PATHIAN' PROGRAM LEH A LEMGEL HOIH IN MANPHA

By~ Mangmuansang Tombing, M.Th in Missiology
(Revised and updated on 09/06/2021)

THUMASA
Pathian' lalgam nasepna ah gentheihna leh haksatna tampi kana thuak sam a, himahleh ka hinkhua ah Pathian' hoihdan leh muanhuai dan ka muchian semsem hi. Pathian min thupi nang, a thupina kilat nang leh mi tamsem in Pathian thil hihtheih dan a theih chian semna ding ua hiai thu (article) kana gelh ahi a, mihing ki pahtawina dia gelh himawk lou hi. Odisha (Orissa) state sung Muniguda Town, Rayagada district sung ah, a gam mite' Pastor conference khat a thugen ding leh seminar paper lui din chialna ka ngah hi. Train ticket Yesvantpur Junction, Station (YPR) apan Muniguda Junction (MNGD) tan tungding kala hi. A thawn (free) a hawm dia kavan puak sawm tamlua ahihman in, Sleeper Class ticket kalak leh mi atam mahmah ziak in RAC 48na ah ka omkha hi. Ticket lakna mun (counter) a ten seat hawm (chart bawl/prepare) chiang a confirm zouding a chih ziak un kala hi. Pathianni (Sunday) a khualzin khiat ka ut ngeikei hi. Himahleh, Pastor Conference ma a Kandhamal district ah date 17th May 2018 in Tangthupha genna ding ka neih ziak in kazin khiat ngai theitei hi. Date 13th may 2018 zingkal in ka ULian te'n hon khakhia uh. A thawn a hawm dia mi kiphalte leh World Bible Translation Centre India in a piak khawm Bible, Calendar, puan, khedap leh sum tampi ka puak banah World Bible Translation Centre India-te apan NT, Bible leh Jesu' tanchin (life of Christ) bu tamsem a free a a ngah theihna ding un, Pastor te'n Bible request form a fillup ding uh kapua hi. Van tampi petmah toh train station lam ka manoh hi. Sleeper class adia ticket kalak himahleh, seat chart a bawl (prepare) tak un, Air Condition (AC Coach) ah hon omsak ua, a hih khelh khak uh ahi de aw chi a TTte ka dot leh, Sleeper Class ah tuang a hon zin saklou dek ua, AC coach ah tuang dia honna koih mah uh ahihdan kathei hi. Pathian' program leh lem geldan thupi in hoih hina mai e. Sum piak beh ngai tuanlou in AC ah nuamtak in ka tuang a, ka gintak khel in tawldam tak in 15th May 2018 in katung hi.

1. PATHIAN' PROGRAM LEH LEMGEL:
David naupang chik ahihlai in, Israelte' kumpi nihna ding in thaunilh in om hi. Kumpi Saul kha gilou in a sukbuai chiang in David in tumging tum a, Saul damzel (halhzel) hi. Israelte' melma lian Goliath vasual a, Philistiate' khut apan Israelte hondam hi. Tua banah, David tuh kumpi Saul' tapa Jonathan lawmhoih ahih banah, Saul' tanu mikal' pasal leng ahi (I Sam. 18:20-27).

David in Israel' kumpi insung leh Israel' lalgam a nuamtak in hinkhua zang di'n kilawm mahleh, Saul in thah di'n zong a, lungmuang tak in om kinken louhial hi... Himahleh, Saul sihnung in Kumpi laltutphah a tu a, Israelte kumpi thupitak suak hi. David in a hinkhua a haksatna, douna leh nelhsiahna tampi tuaktou hi. A hunlai in tawlpih in, thuak hak sa mahle, Israel' kumpi nihna dia thaunilh ahihman in, seppaih' galdou da'n sinsaktu (siamsaktu) leh kumpi' tutphah atutna dia, training na hoihtak in pang hi.

Indian Village Outreach Mission-te saina in Mission Conference 14-16 January 2018 kekal sung omding Kalpetta mun ah, Wayanad region, Kerala ah thugentu leh resource person khat di'n hamphatna ka ngah hi. Tarik 13th January 2018 nitak in Bengaluru apan tourist bus in ka kipan khia hi. Pathianni Zingkal phalvak in Kalpetta katung hi. Ka gari tuanna hatlua ahihman in kagin sang in katung baihzaw hi. Huaiziak in Pastor Joseph-te khua tung masa ding in Adivaram tan katuang suak hi. Bus sung a zan ihmu khollou kahih man in, saulou tawlnga ding ka chih simleh, zingkal break fast pen fasting a nanei ua. Sunday kikhopna ah thugen ding ka hihman in, tawldam manlou in kikhom din ka kisa khia uh.

Adivaram apan Kalpetta 27km vel a gamla zuan a ka taitouh uleh ka tuanna gari uh lamkal ah hongse zawmah hi. Bus dang a tuang in Kalpetta katung uh. A Pastor-te uleh missionary mun tuamtuam a semte hong paikhawm ua. Zing kikhopna (Sunday service) ah thugenna hun kazang, nitaklam in 'Mission' thupi pansan in seminar paper kalui hi. Ani nawn date15th zinglam leh nitaklam inleng seminar paper luina kanei hi. A tawpni date16th nipen Dr MM James in seminar paper lui hi. Ka gintak khel in nek leh tak banah hospitality lam hoih petmah hi. Pathian pina toh nuamtak in Mission Conference kazou uhi.

2. PATHIAN' THUCHIAM NGAK ZOU:
Pathian' program ngakzou, a deihdan ahin poimoh hi. Abraham in tapa Isaak aneih nang in kum 25vel ngak, kum 100 achin in tapa nei hi (Gen. 21:5). Isaak in kum 20 sung angak zawh nung in tapa phiik Esau leh Jakob nei hi (Gen. 25:20, 24-26). Joseph suang kulh apan khah leh tawisang a omma, jailah kum 13vel om masa hi. Mosi in Aigupta kumpi insung a, kum 40 leh gamdai a kum 40 hun a zatzawh in, Israelte pikhe di’n sap in ompan hi. Jesu’n Lazar damlouh thuza mahle, a sihnung in han apan kaithou pan hi (Jn. 11:1-44).

Khristian hinkhua ah hat gige thil haksapi hithei hi. I thumnate uh dawnpah a om louh chiang in, ging lah hi’n na kithei hia? Ahihkeileh, Pathian in hon ngai khelou dan in na ngaihtuah zaw hia? Pathian in inget teng uh hondong vekleh, mi siat nang leh sihna dia thumkha ngei tampi om ahihman in, mi tampi sita ding.

David' hinkhua apan I theih tuh kumpi ding a thaunilh ahihnung in, kumpi tutphah ah tu pahlou hi. Kum 13vel zawh in kumpi tutphah a tupan hi. Huaiziak in i gennawp tuh haksatna, thuakna, lohsapna leh vangtahna' khen a nopna, kipahna, lohchinna leh vualzawlna om hi.

Pathian in nang adi'n thilhoih pen thei hi. Na hinkhua a Pathian' vualzawlna thupitak na donte, na ngakzohna apan hithei hi. Huaiziak in, A’mah a dia hing kawm in, ngakzawh dan kisin ni. Kin luatna ziak a Pathian' program leh thuchiam ngakzoh louhna khelhna hithei ahi chih Mang ngilh kei ni.

3. PATHIAN IN HON OMPIH HI:
Odisha (Orissa) state sung a sawina (persecution) kipatna Kandhamal district chin gen uh. Kandhamal district ah gingtu ten Biakinn bawl hiam, school hon hiam, orphanage home pat ahih keileh conference leh convention khong a neih ut uleh policete (government) kiangah permission alak masak uh ngai hi. Rev Kisan Kumar in a seppih Pastor nih tawh car in Munguda Town ah hongpi uh. Kandhamal district sung katun un Pastor khat in honna kham a, a zingchiang date 17th May a thugen ngai ut a hihdan gen, himahleh, a gam (land) thu toh kisai in court ah a din ngaiding chi, hon nget bang in case sukbei ahih a, hong kikhop theihna ding in ka thumpih uhi. A nitak date 16th May in house church ah thu hongen sak uh. A zingchiang pen ka main program ding uh ahi.

Logos ministry-te intekna/saina in Mangapanga, Kurtamgarh, Kandhamal district ah program nuamtak kinei hi. Pathian in ka thumna uh hon dawnsak a, Pastorpa pen court ah ava din ngailou in, hong kikhawm thei hi. Pastorte leh Pathian nasemte ban ah mipi kikhawmte lakah Tangthupha genna kanei hi. Toupan hon zang a nuamtak in program kazou uh. Tua zoh in ka van puakte puan, calendar, Bible etc. hawmna ka nei uh. Rev Kisan Kumar-te kiten nung kum banzah hiam paita mahleh, Pathian in gil a gah goutan pelou, a kipahna uh bukimlou. Ta a neihna ding un ka thumpih hi.

Pastor conference pen date 18th May a kipan ding ah thugen ding kahih ziak in, nitaklam in Muniguda Town ah hong kha kiknawn uh. Conference program zoh in ka vanpuakte (zin pakte) hawmna kanei uhi. Kalahandi district sung house Church khat ah 21st May 2018 nitak in thugenna kanei nawn hi. Rev Kisan Kumar toh tuma deuh a ka kihouna ua a zi in nau paita, kumbul 2020 a nau neiding chih thu honhilh hi. Toupa'n ka thumna uh hon donsak man in, a min kaphat hi. Gingtu hinkhua ah sawina bang, gensiatna bang, khemna thupitak leh melmapa' pilkhel ziak in lunglel leh thanem in om khaktheih hi. Himahleh, thumnate dawngpa Pathian bang kim hihthei in hon ompih man in, I hampha uhi.

Tangthupha ziaka douna, sawina leh haksatna tuamtuam natuahte hang in gim-le-tawl tak in na om hia? Panpihtu leh ittu ding neilou kisa in thomhau tak in i omkha zenzen maw? Khalam tawl leh bah kisa petmah in, hihat na poimawh hia? Pathian' theih louh a thil piang omlou hi. Mihingte' ki itna, ki hehnep leh ki khamuan in sawt a daihkei. Pathian in hon ompih, hon nuselou. Huaiziak in, na haksatna, lungkhamna leh puakgikte, A kiang tun lete, hon sukveng sakding hi.

4. PATHIAN HONPI DAN LEH LEMGEL DAN HOIH IN MANPHA HI:
Pastor Conference khat a thugen zou, Date 27th May 2018 nitaklam dak khat a kipan ding Church of North India (CNI) biakinn (biakna) khat Kandhamal District, Odisha a thugen di'n Muniguda town, Rayagada District Odisha (Orissa) apan ka delh dek uhi. Zingkal in Muniguda ah kikhopna saulou kanei masa ua, 10Am vel in Pastorpa toh bike in ka kipan khia uhi. A kekal dakkal thumvel gari a khual zinna ahi. Tun baih deuh khakleh chia, ka kamlet missionary Pastor pan mi kiang ah short cut lampi a kan leh lampi hilh ua. Huailam a bike in katai ua, lampi hoihtak ana omlou, gamlak (gam mang) lampi zui, singtang kho tampi katawn uhi. A gammi Pastor pan a lampi theidi kasak leh ka zuihna lampi uh thei nawnlou ana hi.

Jayarpanga kichi khaw neuchik khat a gingtu tamlou omte kiang ah, tui dawn, saulou tawlnga in, varandah ah thugenna ka neih malam zoh un, thumna ka neihsak hi. Ginglou te'n a gei apat thugen ana ngai uh. Tua zoh in kou bike in kana taiphei uh. Huai khua apan lampi hilh dia Cycle a hongpai dingpa ngakna kawm in khaw dang khat ah kana lut uhi.

Kutakagudi kichi khua ah kalut ua, mobile a dak ka etleh nitaklam dak nih ana pelta. Lampi hilh dia hong paipa ngak sung a saulou chik kikhawm a thumna neidi ka chih uleh huai khosung leh khaw kiang apan mitampi hong pai khawm uh. A gam lumluat ziak leh silh leh ten kichian a neihlouh ziak un, pasal ten bang mah silhlou, puan hon teng ua, numei tele a taksa uh bittak in kituam lou uh.

Tanchinhoih tomchik genna neikhin, thumsakna nei a paisan ding ka chilhleh damlouhna chi tuamtuam mitna, bilna, chisa, hitang, khosik, ching (ta neilou a ta deih), tek natna leh natna tuamtuam neiten thumna lunggulh leh amau adi'n thumsak din hon ngen uh. Damlouhna leh natna nei a thumna lunggulh a hon zuan mi huchi zah a tam ka muhpatna hilai hi. Tua banah Jesu nei nailou mitampi leh khalam ah piching nailou gingtu tamlou kamuh te'n ka lungtang hon khoih kha petmah, ka mittui vung hi. Tangthupha gen ka sunzom, a lunggulh bang un a tung ua khut nga in thumna ka neihsak vek hi. Toupan ka Tangthupha gen thupitak in zang a, ka thumna ngaikhia hi. Ka tawptak un nitaklam 4:45pm ana gingta.

Huai khua a te'n ka tawtna lampi uh saulua, thugen dia ka hohna munding uh, CNI Biakinn khaw mialma a tung zou louding chih hon hilh uh. Ka kipatna uh Muniguda Town a ka kik uh hoih sazaw uh. Ka kipatna Muniguda town lam a nungkik in, khaw neuchik khat Belundi kichi a khawltou in, lumlua ahihman in a in neuchik sungte ua sunlai leh nitum ma om zawh ding hilou. Gingtu tamloute kiang varandah ah thugenna hun saulou nei in, thumsakna hun kazang hi.

Ka ki-zuihpih Pastorpa' gingtute omna khaw neuchik khat Piskapanga a khawltou. Nitak dak 8pm vel hita. Nitak anne (dinner), saulou tawlnga in a hon nget bang ua, huai khawte adia thumna neihsak. Nitak dak 9pm vel a kipan khe nawn... Dak 10:30pm a ka kipatna uh Muniguda town, Rayagada District, Odisha (Orissa) tungkik. Lungsim nuam leh ki-paktak a huai zan ihmu hithit.

Ka kipatma un thumna hoihtak nei in ka kuan ua. Ka hohna san utuh CNI biakin khat, Kandhamal District, Odisha (Orissa) state sung a gingtute lak a thugen dia hoh ahi. Himahleh, Pathian in lam tuam daih ah honpi, kuaman ava phak mengmeng louhna mun leh gam mial petmah. A thu lunggulh petmah khamangthang leh damna lunggulh gingtu leh ginglou tampi kiang ah Tangthupha gendia (hun zang dia) honpi ana hidaih hi. Pathian in a gam adia haksatna thuak a, tawl leh gimtaak a honsep ziak in hampha ka kisa hi. Pathian ompihna toh tuamun ah nuamtak in hun kazang thei uhi.

Khovel a gam mial a kigenphate lak a Bible neilou, puan silh kichian neilou, tang leh mualtung, gammang lak a teng, tuklam chiah vuahtui tamziak in haksatna thuak ua, thousi leh thouvai keih ziak in damlouhna chi tuamtuam nei uh. Phalbi lam chiang in khovawt ziak in gentheihna thupitak thuakzel khenkhat adia Bible, Calendar, puan etc. puaktute lak a khat a kapan khak man in hampha ka kisa hi. A chang in Toupa honpi dan leh hon pina lampite thei chiang (theisiam) kei mahle hang, Ama deihdan leh a thupina kilatna dia honpi ahihman in a min kaphat hi.

THUKHUPNA
Pathian' program leh a lemgel dan hoih hina e. Tanchinhoih (Tangthupha) gendia kazin khak tei (sam) nate ah program a thugen ding in kazin tangpi hi. Himahleh huai program-te banah ka tamsung in gammial mahmah munte a gingloute kiang ah tangthupha hongen sakzel uh. Keilam ah suanding bangmah neikei mahleng, Pathian a itna leh zahtakna ziak un, pakkhi toh honna vaidawn pawl om a, phatna leh pahtawina thupitak kadong khazel hi. Pathian in mission field leh gingtu tawmna munte a thil lamdang hih diak in kamu hi. China gamsung Yunnan Province a hilly terrain a tengte a ding in khosak haksa hi. A nekpen utuh rice (antang) leh corn ahi. May 2012 vel in a gam uh naktak in keu, a haichite uh vuai gawp/vul gawp hi. Miteng lungkham petmah ua, superstitious practice tuamtuam tungtawn in khokeu sukbei sawm uhi. Himahleh a lohsap man un, a khua ua Christian mi 5 omte'n amau suang tute kha dou leh a kalh ziak ua tubang tung chi in ngoh uh. Christian mi 5 te Pathian kiang ah thum ua, sawtlou nung in khua nim in, vanging a vuahzu, a haichite uh silou hi. Toupa honpi dan leh hon pina lampite a chang in theisiam keimah lehang, min amah a theih nang uleh, ama min thupi nang in honpi hizaw hi. Pathian' program hoih a, a ngaihtuah leh lemgelte bukim in hoih hi. Khen tuam a neihlouh banah thudik in siangthou leh kizen takin vaihawm zel hi. Pathian' program leh a lemgel dal na sawm zenzen leh nadal zoukei ding, huaiziak in zuizaw mai in. Toupa'n thupina tengteng tangta hen.