NEMTHAWN 30
By Pauzagin Tonsing, Columnist Zogam.com
Manipur a kiphinna om chiang in huaise thei mahmah a, kiphinna a neih taak ngal un chu lohchin ma bang kiphin peih dan ahi mawk uhi. Dan toh kituak hia kituak lou chih omlou in kilual leh kithutuak tak in a kiphin thei ua, kong khat ah pahtaak huai mahmah uh chih diing ahi. Bangmah theihlou na tawm in kiphinna uh gum in, a hahpan pen in pang uhi. Tuaban ah, kiphinna neih diing a ngaihtuahkhetute’khuak leng a duaisan kei a, a kiphinna san uh a lohsap tawp lehle koilam hiam a gen nei mahmah diing in a kiphin pih sek uhi.
Tulai tak a Meitei-te kiphinna leng tangtun theihlouh diing Inner Line Permit (ILP) ahi mawk hi. Mangkangte’n hon opkhum lai ua nam tuantualte lak a namsangzawte a lut uhleh tua nam tuantualte’hihna mangthang thei diing ahi chih muhkholhna a nam tuantualte lak a lut theihna dia permit ana bawl uh ahi. Tuni in hiai nam tuantual hilou, India in namsang (general category) a a koihte’n nam tuantualte’kivenbitna phaw (shield) ngen uh ahi mawk uhi.
Amau sung a khuakpilna leh theihna sangzaw neite na tawm inle thil hitheilou ahihdan media leh social network khawng ah gengen ua, himahleh kiphinte bel a tolh tuan kei uhi. Tulai tak a a kikawkmuh uhleh kihilhna uh tuh Scheduled Tribe (ST) hi phot le hang huai chiang in ILP hong hithei diing ahi chi uhi. Huai ziak in tua ILP kiphinna pen ST Demand lam a hong kihei in kiphinna huaise zaw sem hon hih diing ua, ST leng hon mu petmah diing uhi.
Ahi a, hun paisa apan in a kiphinnate uh awm lou taktak kiphin pih uhi. Himahleh hiai awmlou taktak a kiphin pih pen uh a ziak diing zon tawm hihthoh sim a bat hang in koi lam hiam a gen nei mahmah ahi thei zel hi. Phualpi Solkal in singtang mite hamphatna diing leh hoihna diing banghiam gen-le-sak a neih chiang un hichi bang a kiphinna a pan deuh tangpi uhi. Tu in leng Outer Manipur a Sixth Schedule koih diing chih leh Naga Issue a om ziak in kiphinna a neih lel uh ahi. Ziak di zon tawm a kiphinna a pat uh himahleh kiphindan siam ua, thuneitute’bil dohdan diing in kiphinna nei thei uh ahihman in a lohching kha naak uhi. Tu in leng ILP ma in ST bang hong hi thepthup di uh hia chih a muanmoh huai ahi.
Amau’kiphinna in a tup tak uh ahihleh a thil nget uh pichin diing khat hileh, huai sang a thuukzaw ahihleh tribal-te a dia thil na hih dek pen uh chin-le-ha suang a nang ka hi uh chih indirect a show-na uh ahi. E’n bel a thil nget pen uh mah chauh ana en in huai a kiphinna thil kiseelgu pen i mu thei mahmah kei ua, tua naksang in lawi khat in a kiphinna pen i na support laizang uhi. Manipuri Eight Schedule a guan di bang ei a dia poi hetlou di sa in i support ua, hun hong pai a i khonung buai ua, eimah lutung a ek kithak lel i hikha uhi.
Huchi kawmkal ah ei lak ah bel Phualpi Solkal apan bang hiam om chiang in muh hiau diing i na sa uhi. Tulel a Sixth Schedule bangle ADC member-te leh MLA/MP-te hong pang zekle uh mu dia kikoih in amau gamtat ngaak hiuhiau mai. Huchi bang a tua elected-te bangle muh mai dia gintaak ziak a mipi lam mobilised zek poimoh ahihdan phawk ban lou hile kilawm lai.
PV Narashimha Rao hun (early 1980s) a Parliament Session a gen hoih tak in en tuantuan le hang, piakpah diing bang in a langh hi. Tuamah hun paisa ate ahi a, a gah loh hiau di ngen in i gen ua, i lam-en ua a thawn den lai hi. Kum 30 nung bang ale muhpah ziau dia ngaihtuahna nei lai hile kilawm a, ahihkeileh huai lai a nemthawn heutute’mah i lak ua thutanna latu ahihkhak ziak uh leng ahi kha mai thei hi.
Kum 30 kinepthawn tutung in chu hong tangtungta ngal lou di hia?
Tutung a lam-ethuaina mahmah ahihleh Congress Solkal sang in NDA in nam tuantualte dopkangna diing in nna a hahsepzaw chi le i khial kei diing (India a Congress vaihawm hun leh BJP (Janata tel in) makaih hun sung tehkak le Congress a tam mahmah a, hiai a vaihawm hun sungte gel ua nam tuantualte a dia sepkhiak kua’n a hauzaw dia?) Huaiziak in NDA in nam tuantualte hon awlmoh in, hiai kum 30 bang koih dap a om pen hon pichin in 6th Schedule hon koih mai na lou diing hia chih gintaakna a om thei hi.
A pichin theihna ziak dang nawn ahihleh BJP makaih in Malsuah bial ah lu-ngakna diing kichian a deih mahmah uhi. State khat beek a vaihawm a ut ten diing uhi. Huaiziak in tulel a Manipur luh theihna diing a om sun ahihleh ADC tungtawn a lut theih diing dinmun in a om hi. Hiai ADC nuai a member-te political affliation neilou ahihna uah amau zolna in 6th Schedule a koih theih mahmah diing hi.
State Solkal in dal mahleh Andra Pradesh bangle State in a nan hat mahmah hang in Central in thuneih khum in Telegana hon bawlkhe thouthou uhi. Huaiziak in state in a ut dandan in nang mahleh Phualpi Solkal in nam tuantualte dopkangna diing in State thuneihna nelhsiah in Manipur tanggam ah 6th Schedule a koih thei hi. Tua ban ah Article 371C pan san in President/ Governor thuneihna zang in leng singtang mite kivaihawmna diing a thuneih khum thei lai chih khawng ahi.
Huchi kallak ah, kum 30 kinepna pen kinemthawn den theilai ahihna khat bel om veve hi.
India Phualpi Solkal in a gam sung a om mi lawi khat nelhsiah a lawikhat tuamhui leh deihsak tuam chih a om thei kei himhim hi. Eite ngaihdan in Meitei-te sang a Singtangmite deihsak zawk, mit nauta kep a kem chihdan a ngaihtuahna i nei sek uhi. Himahleh Phualpi in State thuneihna paalzuut hial a huai state sung a nam tuantual leh nelhsiah a omte peen hut taktakna diing in bangtan thuakna leh bawlsiatna nei uh hiam chih chet mahmah uh ngai diing hi.
Huan, tulel a ILP kiphinna tungtawn in Phualpi etdan diing ah singtangmite sang in Talpakte dinmun dengdelzaw bangsak diing in kiphinna a nei uhi. Hiai in singtangmite dinmun hia ahihkeileh talpakte dinmun dengdel zaw chih et theihna a piangsak thei hi. Hiai mah Talpakte kiphinna mah ahi. Ka state uh leh ka gam ua ka dinmun uh lauhthawnhuai ahi chi a a kikoukou uh kha.
Tuaban ah, hiai Talpakte kiphinna in Phualpi in singtang gam a 6th Schedule koih hitaleh bangchi lel a phaizang bial ah kiphinna leh nanna om diing hiam chih zong langsak uhi. Ei mimawl takte muh dan ale Singtang gam toh kisai issue om chiang a Meitei-te kiphin uh ahih chih ahi, hiai kha Phualpi solkal in a haih teuh kei diing chih theihsa ahi.
Huan, BJP solkal in Manipur vaihawmna let theihna diing in ADC tungtawn a Manipur lut diing in i ngaihtuah thei hi. Ahihhang in phaizang bial ah MLA a tamzaw a, huaite etlahna in singtangmite deihte pia in phaizangte deihlouh ahih ngam teitei kei peuhmah diing uhi.
Ban ah, hun paisate a i muhlouhna san uh State Solkal nanziak ahih ban ah mipite mahmah inle kiminna neilou, phuutna neilou in ma-na kiat a kiat mai diing ngakna ahi sek. PA Sangma-te report ngial ah …not serious hon chihsan uh ahi. Gah loh hiau diing ahihkeileh kimuan khelh theih luat ziak hiam a kum 30 bang 6th schedule i chaan uh ahita, tutung ale tua bang niilneel in chu i chaan nawn uh naih mahmah bang hi.
Kinepthawnna 30 kum a val thamta himahleh bangtan i kinem thawn lai diam ah!
©July 31, 2015 | Pauzagin Tonsing