Haksatna chiteng thuak mahle nelou-dawnloua ki om theilou, nekna dia zon ngai, muhna dia thuak gim ngai ahihziakin nna sepna maban kon sunzom nawnta uh. Singngat a zousiang in Mualnuam lam zuan din kong ki sa khe non uhi. Nitak houlimna ah gamvak nopdan leh a ut huai dan ka gen ua, lawm nih tegel phur sia in gari a tuangloua gamvak kawm di chi'n kong ki thukim uh. Kei bel ka lung alut lokei, hon nak chial luat utoh nial luat di nuam kasa kei zel. Maukot apat Sialbu a giak lut di, huaia pan Mualnuam ah chiin thau lawng nih toh gamlak kon zuan maizen uhi.

Sau khop kapai ta uh, nisaa nuai, gammang lak vot dii dii nuaia pai anuam mahmah. Gal taang dungah vau apak pheng phunga alungleen huai lua. Kipahna in zaw sawt daih kei. Thakhat thu bang hialin tunglam ah mei vom hong kizial ngoi-ngoia thawm ging angaiha alau huai lua. Vuahpi hongzu in huihpi toh hong kithuah zomah. Huai kia hilou in gialpi'n hon zom lai...khualum sa a mi' phun lai in kou zaw votsa in kaling mai uh.

Huihpi, gialpi leh vuahpi chik chianga theu ding chih theih hilou, belh di sing hawm suan hawm ka zong ua himah leh huihpi-keek kia lakah a bit huai tuan kei, mundang zuan dek le lah gialpi kia lakah ahi theisam kei. Mangbang leh ka thil sawm uh kisika ka om lai un ka singkung belh uh piingpei in hon bulh kalh sak ta mai. Keek kia in lah kou kia hon ngiim a bang, sak leh paam ah kaki khen ua kaki sam tuah uhi, lawm khat pen aw zaak in a om het kei mawk, ka gam zon mai ua, sing ki bulkalh zung in alu asuk khak ziakin khophok lou hialin ana lum mai mah.

Vuahpi theu kuan ahi ta, ni leng a tumta. Ka makai uh, lampai na di theipen lah khophok lou in alum dildel maimah. Gilkial in ka bah mahmah mai uhi. Nek leh dawn di ka puak teng uh lah ka gai ta ngal ua... Khua mial khe di ahi ta. Bah leh beidong a lawmpa puak di dan vai kasai lai un ka lawm khat pen thakhat thu in hon puk guih mawk. Loh ngaihna ka thei kei. Akam ah chil phuan hong pawta, amit a gau lenlon. Bang loh di ka maizen a, ka lung a am hial ta. Lawmte mel ka muh chiangin lauhna in ka pum dim hi.

Vasaten agiah nang uh a zuanta. Kei le lawm nih te gel taihsan dan omlou, taisan mok lengle koi lam zuana bang chi pai di. Mun lem chang deuh ah lawmte gel ka sial khawma thau toi kawmin asak uah singbul ngai kawmin ka tu hi. Ka khang lamah saa ham ngeu ngeu khawng ka za a, khen chiangin sing khawng hong ki sawi ling souh-souh hin ka thei. Ka paam deuh ah ahong ging phei siat siat ka za hi. Ahon naih hiai hiai. Lauhna in ka dima a hi hi hileh muh hun a kap ngei ngei din ka thau dip kisai litlit komin kakam hi. Sawt lou kal in ka tungah vasa hong boh hin ka thei, ka en toua naupang khat in sing kung apat honna en suk ta mai mah(ka khonung ngaihtuah leh Pheisam hi din ka gingta). Lamdang kasa lua. Ka pama saa lianpi ahi di, hon hamloi a hon kheeng dul hial. Ka lauh tha asuak gawp ta. Huchih lai in ka lawm khat pen phunlou paulou hialin hong thou khemawk. Dawi mat hi di'n ka ngaih tuaha muh nop huai kasa het kei.

Ka suk-hei ka tou-heina a hiai bang thil tuah veu khasia kaki sa a, bang paap pokha ka hiam vangsia kaki sa lua. Ka lawmpan hon muh khak di kalau a amah lah hong ding khia in adak loplop maimah. Katunga naupang tuang lah ka en ngam non kei. Gamlak dai lua abat hangin thawm ging zak di atam khop mai. Atop in ka lawmpan hon mu in hong naih deka kalau lua. kagaal uah ui hong kaza guiha ngaih taka kikou in panpihna ngen in ka thau ka gin dawm hi