KHOTANG HOIHNA DI’N...
-Valte Ginkhenpau
Mi tamtakte’n i khotang a siatdan a gen uh ka zasek a, hihtheih bangpi om louh man in puaknathuai sak in om a, poi mahmah hi. Alehlam ah, khotang hoih lou kichi in hon hilh theih ahihleh mimal hoih lou kitam ahi chih ahi.
Khotang hoihna ding in saptuam pawl tuamtuamte leh NGO tamtakte’n panla uhi. Amau nasepdan tuam chiat mahleh a tup pentak uh bel khotang hoihna ding chih ahi. Dotna nih kidong zualle: Banglam pang a i khotang uh sia hiam? Banghang a i khotang uh hichi siat ahi ding?
Hiai a tung a dotnate dawnna i piakdan a kibang kim khol kei ding in a gintakhuai hi. I khotang uh a siatdan gente’n nekguk-takguk, khamtheih, numei leh pasal kal a thanghuaina, diktatlouhna, leh a dangdangte a gen uhi. Banghang a hichi siat tel hi ding hiam chih tungtang ah a ziak tampi gen ding a om kha ding hi. Khovel goute leh khovel nopsaknate i teel zawk sek ziak uh ahi chi leng i genkhial khol kei maithei hi. Bible in manthatna kong zaa/lian ahi a chih bang in khovel ah a hoihlou lampi zuih ding pen lian in baihlam mahmah hi.
I khotang hoihloutak hoihsakna ding in michih in mohpuakna liantak kinei chiat hi. Innsung a hoih keileh mimal a hoih kei di’a, mimal i hoih keileh lawmta kal a hoih kei di’a, lawmta kal a hoih keileh Veng sung a hoih kei di’a, Veng sung a hoih keileh khotang hoihlou ahimai hi. Khotang a hoih keileh saptuam leng a hoih theikei ding a, huchibangmah in, saptuam a hoih keileh khotang leng a hoih thei kei ding hi.
Huchi ahihna ah, aleek lam a pat sang in a bul mah ah pan lehang dikpen ding in gintathuai hi. Abul ahihleh innsung ahi. Bible in naupangte thununna pate’ khut a A koih lai a, sapgamte hihdan chihbawl a, amau utdandan a zalentak a omsak mawk a hoih kei hi. A paina ding lampi ah naupang chiil leng a let tan dong un mangngilh lou ding uhi.
(Eimi Weekly, Vol. 2, No. 52, peek 2na apan laksawn ahi.)