Lamka khopi sung a i gari taidan uh leh lampi zatdan uh chizauhuai mahmah hi. I ngaihtuahnate uh kinoh in, i gari-te uh toh gawtmun lam kinoh tak a delh bangle hile kilawm hi. Gawtmun lawm (hell-mate) khat i hi uh hia chih uthuai hial hi. DC leh SP-te’n leng phaphetlou in ana awlmoh ua, SP lam ngial in amau khomtawk a hihtheihdan tuamtuam ana suah in pan ana lasek uhi. Traffic zuih diing leh parking diing thu khawng naktak in a hon veek ua, nidang toh teh in zia khat neithei dek in a hong om samta hi. Himahleh Solkal lam a thuneihna tawite sang a mahni a thuneihna kitawite lawi kha abuaisaktu a pangzel uh ahi chih zak chiang in gam itna hichi lel maw chih vungvung in a om sek hi.
Dan kichi a zangtute aa diing a hoihzawkna diing ngimna leh deihna ahi a, himaheh huai dan in a kaankhak chiang a kineu bawlna a ngaisekte mihai i hihlam uh kiphawk hun mahmah ta hi. Tuma lam in kiteelpina khat a vote khe dia mipi kivual nednod lak a Tg Abdul Kalam din lai lem om ka muh in thupi ka sakna a lian tulhtulh hi. Huchi bang in India President lui mah KR Narayan-te nupa zong mipi lak mah ah amau hunt un chia vote khiak diing ngak in a om uh thupi hi. Pu HT Sanglian IPS thupina i gen sek uh, a zi’n bazaar kaina dia official gari a zat ziak a court a a heekthu i thei ua, thupi i sa mahmah uhi. Dan zahtaakte mah dan kia hilou in mite’ zah a kai ua, kingainiam mahleh uh thupi sak in a om hi.
Huaiziak in Lamka khopi sung a gari tuahsiat ziak a sihna tampi i tuahkhit nung un huaite pumpelh theihna diing leh lemtaangzaw diing etna a thunei tute’n zuih di dan hon bawl uh zui thei chiat dia kisak a chidamhuai mahmah diing hi.
Lamka khopi sung a gari tai hat theihdan diing dakkal khat a 20km ahi. Kum 10 val mahmah asuk-atung in gari in ka taina a dakkal khat a kilometre 20 peel a ka tai sawmvei pha nai diing in ka gingta khol kei hi. I utna munmun hun laplou a kitung veve hi veh aw. Dawilok ziak ana hikim lou a pilvaan ziak bangle hizaw kha diing hi. I garite uh hat taktak dia bawl ahih hang in i mun leh mual in hon zillou, a mipite mahmah inle zillou i hihna uah ‘hih vava’ chih pen thupina hihetlou, kuama’n hong eng hetlou di uh ahi chih theihchiatle hoih inte.
Huchi bang in parking na mun dia kipiate bangle ahi bangbang in hihle Lamka sung delhphaklouhna a om kei hi. Nidang a asuk-atung a khe a i siksuakna ngen ahi a, tuni chiang in gari a tai teitei di le i sa mwk uale zaw hi maw. Parking fuh louh ziak a passenger mulou chih peuh leh suanlam lemtaang bawl tawm in pawl tuamtuamte le kiphinse lou in District Administration in eite hoihzawkna diing a hon guante zui leng kikhial lou diing hi.
Huchi kawm in, zuih dia kipia newspaper-te tungtawn a kipan kimute apan ngaihdan leh thukup ka bawl utlai hi. Thuneitute’ thil sawm hoihlua hina pi in a hoihzawk sem diing deihhuai mahmah hi.
1. Helmet: Pei nih neite’ hektute’n helmet khuk diing chih pen a hektute kia hilou in a tuangte geel in a khuk diing chih hileh hoihzaw diing in ka um hi. Tuahsiatna tuaksa tampite apan i etleh a tuang teng in helmet khu hile uh ahinna uh humbit theih bangzah hiam om ngeingei diing chih theih hi. Helmet tungtang ah i ngaihtuah sauleh i gam dinmun et in a hoihlouhna leng a om diing hi. Helpawl or thautawi khat bang khat om hun ah identify haksa mahmah diing ahihna ah bangloh a hoih diam ah.
2. Parking/Stop: Gari service tuamtuamte’ parking ding gelfel a om a, mimal gari-te koihna diing leng gelfel ahi. Ahihang in, mimal gari koihnate marking bawl ding a chih uh lampi dungzui a marking kia hikei henla, gari koihdan diing pen le marking hilaileh. Ban ah, public service i chi hia town bus leh line a auto paite’ khawlna mun diing leng hoih tak a chiamteh hileh a chihhuai hi. Hiaite lawi mipi dawn zangkhai mahmah ahihlai un hat taktak a tai in a utna munmun ua a khawl phutphut chiang un traffic a buaisak kia hilou in tuahsiatna a tun baih mahmah hi. Huchi ahihna ah metre bangzahzah hiam kihal in town bus leh auto-te khawlna mun diing piak teitei hoih hi.
3. Pot hole: Tuahsiatna tamzaw lampi kuakte pelhna bang le ahi. Huaiziak in District thuneitute’n lampi toh kisai a thuneite toh kithuzak a, kuak thuuk leh kuak lemtaang loute a hunhun a huksak teitei thil hoih kia hilou in i traffic rule bawl hon zuihpihna diing ua phatuam mahmah diin khat ahi.
4. Rickshaw: Traffic rule in a huamkhak saklouh uh hia ahihkeileh maihkhak chih ka thei kei, himahleh rickshaw-te kingakna mun leh a lampi zuih dan mawngmawng uh velthak tuak mahmah diing hi.
5. Gawtna: Dan zuih dia kipia zuilou teitei-te Vehicle Act nuai a dan toh kituak a gawt diing chih a om sek hi. Ahimahleng ahi kha diing, tuate ban ah dan i bawlbeh zek uh kul ade aw chihhuai hi. Dan bohsete a gapna a ‘challan’ gelh a liausak pen huntawk lou in dan a bohsiatna uh sinsakna kal khat bang om teitei henla, huai kisinsakna a tel loute a sangzaw a gawtna piak a gari bangle heksak nawnlouh phot chihdan pian khawng ahi thei diam ah.
6. Parking fee: ADC lam hoih tak a function-ta i hihna uah ADC lam bang in tax lak theihna dia fel tak a bawl hunta mai thei hi. Hiai atung a i gelhte kia a huntawk kei diing a, a dinmun taktak a ding a ngaihtuahna sengte’n tampi behlap diing a neih lai uh a gintaak huai hi.
Bangteng hileh District Administration in gawtmun lawmbawl kidaam deuhna dia pan hon lak uh a pahtakhuai kia hilou in mipite’n leng eimah hoihzawkna diing ahi chih thei a zuitu hihsawm hoih mahmah diing hi.
© October 13, 2012 | Pauzagin Tonsing
**************
Pauzagin Tonsing>ZOGAM.COM Facebook
Dan zahtaakte chu kithei thou maw, October 17 ma inle ka khu di heeeee
