A BOU DEUHTE MAH ZAW HOIH HI
-Valte Ginkhenpau
Nitum kuan khawng a Imphal leh Lamka kikal a i taikhak chiang in lamnawl khawng ah nungaknou kizui ana om zelzel uhi. Khatvei ni ngial houh nungaknou bangzahhiam ka mailam ah ana kizui nainai uhi. Khekol leh t-shirt kigak huntawk a kizem chiat ahihman un a taksa pian uh nalh huntawk litlet ngenta ahihdan uh bangtanhiam kithei thei hi.
Lamlian hoih lawta ahihman in hat huntawk thou in ka tai a, amaute ka phak kuan in ka awl tai hiaihiai hi. Huchia ka tai phei zelleh amaute’n leng ka gari gin za ahi ngei ding ua, hong kihei sasauh uhi. Mel vak huntawk kiukiau ngenta ahi ua, hon thei ngei uh hileh kilawm in nuihmai hiuhiau kawm in hon en uhi. Ke’n leng en zual mah leng amaute phakna tan chiang a lamlian hoihna bei chet ahihman in huai a hoih louhna a taiphei ding huphulh kawm in ka kikhin phei zel hi.
“Eih!,” chi in ka mi puakte khat, ngaih lawtel lou in hong kikou kuau a, nuih toh thuah hi. Ka gari leng hong tuan bouh a, a nunglam kuang sung a a pei thaklai khat ka puak pen toh a bawlna siik van tamlou omte leng hong kitat ging leuh hi. Kei leng kisuanglah sim in, nui themtham kawm in, ka taltang zawn a a nunglam et theihna limlang om pen ah ka nung a tute ka en keukau hi. Amau leng hon mu ua, bangmah gen zawsam bel om tuanlou in ka kinuihsan heuhau uhi.
Ka ngaihtuahna masa ah hichia hong kitat tuan bouh ziak in, gari dawm lawlai ka hihna toh, ka hehsim hi. Huai nungaknoute pelh khit toh kituak in veilampang a a nunglam etna limlang ah mitsik in ka en nawn hi. Suangsilak lamlian leh a kibawl thak lamlian hoihna kikhenna kikhoukhiak sim ahihdan ka muchian mahmah hi. Ka ngaihtuahkik chiang in, “Oho! A gengen namah ua a bou deuhte mah zaw hoih hi,” ka chi thak hi. Engchihna leng hi tuanlou in, tuuk nih hiam thum hiam in bou litlet suak zouleh leng etlawm a hoihsem dingdan zaw ana hi aka.
Nidang in bel a bou muh ding om ngellou hi. Tuchiangchiang in ahihleh a bou tam mahmahta a, lungtunhuai thei ka sa hi. Tunung sawtlouchik chiang a Imphal apan Lamka tan bou litlet tawnsuak zouta ding a ka gintak man in kipahhuai ka sa hi. A kisaipihte phathuai uh ka sa a, phattham ching uh leng ka sa hi. A boute mah mite’n leng pakta a, a nop leng nuam hi.
©Valte Ginkhenpau, 2020