua hohkha ngei nailou ka hihman in gamlak ka luttak un ka gammang pian sim hi. A lui mun pen khua apan gamla lua ahi keina a himahleh numei kia a va hohna ding in bel nuam chiah lou ding mah ana hi hi. Tua, a khonung a, unaupa Biakdik kiang a ka dotchetleh hiai kisilte ka va zuihna uh lui min pen YPA Lui kichi ahi chih ka theikhia hi.
Lui ka tuntak un ka hohpih uh numeite'n a tuibel kente uh koihkhia in kisuah ding in hong kisa uhi. Hon en zual ua, khat in, "N'on et hetlouh ding uh eihkha!," chih toh hon nungngatsan thuah hi. A liang tung zawn ah, ngawng heikawi zek a nui sim heuhau kawm in, hon sawi et gu deidai hi. "Hon en ut mahmah khang ei! Na kinungaksakna ua, na mit uhle keuh nailou hilou a maw?," chi a eng dawn kawm in ka nuihsan a, lawmpa toh amau en lou chih bawl in ka kinunghei uhi. Nidang a kithei ngei lou ka hih ziak ua kizahtak tuah sim heuhuau ka hi ding uam ah, kisilna ding lui lampi a ka pai sung un khatvei mahle ka kihou lam uh ka theikha kei. Himahleh, lui mun a kihouna pan thei a ka om man un ka kinel panpanta uhi.
Lui tawlam naichik a singkung kawikhop a lian khat ah ka kal tou a, a singkung pen awn ziziai pian ahihman in huai ah, sahang singkung a bok bang pian sim in, ka khe tegel leh ka khutte kaikhesak ngehngah kawm in bok hi. Kisilte deklam zawn a om ka hihman un a nunglam uh ka mu thei ua, a samte un a liangzawn tan uh hetkha ban ahihdan ka thei uhi. Etnophuai thil lamdang lua chih ding om hi tuanlou ahihman in ka enen tuankei uh. Ahi a, singkuang kal tou kawm a ka muhkhak zualdan bel mitkha ah thamden theilai veve mawk hi.
"Ahihleh na min uh bang eita?," chi in, en lou in, ka dong phut hi. "Min kithei loupi a hiai tan hon kizui hi mawk a," ka chih behlap hi. "Kua pen eita?," chi in khat in hon dawng pah hi. "Nang min hon gen masa photve," chi in huai aw ka dawng pah hi. Huaitak in, "Kei min maw Hoihnu," chi in hon dawng a, ka etleh amau leng nui gu kulhkulh uh hi in ka thei. "Eheu! Na min a hoih law vele, Hoihnu. Na melle hoih ding chihna eive," chi in ke'n leng ka chiamnuih zeih hi. A nuihmai ka muhdan apan in a kipak sim thou in ka thei. Himahleh a min diktak zaw hon hilh lou hi ding in ka muangmoh a, hinapi in bangmah ka muanmoh thu ka genlang tuankei. A lawmnu min ngei leng hon gen hinapi ka mangngilh hithet mawk hi.
Ki-entuah ngellou khawng a ut teng gen a ka paupau sung un hong kisil khin thei khong uhi. Huchi in, awl in inn lam ka zuan uhi. Huai ni chih louh hiai lawmta numei nihte toh ka kithuahkhak hiam ahihkeileh ka kimuhkhak lam uh ka thei nawn kei. A min diktak hon hilh hia, ahihkeileh a phauhtawm min hi zaw hia a gen chih leng tuni tan dong in ka theikhe zou kei. Kankhiak leng ka sawm tuankei.
Kum tamkhop nung in Lamka ah, Hoihnu hi ding a ka muanmoh sim nungaknou melhoih huntawk thou khat tuh, a vangkim in ka mukha zel a; kimuhkhak phut chiang in ka kinuihsan heuhau cheuh zelve ua!
©Valte Ginkhenpau, 2020