PATHIAN BANG OMLOU
(Revised and edited on 4/6/2021)
~ T Mangmuansang, M.Th. in missiology
Pathian tawh tehpih ding A'mah bangbang kuamah omlou hi. "Aman kha hunbi theihna ding in asep a: ni in tum hun athei gige hi" (Sam 104:19). "Aksi tamdan asim a amin uh asa chiat zel hi" (Sam 147:4). Mei gialte, vuk leh meipite'n Pathian thu azui zel uh (Sam 148:8). I gam uah siatna a uang a, Pathian ngaineu in a sang a deihzawk tampi i neita uh. Khawvel ah hipi lengte (thil tungte) ziak in siatna, manthatna leh haksatna thupitak tung a, mi tampin sihna tuakta hi. Tua ban ah mi genthei leh liangvaite adin haksatna genvual louh thupitak hongtung hi. Ginglou mi tampin a Pathian uh gingta nawnlou ua, Jesu Khrist Lal leh hondampa ding in sang uhi. Khovel kitaitehna sang a, pilna, siamna leng a sangta hi. Himahleh khalam ah Pathian' vualzawlna i poimawh lai uh. Gingtute'n kei ading in bang a hoihpen de aw chih sang in, Pathian in kei ading in, bang hoih asa pen chih theih poimawh zawta hi. Mari bang a kipumpiak in (Luka 1:38), Pathian' deih lampite zui in, a deihlam sem din kisa ni.
1. PATHIAN' DEIHLAM SEM:
Pathian bang leitung ah kuamah omlou hi. Gingtu hinkhua ah thupukna lak a deihtelna bawlna munding tampi om. Pathian' deihlam thilte theina zenpi a deihlouh lam na semkha zelte ihi uh. Abraham in Isaak ji ding zong dia a sawl sikhapa'n Pathian' seh numei amuhna ding in thum hi (Gen. 24:1-14). David in Pathian' kiang ah Philistiate dou ding in kakuan diam chiin dong, melmate zou hi (1 Kro. 14:1ff). Hiai bang a khawvel hoihlou leh dinmun haksa a I din lai un, Pathian' deihlam na isep theih zelna ding un Amah muang a, kipi sak zel poimawh hi.
Pathian tuh i lungtang tengteng a itding, i invengte leng iit ding thu Laisiangthou in hon sinsak hi (Matt. 22:23-40). Pathian in hun paisa a i khelh nate uh thei gige lou hi. A tapa tuh Liangvaite kiang a, Tanchinhoih gendia thaunilh ahi (Lk. 4:18-19). Addictte, ngolveite, leh numei kizuak te'n nang ah mun anei uhia? Itna leh veina lam ah Khrist gim na namta hia? Pathian in a deihlam, thuguk tuh hon theisak zel hi (Eph. 1:9). Pathian' deihlam thilte, dan toh kituaklou chih om ngeilou hi. Itna tawh Pathian' deihlam semzel ni.
2. PATHIAN DEIHLOUH LAM SEM:
Samson lu ah mulmet tem himhim zatlouh ding chih ahi (Vai. 13:5). Himahleh, Delaila pheipi tung ah a luplai in, a samphek teptan sak leh mat in om hi (Vai. 16:9). Eli' tate ziak in Israel ten kithoihna ngaihneu loh uhi (1 Sam. 2:16-17). Kikhopna puan inn kong khak bul a nasem numeite leng luppih zel uhi (1 Sam. 2:22). Himahleh Samuel tuh Pathian leh mihing deihlam in a om hi (1 Sam. 2:26). Saul in Amelekte zou mahleh, Toupa Pathian thu a deihlouh ziak in Toupa'n leng kumpi ding in deih nawnlou hi (1 Sam. 15:22-23).
Pathian in Sinai tang ah Mosi tungtawn in Israelte thupiak 10 (Ten Commandments) pia hi (Exo. 20:1-20). Dan tampi a zuih ding ule pia hi (Exo. 20:22-23:33). Himahleh Pathian' deih lampite zui zoulou in takhial sek uhi. Pathian' deihlam sep sang in, a deihlouh lam sep nuam isa kha zaw uhia? Setan inleng mi vualzawl thei hi. Himahleh Setan vualzawlna te'n gah kilawm lou a piangsak dia, siatna leh manthatna ah hon pilut ding hi. Na tate thumang a om a, mundang ah thumang hetlou in nathei hia? Nang adia puakgik a hih ualeh, vualzawlna naak asuahna ding un thum in. Bang kim Pathian in hih thei hi.
3. PATHIAN VAIHAWN SIAM (VAIHAWN SIAM PATHIAN):
Pathian' vaihawm a hoih leh hoihlou lamah na tuakzel hi? I khelh nate uh ziak leh I hoihna ding ua thil hong tungte pomsiam kisin ding ahi. David hun nanung lam ah Pathian in Israelte a gawt deklai in, David Toupa kiang ah puklut hi (2 Sam. 24:10-14). Kumpi Hezekia in Jawlnei Isai apan Babulon te'n sal a a piding thu uh za a "... na gen Toupa thu a hoih hi" chi hi (2 Kum. 20:19). Job in a neih leh lamte mansuah a, a tate sihthu a zak in Pathian phalna leh deihbang a thiltung chih thei in bia hi (Job 1:20).
Pathian in khentuam neilou in thudik in, Itna tawh vaihawm hi. Ei adia lohsapna leh vuallelhna i chihte midang a ding in vualzawlna hithei hi. Na it mahmah leh mihoih nasakte'n sihna a tuah chiang un amau sang a sidia pammaih lou nasak zawk a om hia? Na ngaih tuah leh tuplouh dan a thil apai chiang in bang nachi a? Pathian in mihingte bang in vaihawm khial ngeilou chih thei in. Vangam tuh kipahna, tawldamna leh bukim namun ahi. Pathian' deihlam hihte tuh a lut ding uh (Matt. 7:21).