MUALKAWI KHUA LEH KEI
-Valte Ginkhenpau
Mualkawi khua tunna:
Khatvei, Headquarters Veng, Singngat khua a ka teenlai un u Khoimung leh a pa pu Khailang hong lengla uhi. Ngalzang gam apan amau khua sat thak Mualkawi khua a teacher sem ding a ka pa hong chial ana hih tuak uhi. Ka pa bel amau hunlai a pawl giat tan ana simsa ahihban ah sappau bang leng, a pau lampang siam lawtel zolzol kholkei mahleh, grammar leh a gelhthoh lam ana bun mahmah vanglak hi. Ban ah, vaipau bang leng kum bangzahhiam Indian Army a Medical Corps a ana semsa ahihman in pau thei in amah aa ding khop leng ana gelhthei hi. A tangval tuunglai a Imphal khopi bang a leng laisim a ana omkha ngei ahih toh Meitei pau bang leng amah zatkhop ding thei hi. Huai hunlai a ka nekzonna pipen uh ahihleh ka nu’ mehzuak ahimai a, huai dawnzangkhai theihna leng hi ding chi in ka pa’n u Khoimung leh a pa hong dawpna ana mang ahi chih ka khonung theih hi. Huchi in, kei leng naupang lawlai ka hihman in, school va kai kawm thei ding chi in hon tonpih hi.
Mualkawi khua ahihleh Manipur gamsung apan India toh Burma (tua Myanmar kichita) gamgi a om khuate lak a khat ahi hi. Inn tawm chik, kou omlai a inn sawm vel khawng hi maithei ahi hi. Ka naupang theihdan in, a kithutuak mahmah khua khat leng ahi. Singngat khua apan Mualkawi pen lampi nih apan tun theih tuaktuak hi. Akhatna ah, Singngat apan Tedim Road zui in Behiang ah kipai in huai apan kitung thei. Anihna ah, Guite Road tawn in kipai a, Enpai khua ah pialkhia in Lungchin leh Ngalzang gamte tawn in kitung thei leuleu hi. Huailai khawng in bel gari ginatak a om kei a, khe in lampi a sauzaw kipai hi. Ka pa’n ka zin chiang un Behiang lam hon totpih mun zaw in ka thei a, a naizawk ziak chi hi in ka thei hi. February 11, 2020 in Behiang ah mi kha in ka va taaikha a, kum sawmnih val zek nung a ka phakkhak patna ahi hi.
Mualkawi khua ka tun un ka omna ding uh inn hon pia uhi. Ka mitkha bang in a khua omdan tutan ka mu theilai a, ka ngaihtuahkhak chiang in lunglenhuai bang ka sa hi. Ka theihkhelh keileh, ka pa toh, ka u Lian toh kei kia lel va tung masa hi in ka kithei. Ka nu leh ka sanggam dangte uh bel Singngat khua a ka inn lam uah om uhi.
Inn lam ngai a sim kahna:
Mualkawi khua ka tun nitaklam un vuahzu nipnip hi. Inn lam ngai a lungleng sim ka diam ah kei kia in ka inn pang ua bikhalap nuai ah, kuamah theih louh ding in ka va ding hi. Nitum kuan, vuah phiin sisilh lak a mei san-eng singsengte en kawm in ka mittui a hong luang zungzung mawk hi. Bikhalap a vuahmal taakte’n huih a nung zek chiang in hon thehkha sengseng ua, leitual deng vuahmal hong zuantoute’n ka khepek leh ngaltak khawng hon theh keuhkeuh hi. Huchia kei kia a inn lam ngai a sim kah kawm a ka din nung sawtlou in ka pa’n inn sung apan hon sam a, “Huai bikhalap nuai a bang va hih na hia oi? Houh va guk kah na hialeh?,” hon chi hi. Bangmah in ka dawng kei. Hiai nitaklam a inn lam ngai a ka sim kah pen ka damsung a di’a lungzuang a ka kah masaknapen ahi ding in ka koih hial hi.
Teizang pau theihbuaina:
Hiai ka va teen thakna khua uh Mualkawi pen Teizangte hauhsakna khua ahi a Teizang pau kizang hi. Teizang pau kiza mun lou ahihman in theih ding zah kithei nailou hi. Nitak khat u Khoimung’ inn a ka pa toh va leengla hive ung aw. Ka pa toh amau houlim tui mahmah mai uhi. Ka dang hong taakta. Pau sese lou a tuithei leh tuibel omna lam va naih. Chihleh u Khoimung in, “Paupi, tui dut ing maw?,” hon chi. Bangchi ngaihtuah ka diam ah, ke’n leng kintak a, “I, dawn dek,” chi a dawngkik pah gaih. Hon theisiam kawmtak in hon nuihsan heuhau a, bangmah gen tuanlou hi. Huai ka dawnna nalh sa lua uh ahi diam ah, ka phawk ma in kuakua hiam in ana zakha pah in hon chiamnuihna in zang sek uhi. A nung lam in ka sanggamte mahmah hon chiamnuihna a suak a, nuih theihna thu hong suak ahihman in kichian mahmah vanglak hi.
Lawi chin a nopna leh haksatnate:
Kei bel ka omna peuh nuamsa pahpah, kei omom a om thei mi khat ka hi hi. Tua ka om thakna khua bang leng nuam ka va sa pah zel mai hi. Kiginni chiang bang in lawi khawng ka ching ua, Tuivel luipi dung khawng ah hun ka zang sek uhi. Lawi chin chiang a haksa ka sak mahmah khat ahihleh, khedap ginatak bulh ding om lou a sai-an kichite lak a pai ahi. A bul i chi hiam, ahihkeileh, a nou pou tuung zumzitzette’n khetaw hon dawtkha sek ua, naa thei mahmah mai hi. Khedap taw khauh ginatak kinei lou zawmah ahihman in sai-an lak a pai ding kilin gu thei petmah mai a, himahleh paikhak veu kul veve sek hi. Kaang chikchik a pai i chih chiang in leng kigin louh laitak bang in hon na dawtkha ek nuam sese bang hi.
Lawi chin chiang a a tung a kituang inchin nuam kisa in kilungkim mahmah. A nuam hetlou khat ahihleh, vuah hong zuk lam chiang in chithak chihdan deuh, lawi natna chih ding adiam ah, kivei thei mawk hi. Lawi tung a kalkak a kituang hiven, huai chithak chikhat i gen pen i khalkal leh pheipi lak khawng ah hong om in nuam hetlou hi. Huchibangte a kivei chiang in meh lak a kisoh chite peuh in kizut in om a, thak toh taak sesu thuah in nuam ngiallou hi. Huai lou, a nuam lou ka sak dang khat ahih nawnleh, mit naa hong kithang inchin huai ahi. Mit naate’n zuntui a mai i phiatleh dam pah ahi a chi ua, himahleh ka phiatkhak lam bel ka theimel nawn kei. Zingkal i thoukhia bang tuh mit kihak thei lou, kilawidak i chi hiam ah, kivandak siuseu maidan ahi. Mit i hah sawm teitei chiang in i mivun tunglam leh nuailamte mitnai a kibelhkip ahihman in taak velvul toh nat petmah thuah hi. Ka naunu Vung pen hiam hong hohkhak hun in leng veikha man in ka thei.
Gante ching ding a a kikuankhiak chiang in vuahpi peuh in hon pha thei zel hi. Huchih chiang in tui san nuaunuau khawng kan ngai hi. Huai hun chiang in lawite pang beel in amau khanglam pang ah ka pai zel ua, tui hattak a kikhohte bang khauh hetlou in, lawite pang a awlchik a pai kawm in ka kan thei uhi. Ka gintak sang mah in lawite tuh gamlak ah pilvang mahmah uhi. Lawi pichingte bang in amau chingtute meltheih ua, hehpih thei mawk uhi. Thawmging lauhuai a omleh vandak pah liklek in biltung zen in limtak in ngaikhia uhi. Huihpi-vuahpi hong kipan ding ahih leh hih louh bang leng theithei mawk uhi. Gamsa hiam mihing hiam ahihkeileh huihpi-vuahpi lauhuai om ding ahi chih a theih uleh bitna ding zong in taikhe thei mawk uhi.
Lawipi’n hon hondam:
Khatvei, lawi ching khin khomui kuan in inn lam ka tungkik uhi. Lawite a buk uah khum ding in ka kisa uhi. Tuklai ahih toh huai ni bel khua bang niim demdom maimah a, lungzinhuai chih ding khawng bang hi. Chihleh, vanpi ging domdom toh mei vompi hong kizial huthut a, mial ngemngom maimah hi. Vanpi ging domdom lak ah kekkia in a kallak in kawlphia hong vak sotsot hi. Huchihlai in kei pen lawi nou khat, lawi tanggan a chi uh hia, huaite khat tung a tuang ka hi hi. Huihpi toh vuahpi kithuah dingdan a hong bat chiang in lawi honte patau in taizak ding in hong kisa uhi. Huchia lawi dangte a hong taizak huthut laitak un ke’n leng huai ka tuanna lawinou pen awl in a nungzang ka beeng hi. Huaitak in, thakhat in hong kikhoh zonzon mawk a, let ding mumal om lou ahihman in a tung apan kei hon sepkhia hi. Leitual ka kidenna pah hi. Ka nung zek ah lawipi, a ki bang kuum tuah hial, lian deuh mai khat hong kikhoh phei vutvut hi.
Ka tuanna lawi tung apan leitual ka kiden khit toh kiton in huai lawipi in kei hon chilpheikha thei ding dinmun in om hi. Huchia leitual a panpihtu bei a ka thallup lai in huai lawipi in ka maitang zawn ah a mailam khe hon liiktou in hon tuansuk dingdan in kisa hi. Laukawmpi in lawipi khadang apan beidong in ka entou likliak maita a, a khadang bang ka hoih muh touh ngial hi. Himahleh, kei a hon muhtak in huai lawipi tuh hong khawl chet thei vanglak hi. A taklam khe tuh ka maitang zawn ah liksa in dinkhawl gelgawl nilouh hi. Lau lawtel ka hi ding a, tunitan in ka mitkha ah huai a mang thei nawn kei hi.
Lawipi in ka hinna hon humbit ahi ka chi hi. Pathian bel ahisa hitaleh.
Mualkawi khua a ka lauh khat:
Ngalzang hausapu’n a gamsung ah Nepali-te teen theihna ding phalna pia in teengsak hi. Amaute’n bangkol, lawi leh ui khawng tampipi nei ua, vaimim leh ankam khawng a chiin ban uah gankhoi a thangsak uhi. Sun chiang in a gante uh ching zoizoi zel uhi.
Khatvei, luidung mun khat ah Nepali papi khat zi kisillai hong kelum mawk chi uhi. Ka mit in mu kei mah leng a gendan un, huai a zi pen a mel bang leng hoih huntawk chi ua, a pasal in it mahmah chi uhi. Huai amah kiaklupna mun a ka paikhak chiang uh hiam ahihkeileh huai kiim nai a ka vakkhak chiang un ka thawmhau zou uhi.
Sunnung khat luidung a ka kisil sekna mun uah Nepalite’n a bangkolte uh ana kibualsak laizang uhi. Kou leng heh lua in suang in ka deng ua, ka hawlkhia uhi. Huai zoh in kou ka kisil zaizai uhi. Huchihlaitak in Nepali-te a temkui uh toh hong pai in bangbang hiam amau pau in hong gen zolzol ua, heh petmah a heh ahi uh chih ka thei pah mai uhi. Ka kilau keisak khemkhemna ua hiven, a guktak in bel ka lau mahmah uhi.
Mualkawi a ka om sung ua lawi ching a ka kuankhak chiang un Nepali papite leh tangvalte tuahkhak phut ding ka guuk lauh uhi. Amaute thutuam hileh, a uite uh tonpih sek ahihman un a ui hangte bang uh ka lau ua, a bangkol hangte uh bang ka lau kholdiak uhi. Napali-te pen gamlak khawng a i muh patna bang ahih uh toh kimaingal hetlou hi. A kawng ua kukhri kichi hia, huai temkawite a vom uh toh, akhenchiang bang a a khut ua tawi gelgawl kawm a hon en gemgam uh ahihman un kilau hi.
Ahi a, naupang i hih man in i lau chih thu ahi a hiven, adiktak a amaute’n a khotualte hon guk lauh zaw uh tuh ana hidan eive.
Mualkawi khua nop ka sakna khenkhatte:
Mualkawi khua ahihleh luipi in a umkual khua lianlou khat ahi. Huaiziak in, luidung a hoh chihte kithangsak hi. Ka pa makaih in ngasa leh aisa antah in nitak chiang bang in ka kuan sek uhi. Gua a keute tamkhop tomkhawm in lom lian huntawk in ka gaklom ua, huaite ka antahna kiang uh luipang ah ka nawse zel uhi. Aihalh a kuan bel aisa man ding sa kihi mai inchin, athawn a kikik ngei lou. Khua a mial chiang in meisel kide a, lui taw lam apan kipan tou in huai antahte kivil toutou a, meisel a hong tum dek chiang in meisel di’a a lom lianlou a bawlsa a kikoih guate kide thak zel hi.
Tengkol sawk bang leng a nuam mahmah khat hi nawn. Sun sang in nitak a tengkol sawk nuam ka sa zaw hi. Tengkol sawk a kuan chiang a a nuam lou khat ahihleh, tui sung a suangpi pang teng mu loupi a khut a kimai ahihman in lung dandeuh ganhing lianlou nip deldul khawng maikhak in om nelnol sek hi. Aihalh a kuan kawm khawng in tengkol kitom kawm zel a, avangkim in leen paihthohte paih in ngasa kiman zel hi.
Ngabeng a kuan bang leng nuam mahmah nawn hi. Huai hunlai a bel damdawi a ngasa mat chihte om gina nailou ahihman in ngasa bang tam thei vanglak a, gu khawng kisu in huchi in gukham ngasate kiman zel hi. Ka pa’n lenpaihte gaan thei ahihman in sun chiang in gaan a, nga matna lam a kisete bang leng khui zelzel hi. Kei leng thil thei ut mi khat ka hihna ah ka va kisin zel a, himahleh ka siam man kei. Lenpaihdan ahihleh ka lunglut toh ka theisiam pah a, ka paih dangdang thei sam man hi. Tuchiang in ka paih theilai diam ah chih bel ka thei nawn kei, ka paihkhak louhna a kumkum a sim hita ahihman in. Ka pa bel khut kongkaw nei mi ahihman in tuilak a sawt deuh ka om chiang un a khut peuh hong kongkaw zel hi. Huchih chiang in ka meisel khawng un ka hai lum zel ua, huai a huntawk keileh luidung a gaw keu omte tomkhawm zok in meiphualpi peuh ka toh ua, huai ah ka kihai lum phot zel uhi.
School kai tawp sunnung chiang in kho nawl khawng ah lawmte toh ka va pai ua, the khawng ka va man sek uhi. Singkung a bawm geigai kawm a ham selsel thete zawl in, “The aw nung tawn, nung tawn. Na lu lam ah gal om e. The aw nung tawn, nung tawn” chi khawng peuh in a taw zawn ding a khut kuak doh in singkung ah ka bawm tenton sek uhi.
Sunnung lam hunawl khenkhat chiang in Tuivel dung ah lawmte toh ka va hoh ua, ngasa ka va man zel uhi. Huai hun chiang in leen hiam bangmah ka tawi kei ua, gawteh keu tuilak a kiate ka ngasa matna uh ahi mai hi. Gawnik keu tuilak a kiate luum vilvel, a sung hawm hiven, huaite tuitaw a daina siak tan hiam khuktan hiam a thuukna munte khawng ah om sek hi. Huaite awl a gem in, kaang chik in a bullam leh tawlam tuak kimekchip a, a sung a ngasa a omleh kithei hiven huaite tawi in tuipiau ah ka paikhe zel uhi. A man thei deuh bang omse ua, kei bel a man siam lou lawilak ah ka tel hi. Mi kuate hiam in luidung a gu suu a ngasa man uh ahi chih ka theihchiang un, a zingchiang khawng in gulau ngasate man ding in va kidelh zel hi.
Lamka lam a ka pem nung uh kum 2009 vel in Mualkawi khua kichi mah ah ka teengkha nawn uhi. Hiai khua ah leng a luipang lam mah ah ka teeng ua, himahleh a nopdan a tuam hi.
Kareh! Ana sau gawp man zel eih. Exam hi hiallou ahihna ah hiai zah in hunsak phot ni aw. Haha...
©Valte Ginkhenpau, 2020