A Laiah Jesu
Biak S Tawmbing

(Hiai laigelh a neitu in gelhdia hon piak a, a simtute a dia bang hiam khat beek a sinlai laak ding a deih ziak a hon gelh khiak ahi)

Innkuan sung sia a tam luat tak ziakin, a hoihna ding in bang zahta in panla la leng leeng, I khotang, saptuam innkuan sung hoih ngeilou ding hi.

Kum 30 paisa in ka nupa un Pathian mai ngei ah kitenna siangthou in Pathian leh saptuam misiangthou te mai ah kana kiteng uhi... Ka kiten tung un nupa kituak tak in ka sep ka bawlte uh ki huh tuah dialdial in ka khosa khawm uhi.

Pathian dong lou a, Kei mah deihtelna zang a keimah ut leh thupukna a ka pai ziak hia ka thei kei. Lungkham haksatna lungzinna ka na tuah tel ka chi sek hi. Ka pasal in sep lianlou khat a neia, a hih theih khom in Saptuam vai leh khotang ah ki zat thei bang bang in kizang hi.

Pathian a din ka nupa un ka hih theih khom khom un ka ki zang ua, himahleh nupa kal kituah chih a om ngeikei a haksa mahmah hi. Sex chi leng lah lungkim tak in ka hih theih khom in damlouhna ka neih kei nakleh ka koih hi. Lungkimna Pathian ah a om chih thei mah leng i kiang a lum ei hon panpih di leh ei hon khamuantu ding a deih a tel a I zot in lungkim louhna ding kia zonga hong om chiang in a haksa thei mahmah hi.

Mi lak ah maitai tak in i om a, himahleh i lungsim taktak ah kahna guam ahi mai hi. Pathian I sam a lah hon dawnna ka thei naikei. Nidang a lupna khat a lum khawm a itna thu gen lai ka ngai thei mahmah hi.

Kei lou leng mi tamtak te lum khawm a teng khawm hi na zenpi deih louh paih a lah paih theih non nawnlouh zi leh Pasal nei omkha i om mahmah ding hi. Huai te a ding in na pasal sangin na tate i it zaw ta a, huai ziak maimai a a dik tak a gen in om leng i hi uhi..

I pasal tung a khrist mel a ki lat kei leh tate tung ei a nun latsak a haksa mahmah hi. Mi theih louh in i pasal in hon simmawh mahmah a, i pasal in hon simmawh leh taten hon simmawh uh ahi ka chi mai in.

Nupa kal mitampi ten sex a poimawh ahi a chi ua ka tuankei... Himahleh nupa kal ah A LAIAH JESU A OM KEI LEH sex in lungkimna kipahna tak tak hon pe tuan kei..

Na zi ding na pasal ding a ki khel ma in Pathian dong teitei in, Nang mah theihsiamna ah kinga ken. Lungkhamna haksatna ah na tang dia himahleh na samsung in suahtakna na mu kei ding.