LAMKA LEH COFFEE
- McMuan Sona Ngaihte
"Koi ah om uh e? "
"Damkam sak a coffee dawn ka hi uh hong pai ou.. "
"Awle.. "
Nikum, kum masa lam deuh chu ahi ta a, tuchiang in chu coffee machine chi tuamtuam a zang le om ta in ka thei.
Coffee ka va dawn ngei tak a. Huai mun a coffee te kha a tangpi ka theih dan in coffee powder toh tuisa ki mix khawm chi le a dik pen mai din ka gingta. ( Huai lai a coffee machine nei om nai lou chih di hi mo). Coffee chi khat chu a hi veve, coffee gim nam hilel ven maw. Bangchi dan hiam a nep bawl, thring sa hiam, cheap sa hiam ka hi zenzen kei. Coffee lovers taktak ten chu dawn ut vet lou di uh chih dan ahi zaw a siangsiang a gen in. Keile coffee lovers khat ka hi tei sam a, hilele om na mun zir a, a om dandan dawn thei vek ka hi ( inn ah a dawn zou le ki hi sam lou, sepna ah om chiang kia a dawn ka hi.. Hehheheee..). Ka favorite coffee ahih leh *AMERICANO* ahi, huai le strong ahih sese di hi zomah. Den chiang in coffee chi tuamtuam i gen khawm di uh.
Coffee lam ah zirna, siam na nei ka hi het kei, Barista le ka hi bok kei na a, bangtan hiam zaw theihna kana nei ve sam hi. 5* Hotel khawng apat tuni tan ka sepna ah khoih kha den ka hih chia.
A history lam va gelh di chi le gelh di a tam mahmah dia, hilele a thu vantang i chi hiam, coffee ahi chia i na theih tan lel khawng uh en khawm himhim le i chi hi.
Coffee i chih chiang in coffee tang ki em gaw aihkeh ki em mui i chi diam a, huai pen ki hih vui in tuisa toh ki mix chi le theihsiam a nuam pen din a gintak huai.
Coffee beans ahih leh chi 4 in a khen theih hi.
1) Arabica
2) Robusta
3) Liberica
4) Excelsa ahi uhi. Ei gam India ah Arabica leh Robusta a kimu hi. Hiai a tung a chi 4 teng zaw i gen sau dah mai uh aw. Banah khovel ah coffee mantam penpen lawi a kigen ahih leh KOPI LUWAK, JAMAICAN BLUE MOUNTAIN chih khawng ahi hi. Kopi luwak coffee nou khat in $35 toh $100 kikar a man hi. Damkam ah nou khat Rs. 10 toh chu kikhe zek sim mawle.
Tu chiangchiang in Lamka ah le coffee i hah dawn mahmah ta ua, a machine hoih taktak nei bang le ki om ta hi. Lamka a dia coffee machine hoih pen dia kana gintak ahih leh THE VINE te a ahi. The Vine te machine chet chu coffee shop i chi hiam, coffee dawr bawl dek hileng kana deih penpen te lak a khat ahi gige hi. Mundang ah ka va lut khak nai louh ziak a diam a, amau a dandan machine nei dang ka theih om nai tadih lou. A nei zaw om maithei din ka gingta. Lamka nak changkang law mahmah hiven.
Hiai coffee machine te a hoih na diak a hih a leh coffee beans te kha hong ki hekvui tawm or freshly grind ( grinder zang a) inchin coffee gim diktak, a lim dan diktak ki chiam kha ahih banah FRESHLY BREWED ahih ziak mah in COFFEE LOVERS te a din coffee dawn man nak om law mahmah dan eiveh.
Freshly brewed ahih bak ah cappuccino hiam, cafe latte hiam i bawl dek chiang in le a bawngnawi (milk) pen ki hih lum tawm or ki boil tawm ahi. Huai i boil hun a kha i coffee bawl dek pen zir a a foam a tam leh tawm chih bang le ei deih dandan a hih theih hi zomah lai. Milk bang le a hih lum, a boil siam mahmah ngai khat ahi. Na siam kei leh na coffee bawl lim het lou di. Barista te, coffee bawl siam taktak ten a ging om dan mai in le a hun leh hun lou theithei mai uhi. Huai ban ah nou (coffee cup) sung ah a sung dan bang le siam mahmah ngai leuleu zel hi. A siam taktak ten finishing touch nalh taktak in bawl thei uhi. Love sign hiam, leaf lem hiam leh a tuamtuam mi mit la mahmah thei din bawl thei uhi. Den chiang in details zaw deuh in i gen suk sawm uh aw.
Hiai dan lou coffee machine dang te ah chu ki pre-mix ahi, himahleh machine tam zaw ah chu freshly grind process ahi deuh tangpi veve. Coffee i deih penpen button va mek geih a hong pawt hilel.
Coffee chi tuamtuam tam lou eilawi theih tangpi deuh gen khawm zek le maw. Restaurant khawng ki changkang sak deuh a va lut in coffee order dek in duh di pen bang va thei zok lou. Menu bang en tuan zihzeh in a tawptawp a, a min familiar deuh pen chi in cappuccino hi suk mai le maw va chih baihlam tak ahi aw.
Coffee chi tuamtuam tam lou te -
1) ESPRESSO: Espresso shot or short black chih khawng i zak ngei uh a gintak huai a. Highly concentrated and strong ahi ( english zang mai ni eipau in daih lou aihchia maw). Espresso ahih leh single shot or double shot chih dan a ki serve sek ahi. Espresso kha ken kana chih sek dan in Mother of all coffee ka chi sek a a ziak a hih leh espresso apat in coffee dang chi tuamtuam hong ki bawl khia ahi.
2) AMERICANO: Espresso shot lak ah tuisa ki hel chi le a hou pen in a gen chiang pen din ka gingta. A strong i deih a leh espresso double shot le hel theih. Breakfast drinks chi khat ahi bok hi.
3) LONG BLACK: Hiai le Americano toh kibang ahi thou hi. Ahi tak in New Zealand toh Australia lam te gen dan ahi. Americano toh a kibat louh na ahih leh long black ah crema a tam zaw deuh hi. ( crema i chih kha coffee, espresso, tung a, a brown color dan deuh sim a dat om te ahi)
4) MACCHIATO: Espresso shot tung ah bawngnawi phuan ( foam) tam lou i va koih or i va hel chiang in Macchiato kichi ahi.
5) CAPPUCCINO: Amin za ngei lou i om uh a gintak huai kei. I theih pen uh le ahi maithei. A hou pen leh i theihsiam pen di un gen le, espresso shot toh bawngnawi ( steamed milk foam) a kibawl ahi lel tak hi. A layer dan in gen mai le, espresso, steamed milk, foam milk ( on top) chih di ahi
6) FLAT WHITE: Australia toh New Zealand lam apat ahi deuh hi, cappuccino, latte i chih te toh a kibat louh na neng chik ngen ahi. Cappuccino neng chik a khauh zaw deuh. A layer ah, espresso, steamed milk.
7) CAFE LATTE: Hiai le a tung a i gen, cappuccino, flat white i chin te toh ki lamdang lawmlawm tuan lou ahi. Espresso shot, steamed milk, foam chih te ki mix ahi. Cappuccino te sang in foam tawm a nei zaw ua, steamed milk a tam zaw hi. A layer dan in, espresso, steamed milk ( tampi), foam tam lou chik a tung ah om.
8) MOCHA: Mocha i chih chiang in coffee toh hot chocolate i mix khawm ahi. Hot chocolate a tel ziak in a lim dan tuam bik mahmah ahi. A tangpi in cafe latte toh hot chocolate ki mix sek hi. A layer dan in, espresso, chocolate, steamed milk leh whipped cream ahi.
9) IRISH COFFEE: A chi tuam deuh din aw. Hiai ahih leh cocktail ahi daih hi. Hot coffee, Irish whiskey, sugar ki mix khawm in a tung ah cream ( whipped cream) kikoih ( topped with whipped cream) chih dan ahi. ( one of my favorite cocktail)
10) SOUTH INDIAN COFFEE: Eilam a deuh din gen tel himhim le. Amau gen dan in KAAPI a chi uhi. Hiai bang le a lim dan chi tuam mahmah khat ahi
A tung a teng kha coffee chi tam lou i gen khawm ahia, hiai teng bak ah decaffeinated coffee chih bang le om lai ahi. Decaffeinated coffee i chih chiang in coffee apat caffeine ki la khia chih di hia aihkeh huai coffee ah caffeine tawm chik om chih na ahih ban ah normal coffee sang in a nem ( mild) zaw hi. Huai dungzui in decaffeinated cappuccino, decaffeinated latte, decaffeinated flat white etc. chih a bawl theih veve hi.
Coffee i gen lailai un, coffee main ingredients khat ahih ziak in bawngnawi ( milk) i chih top uh a tuamtuam gen zek le. Bawngnawi i chi top ua, milk bang le chi tampi om hi. Tulai mi health conscious gawp ta. A details in zaw i gen dah di ua, coffee bawl chiang a, a kizang tangpi deuh te min tam lou gen zek le mo
1) Whole milk
2) 2% milk or reduced fat
3) Low fat milk
4) Organic milk
5) Skimmed milk or Fat free milk
6) Lactose free milk
7) Full cream milk
8) Soy milk
9) Almond milk
10) Rice milk
Hiai teng ban ah coffee a chi tuam dungzui leh a mi tuam dungzui in a flavouring agent bang le chi tuamtuam om leuleu zel hi. Eilam in chini ( sugar) i zang tangpi uhi. Chini bang le, white sugar, brown sugar, sugar free etc. om lai hi. Sugar ban ah Vanilla syrup, caramel syrup, hazelnut syrup chih khawng le kizang hi. Eg. Caramel Latte ( Cafe Latte with caramel chih na himai mo, lim a lim ahi) Vanilla Latte etc.
A tawp na lam din, coffee i taksa damtheihna lam a, a hoih hia hoih lou chih i genkhawm zek lai uh aw.
Nasep ma a coffee ( Americano) dawn kenle kana ching mahmah khat ahi. Hiai in ihmut hon susuak kei a hon halh sak zou mahmah a, i lungsim hon thathou sak mahmah hi. Coffee in i sung ah thau te a kiamsak thei a hiai ziak in coffee dawn tam in i gikna bang le hon sukiam sak thei bok hi. Coffee dawn tam in natna chi tuamtuam cancer, stroke, Parkinson's disease, diabetes chih khawng apat hon veng thei bok hi.
Thil himhim zaw a uang lua a i va hih khak chiang in hoih na lam sang in siatna hon tun zaw hi. Huchi bang mah in coffee le excess lua a i va dawn chiang in i taksa a din poi ban hi. Nitak lam deuh, nitak hiam a coffee na dawn in na ihmut suah na hon buai sak thei hi, naupai lai a, nikhat a coffee nou khat kan dawn louh a hoih mahmah. Nikhat a coffee nou nih sang a tam zaw na dawn a na gilna chih dan a, a om ngeingei a, a ziak di na theih zoh kei a leh stomach ulcers ahi ut mahmah. Hichi bang na tuah ngeingei leh na coffee dawn kar bangzah hiam khawl phot in.
A tawp na pen ding in *Excess of everything is bad* chih i lungsim uah koih gige le maw. A nawn chiang in hun remchang ah *Cocktail & Mocktail* lam gen khawm sawm le maw.