Akpi'n anoute a opkhum lai mu in api atuahmang sak a anoute tagah in lungleng takin aham chikchik mah bangin innsung a i pasal te Toupan hon laksak chiangin innsung thomhau in lungleng in i tate toh hinkhua kizang hi. I lungkham dan, vanbang sangtuan hileh kilom lungkhamna in hon tuam in manoh na di gam le kithei lou a hinkhua i zat hun om hi.

 

Tua hunlai takin Toupa kiang zuanni, kingaihsiat ziaka lungnopna di zu hiam va dawn in kipahna bangmah tan hondaih kei. I tan di chu innsung leh i tate mangthang di uh thuak tu di eimah i hi chih phok thak ni 

 

Ka meithaipihte aw i tung a Toupa hoihdan thupilua hi. Pasal poimoh na munah Toupa hongpang jel ahi Toupan tagah meithaite kahna lungkhamna mangngilh lou ahi. Ei lampang ah Toupa it thei a, vualzawl na tangtaak hi din kisa thak ni unaute.

 

Ka zahlakna di munte ah hon liahkhuh in ka thomhau na di munte ah amah hongpang jel hi. Kum 13 vingveng meithai a ka omsung in ka tate damlou a kakep a ka zanhah pih om nailou ahi Toupa hoih hinamai zen e ka tung ah chih ka mu a Toupa thupi na teng2 ka pia hi.

 

Khovel i khual zinna gam ah lungkham na haksat na i tuah a i melma di bang ilung tang hon suna di bang ituak tham a melma ichih gamla pi a hong kipan lou in innsung mite mah le melma hong hi thei zel hi.

 

Huchih hun hongtung inle i tung ahak sa tawp i tuah inle chikmah ahon tai sanngeilou Pathian mah bel ni i lungkham na i tuah tam dedeuh leh Toupa khut muanhuai lenkip semsem ni .

 

Meithai te khitui nulhul tu in honkhem ngeilou hontai san ngeilou ahi i  poimoh bangkim honpia a i taksap na teng a amah hongpang zui ni amah bel ni kipah na bukim lungnop na bukim Toupa kiang a om zong ni.