KA PASAL GAY ANA HI GIGE

-Taken from Mizo Magazine

Nungak virgin in Pasal ka nei hi.Ka nungak laiin YMA,KTP leh MHIP te ah ka hih theih zahin ka kizang hi.Senior Department ka tunma in Sunday School Teacher  ka sem hi.Pasian nasemin ka hun tamzaw ka zang hi.Ka pa in hong sihsan baih ahihmanin  ka nu makaihna nuaiah ka khawsa uh hi.Tua ahihmanin innsung ka lunghimawh mah mah hi.KTP leh YMA a ka kizat man leh innsung ka lunghihmawh manin pasal neih ding zong ka ngaihsun man meel kei hi.Pasal ka neih ciang virgin a pasal nei dingin Pasian’ maiah ka ki ciam hi.Pasian kianga ka kiciam mah bangin nungak siangtho in pasal ka nei hi.Ka pasal zong mi hoih leh migi mah mah khat ahi hi.Ki it in ki ngai mah mah hi ung.

Tua banga kilem tak leh nuamsa taka hun bang tan hiam ka zatkhawm khit ciangun ka cidamna hong hoih nawn lo hi.Ka ci hong na in dam kician thei mah mah lo hi’ng.Doctor ka ki etsak leh HIV test ding hong ci hi.A tungin bel ka heh tha bang suak zaw zen hi.Ahizongin Doctor te thuman na tawh  vei zong ki ummawh lo pi in sisan ka test hi.A result hong suah ciangin ka lam-et hetloh ka sisan ah HIV na om mawk hi.Lamdang sa lua in um lo phial hing.Ka result pen hihkhial hi ding uh hi ciin ka ngaihsun hi.Kuama’ sisan hong kipia ngei lo banah virgin in pasal nei ka hih manin HIV ka ngah theih nang  ka theizo kei hi.Tua manin midang sisan pen kei’ aa’-ah koih kha uh hinteh ciin ka ngaihsun hi.

A zing ciang in sisan ka test sak kik hi.Ahizongin tua result ah zong HIV+ mah na om kik mawk hi.Ka lungsim ngaihsutna khempeuh buai gawp hi.Virgin in pasal ka nei a, ka pasal zong khuaval lo in nungakdang tawh kizui ngei lo hi.Nungak tangvalna tawh kisai in kitai ngei lo hi ung.Ki muanmawhna lungsim zong nei lo hi ung.Mangbang lua ka hih manin ka pasal kiangah ka gen hi.A man zong lamdangsa hi.Numei dang tawh mawhna na bawl hiam? ka cih leh bawl ngeilo ciin hong dawng hi.Ni khat ART Centre ah ka va pai hi.Tua muna sem Councellor ten,” Na pasal in zong sisan hong test pelmawh hen” hong ci uh hi.Ka pasal in zong Councellor te ngetna bangin sisan va test hi.A result hong suakin amah zong HIV+ na hi  gige mawk hi.Tua akipan ka nupa un lungsim gim takin ka om uh hi.

Ka nupa ua HIV+ tuak ka hih ua kipan sex zong ka zang nawn kei uh hi.Ahizongin ka ki it mah mah veve uh hi.ART Treatment khong ka la uh hi.Tua treatment ka lak khit uh a sawt lo in ka pasal aci hong na(damlo) hi.Lupna tung bek ngaka hun sawt sim a zat khit ciang hong ki pulaak hi.Tua ka pasal thupulaak pen ka ngaihsut khak ngei loh ahi hi.Ka pasal it mah mah in ama kibat pih pasal dang, a lawmte tawh sex na zang uh hi mawk hi.Tua thu hong hilh ciang ka lungsim na sem sem hi.Tua dana sex a zat pih te ama’ lawmhoih zi leh ta neikhin vive ahi uh hi.A lawm te tawh a omdan hong gen ciangin hun paisa te ka ngaihsun hi.A lawmte laka khat pen hong hawh mun banah zong hong phone mun mah mah hi.”Hi pa tawh ki ngai hi  uteh maw?” ci in zong ka dong ngei hi.Aman lah hong nuihsan ziau lel mawk hi.Ahizongin hong kipulaak tak ciang tua ka upmawhpa mah zong kihel kha hi.A lawmpa khat bang HIV/AIDS hangin si khin hi.Tua pa sih khit ciang amah zong ki ummawh hih tuak hi.Bangmah a gen ngam loh man bek na hi mawk hi.Tawlkhat sung amah bek kuama’ theih pih loh in lung gimtakin na om hi.Virgin a pasal neite nangawn in HIV a ngah ki hi mawk hi.Lamdang sa in ka lungsim na lua hi.

Ka pasalin ama’ hanga HIV ka ngah pen poi sa hi.Tua ahihmanin ka kiangah mawh maina ngen ding na ngawn in cing kisa zo nawn lo hi.Ahizongin ken a mawhna ka maisak lam ka hilh hi.Poi lua cih lo buang gen ding bangmah theilo hi ung.Ka lungsim tawngah ka kisikna lian pen bang hiam cih leh,” Ka kiteen ding ua sisan ka test khakloh mah mah uh” ahi hi.Hi bang dinmun a tung ding ki sa khalo mawk ka hih ciang a.Ka lawmpa lah mi hoih guih theih kham theih hih lo, kuva bek hai hi mawk aih ciang a.Ka kiteen ma un zong tuadan a mihoih hi den hi.Hi dan a om dingin ngaihsun ngei mah mah lo kha mawk kai ve.Ahizongin aman amah tawh a kibang pasal lawm ngai in sex na zang kha mawk hi.Poisa in kisik mah leeng bangmah a phattuamna lah om nawn lo hi.

Tua bang dinmunah ding mah leeng Pasian muangin  Pasian tungah ka ki nga hi.Ka thuak zawh loh ding ka tungah bangmah hong tungsak ngeilo hi.Haksa leh lunggim tak in hun ka zang hi.ART Centre  ka pai ding ciang bangin meltheih ka muh khak ding ka lau hi.Zum pipi in ka pai zela, himahleh a semte bel nuam mah mah uh hi.Mi hehnep dan zong siam mah mah uh hi.Pasian in amau te zangin ka lungsim natna zong  awl in hong dam hi.Pasian leh ART Centre a sem te tungah ka lungdam mah mah hi.Tu ma in Pasian tawh kinai ka kisak leh, hibang dinmunah ka tun ciang  Pasian tawh ka kinai loh lam ka phawk hi.Amah tawh ka kinai zawk theih nanga hong sapna na hi gige hi.HIV+ ka hih lam ka theih ciang Pasian tawh ka ki nai sem sem hi.Ka nungak laia ana ka sep sak mahin hong  tawsat hi.HIV ka neih lam ka theih khit ciangin depression khong ka nei to hi.Ahizongin Pasian in a mite zangin nasem hi.Tun manin depression zong ka neinawn kei hi.HIV/AIDS vei ka hih lam zong phawk nawn meel lo in ka om thei ta hi.

Ka pasal te lawm te amah tawh simin mi thum si khin uh hi.Khat bel HIV natna tawh si ahi hi.A khat pa’n bel sisan test maw test lo cih ka theihpih kei hi.Ahizongin HIV mah hi dingin ummawh ing.Amau lawm teng pen mi guk pha in zi leh ta neikim khin uh hi.Kei tawh ka kiteen ma in zong na kingai kual khin uh hi.A zite un   a thei vetlo hi mawk hi ung.Ka kiteen khit ciang un zong a zite uh kihel lo in ann khong ne khawm zel uh hi.Tuabang hun ciang Sex zong zang zel uh hi, lamdangin lipkhap huai hi.Kum sawm val ka kiteen uh hang tuadana om dingin ka ngaihsun ngei kei hi.Kei tungah lah gitlohna bangmah nei tuan lo mawk hi.Amah mah in a sex zat dan uh  hong gen in,” Ann ka ne khawm ua, tua ciang a hon in sex ka zangkhawm zel uh” ci mawk hi.A lawm te pawlkhat bang saptuam a mi kizang mah mah ahi uh hi.

Ko nupa tuahkhak bang  na tuahkhak loh nangun kiteeng ding peuhmah in sisan test masa un.Sap tuama kizang, zu leh kham theih hih lo ahih manun  lungmuan huai nawn lo hi.Tua sangin a sisan uh a siangtho hiam cih thupi zaw hi.HIV pen pro pastor  te tapa hihman  aihkeh  saptuam upate ta ahihman un a vei lo dingin ngaihsun kha ken.Sisan test masa loa kiteen a hoihlohzia keima tung pan kilang mah mah hi.Tu nung cianga ka lungsima hong lang zel bang hiam cih leh ka kiteen dingun mi khatin,” Tuhun ciang zi leh pasal a nei ding ten  mi hoih hi, saptuam ah zong kizang cih sangin a sisan a siangtho hiam cih thupi ngaihsut zawk ding” a cih ahi hi.

Ka nungak laia Pasian kianga ka kiciamna om mah bangin Virgin in pasal ka nei hi.Pasian kianga ka kiciamna bel lawhcing hi.Ahizongin ka pasal in HIV na vei mawk ahihmanin  ken zong ka ngah ta hi.Poi cih ding lo ngal gen ding om lo hi.Ka tunga hong tung bangin midang tungah tung kha kei leh ka deih hi.Ka tuahkhak bang  midang ten a tuahkhak ding uh ka lau hi.Tua ahihmanin a kiteeng ding peuhmahin sisan test masa zel ding cih pen ka thupi ahi hi.Tua banah HIV vei dinga ki ummawh peuhmah in zekai loa sisan test pah ding hoih hi.Positive te adingin zong treatment om ta ahihmanin treatment lak baih hoih hi cih zong ka gen nuam hi.ART Centre ah treatment la hamtang un.Ken zong ka lak leh hoih tuam mah mah hing.Ki thei baih hi le ung ka lawmpa zong si nailo dingin ka ummawh hi.Ka taksa kisia mah mah ta himah leh  ART Treatment ka lak akipan hoih kik in a ma tawh kibang phial in ka om kik thei hi.HIV vei dinga ki ummawh sisan test ngam lo khawng  i om khak leh zum ngaihsut lo in test ta peuh un.Ko zong ka pasal bang a kiummawhna sawtpi hi.Ahizongin a sisan test ding pen zum ngaihsut mawk hi.Tua manin treatment la hak kha hi ung.A zekai khit ciang treatment ki la pan ahihmanin  zatui in a sep ding bang sem thei nawn lo hi.ART pen hoih peuhmah hi, kei zong la lo hi leeng si khin ta ding hi ing.