Siamsin momnou te kiang a laikhak
By Mumung Tonsing.
Khovel hun pai zungzung, kinoh mahmah leh khantouhna hattak lak ah i omta hi. Mihing te pilna, siamna, strategy tuamtuam te theihseng ding leng ahi kei.
Nu leh pa ten a neihval uh hilou in, mi bang a sepna hoihtak muh di lamet ziak le hivek khollou, nek leh tak zonna ah mi nuai a khutdoh a nek i zon tel louh ding deihziak in guihtu kang zen in i siamsinna uh hon chom uhi. Nu leh pa haksatna theihpih ban lou in Manipur pawlam a kai teitei khong i sawm khak ding uh thil lauhuai pi ahi.
Hunpaisa ah bangziak a Manipur pawlam a laisim dia ki sawlkhia ihia? Chih enthak jual ni.
1. Manipur a course/subject omlouh ziak
2. Kam zonna toh kisai a Postal Service (admit hon khak na di uh) leh study material a ki ningching louh ziak ahi.
Lamka leh Manipur sung a i course lakut pen a omkei a, i nu leh pan hon chawm ngap nak uleh I gam uh pawtsan a laizil ding mah ahi.
General Course khatpeuh zil ding ihih leh bel nu leh pa te puakgik guan keileng deih huai kasa. Aziak ahih leh, India gam mun tuamtuam a College tuamtuam te laibu zat leh Lamka/Manipur a ei zat kibang thou ahih ban ah agelhtu leng kibang thou ahihziakin. Za a za (100%) kibang vek kei leh leeng ei laibu zat niamtuam/sit huai tuanlou ahi chih phawk thak ni. Huailou in, college/university hoih taktak te ah leng
e-book khong mah zang ahih na uah, hiaibang thilte ei gam ah leng zat theih mahmah ta hi. Bangchin maw? Internet a pan lakkhiak or internet a pan ki lei thei vek ta hiven. Admit card tunglou chih lah om nawnlou, internet a download ziau lel. Competitive book tuamtuam chi leng, internet a lei theih ta, inn a laibu hong deliver di uh himai. Coaching institute tuamtuam le om ta.
Huaibang kal ah pawl 10 & 12 rizal hong suah hun toh kiton in lamka ah education fair om ahih lam news tungtawn in ka na mu tei hi. Hiai education fair sia ka chi pah kholkei a, pilvang huai tak om hi'n ka thei. Bible in Mihing a dia lampi dik a kilawm a om a, himahleh huai tawpna sihna lampite ahi achih bang pian sim in mipil, misiam ten ei lam ah business hong bawl jel ua, hiaite thang-a awk kha vanglak te buai mahmah uhi. Hun paisa a mi tamkhop in a tuahkhak uh entak ni. Nurse zilna ding in Direct Admission, no security deposit chihdan om jel hi. Hoih sim bang mah leh, admission a bawl chiang un ORIGINAL CERTIFICATE institute in kepsak pah ua, Course hunsung tawpkik theilou ding in ki hentang uhi OR a tawp utleh a certificate tankik sak jel uhi. Huai kia hilou in, Course a zoh chiang un leng a hospital a kum 1 sep teitei ngai chihkhong condition om hi. Awle, internship 6 months + 1 year i gawm leh kum 1 leh akim sep teitei ngai, huai ma certificate te leh course completion certificate ki pe khe lou chihkhong om hi. Hiai hunsung in loh tawmchik kipia ua, Hospital te lawk/meet mahmah ding uhi. Huai mah bang in, advertisement/promotional activity tuamtuam te ah pilvang chiat ni.
Siamsin naupang te maban khualna paulam in NORTH EAST MITE & ST/SC student te khualna chih pansan in Educational Institutions tuamtuam in business marketing hong hah hih thei mahmah uhi. A taktak in, hichibang school , college leh university te a hoih pen hi khollou maithei ahi. News in apuan dan in Group of Institutions(GoI) chih ahi. Hiai GoI concept kuapeuh in i theihsiam uh poimoh mahmah hi. (A theilou ten internet ah en ni). Scholarship tuamtuam leng om a chi jel ua, tuni chiang tan in Ministry of Tribal Affairs nuai a scholarship chihlouh college/university ST/SC & NORTH EAST MITE a dia scholarship hoihtak nei ka theih khak na chiang ah, khat leng a om naikei.
A tawpna ding in College hoih/University hoih taktak te'n marketing/advertisement bawl khollou uhi. College/University hoih leh hoihlou chih theihkhen hak i sak leh NAAC(National Assessment and Accreditation Council) grade/score et pah/dot pah/theihsawm pah di ahi. NAAC score a hoih nak leh college/university hoih deuh chihna ahi mai.
Mipil misian te business strategy a awk mai lou ding in siamsin naupang te pilvang chiat ni. I gam giabang zun ding in mangvom - mangkang te hong pai lou ding hi, i gam in lametna lianpi toh nang hon ngak hi. Nang na zuun kei leh kuan zuun ding?
Siamsinna mah awle....!!!
Deihsakna lianpi toh
Mumung Tonsing
Zoar Veng, Bungmual
Lamka, Manipur
#9089813132/9615507846