NAM KHAT i hi. Ei-le-ei kivaihawm diing. Khantouhna leh hauhna in i gam hon vuk diing. Neih-le-lam a gamdang englou diing. I khosakna changkang diing. Gen uang laile heicopter a zawngtah lou diing. Zomi leh Zogam halhna in hiaite ngaihtuahna a hon tun, hon tun phet hilou in tua i dinmun ua pan galmuh i kichi uhi. I galmuh pen hong tangtung mai diing bang a ngaituah a thil sau khuallou a i omna pen in siatna thupi, tua i dinmun sang a siatna thupizaw hon tun thei lai hi.
Zomi a kitheihchianna diing in pan hahtak in i la a, ahihziak in Zomi i lehdan (interpretation) leh ngaihdan a neu hiaihiai hi. A thu in zahuap mahleh a sepkhiak lam ah mun neuchik leh mi tawmchik a huap(ta) hi.

Tua i dinmun lel a khanlohna leh kitheihchianna kha i tan chipchial deuh a etchian kul abang hi. Huan, nam (Zomi) kitheichiansate leh kitheichian nailoute kal ah awngvang lianpi a hong om(ta) hi. A kitheihchiansate aa diing a hihbeh diing om tuanlou, Zomi hitop, maban om vaklou diing a bang hi. A kitheichian nailoute aa diing kidal in amau aa diing a lamet om hetlou a kibawlsak a hilim diam chih ngaihtuahna leng a hong piang(ta) hi.

Zomi hih kitheihchian khit chiang a bang loh diing. Tup-le-ngim leh paidan diing muhkholhsa leh gelsa om (tak) diing a hi. Omta ahihleh leng mi tawmchikte’ theihna kia in sau tunlou diing a, mipite leeng theihsiamsak poimoh hi. Mipite’n a poimohna uh chiangtak a atheih uh kul hi.

Amik-amak leh bulbal in theikei mahle’ng i tup pen Zomite kigawmnawnna diing chih ahi. Ngam-le-khat thu in i tangtung theikei diing hi. Hiai diing in heutu leh mipi’ paidan diing kichian, sum-le-pai, tha-le-zung leh kithulualna a poimoh hi. A lohchinna diing in khangnih-khangthum a lut peuhmah diing hi.

Hiai hunsung thuakna hun ah leng khosak, gamtat leh vaihawmna paipi khat om ngai hi. Hiai hun sung teng nelou-dawnlou, khosalou leh hinglou bang a kikhual hetlou a om theihvual ahi kei (diing) hi. Ganhing neute bang a phalbi sung teng ihmut (hibernate) a nipi a khanloh geih chih thil hithei ahi kei hi.

Tua i khanlohdan leh kitheihchan mai in i tup a hon tun kei diing hi. I tup tangtun ma a i paizia pen ei-le-ei kithasinna leh etkhiakna hun ahih diing ahi.

Hindan bawlphatna

Tulel leh tup tangtun chiang a leng poimoh (diing), lah i donsak (khak) luatlouh hile’ng i nawlkhin theih vuallouh khantouhna, khotaang hoihna, siamsinna leh ekonomik thil a i hihkhelhna in i paina diing lampi hon dal thei hi.

Khantouhna nelhsiah ahih chiang in politiks in omzia a nei kei hi. I khantouhna in tualam a nelhsiah mahmah hi. Eimah a kivaihawm nailou i hihna ah midangte buhpang apan in i gam khantouh sak diing ahi. Pupa apan i luah i chihngal leh naak tak in puahle le kuamah in hong suhtuanlou na diing uh ahi.

Khotang siatna in gamsung ah siatna a tun hi. Mihing’ hinkhua leh nungchang a tokbuai a, kuamah kigintaktuahlouhna a tun hi. I khotang su-phuurtu lel i hihkhak diing lauhuai hi.

Siamsinna in khanlohna a tun hi. Siamsinna tawmchikte kia aa diing hilou a miteng aa diing ahi. Hiai aa diing in lampi dang om nawnlou hia? Solkal siamsin innte summuhna lel a zang i hi hia ahihkeileh i sanggamte’ tan (rights) laksak lel i hizaw hia?

Ekonomik leh nek-le-tak zonna ah hinna leh damna a om hi. Hiai a mumalloutak a muhnate hanthawn a, amau lak a tan neih zek chih pen chidamna ahi kei hi. I gam nek-le-tak zondan leng a huntawk nawn kei hi. Ngaihtuah detdet a, khanna diing leh muhna diing lampi bawl diing ahi. Tua hilou a mite’ muhsuah sunsun etlahsak mai a, huai a kivak i hihkhak diing leng thil lauhuai ahi.

Nam kitheihchianna bangziak a poimoh a, bang diing a gam poimoh hiam? Mi tung a leen leh vaihawmna mai hia ahihkeileh nam khantouhna diing? Thuneihna deih ziak mai ahihkhak diing lauhuai hi.

Mahni vaihawmna hia ei-le-ei kivaihawmna? Tua in bang hon tung diing hiam? Bangteng hileh, kivaihawmna ah diktatna a tel diing ahi. Diktatna chauh a huntawk kei a, dikna (justice) a vaihawm a poimoh hi. I nam khanlohna leh kitheihchianna uang lo zozen in diktak leh tangtak a leng vaihawmna paithei (nawn) lou ahi diam? Hileleng, mi’n hon enlou leh tehlou i sak kal in hon en ua hon teh ahi uh.

Paizia omlou a ui-ngol gamphuut a i pai leh manthatna lampi zui i hikha thei hi. Mipite pau ngamlou mai a hon zui ahihkhak diing lauhuai hi. Pau kei mahle uh lungsim ngaihtuana a si theilou, mangtheilou leh puakgik lianpi i tutkhak diing lauhuai hi. “Mene mene tekel....” chihsan mai a i om diing lauhuai hi.

Hitler’ kam a thupawt Pathian’ aw bang a zahtaksak a om a, Idi Amin in mihing sa ne hial a vai ahawm a, Pol Pot in khopi mite louna sem dia a kaihkhiak hial a vaihawmdante ngaihtuah thak ni. Bullet Theory a kizang thei den diam?

Makai piching leh pil in gensiatna leh kalhnate kibawlna diing leh lamdik a paina diing in a zang a, makai hai leh huaiham in thangpaihna in a la hi. Thuchian leh dikna a vaihawm in lohchinna a tun a, diklou leh gawtna zang a vaihawm in manthatna a tun hi.

I nam khanlohna dan leh kitheihchiandan enpha thak in, i gamtat leh khohei kivel in a diklam hiam dikloulam chih chian ni hang. Vainanung vuahsia in lap chi uh ahi. I khanloh leh kitheihchianna a sia i chi kei a, dikkei leng i chi tuan kei. Hilehleng i khanlohdan leh kitheihchiandan ban ah septhopna (reaction) enchian ni.

[Published in Tongluang June 2001]
©May 10, 2001