Guuktakna vai tawh kisai a tulai a Lamka khawpi sung leh asehvel genlouh Manipur leh India gamsung mun tuamtuam dengtuah lellel ahihleh Singngat water scheme thu leh Lamka damdawi inn a vanzat poimawh mahmah CT scan leh a dangdang manthu ahi hi. Thil paidante i et chiangin i tenna district pen maimai nawnlou hita e chih hon ngaihtuahsak a, hiai dan a hong paitouh zel leh, selguk thugil tamtak puakzaklai dingin uphuai hi.
Singngat khua a water supply tawh kisai North Eastern Council (NEC) tungtawna NLCPR 2010-2011 a kibawl, Water reservoir ding tua kisekhin chihtel thil zumhuai tawpkhawk ahi hi. Hiai tanky bawlna di tawh kisai fund teng release khit leh khitlouh pen thutuam hita leh athil kibawlkhia mit a muhtheih kilangkhia pen hong hihchih mawk leh mipi lungsim si dedu tawh kibangin omlel hi. I theihchiatsa bangin Singngat khua ah a chik achik in tui haksa a, tutung a NEC tungtawna water supply scheme bawlna ding a Rs. 2.4 crore sanction a i om zenzen khak pen nak vangphathuai law mahmah chih ding ahi. Vangtahhuaitakin Singngat khua bangzahvei hiam tak mei in kangta a, tui ginatlouh ziak mah in inn tampipi kang tum hilhel sek hi. Tuaziak chauh in leng a khua uah tui poimawhna lian hi.
Hiai dan a thil hong paitouh zel a ahihleh centre scheme tuamtuamte a zarzoutak ihi lai ua hia chih theih in om hi. Manipur in National Games a zintun dek lai in hockey stadium a gallery kichim a, huaipen state adia zahlakna tawpkhawk ahi chih ziakin phaizang helpawl khat in Thoubal district sung ah a kisaipih engineer leh contractor capital punishment pia uhi. Tutung in capital punishment peni chih thu hi zenzenlou in, maban saupi etna tawh neuchik kitaihilhpen a loutheilou suakta maithei hi.
Singngat MLA GS Haupu leh EE/PHED te’n thiltung tawh kisai a mit mahmah un amuta ua, lungmuanhuai chih ding hiphot inteh! Tanky bawl na ding a van zat tuamtuam te diklou, tanky ah balu shingle kichi kizang ngeilou, lei ngawi leng sawp sianglouh ban ah, khat veithu a nasepna zawh tantan akilual a bawl vek ngai ahihdan gen uh ahihman in bangchi bangin thil hong paitou hiam chih mipite’n bildawh mahmah di’n kilang hi.
Thudang khat ah, Dist Hospital a CT scan vanzat CT scan monitor, endoscopy monitor, key board leh dry cell battery 7-te April 8,2012 in kigumang chih hinawnta get hi. J.Lhungdim, Planning Adviser(NEC) in CT scan inspection bawldia a kisak leh huai hunin thilmang kithei khepan chih hilai! CT scan vanzat kigumang mahleh chabi(key) kihih selou in hoihtak in kikalh a, tukvelh khat leng 
omlou in kongkhak kia ah luttheih hi’n kigen a, huchi ahihleh a gutu pen a gamla lawtel dia hia chih mi mawl pen suangtuahna ah leng om thei mawkmawk hi. Bangzah ta a damdawi inn leh vanzat bukim poimawh hiam chih mi damthei te’n ngaihsun kha khollou ding ua, himahleh, damlouhna tuakte’n damdawi inn poimawh dan thei mahmah ding uhi. Lamka damdawi inn Infrastructure tawh kisai in Zomi Human Rights Foundation in National Human Rights Commission a ngetna abawlziak ua vanzat bangzahhiam kinei hilel in theihtheih lai hi.
Bangteng hileh, Mizoram ah MNF in vaihawmna aletlai 2008 velin Reliance General Insurance Company Limited tawh pangkhawm in mizawng leh gentheite khualna ziakin scheme hoih mahmah khat pankhia ua, damlouhna ziakin innkuan khat in kum 1 in Rs 1 lakh tan hamphatpih theiding uh chih ahi. Implement tu ding Mizoram Health Care Society kichi tanpha phuhkhiakin ana om a, himahleh, akhawnungin huai hun a Health Minister R Tlanghmingthanga leh official hunkhop in sum le pai crore tamtak ana su thelthang uh ahihdan pholhkhiakin hong om a, hawi ahituan kei uh. Khamtheih-guihtheih hihziaka guta-lata te soisa ut i tamthei mahmah ua, newspaper tanpha a suk zahlak i ut mahmah lai un, guta lian taktakte kua’n mankhe ngam ding ihi ua le? Kua’n zawhngeu long oksak di? Omlou.. A omlou... khat lel zong.
(Manipur Express editorial April 17, 2012 issue)
.