BIAKNA CHII NIHTE
-Valte Ginkhenpau
“Aw hong pai unla, bia in kun ni e:
TOUPA hon Siampa ma ah i khukdin ding uh”
(Sam 95:6)
Thukhun Thak Bible sung i suut vengveng chiang in “biakna” pen, a lompi a gen in, chii nih in khen theih hi. Huaite tuh “Biakna Thawn” leh “Biakna Dik” ahi. Biakna Thawn i chih pen Biakna Diklou leng a chih theih ding a, Biakna Dik i chih chiang in Pasian Deihdantak a biakna ahi chi in tomkimtak in a genchet theih ding hi.
Hiai anuai ah enchian ni.
1. BIAKNA THAWN:
“Biakna Thawn” kichi in a huamkhak theih hiai anuai ate ahi:
i) Theiloupi A Biakna- Hiai toh kisai sawltak Paul in hiaibang in na gen hi: “...nou Athen khua a mite aw... na chibai bukte uh ka et lai in, Theihlouh Pasian a diing, chi a gelh, ka mu...” (Nas. 17:22–23).
Theihlouhpi biak chih mawk pen biakna thawn ahi.
ii) Mihing Thupiak A Biakna- Toupa Jesu’n hichi in chi hi: “Abang abang hileh, a thuhilhna uah mihing thupiak a hilh ziak un a hon biak uh a thawn mai ahi...” (Matt. 15:9; Luka 7:7).
Laisiangthou a kimu hilou, mihingte hoihsak bang a biakna pen biakna thawn ahi.
iii) Ut Bang A Biakna- Kolosate kiang a a laikhakna ah Paul in hichi in gen: “...ut bang a biak leh, thunuailut leh, pumpi engbawl... tuh bangmah himhim a phatuam kei hi. (Kolosate 2:23).
Ei hoihsak bangbang, ei ut dandan a biak mawk pen a phatuam kei a, biakna thawn ahi.
2. BIAKNA DIK
“Biakna Dik” kichi chii tampi om lou a, theihkhelh theih ding khop in leng theih haksa lou hi. Toupa Jesu Khrist in mawlchik in hichi in gen hi: “Pasian zaw Kha ahi; a bemite’n kha leh thutak a a biak ngeingei ding uh ahi.” (Johan 4:24).
“Kha” i chih chiang in “i lungsim tengteng leh i pumpi tengteng nasan toh kipia a Pasian biak ding” genna hi a (Sam 9:1; 86:12; Rom. 12:1), “Thutak” i chih chiang in “Pasian’ Kha Siangthou’ hatkhum a piak Laisiangthou sung a kigelh bangbang a biak ding” chih genna ahi hi (Jn. 17:17; II Tim. 3:16-17).
Tuni chiang in gingtu kichite lak ah Pasian biakna kikhat lou in, biakdan leng kikhat hetlou mawk hi. Kha Siangthou’ hatkhum Laisiangthou sung a kigen bangbang a Pasian bia hi leng bel i biaknate uh kikhat vek ding hi.
©Valte Ginkhenpau, 2019