Tuma in khavei Paite kampaute lak a saptuam lianpawl a heutlian khat,  siamsinnalam enkaitu toh Zodawn a siamsinna toh kisai ka houlimkha uhi. Tua hun ah, ‘Zodawn a siamsinna phuahphatna ding in asung a bual saptuam nih-le-thumte pangkhawm in, khua bang kihawm pian in, khua khat a saptuam tuamtuam’ skul nih-le-thum om a, naupang etkol khamlouh chiat a atan sang un saptuam khat in tua skul enkol henla, huchi hileh skul omna chiat saptuamte’n ginatak a enkolzou ding ua, siamsinna hong gina mahmah ding hilou hiam? Hiai toh kisai in saptuam in bang ngaihdan nei hihiam?’, chia ka dotleh aman leng, ‘Tua ngaihdan hoih mahmah ahi a, tua bang a saptuam tuamtuam toh houlimna omkei mahleh khua khenkhat, skul dang omna a I skul naupang tamlouhnate laakkhiat a, naupang omsunsunte saptuam skul dang a kaisak a, saptuam in a kaiman uh piak ding chitan hial a pan naakpitak a ka laak lehleng ka pichin zoukei. Mahni saptuam’ skul a omlouh ding papi khenkhatte’n angai theikei bilbel ua, lakhe teitei lehang saptuam nangawn ma ding uh hileh kilawm a, ahaksa mahmah. A tate uh saptuam dang’ skul a kaisak ding bang sih ngaihdah in ngaidah uhi,’ chi hi.

Thil lamdanglua ahikei a, I lungput bang leng I khoneu leh let ale kingasim mahmah ahihmanin amaute va mawk mohsak theih leng ahipahkei hi. Apoimohpen bel hiai kingeihlouhna chi bangchi leh sumang thei ding I hiam chih ahi. I saptuam heutu liante lungsim munkhat a om a, dohkan khat umkhawm a, khalam leh salam thilte vai hon khawmkhawm theih chiang un hiai kingeihlouhna hong mang ding in uphuai hi. Akhen chiang in houh hiai kingeihlouhna chi tuhtu makaite I de aw chih hun bang hong om thei hi. Kumpi nih akidoudou ngal un, bangchi’n agam mipite kilem in a omthei ding ua? Kumpi nih akituah ngal un, bangchi’n agam mite kilemlou in a omthei ding ua?

I naupangte ading in lungbuaihuai pi mah ihi uhi. Sahkhua lak ah ei sahkhua adikpen I chi a, ei sahkhua ah leng ei thugin (doctrine) dikpen, I chitouzel a, mi chiimtak a ngaihsunte a ding in thilnuihzathuai ahilou theikei hi. Pathian khat ahihngalleh, banghang a sahkhua huaizah zouzai om ahia? I tunna ding munkhat ahihngalleh, banghang a thugin huaizah zouzai om ahia? Huaiziak in hotdamna zaw Pathian a kipan ahi a, thuginte zaw mite’ muhkhiat ahi  (Salvation is from God, doctrines are invented by man) chi ding in ka lungsim athanuam mahmah hi. Khovel a thugin diktak a om ding leh, tua thugin tuh Itna Thugin (Doctrine of Love) ahi ding hi. Banghang a hiai thugin dik taisan a khat-le-khat kingeihlouhna ding thugin dangte a hiipmang a om I hi ua? Thugin ka ngainep in ka ngaidau  ahikei. Himahleh thutak khatkia omlai tampi I suahna uah nuihzaathuaina a om hi.  Ahihkaleh houh tua bang a kilamdanna Pathian deihdan mah houh ahi ding e, ama lemgeel mah houh ahikha ding e!!!

Na kiim na paam uh en mah dih ve ua, vakhu na muh uleh vapaal ana om a, zawng na muh uleh ngau ana omzel a. Ahihleh sahei na muh uleh asan kia a om ahia? Asan a omleh a ngou ana om a, a ngou a omleh a eng ana omzel a, khokhal lai a galmual a vaupaak na muhleh, a ngou kia in apaak ahia? Asan in leng apaak sam hi. Amaute’n akilamdanna uh bang ding in azang ua eita? Zogam’ etlawmna ding in azang uh ahikei maw?? Amau tuni bang a paak a zingchiang a vul mai dingte nangawnin akilamdanna uh Zogam’ kilawmna ding a azattheih uleh, ei sisan hilhial a leite’n I lamdanna uh Zogam’ kilawmna ding in I zangtheikei ding ua hia? Kilamdanna in kimelmakna piangsak ding hitaleh, khovel bangchi’n apai mahmah dia? Ngasa na chihlah chi tampi leh zetampi a bawl ahi a, na muhtheihlouh huih nangawn lah kilamdang pipi tampi gawmkhawm ahi ngal a.

Nga lian a omleh nga neu leng om a, nga liante’n nga neute aneeklai un kimeelmakna, kituahlouhna chi ding I di uam? Loupa a omleh ane ding loupa ne sakhi om a, sakhi a omleh amaute  ne ding sakei omzel a, hichi bang a kineektuah vengvung na ah kituahlouhna om I chi ding uam? Ahihkaleh khat in khat ne a, huchia kinetuah a khovel a hinna kitatsatlou a apaitouhzel na ah kilemna (harmony) om I chizaw ding uam? Khovel a sahkhua a omleh khatkia omlou a, sahkhua khat a omleh huai sahkhua sung ah thugin khatkia omlou a, tua bang a sahkhua khat-le-khat kituahlouhna ah, sahkhua khat sung a thugin tuamtuamte kal a kimelmakna ah kituahlouhna om I chi ding uam? Ahihkaleh saptuam khat leh saptuam khat kinawktuah a, kiam leh pun kihelhhelh a, tua bang mah a saptuam khat sung a gindan tuamtuamte kal a kinawktuahna ah kilemna om I chizaw diam? Tawndan (culture) tuh thilhing bangbang in akhan ding ahi. Khan akhawl hunhun tuh asih na’ng nai chihna ahi. Darwin in ‘Chiphapen khosuak’ achih thilhingte kia hilou in tawndan ah leng adik hi. Eipawl tawndan chipha zoulou ahi ding a, akhosuak zoukei a, sapte tawndan in anawmvalh hi. Na nu apan na zil, tua na kampau zat kum bangzah na zanglai ding hiam na theihiam? A nawmvalh ut a kamka heekhook hiaizah lak ah bangtan I khosuak diam chih I theikei hi.  Mihingte lak a hichitel a thildang genlouh sahkhua a kilamdanna a om a, tua sahkhuate lak a kinawkna a omleh bang dang hilou in, hiai khovel siampa’ danbawl (formula) zui I hilel hi. Rose paak a san kia bawllou a a ngou, a eng , a sandang leh adangdang leng bawlpa’n sahkhua khatkia ana bawllou mah ahi ding e!  Thugin khatkia ana bawllou mah ahi ding e!

Pathian in kilamdan utna lungtang hon pia a, hiaipen I pichin a I zuih ding mah hihiam, ahihkaleh I dou a, I betdaih ding hizaw hiam chih ka theikei. Tu a sihpih ding khop a I gup uh thugin tuamtuamte lungtang helhaatte apan hong piang hilel hi. Ei-le-ei a huchibang a lunggeel ding I ngam hetkei ua, ngaihdan thak, thuginthak chihte pokhe ding in I dawilok mahmah ua, I gaal khawng a tua bang a lungtang hel a, paidan ngeina ana taisante bang I awlmoh mahmah ua, huchihlai in ei lah tua bang a lungtang helhaat apan hong pawt, ahun sawtziak a pomkip a ana omta sihpih ngam ding khop in I hangsan zel uhi. ‘A paina ding lampi ah naupang chil in, huan a upat hun nangawnin leng huai akipan a paimang kei ding hi,’ chih tangtunna I hilel uhi. I pian apan I theih, dik ahi chi a I pom, I gupkeileh khovel ah bang I gumta dia?

Saptuam leng hun teng in dik gigelou hi. Saptuam pen Pathian a himahleh Pathian lautekia in enkol gigelou uh ahihmanin hun tampi ah diklouh hun na neitham hi. Mite’n Pope innpi ‘Kizuakte kul’ achihlai uh hunkhat ana om a, saptuam makai khenkhat ‘Gitlouhna Ngalkhohang’ (Monster of vice) chi hial a ana minvuah uleng om hi. Galileo in khovel kiim a ni kilaam hilou a ni kiim a khovel kilaam hizaw ahi chih amuhkhiatlai a thiltungte I thei hi. Theihna dikloupi gum a, saptuam in huchitel a ana lan ua, atheihlouh uleh agindan diklou pi uh thagum a Galileo ana pomsak teitei mawk uh ahihleh  tu a vangam, angel, hotdamna chihleh adangdangte leng atheihchiang taktak mah hon pomsak ahina diam? Huaiziak in saptuam makai khenkhatte’n saptuam’ vaai leh daan peuhmah Pathian vaai leh daan bang a agen chiang un ka naa ah a thalkiak hi. Tua bang a mimal hamphatna ding leh gitlouhna sukpichinna ding a Pathian thu zangte hang in Pathian I ngaineu in athu I musit bel ahikei. Himahleh bangchi’n ahia mite lak a kideidanna tuntu Pathian apan ahihtheih ding? Bangchi’n ahia kilanna, lungtang a ki-uina leh kizehuatna piangsaktu lemna deihpa apan ahih ding?

Khovel a teisuina tu bang a apaitouhzel leh tunung kum zakhat a thiltung dingte ngaihsutphak ahikei hi. Na pi’n amuh ngeilouh lenna a na tuanleh, na nu’n amuh ngeilouh bang thil na ta’n ahon mu dia? Galileo hun bang a saptuam leh telsuina kinanna tu in I tuak nawnta hi. Huai tuh stemcell leh cloning ahi.  Galileo thil muhkhiat khaamvual ahihlouh a, ahong kiphoulaak thouthou bang in hiai (embryonic) stemcell leh (human) cloning te leng khaamzoh ahih gigelouh hun hong om ding hi. Ke’n bel tu in leng khaam angaihna ding thu ka theikei. Mihing in pilna aneih bangzel in sui hen. Pathian in pilna leh siamna eite a ding a hon phalsak tan hiaitan ahi chihlah I theingalkei a. Ama hon phalval va sawkkha I hihlehlah Babel innsang lamlai bang in amah hong kigolhmai nake. Huaichiang in chiangtak in ei theih dia kilawm chiang, I gamgi I theita ding hi.  Hiai thilte bang ahong tangtun a, I lak a hong om chiang in thugin, amaute leng kaankhawm thei ding I muhkhiat thak uh kiphamoh ding hi.

Hiai bang thuginalou teng gelh ding a bang kha in hon tokthou ahia ka theikei. Kha diklou ka tung a hong tu hiam, ka dik in hong pawl hiam ka theikei. Himahleh hiai bel ka thei, sehsa leh sehsalouh hang in Zogam in sawt athuak lawta. Tuiphum leh tuiphumlouh hang in bangtanvei mapangkhawm theilou lai ding I hia? Sahkhua sang in Zogam ka limsakzaw in ka awlmohzaw  ahikei. Himahleh vangam a kituaktak a omkhawm diamdiam dingte banghang a Zogam a mapangkhawm diamdiam theilou I hiam chih in hon lungnuamkei sak. Huan na thugin kibatpihlouh toh dohkaan khat umkhawm a vai na hawmkhawm theihkeileh khovel a sahkhua huaizah zouzai ana piangsak a, thugin huaizah zouzai a om ding ana phalpa toh bangchidan a dohkaan khat umkhawm thei ding na hia??