Outer Line Permit
~ Pauzagin Tonsing, Columnist Zogam.com
Phaizang bial a ILP, oops! a lamsau le ngai nawn zawzen lou himahleh Inner Line Permit deih in phin in a kiphin maimah ua, lungzinhuai mahmah a bang hi. Niteng ngeina hinkhua a toknok ua, Solkal pisa na tawm aduk-adak a le sem theilou in a koih ua, Manipur tuh hinna bei bang phial in a koih zou uhi.
Inner Line Permit chi in tangkoukou mahle le uh amau (Talpakte) pen SingTangmi (ST) hilou ahihna uah ILP diktak pen zat a om louh ding theihsa ahi, a ziak chu huai tang diing drafting committee phuan uh ahihna ah. Mangkangte in ST-te’gamleitang neihna kepbit sak a, a tawndan uh leh ngeina uh kepbit sawmna a hiai ILP ana bawl uh ahi a, tu in India a namsang General Category in zat hon sawmna pen uah a diktheilou leh thil hitheilou khat a hon sawk uhi.
Hiai ILP kiphinna a pipente’n a hon gengen chiang un Vaigam apan a hong lut vaite sang in Manipur Opkhumlouhna (Outer Manipur) a ST-te huphulhna a hiai bang kiphinna nei uh a bang hi. Agam leitang in a piansak (indigenous) i kichi utlai in Myanmerese Kuki chih in Non-Naga ST teng a hon chiamteh uh a, huaite huatna thupi tak ziak a hiai ILP om bang in a langthei hi. Himahleh ei lawi in bel ei hon huatna ua ILP kiphinna om ahihlam phawklou in i om niilneel lai uhi.
Ngaihtuahna ana sou mahmah a, himahleh a field a omkha nawnlou chi a gal et zek i sawm hang in sunglam a phuutna lian tak om man in ngaihdan haihuai pi gelh sawm get i hi. Khovel paidan ah mial a om leh vaak a om a, khum om leh kha a om, hoih a om leh sia a om a, lum leh vot a kikeelki ua, sungnung leh ponung tuh chikmah in mun khat ah a om khawm thei kei mawngmawng uh! Tuaziak in Inner a omleh bangziak a Outer om lou diing??
ILP a ngetnget hang un ST hon muh loh thei dinmun ahi ua, tangtak (direct) a ST a nget uhlah i dal ut kei diing ua, huai ziak in hihdan chikhat nei in Outer Line Permit (OLP) kiphinpih mai hoihzaw lou hia i chi hi.
Phaizang mite’kiphinna in Inner Line Permit a gen ua, singtang a General-te’n gam a neih theihlouh lai un ST in inner (phaizang ah) gam a nei thei uh chih khawng a tangkou pih khat uh ahi. Hiai omdan bel ST in phaizang a gam a neih theih uhleh Talpakte’n leng singtang ah gam nei thei uh hen chihna ahi. Phaizang gam neu chik a ST te nuam tak in a khosa ua huchi bang in general-te (Talpakte) leng singtang ah khosa thei uh hen chih khawng ahi hi. Hiaite pen ngaihtuahna tawmchik neite’n i man ban kei diing, indirect a a kiphinna uh a ngette uh ahi.
Tua ahihman in, amau leng singtangmite direct a hon kawklou uh hinapi in hon galbawl den uhi. Huaiziak in e’nleng hihdan chikhat i bawl uh ngai ahi. Amau a kiphinphin in kiphin uh henla, a ngetnget uh ngen uheh. Eite’n leng amau direct a dou hetlou in kiphindan chikhat I neih a kuulta hi. Tua diing in Outer Line Permit (OLP) ngenta ni i chi hi. E’n leng direct a kawklou in singtang mite hihna kepbit sakna dia dan tuamtuam omsate mah pansan in, apoimoh bang a dan bawl thak a om a, huai dia State Government in Drafting Committee (general tellou a) a phual hial zoh diing ua kiphinna neih hun mahmah hi.
OLP movement a bang kiphin pih diing i hiam i chihleh :
Khatna ah, singtanggam/ Outer Manipur a 1951 nung a non-tribal gam nei teng in orginal owner kiang a a piakkik diing uh, piakkikna diing omloute Solkal kiang a a lut diing.
Nihna ah, MLR & LR Act kizat nung a singtanggam/ Outer Manipur a non-tribal gam nei tengteng in gam neitu masa pen kiak a a piakkik diing uh, piakkikna diing omloute Solkal kiang a lut kik diing.
Thumna ah, Outer Manipur a MLR & LR Act nuai a innmun leh lougam patta-te tengteng ADC nuai a lutna dia Dan a om diing, gamneihna tungtang a ADC thuneihna sang pen ahih diing.
Lina ah, Outer Manipur a singtang mite’n gam man dual tax piakna omte beisak a, Outer Manipur a Hill House tax kia piak diing, huai leng ADC kiang a piak ahih diing
Ngana, Outer Manipur huamsung a Manipur Forest Department in reserved forest leh Sanctuary a neihte community/ Village kiang a piakkik diing
A point tuamtuam di hiaiteng api deuh hi henla, hiai OLP movement patna diing in nomenclature hiam tribe based organisation hi kei henla, JAC pian in kipan hileh. Hiai OLP kiphinna pen issue based ahihna ah kuamah kidang koih lou in thautawi leh tawilou pawlpi tuamtuam, vengsung youth club leh saptuam pawlpi tuamtuam na tawm in support thoh in kipatdan khat i neih thak kei uhleh tunung a buaise diing i hi uhi. Galleng (Naga) lam a lunglut kei uhlehle Zo suante beek i kisak kei uhleh a thuak gim di eite mah i hi, Galleng lamte ahihleh a Talpakte’n leng a nam ngam kei ua, amau area chu luutna leh opkhum leh laksak dia le a ngaihtuah louh uh ahihna ah a lunglut khol kei diing uh.
©July 31, 2015 | Pauzagin Tonsing