Innkuan i chih mihingte a dia thilteng kisinsakna mun, omdan, paukam, itna a kiphan khawmna leh piankhiakna mun ding ahi.  Mihingte hinkhua ah zi pasal, tate leh tute a dia paradise (vangam masa) ahih ding himah leh tate tute khentuam innsung nu, pa omtheih mawk hi. Tate, tute gupzawk nei in, sungkhat piang hinapi'n deihsak deuh, deihsakna tang zoulou deuh bang innsung tampi ah muh theihta mawk hi. 

 

Bangziak ahi ding, ahong vak leh kemtu pen, a sum musuah deuhte bang pibawl, a sanggamte uh dinmun ana pha zoulou, ana ginalou pen zong a sung ua piang ta hithou hi ua ? Tuate pen itna leh lainatna toh kep a etkawl ngaite hizaw sem hi ua maw?  Pasian nasemte, ahithei deuhte kia ki it in, zi/pasal ana suunta alang beite, zi/pasal neiloute bang thusimlou in simmawh bawl deuh se nu leh pa, u leh nau tampi omta mawk hi ei...... 

 

Alang lam ah, zi pasal om gegu mi dang deih man in zi/pasal tate mudah ding ihi diam.Toupan inkuan hon bawlpih leh patpihsa nu leh pa tampite thulimlouh ziaka inkuan kekzak sak mai ding i diam.... Nu leh pate kingaihtuah thak ni. Inkuan sung manphat dan leh it huai dan thupilua hi.

 

Inkuan sung a thunei pen leh alupen PA' ahi. Pathian in Pa dia honseh bang a Pa in inkuan sung a mohpuaknate asep ding akep ding bang ana seplouh chiang in, inkuan masawn lou in khangbul kitam hi. Toupa' honseh bang in mohpuakna Pa in alak chiang in inkuan masawn in lamzang takin pai hoih hi. Nute'n le insung, tate kepna ah mohpuakna azoh chiang un, insung nuam leh manpha hong suak hi. Tuabang ahih in tuh, tate adi'n chidam huai in tawldam huai mahmah ding hi. 

 

Inkuan sung ah i line chiat om a, nu leh pa, tate leh moute mohpuakna i tan om chiat hi.  I mohpuakna chiat ihon sepsuah chiangin insung nuam leh manpha hong suak a, a sunga tengte ki it, ki thutuak in, nu leh pa zahtak kawm in inkuan bawl leng innsung nuam vangam nai pen hong suak ding hi. 

 

Insung nuam di i deih leh ei leh ei kipiak a, kibawl theih luat ahi. Ei khut a kinga liauliau ahi. Nu leh pa kuapeuh in panla thak in inkuan nuam bawl din kisa thak ni hang. Khotang leh Saptuam kipatna bul lah INNKUAN ahi ngal a...... Inkuan it huai in manpha lua hi.  Inkuan phelkhaptu, pukse saktu hilou in, itna toh Pathian deihna bang a phankhawmtu hithei chiat ding inToupa'n hong makaih in hong ompih tawntungta hen..... Amen 

 

Simtute Toupa'n hon vualzawl hen!