Pension kichi kammal pen ei pau ahi kei a; Merriam – Webster’s Advanced Learner’s English Dictionary ah hiai bang in hilhchetna kipia hi: “An amount of money that a company or government pays to a person who is old or sick and no longer works.” Mi kumtamta – upat ziak hiam, hat lou leh damtheihna hoih louh ziak leh septheihnawn louh ziak a Company hiam Sorkar nasepna mun akipan khawlsak, khateng a sum piak a om mi genna in “Pension” chih kammal zat in om hi.

Taksa kum tam ziak hi lou, damtheihna hoihlouh ziak hituan lou, nasem theinawn lou chih zong hituan sam lou; Sorkar nasepna ahihke’h Company a sep hunsung kum 30/40 bang chingta, huaiziak a sepna akipan khawlsak a om, hatlaw lai, mi tamtak, eimi lak ngei ah zong om diing in uphuai hi. Siamna saangtak nei, dinmun poimoh leh hihna hoihtak Phualpi Sorkar nuai a sepna neisa ‘Pensioners’ bangzah hiam Zo suante lak ah mi bangzah om in na thei a le? Huchibang mite “Pension Taktak” uh hi hiam? Phualpi Sorkar nuai a ahatlai nite uh, asiamna tengteng uh suah a, tha-le-zung, pilna-siamna leh lungsim tamtak seeng a; ahoihtheipen diing ngaihtuahna toh hun tamtak, kum 30/40 bang Sorkar na sepnung a Pasian in damtheihna hoih pia a, chipih-sapihte lak a inn-le-lou kiningching a vualzawlna toh khawsa thei a hun manpha abawlsak mite mi hampha ahi uh i chi louthei kei hi...!

Home Reception Program In Respect of SSPP Leaders On Retirement From Services Who Rendered Their Services To Government of India Outside Manipur – June 23, 2013 (Sunday) ni in Jelshyam Chapel, GBC Campus, New Lamka ah nitaklam daak 01:30 – 04:00 pm hunsung kithuahkhawmna Hun manphatak nei in Siamsinpawlpi Foundation Trust GHQs in pahtawina thilpiak mi li kiang ah pia hi. Hiai hun a ka kiheltheihman in kipahhuai sa in; manpha ka sa a, nuam sa in kipahna toh lungmuanna mahmah khat thugentute akipan mimaltak in ka ngah hi. Phualpi Sorkar nuai a sepna akipan ‘Pension’ tan dong Toupa’ vualzawlna tang, pahtawi a om mi li, amaute min, sepna leh hihna i taklangh diing:

(1) V. Dongzathang IRS Retd., President, Income Tax Appellate Tribunal.

(2) N. Tuankhankhup IFS Retd., Ambassador of India.

(3) Thiauzakhup Hangzo IRS Retd., Chief Commissioner of Income Tax.

(4) Gh. Khaikhanthang IRS Retd., Dy. Commissioner, Custom & Central Excise.

Hiai hun ah mi sagih in thugenna hunzang uhi. Pahtawina ngah mi li baan ah mi thum; Amaute min leh hihna hiai bang ahi: (1) V. Vumlunmang IAS, Joint Secretary(Home), Government of India, (2) Pauzakham IRS & (3) Lianzapau Samte President, SSPP, GHQs.  

Thugentute teng in ‘Students-te’ hasotna hoihtak pechiat kawm in poimohngaih leh awlmohna toh “Education” naaktak in ahon gen chiat ua; Laizilna toh kisai a Zodawn Sikulte puahphat theihdan om lou diing hiam chih agen baan un, i gam-le-nam kepbit kul leh poimoh ahihdan taklang chiat uhi.

Gh. Khaikhanthang thugenna hun piak in om masapen a, athugen laktom hiai bang ahi: School bawlhoih diing; Competitive Exams tuamtuam a chinhaksa ahihman in Tutorial Institution, Coaching Centre SSPP in bawlkhethei lou diing hiam chih leh Sinlai naupangte’n thil tuamtuam a “Part” latam lua, laisimna hun nei lou na hi uh chi hi. Singtang-Zodawn a teeng khosakna haksa ahihna ah Sikul hoih aom kiphamoh petmah ahi chih naktak in gen a, Ginomna leh chihtakna toh i omna mun leh sepnamun a heutute a dia kingakna leh muantham a seem in kong bangkim ah lohchinna diing in kuhkalna kiphamoh ahi chi hi.

H. Thiauzakhup in agenna ah “Challenges” maituah diing tampi om a, ‘Crime Investigation’ toh kisai in India ah Manipur Police Department achau penpen ahi chi in gen hi. Kristian i hi chih ziak a “Crime” toh kisai kingaidamsuk mai chihte pawl thildik lou ahi chih angaihdan gen in leh “Law Enforcing Authority” a ‘Case’ Register (FIR) bawl ngeingei diing ahi chi hi. Lamlian a “Speed-Breakers” tamlaw mahmah, achiamtehna lah om lou, huaiziak in SSPP in chiamtehna bawl ni chi hi. Tousem Road, Armstrong Pale IAS malakna leh mimaltak a awlmohna aneih ziak a lamlian 100 Kms saang a sauzaw bawl a om ahihleh, ei pawl in leng “Challenge” a la a, “Thilhoih leh Phatuam” sepkhiak i sawm diing uh ahi chi hi. Pensioners-te’n leng “Zattheihna Neilai Di Ka Hi” chi a kuapeuh in i minam a diing a panlaak kisam ahi chi in gen a; “Circus Elephant” i bat het louh diing uh ahi, aziak bel naa khat peuhpeuh “Ka Zou Diing” chih diing ahi chih leh “Thathak la le’ng ka chi hi” chi in Sinlai naupangte hasotna hoihtak geen hi.

N. Tuankhankhup in hiai bang in gen hi: “Singtang a sepna neite ka hon eng mahmah…aziak bel na hih/sep peuhmah uh eimite a diing ahihziak in… Hiai lam (Inn lam) a om manpha ahi… I teenna uh puah diing ahi… Singtang gam puah diing hoih ka sa lua… Hausate leh mipite kaal bawllem diing aomleh bawllem a, kituaktak a singtang gam puahphat diing ahi… Economic Potential hoih lua, i gam ah sing-le-gua hoih ahi… Maldive Island 1972 akipan hon puahpha, Tourism lam nasatak a hon pankhia uh, tuni a khovel a Maldive Tourist Spot minthang pha mawk ei voi… Cyprus pen 1974 kum a Turkish-ten valuah uh, kum 20 sung a hong hausa lawpetmah ahi… Resources toh kisai eipawl in Zahna i neih het louh pen uh puaknathuai ka sa petmah hi chi hi… Lanva lui khatvei ka va zui a, sing-le-gua lah omnawnta himhim lou, suang laakna kuak keukuau mai, hehpihhuai lawpetmah hi mai, agen ngaihna leng om lou ahi, sing-le-gua leh luidung i neih sunsunte uh Zahna pechiat le’ng eimah a dia hoih ahi…” chi in athugen zou hi.

V. Dongzathang in athupatna ah mipi paikhawmte tohhalhna kawm in tulai thil paizia tuamtuam, laigelhdan leh kammal zatdan baan ah, labu a late kikhek leh Bible thugelhdan kikhekte nalhtak a hon gen in ihmutsuak simte nangawn nu-ui zaaksak zuazua masa in – awlmohna mahmah toh thumanpha hiai bang in gen hi: Buaina thukzaw ah tuaklut kha diing i hi uh, huaiziak in pilvangtak a mailam hun gaaldot kawm a “Educational System – Kichiziatna deuh nei a School bawlkhiak in omleh hoih diing ahi… Teachers-te control ngam ngai ahi… Hattak leh hangtak a heutu-makaitu dinmun leente hong pang un, hangsanna nei a pan laak ngam ngai ahi… I focus pentak kha Education hileh… Sikul hoih lou i chih leng kum 2/3 sung a bawlhoih theihtham ahi… I Nam Tungding Taktak Le’ng; I Gam ei-le-ei i kitoudelh diing uh ahi…” chi in omzeneitak a gen in athugen zou hi.

Paite-Zomite lak a Officers muanhuai leh hihna saangtak leh dinmun poimohtak ngen leen a, Phualpi Sorkar nuai a sepna a kipan “Pension” tan chidamna hoih leh sia-le-pha theihna siang zangthei mahmah lai ngen ahihna uah, kei, mimaltak in chu lametna saangtak amaute akipan ka nei hi. Athugente uh laktom i gelhkheta a, alunglutna uh akibang mahmah khat i ngahtheih bel “Educational System” puahphat diing chih ahi. Huan, Nam tundingna leh Gam leitang a haichii piansak diing, Ei-le-ei kitoudelh theihna diing a… “Economic Politics” puahphat diing ngaihsutna thuktak neichiat uh hi in leng ka na mu hi. Huaiziak in amaute’n mipite lampi (Road-map) zuih diing hon bawlkhia in Sinlai naupangte’n lamdik zui in kisathak peuhmah le’ng i teenna gam leh i minam bawlna ah khantouhna thupitak hong piangkhe ngei di’n ka lamen tinten hi. Huai baan ah SSPP GHQs in bohzuidan siam in pawl tuamtuam a tulel a makaitute teng toh pankhawmdan siam peuhmah le’ng khanlohna thak, eite lak ah hong om ngei diing in ka gingta hi.

Azahtaakhuai, hiai a Pensioners 4 i neihte uh mimal theihna (Personal Experiences) aneihte uh tam peuhmah diing ahihman in, muanhuai uh ka sa petmah hi. “Nam Tundingna leh Inn-teen, Lou-teen Kichuptak” hong piankhiak theihna diing a amaute’n atheihna uh, asiamna uh mipite zuih diing piakkhiakna ah kalsuan kiphamoh ahih zel chiang in… “Pension Taktak Maw?” chi in amaute dotna i bawl ahi. Phualpi sorkar akipan bel “Pension” ahi photta ua; tu’n chu hun neita, Sorkar thunuai a omnawn lou, mahni deihdan leh hoihsakdan a vei-le-ziat a kihei kawikawi theita ahihna uah i teenna gam leh i mi-i-sa, minamte a dia ahun uh zangtheita diing uh ahihman in lungmuanhuai petmah hi. Mipite dinmun diktak (ground reality) i et chetchet aleh awlmohhuai ahihdan tampi gen sese louh in zong i theihsiam vek uh ka gingta hi. Eite lak a Setan Biakna bang om maimah, Singtang-Zodawn neekzonna mumal lou lua; sikulte lah segawpta, tubaan kum 10 hong paileh bang dinmun ah i om diing ua…? Ngaihtuahtham ching hi in i koih uh hia? “Pension Taktak Maw?” chih dotna pen mi 4 i gente kia hi lou in, Manipur Sorkar nuai a Officers tamtak i lak a “Pensioners-te” kiang ah leng dotna i bawlbeh lai hi. “Pension Taktak” hi lou in atamseem septheihna hun neita uh hizaw ahihlam uh amaute kiphawkthak di’n deihsakna i hlan ahi.

V. Vumlunmang IAS, Joint Secretary(Home) Government of India in Special Address abawlna ah Officers li – amau thugente ‘Mark’ piak diing hileh athugen uh saang a asepkhiak uh tamzaw tham ahihman in 1:10 marks piaktheih vek ahi uh chi in athugen hon pan hi. Central Customs & Excise leh Income Tax omzia hilhchetna tomkimtak hon gen masa hi. Vaigam a laizil diing a hong kuankhete toh kisai awlmohna liantak nei in – amaute ‘Incentive’ omnawn tuan lou, puansilh-niikteen ahoih phapha nu-le-pate’n pia, Leenna a leengsak, Delhi, Bangalore leh khopi tuamtuam a sawlkhia, vaanleeng a leeng vek uh; abaan lunggulh diing bangdang omnawn tuan diing ahia…? Delhi a eimi (students) kitam lawta… Inn neuchik mithum khawng in luahkhawm tektuk maimah, atawpna chu lohsapna hi mai…! Counselling leh Screening hiai lam ah SSPP GHQs in bawl masa detdet a, naupang-laizil diing tuamtuam India Khopi tuamtuam ah sawlkhiak hileh bang achi dia…? Chi a gen in SSPP Foundation Trust hoih ka sa a, Lohchinna hiai Trust tungtawn a atamseem in a ngah uh ka lamen hi chih toh athugen zou hi.  

Pauzakham Ngaihte IRS in hiai bang in thugen hi: Training ka neihna uah ka heutute uh lak a khat in koi a hong kipan na hi hiam chia dotna hon bawl, ke’n Manipur akipan ka hi ka chihleh “Churachandpur” akipan na hi ngei diing maw hon chi; huaiziak a i khua pen zahpihhuai lou ahi. Midangte hon theihdan a Churachandpur akipan IAS., IRS., etc., etc., First Class Officers tampi pawtkhe zel ahi chih ahihman in sinlai naupangte midangte saang a kiniamzaw tuan lou ahi chih theikawm a kuhkaltak a laisim diing in hasotna thu gen in, kipahthu genkawm in athugen zou lian hi.

Lianzapau Samte President, SSPP GHQs in Pawlpi malakna leh Education lam a kalsuanna ‘Report’ bawl a; Sinzawl High School hoihtak a paitou zel in, amah-le-amah kitoudelh thei panta chih gen a; Bukpi, Songtal, Mualnuam leh Suangdoh a Government Schools pansan a SSPP in puahphatna nasep nasatak a paitou lellel ahihdan zong gen hi. Khosung Hausa khenkhat theisiam ngel lou om lai ahihna ah haksatna kituak zekzek ahihdan zong gen a, “Proxy Teachers” tungtang toh kisai zong buaihuai mahmah suak ahi chi in gen bok hi. SSPP GHQs etkolna nuai ah ‘Residential School’ Nghathal ah hoihtak in paitou lellel a, tu kum Class X Board Exams ah lohchinna hoihtak om ahi chi in gen hi. Sum-le-pai tungtang toh kisai muhna leh zatna hoihtak a chiamtehna kinei leh Charter Accountant Audit kibawlsak zel ahi chi in mipite kiang ah gen hi.

Look-East Policy toh kisai India Sorkar in hihlohchin teitei atum tinten a, Manipur Sorkar naktak in akisakhol lellel a; Phaijang mite lak ah “Economic-Politics” ah khanlohna nasatak aomta hi. Singtang mite lak ah ahihleh tuni tan mangmat pha vet lou hile’ng kilawm maimah…! Zankhat thu a hauhsak sawm mawk in sawt daih het lou diing ahihman in ngenteltak in kingaihtuah taktak chiat le’ng deihhuai hi. Trade & Commerce, sumsinna leh gamdang mite toh kidawr a, kong bangkim a khantouhna thupitak in hon tuamkhum diing a kisa meek ahihna ah, Gam leitang manphatdan theikawm a, Resources tuamtuam i gamsung a haichii piangthei tam law mahmah ahihman in apilpi a khantouhna eite lak a aomtheihna di’n kalsuankhawm le’ng uthuai petmah hi. Manipur Sorkar in ahihleh Nu-masata neituam bang mai in, khantouhna toh kisai Nu-nawntate lak ah piaksawm ngel lou abang hi. Staff Selection Commission nuai a Regional Director dinmun akipan Pension, L. Sinate makaihna nuai ah tu in Mizoram – Hmar bial ah ‘Horticulture Farm’ nasatak in abawltou lellel ua, lohching mahmah diing in agintakhuai hi. Tua mahbang in Phualpi Sorkar nuai a dinmun saangpen leh hihna nei “Pensioners” i neihte makaihna lou in bangtan i tungzou mahmah dia…? Manipur Sorkar in lah hon nelhsiah lua ahih maimah chiang a…!