DRINKS (DAWNTHEIH/ DAWNCHI)

- McMuan Sona Ngaihte

 

Khatvei ka roommate pa'n "Tulai khua a lum toh fridge ah theitui koih di sum kithoh in lei ni.. " hon chi a. Fridge kava hong leh coke ana om maimah hi. Ka lungsim in, "Theitui lei di chi ka sak leh..." Ka chi sim a kam khat dawn ka thuah hi.
Eipau a chu theitui hi suk vek mai le bang sim maw. Ahi tak in coke i chih ah theitui nengchik le tel kha lou ahi. Carbonated water chi le a gen kha pen mai din ka gingta. Eipau ah THEI i chih chiang in FRUIT gen na ahia.. Theitui i chih chiang in fruit juice chih na hong hi daih mai eichu. Coke, fanta, sprite peuh theitui chi non lou in soft drinks chi ta le bang a chi dia.

Theithuk ka zuak, Theithuk ka zuak..
Bang thei a?
Theikha
Chih bang le om

I gen nop pen zaw coke leh theitui chih ahi kei a drinks kichi bang hi hiam, bangbang huam kha hiam chih en khawm le i chi hi.

Drinks i chih chiang in zu ( alcohol) lam sese gen na ahi tuan kei. Dawn theih khat peuhpeuh, refreshment dan hiam, taksa a dia hoih hiam i dawn te drinks kichi ahi.

Dawn theih chi tampi a om hi, a vot, a sa, a al, a thuk, a mawk leh chi tuamtuam a tam hi. Etsakna din, tui, bawngnawi, singpi, theitui, coffee, hot chocolate, soft drinks ( dawn nem) leh a behlap na din Beer, Zu leh Wine chih khawng ahi hi.

Mihing te i taksa a hong dehydrate chiang in i dang hong tak a huai in dawn theih bang hiam hon lunggulh sak sek hi.
A biology, history, production etc lam zaw i en sese dah mai dia. Hiai dawn theih thil chi bangzah om hiam chih te theih dandan in, a tuamtuam kikum suk zaw le maw.
Drink i chih chiah Non- Alcoholic toh Alcoholic in a khen theih hi.

Non - Alcoholic drinks bang hi hiam? Alcoholic drinks i chih bang hi hiam, bang teng huam kha hiam? Chih kidong le hang i theih chiat uh a gintak huai hi.

Non- Alcoholic i chih chiang in i theih sa vek uh ahia, dawn theih khat peuhpeuh alcohol tel lou chih na ahi chi leng a chiang pen di. Huai mah bang in Alcoholic drinks i chih chiang in dawn theih khat peuhpeuh alcohol tel chih na chih na mawle. Huai i chih ziak in hand sanitizer i chih te ah alcohol tel mah leh va dawn zenzen kei un aw.

 

NON - ALCOHOLIC DRINKS

Non- Alcoholic drinks le tampi in a khen suk theih lai hi. A sa, a vot, a al, a khum, a mawl etc i chi hiam, a ki mix i chi hiam, soft drinks ( dawn nem) i chi hiam. A vek in, kim sipsip in zaw i gen man kei dia, eilawi in i na theih phak liai tan di ua gintak tan lel kikum le maw.
Eg. Singpi, coffee, theitui, soft drinks (dawn nem), bawngnawi, hot chocolate, mocktails, shakes, smoothie etc.

Singpi i chih chiang in a thei lou kuamah ki om lou, tuisa, singpite leh bawngnawi i hel khawm chiang in singpi kichi hi chih i na theih dan uh ahia, i niteng hinkhua uah kidawn gige tangpi hi. Singpi ( tea) kichi bang le hoih tak in bul sut ding chi le gen di leh gelh di a tam petmah dia, singpite ( tea) chi tuamtuam ( type of tea) khawvel ah om hi. Green Tea, Harbal tea, Camomile tea, Earl Grey, English breakfast tea, Oolong tea, Sancha, Masala tea, Darjeeling tea, Assam tea etc gen seng kei ni maw.

Coffee i chih chiang in le a thei lou ki om lou din a gintak huai. Tuma lam in coffee tungtang sau lou kon gelh kha ngei a huai ana sim mai le uh chin maw.

Coke peuh theitui i chi suk zialzial sek ua eilawi in. A tung lam ah sau lou kon gelh khin. Theitui i chih chiang in fruit juice chih na ahi. Fruit= Thei chih na aihchia maw bang ziak a Coke peuh theitui chi laizang di ihi ua oi.
Hot chocolate ahih leh eilam in ki pi bawl law nai lou deuh in ka thei. Company tuamtuam in a bawl ua, chocolate powder toh tuisa tam lou toh bawngnawi hoih tak a i mix chiang in hot chocolate ahia, lim mahmah khat ahi.

Huchi lou a dang, mocktails, smoothie, milkshake bang le om lai. Hiai te bawl theih na ding in company tuamtuam in fruit crush i chi hiam, concentrated juice hiam, syrup i chi hiam chi tampi produced hi. Huai te zang in dawn theih chi tuamtuam, mocktail chih khawng a bawl theih a, banah tulai dahi bawl dan bang le i siam mahmah ta ua, dahi apat in dawn theih tampi leng a bawl theih leuleu zel hi, lassi, chass, buttermilk etc.

Non- Alcoholic lam hiai zah genkhawm phot le maw. A kuakua in le i theih sa vek uh ahih banah lunglut law lawmlawm khol din le kon gingta vak khol kei a. Bang hiam gen khak louh bang le om kha maithei ahih na ah kitheisiam tuah zel ni uh maw.

 

ALCOHOLIC DRINKS

WINE:

Eilawi in alcohol i chih chiang un zu i chi ua zu i chih chiang un wine i chi suk maimai sek zel uhi. Hiai kar khen siam ngai mahmah khat ana hi bok hi. Alcohol tengteng wine ahi zen2 kei a, wine kichi tengteng ah alcohol a tel kha chi zaw le i theisiam di ua aw. Wine i chih chiang in a min tuam lieuliau khat ahi. I Bible uah le Wine ana kigelh kha ngut a, huai lai pek BC lai pek apat a le ana kibawl khin tham, ana om khin tham ta ahi chih a theihtheih hi. Wine kichi hoih tak a explain di chi leng gen di a tam mahmah dia a houpen a gen din, wine i chih chiang in alcoholic drinks chi khat grapes a hong kibawl a hi tangpi deuh hi. Red wine, white wine, rose ( ro-ze chih dan a pronounced di aw), sparkling wine, desserts wine, fortified wine etc chih dan in leng a khen theih hi. Japanese rice wine kichi sake ( sa-ke chia pronounced di) le a sim tel theih mai diam a. Ahi tak in hiai sake kha wine a kichi na a beer chi khat dan in le a sim theih diam ka chi sim lah a fizz om lou zel.

A grapes kituam dungzui in category, characteristics tuamtuam ah khen suk theih lai hi. Eilawi in bel a huai tantan i va en khol kei ua, kham a kham theih nak a leh, alcohol a tel nak leh dawn lah kinei vak khol lou. Kizen kawikawi vanglak aka.

Wine bottle khat peuhpeuh na et leh a alcoholic content zah uh a wine kituam dungzui in kibang vek khol lou ding hi.

Hiai alcohol om zah pen ABV a kiteh ahi. Alcohol By Volume kichi ahi. Unfortified wine ah ABV a tangpi in 5.5% to 16% ahia, average in 11.6% lak vel ahi hi. Fortified wine ah ahih leh 15.5% to 25% ABV vel ahia, average in 18% vel ahi hi. A tangpi in Wine glass khat ah 11%-13.5% ABV a om zou hi. Huai banah red wine toh white wine glass ( nou) bang le kibang lou in chituam tuak om leuleu hi. White wine ahih leh a tangpi in a vot ( chilled) in a ki serve a, red wine pen bel a tangpi in room temperature in a ki serve, a khen in bel a vot sim le poi a sa tuan khol kei ua, ei mimal choice le ahi thou hi. A dawn di dan tantan zaw gen ngai lou a i theih sa vek uh hi maw. Tui dawn dan in dawn kutkut kei peuhmah le hang.

Wine dawn gige, a diak in sap gam lam a te bang in neng chik a chep zek mai un le bang grape a pat kibawl hia, bang chi bang ahia chih gen thei ziau lel uhi. Et mai in chu gen theih na chiang kinei ve thou hi, eg. Cabernet Sauvignon, Malbec, Syrah i chih te full bodied red wine ahia ( et mai a san dup kikeih di ahi) , Merlot, Zinfandel, Nebbiolo i chih te medium bodied red wine ahia ( i et leh san dan dang deuh sim di), Pinot Noir, Grenache i chih te light bodied wine ahi ( a san dan dau chih di hinteh).

Sap gamlam ten wine & food paring chih khawng ana ngai na diak ua theih ahi. Hiai wine na dawn leh hiai toh nek khawm di chih dan deuh.
Tam lou en suk zual le. White wine, sparkling wine, i chih te a tangpi in cheese chi tuamtuam, roasted vegetables, fish, seafood chih khawng toh a kituak mahmah a, Red Wine toh a tangpi in cheese, red meat, white meat chih khawng a pai khawm tangpi hi. Ei lawi a din zaw kituah pih louh le om vak dia hia maw. Nek lah, dawn lah kinei lou hiven.

Wine na lei dek chiang a poimoh mahmah tam lou enkhawm lai zual le. A poimoh i chih teng a wine bottle / label ah kigelh vek ding ahi. Huai te ahih leh
1) Koi gam apat kibawl hia ( Country and Origin)
2) A bawl tu/ company min ( Name / producer
3) Bang grapes a pat kibawl ( Variety of grapes)
4) Kum bangzah a upa ( Vintage or non vintage)
5) ABV bangzah ( Alcohol level)
6) Sulfites kizang hia
7) Sweetness

Chih te khawng ahi tangpi deuh hi.

BEER

Beer i chih bang a, Beer i chih numei te zu eivoi.. ( zu hi suk thouthou zel hahahahaa..). Beer chih na zak chiang in na lungsim ah bang a hong lang ma sa pen a le? Kingfisher mo, Tuborg mo, Diablo mo?
Beer i chih carbonated, fermented alcoholic beverage, malted cereal grains ( barley) toh hops zang a hong kibawl khia ahi. Beer a kibawl na peuhpeuh ah HOPS a tel vek hi. Hops i chih bang hi non ta zel. Hops i chih beer bawl na ding a a helpih poimoh mahmah khat ahia, hai ( plants) chi khat Humulus lupulus pak ahi hi. Beer na dawn chiang in a kha tiptip voi maw, huai a kha tiptip (bitterness) pen kha hops ziak ahi.
Beer le chi tam sim in a khen theih non hi.
Ale, Lager, Porter, Stout, Blonde Ale, Brown Ale, Pale Ale, Indian Pale Ale.

Beer ah, a tangpi in 4% to 6% ABV a om hi. Beer na lei chiang in a bottle, can ah bang na en masa pen sek, a alcohol om zah ahi chi leng ka gen khial lawmlawm din ka gingta kei. Alcohol tamtam kideih hilel ven maw.

Khawvel ah beer ABV sang penpen ahih leh BREWMEISTER ( Snake Venom) ahia, 67.5% ahihleh chu whisky, rum, vodka te khawng sang a le sang zaw chih na hisim eiveh.
A lehlam ah khawvel ah beer ABV tawm penpen ahih leh Allagash Little Grove, Anchor Little Weekend, Bell's Light Hearted, Goose Island So-Lo i chih te khawng ahia, hiai te 3% to 3.7% ABV ahi tangpi hi.
Ei gam India a dia beer ABV sang penpen ahih leh Godfather 8%, Bad Monkey 8%, BroCode 15%, Kingfisher Strong 8%, Hayward 10000 8%, Carlsberg Elephant 7%, Simba Strong 8%, chih te khawng ahi.

To Be Continue 😁