Bukpi
24°21’15’’N
93°23’95’’E
Lenna phual naipen: Tulihal Airport  238 kms
Rail khawlmun naipen: Dimapur 447 kms Silchar 422 kms
Damdawiin lian naipen: Lamka 177 kms

Tuan a pupa lentumang a aleen leh
Kangthal leh namtem toh aleng hi e
Kangthal leh namtem toh aleng a aw
Sang paalluun tual a khia’n tuun’ siang tun e

Tang kei lentumang a ka leen leh aw
Melchin zialsiamnou toh ka leng hi e
Melchin zialsiamnou toh ka leng a aw
Melchin ka zialnou tuun’ siang tun ing e

Melchin ka zial zata’n laam bang veel hen
Miza’ sinlai bilh bang thousak hen aw
Miza’ sinlai bilh bang thousak hen la
Gamlei zuun di’n zata hong thou hen aw

Pipute’ hunlai hileh zaw hiai hun chiitchiat a gampawt ahon phalkei hial ding uhi. Himahleh tu khangthakte’ hun a bel huchi bang gindan leh zekte bang leng kingeingaih nawnlou ahihman in lungnoplouhna om hetlou in Gamkha, suanglepte leh bichiing khiinte’ gamtat hun laitak in zodawn veh ding in ka kisa hi.

Kum thum nung a kha khat sung innlam a hun zang ding a pai tuh hun hawm a haksa vial hi. Tutung ka pai ngial houh nasep ding thupitak nei a pai ka hi a, kithalawp mahmah in, lah thazoitak in ka om hi. Huchi tanvei inn pailouh nung a pai sunsun a zinsawn na ding neih tuh thil nuamlou pi ahi.  Sungte’n le hon awi ngellou napi in lah hon khou teitei ngam samlou in a zingkal a kuankhe mai ding a kisa khin tuh ka hi peuhmah hi.

Mite’n a hun awl ua kisukhalhna ding in vaigam hiam sapgam hiam ateel ua, ke’n bel zohuihkhi siang alaan na, zosiktui siang aluan na leh zolengthete’n zai a oihna uh zodawnlou mundang lunggulh zawk ding ka neikei hi.

Zodawn pha ding ahihleh chia khokeu lai Gamkha i teel leh tukum in bang thu hon thei hiam ah vuahtui abuah in hon buahkhiat thoh a, nikum khawng a akholkhawmte uh akoih na’ng om nawnlou a hon buahkhiak uh hipeuhmah ding in ka ummoh hi. Ahon sunawngkai sim mahmah a, lah luite, tuituakkhiate a tui luang ding ana tamzel ahihman in apoi lemtang  kawikawi hi. A vuah chiin nilouh ziak mah in kho tuamtuam phaak ding ka chih leng akikheel maimah a, Bukpi kia ka phaman lel hi.

Bukpi a va zin mawk ding chih, tanau lah kineilou, meltheih lah kineilou, koi a bangchi zintun ding ade aw chia ka buailuat lai in ka lawmnu khat Bukpite ana hi laizang a, ama tanaute’ inn a zintung ding in vai ahon hawmsak a, a kizen mahmah hi.

Zingkal dak sagih ginma deuh in Tipaimukh Road, Lamka apan ka kipankhia ua, ka taitou vangvang uhi. Mission Compound khosak a ngakiik pelh apan kei a dia gamthak ana hipah hi. Chiangpi ah an ahon neekpih ua, ka bawngsa neek uh limlouh daandaan tuh mangngilh hak ngial ding in ka kigingta hi. A sadual ngen ka tangkha zomah a, aneektheih deuh duhhuai chia ka ngetnawn leh ahuaite mah ka tangzel hi. A tawp in ka an akimkhat leng gailou in ka dingkhia a, kong a dawr ah sang leh theitui ka va meh hi.

An nezou ka kipankhia ua, gari heektu’n lamnawl a  pasal dingte khat teng zakhat apia a, hiai mun a unaute’n siah khon uh ana hi maimah hi. Unaute kiang a siah piakzaw adaan om ka sa a, himahleh vai sepaihte khawng in thunei tak a hon hih vatvat ua, kum in achih chiang ua kum a, kal in achih chiang ua kalnawn vial khawng ka thang apai lawmawk a, lah lohtheih bangmah a omkei hi.

 Ka lamzang mahmah ua, gintaak sang in lampi leng ana hoihzaw mahmah hi. Ka tuanna ding mah ua tuangkha leng ka hi ding ua, ka tuanpih uh a Bukpi khote leh gari heekpa mahmah bang in ka vai uh hon lungluutpih in limlaak dia hoih mun khenkhat ah hon khawlpih zel ua, lim la in mailam ka nawtzel uhi. Digital camera ana muhkhiat mahmah uh kizen hina tel e chihphet in a om hi. Nitaklam dak li leh akim vel in Bukpi vangkhua ka tung ua, ka hi heihuai zozen hi.

Ka lawmnu’ hon kawkmuh bang a a pute tung dia ka va kisak uleh innteekpa ngabeng a luidung giak in ana om chiitchiat a, innteeknu kia ana om hi. A’ihleh ka tuanpih uh Bukpi Bethel vengte nupi nih hi ve un, khatpen houh pastornu ahilai a, amau tua ka tunna mun a hong kha malam uh hive’n, innteekpa’ omlouhlam atheihtak un innteekpa omlou a nuam ka sakkei uleh amau innlam a va tung ding in ahon chial ua, himahleh vangphathuai tak in huai a pastor dang khat om chia ahon hilh uh kei adia ka gang ana hi a, ka pianma apan ka pate toh ana semkhawm, ana kingaina mahmahte ana hi laizang ua, kou leng mundang sang in hiai ah tung ni ei chi in Bukpi vengpi a pastorpa kiang a tung ding in thu ka puuk uhi.

Pastorpa toh innkong a ka kituahguih uleh hon lam-enlou kisa selua in a hi heihuai zozen a, kichibai in inn ka luut uhi. Hon na ngaina mahmah a, ka naa ua leng a lungluut mahmah ziak in ka hampha mahmah ua, tunna ding muntak a va tungkha hita ung e chih in a omzel hi. A zingchiang a vai ding khawng ahon saipih a, gam hon vaakpih ding khawng ahon zonsak a, kizentak in vai ahon hawmsak hi. An neekkham in Bethel veng a Pu Suakpao kiang ah ka va hoh ua, pupa la tuamtuamte khum ut ka hihdan uh gen in ahon saksak ding a mi kaikhawm leh makaihna naa la ding in chial leh mohpuakna got ka va thuah uhi.

Mi kizen ngen’ teenkhawmna chih mahtak, zingkal ka thohma un ka vai utoh kisai a ka kisaipih dingte uh amu ding in ahong hoh ua, gamtat dingdan khawng kikum in ka om ua, ‘a’ihleh an nekkham chiah hon tawnphei un aw,’ kichi in ka kikhen uhi.  Huchia an nekham kisa a ka totphei uleh ahon makaih ding pa Pa Nenggin in, ‘Na hong kuanhak lua ua tawpkiik na hita di ua aw ka chi a,’ ahon na chi hi. Neulai hun teng singtang khua a ana kizangbei saam ahihman in singtang vai akithei saam hi. Himahleh kum hiaizah i zuih nawnlouh nung a singtang pa zingvai lap ding chih bang tuh namenlou hial khat ahi hi.

Ka hong kipankhia ua, Bukpi gam a mun etnop leh tangthu neite baan phaak dia kisa ka hi uhi. Sun a gilkial chiang a ding chi in hotel khat ah puri tamkhop ka lei uhi. A masapen ding in Mualluum mual a Khupching’ khibah koihna sungpi leh suang vokkuangte’ omna ka naih uhi. Bangtan hiam lamphei a ka pai nung un  mual kah ding in ka hong kisa ua, kihtaak a om sim hi. Lampi gina leng omlou, sial zawi peuh zui in ka kahtou ua, lampi omlouhna a vaattawm in ka kalzel uhi. Honna baat ding khaugui lah tam, palkhaak ding lah tam, abaihlamkei hial hi. Bang tan hiam ka kal nung un ka lawmpa uh, kei sang a leh nga khawng a thauzaw in hon zui ngapnawnlou in ahonna kiiksan a, kou Pa Nenggin toh mailam ka nawtzel uhi.  A zaang ka naih deuhdeuh uleh abing deuhdeuh a, ka telhkei hial uhi. Ka tung khong ua, suang liankuam tak khat ana om a, tua suangpi mai ah khibah khoihna kikhuak tiktek a om hi. Apaam asuang sau zinzen khat vokkuang chia mahmah akikhuak a, tui ana vung diildeel hi. Sing-le-lou leh suangpaan khawng in ana tuamdim ahihman in tuate vatsiang leh hahsiang in lem la in hun ka zang uhi.

A kichiamtehdan  in bel Khupching’ khibah khoihna ahi a, taktak ahihleh bel Khupching leh Ngambawm a kideihtaak lai ua inn alah kiheel ngamlou a gamlak khawng a kiheel a, a kiheel kawm ua Ngambawm in Khupching’ khibah koihna ding a akhuak chiatchiat himaikha ding hi. Suang vokkuang ngei leng sialte khawng chi atahna ding ua Ngambawm in akhuak hikha ding hi. Ahihkaleh lah amun a dailing tamdan khawng apan nidang a khomun lui ahi mai de aw chih ngaihsut theih hi. Khomun lui ahihleh tuh kua hiam’ innkong hi ngeingei ding a, tuate’n akhuak uh leng hithei hi.

Huai mun apan kipankhe nawn in anuai a Palkhuang lampi mansuk ding in ka kisa ua, lampi himhim omlou, sialzawi beek leng om nawnlou, dingtang sa aleng pai theihlouh, tutchiilsa in paina ding vattawm in ma ka suan uhi.  Kaltouhlam a zaw loupa’n hon baat lele kinawk vutvut zousaam hive’n, tuzet in tuh ahon baat na lamlam uah a kihoi dongdong hi.  I vanpuakte lah ahon baatna ding ua lemtang kisa a ka sesouh geuh uh. Atawp in bel pastorpa hon kengsak ka tempai, ka kawnggak a ka kuah in nangzou nawnlou in abil ahong bal a, ka lawmpa ka kuahsak a, ke’n a tem ka tawithoh hi.

Lamlian ka tungsuk khong ua, huai apan Palkhuang naihlam a Ngambawm’ khekhap omna ka naih uhi. Ka tun un Ngambawm’ khekhaap ding ka zong ua, ka mukei maimah uhi. Huai phet in amun video a la in ka tonpihpa kampau a ka zatzel hive’n, ‘Hiai mun nidang a Ngambawm’ khekhep omna himahleh khangthakte’n i kepzohlouhman in tu in kisumangta hi,’ chi in ka khum uhi. Inn tun a khekhap omnawnlouhdan ka gen uleh tua lampi kou zonna mun pen hilou a, apaam a lamlui, laam khat vel a gamla a om ahihdan ahon hilh uhi. Va zongkhial dimdem ka hi uhi. Huai mun a ka puri puakte uh ka neek uleh, maizen, a khomite’ pau mah suun in duai in a duai maimah a, kha kham chihtak in akham hi.

Huai apan anuai a Ngazam lui ka kumsuk ua, vuah in ahon pha a, atam ngial hi. Vuah phit tung in lampi tung a linggaap kikhai ka mu a, lemlaak kithalawp lua in ka temtawi bang kaw koihzok ka hiam chih nangawn en manlou in ka lemlaakna ka lakhe somsom a, lem ka laak zoh in vuahzuk toh kintak a guangkiik in mailam ka nawt uhi. Kal bangzah hiam ka suan nung in ka temtawi tawi nawnlou ka hihlam ka kiphawk a, ‘Ana khawl do, ka tem lah nusia ka hi maimah a,’ chi in ka tem la ding in ka kiik hi.  Ka lemlaakna mun ka va et leh muh ding bangmah a omkei a, ‘Ehe…he, mualtung a mualsuang omna a ka khawl ua ka nuutsiat hi ding eive,’ chi in ala ding in vuahnuai ah ka taitou a, kho-ul in ahon buak hial hi. Amun ka va tun leh muh ding bangmah ana omkei zel a, ‘Khai aw, sumang ka hi peetmah di e,’ chi in lungsim nuamlou tak in ka diangsuk nawn hi. Amun ka tun in ka lawmpa’n ana tawi vevauh a, nui deidoi kawm in, ‘Koi a nana muh ahia?,’ ka chihleh, ‘Kei muh le ahikei e, lawmte muh ahi,’ achi a, gamvaak ding a hong kuan minih ka kituahpihte ahi ngeingei  uhi. Lamkiang a singkung khat a ka siattal ahi leltak hi.

Ngazam lui ka tungsuk ua, munzang lianlou ah tuilou khawng ana kibawl a, kou leng kinga in lemlaakna tunna khawng lem in lemla in ka om uhi. Huchihlai in loukaite khat ahong pai a, ka makaipa toh hichi’n a hong houlim uhi:

‘Bang hih na hi ua,’
‘E, tuma khawng a na loan laakte uh lou na bawl taktak na uhiam chih hong en ahi uh. Meitei-te ahi, ei pau atheikei,’
‘Ahi? Huai a paam khawng tui’ nawksiatna, hoihtak in la leh ahoih di. Sappau tuh athei di maw?’
‘Athei houh ke.’

Huai phet in mipa ka kiang ah hong pai a, sappau Bukpi kaih in, ‘Can I see?’ a hong chi a, ‘En lua in, en lua in,’ chi in ka nui teemtuam phet uhi.

Mual nih kaankhin, a mual thumna, Khupching’ khomun achih uh, sihpi omna kal ding in ka hong kisa leuleu ua, ka kal ma un tawlkhat vot hahpina ka nei in huaizoh in ka kal nawn uhi.  Amun ka tungtou ua, mun nuamtak ahi a, agaal ah Bukpi, Zoutung, Songtal, Mimbung, Sumtuk chihte akimu dinden uhi. Huai apan sihpi ah ka paiphei ua, sial ka sap uleh ala khat a hong suak lel hi. Nitaklam ahi a, sih a sial atan hun leng ahikei him a, khua ahoihlouh laideep toh.

Ni bang niamta ahihman in innlam pai phot ding ka chi ua, lampi a baan theih nana a baang ding in innlam ka zuan uhi. Hanship zotna PWD lampi achih ua ka suahkhiak madeuh un lampi ah pateh khat amah kia in ana ding gengan a, ka lawmpa’n pasial-ek ahihdan ahon hilh a, lim a lim ahi achih phet in chep ding in ka bot a, a tuunzok nang nahteh lian lah omlou ahihman in ka khut in ka tawi thoh hi. PWD lamlian ka man ua, tawllaw simta i hih toh lampi nuamta ding chia i kipah simleh saulou ka pai nung un gamlak ah hon luutsukpih zel a, lampi noplouh toh, ka pateh ka it toh, ka buai ngial hi.

Mun khat ka tun uleh suangpi tam demdom liankuam khat ana om a, huai ah sum ana kikhuak vilvel hi. Bukpi Bethel veng a mihaat Pu Ginzakam in huai mun lou a aneihlai a akhuak ahi a, ann bang ataaibaih se achi uhi.

Guam taw ka tungsuk ua, mual apan lui luangkhia thum a om ua, sang pipi apan in a tuakkhia ua, a etlawm thei mahmah uhi. Huai apan loutul pawnlak, lampi leng omlou ka nawktou nawn ua, tou kisa in ma a paipa’ khetul bang liahkhaak phialphial in a om hi. Tawl sim taak toh lamtou tot hichitel a naa ana hi maw chih in a om a, pupate’n hichi la a ana sak bang uh phawkkhiat in a om hi:

Mazap haamtaang bohlelh leh zawlleng khiap aw
Na ngiingiai e mualliim kam totnou bang e
Mualliim kam lah ommuan mun ah theuthei e
Zawlleng khiap in zanggu bang zet ni nei e

PWD lamlian ka tuntouh un khua a muita hi. Tomchik tutkhawl in vot hah piina ka nei nawn ua, vot paih ding atam ngial hi. Ka pasial-ek tawi ka lawmpa’n ahon mu a, ‘Inn tun peetmah di zaw neive maw,’ ahon chi hi. Ka painawn ua, sawtlou nung in khua in ahon mialkhum hi. Khua anai naikei hial a, mel thum hoihtak bang ahilai ding hi. Hiai lamkawi pelh chiang in zaw khua kimu ta’n teh i chi lungsim ta hal in khua in dawk asawm nai dekkei hi.  A tawptawp in zaw Belthel veng ka tung khong ua, ka lawmpa tuh inn tung ahita mai hi. Kei bel mel nih phial ding ka pailai angai hi. Nitak daakgiat bang agingta a, ka lawmpa’n giak mai ding a ahon khouh bang aw sukmai ka utsim a, lah pasal gamvaak inn tunzohlouh ding hi salou deuh in huai apan keikia in ka kipankhe nawn hi.

Bukpi vengpi leh Bethel veng kilometer nih vel a kigamla kikawm tuahna dia lamtom a sial uh, gamlak tawn khat a om a, huai lampi ka zuih leh zandai nung in tuh a nuam vovok kholkei hial a, lamsak a gulsia-tangsia taiging leltak in leng ahon kiguihsak zotzot thei hi. Inn ka tun in tuh a bokvaak luut ka himai hi. Dakkal sawm-le-nih vingveng gamlak ah hun ka zang uhi.

Ka pasial-ek puak ka em pah a, ka neekma deuh in pastorpa kholai pawt ahong pai a, bang pa hiam chih ahon dong a, pasial-ek  ahihlam ka hilh leh, ‘Karbi a omlai a le na pa’n alemte hon gui thahah, a lu leh a taw a pawt mai, hong si di hiam i sakleh hong silou vanglak,’ ahon chi a, ke’n leng ne ngam nawnlou in pangkhang ah ka lawnpawt hi. Inn ka tunkiik a ka pa’ kia ka gen leh, ‘A lemte tu tam pipi poukhawm metmot uh, a taktakte ahihleh khat kia a pou vilvel, na tonpihpa’n theilaw ding zaw hive’n,’ ahon chi a, ka ngaihsut kiik leh khatkia mah pou vilvel ana hi a, ka tonpihpa mah in neektheih ahi achih muangngamlou a ka phaihkhaak ka kisiik phiing hi.

Zingkaal a golhgawp ding ka kisakleh houh ka golh hetkei vanglak a, nitak a innteekte’ nungaknu’n paracetamol hon piak ka neek houh phatuam ahi mai diam ah. Pastor pa’n aak ahon goh a, ahon pumhuan pih a, singtang ak neklouhna bang akum a sim hita ahihman in ka hahneek ngial hi.  An nekham ka kisakhe nawn ua, tutung in bel Kullung kawl leh akiim, khonawl zel ate en ding in ka kuan uhi. Khonawl chin a Tuiluut achih uah ka pan ua, huai tuh kohawm lianlou ahi a, asung ah baak khawng akai sesouh uhi. Huai apan suangluum kawl ka tungphei ua, kiim-le-kiang a lengtal khuang vingvengte leh gamlim kilawm taktakte’n lung asuzuang mahmah uhi.  Huai apan Kullung kawl ka naihphei uhi.

Lampi omloupi ahi geet a, sih-le-hin kal a ding in ka zuanphei uhi. Tui tuahkhiatna (waterfall) ka tung khong ua, mun nuam mahmah khat ahi leuleu hi. Sangpi ahi a, adandan in a omlai hi. Bangtan hiam ka om nung un pai ding in ka kisa ua, ka lampi ding uh a maingalhuai keihial hi. Kawl mai a suangpi a mawngzungte pansan a kaltou dia kisa ka hi uhi. Naang bang leem masa phot zezen in kalbi ding bang ka gaaktawm ua, huchia sawtkuam ka sual nung un ka kahkhezou khong uhi. Innlam zuan a ka pailai un lamkhanglam a chiangkot ah mankhawng ana kivualsuk diudeu ua, lemlaak kawm in ka va vil a, khat le ana kisai keilai zomah hi. Bang hiam ana awk lezaw laak a, innlam a akamtupa kiang a genlem suk ding ka chihsim hive’n.

Tuni tuh sunnung a la khum ding nei ka hihman un inn ka tung baih uhi. Ka tunkuan un khual ging kekeuh leh tonla ka za hialhial ua, lawmte’n la ana zil uh eive chi in kithalawp tak in inn ka tung uhi. Thu ka khaak masak louhziak in lasiam tampite ana zinkhia leh lougiak bang in ana om ua, himahleh a om teng in ka saktheih bangbang uh sa in la bangzah hiam ka khum uhi. Buh tuh saan laitak chilou a awlmohtak a hong kikaikhawmte a nitha beek uh pezou leng ka ut mahmah a, himahleh ei leng ineih-ilam in hon chinlou ahihchiang in ka hihzoukei a, kisuanlah ahuai mahmah hi. Ahi a, kei kaal khat zen zangbei a akhua ua va hoh ing a, amau ni khat hun pia ua, hiai pupa la kepbitna khawng lah akei a tuam hilou a, akuapeuh naa hithou hia chihkhawng ngaihsun in ka kilungmuan hi.

Tuma a Bukpi a Khupching leh Ngambawm’ lemchiin abawl lai ua a pastorpa khat un, ‘Ahuai Pathian thu toh kituak leng hilou,’ chia phil pawl ana nei in, atelte khenkhat bang leng nuam ngellou a ana koih achi chih bang ka va za hi. Kei ka va zin in pastor dang ana omta a, ke’n a inn uah mi kaikhawm in zangta la, ton la, zawl la, sannem la, sazolh la leh adandang sa in khuang leh sialki toh ka luumzen uhi.  Huai a pastorpa’n ka kiang a ahon gen tuh hiai ahi: tuma a Khupching leh Ngambawm lem achiin uh bang ka lung naak tunlouhlua. Kei omlai hi ngeingei leh behlap tuak leh hichizaw deuhleh chia ka advice na di naak tamlua. Ka houlim zel na uah pupa’ tawndan lemchiin a, zuluup-saluupdan khawng hoihtak a hih a, a sa mahmah goh a, sahawmdan khawng, a ik, a phei, asin-alung chihte hiai mun ahi chia hoihtak a lemlaak a kepbit poimoh asakdan ahon gen hi. Kei leng ka lungluut luatna ahi a, ‘Huchi hial di zaw mi khat kia’ sen dia hong haksa lawdeuh dia, alungluut thum-le-li bang kipawlkhawm in kiseenhuan leng tuh nuamtak a zoh di hia,’ ka chi hi.

Zodawn veh tuh anuam mahmah a, adamtheihhuai in ahalhhuai mahmah hi. Himahleh lungsim hon suna thei ding ngaihsutna tampi ahon guan hi. Khangthakte’ hun chiang in i zodawn khuate bang dinmun in a om dia? I khopi, Guite hausa khopi Hansip bang leng sang mahmah ta hi. I zodawn khuate uh taisan a Lamka leh asehveel a kise khawmkhawm ding mah i hi ding uam? Tu a zodawn a naupangte’n lai hon sim ding ua, akhua ua skulte apelh chiang ua Lamka hong tungsuk ding ua, Lamka apan khopite ah luutsuk lai ding ua, alaisim uh azoh chiang ua lah akhua ua kiik peuhmah lou ding ua, anei zoulou teng kia in i zodawn ngak liklik ding ua, atawp chiang a bei khong ding hilou hiam? A bei thilpoi hilou hia leh?

Ke’n bel i zodawn khuate puah a, innkip-loukip a i neih uh kiphamoh ka sa hi. En luahkei le’ng aluah ding hong kiching mahmah ding a, hausa hihna chiktan i kembitzou ding ua? Huaiziak in tua i naupangte sepna neithei ding ahong hihma un lai ahong siam chiang ua zodawn a amau septheih ding, neekzonna a azat theih ding uh bang hiam i zonkhiat uh hun lawta hi. I gam ua bank hong lut sosouhte khawng zat phatuam a zatdan kisinsak in, diktatna toh naa sem le hang i zodawn khopite i tungding zou nawn khamoh ding hia! I nampi mahmah in leng hichi bang khawng ngaih poimoh a i neih uh thil kuul hi in ka thei hi. Huaiziak in Zodawn Mitsuan chih bang khantouh vaigeel (development policy) a i neih ua, kumnga geel (five year plan), kumsawm geel (ten year plan) chih bang i neih uh thil kuul hita in ka ngaihsun hi.

Lampi mahmah hong hoih masa phot peuhmahleh a lunggulhhuai pen hi. Mi khat in ka kiang ah, ‘Nagate bang khantouhlouhna vual omlou, amau a gamnuaimite un development fund pai chih atheih ngeingei uleh kintak a va delh ua, akisaipihte kiang a, ‘Diktak leh hoihtak a na nasep ding uh ahi, venbit angaih leh kou hon veng ding ka hi uh,’ chi ua, kho neuchikchik khawng le lampi hoih a hoih mai eivoi,’ ahon chi hi. Takhiam-zuauhiam lah theikhang, himahleh neita vanglak tuh huchi bang khawng neih thaman deuh leh kilawm ngut ka sa hi.

Bengteng i genta zong in, kua’n lah hon thulaakkei ve’n chin, ka lunggulh mahmah zodawn ka va zin a, amun-amual ka va muh a, ka hih utte ka hih a, tuate a lungkimna leh kipahna ka muhleh phazou himai henla. Ta hal in amun ka muh a, puakgik got a omte paw ding in ka duang leh ka lungtang muangkei na mahmah tel ing e! Pathian in damna hon piakzel a, sepna apan tawldam thei ding tan a ahon pii leh huai hun chiang in zodawn khua khat pansan in sial farm ka bawl ding a, singthupi leh mehtheih tuamtuamte toh, huchi in ka hun nanunglam ka zang ding ka chi lungsim hi.

Tua tengteng baan ah, tutung ka khualzinna ah kipahna thak khat ka va nei hi. Tuma teng a ka zeenluat ziak a nungakte bang in hon nawl khinkhin ziak ua kingaisesim a ka om laitak in tutung ka zin un zeen aphattuamdan ka va theikhia a, lungnopna thak ka nei hi. Pathian in houh hiai ding mah khawng a hon deih ziak a zeentak a honna siam houh ahimai ding e ka chi hial hi. Ka zeen ziak liauliau a gam hiaitan sikkhat thu a siiksuakzou ka hi phet hi. A suklua chia kummohna hiam, a toulua chia kallahna hiam neilou in makai pa’n akaih laiteng zuizou in ka om hi. A kaih zohlouhna tanpha bang uh leng ka va siikzou hi. Huaiziak mah in, ‘Amah zaw sasan bangbang ahi,’ chih ka loh hial hi. Huaiziak in zeen tuh hamsia hilou in vualzawlna hitah e ka chi hi. Khaih, hiaizah in ko’n khin di. Chiamnuih khahluat le ahoihkei e. A theisiamlou khawng nana om heuhou kha di u e.

{youtube}-FAcOnq2Bfw{/youtube}