Khristmas Message: JESU HONG PIAN DAN

~Donang Buansing

 

Jesu ahong pian theihna ding chuh numei sung apan ahikei ichi khamai thei uh. Hiai adikthou na a dik kimlou ade aw ka chisim, aziak ahihleh Jawlneite'n ana genkholh mah bang un David suan akipan ahih ngai ahi. David suan apan numei lah tampi om ding ua kuapen hiding ?? Pathian ichih i lungsim leh ngaihtuahna mu a thei pailet banah maban a i decision lak ding natan athei Pa'n Mari teel mawk hi.

Mari a telna ziak Luke 1:26-38 apan i ensuk ding.

 

1. Asiangthouna ziak : 

Ahong piang ding Jesu Misiangthou(t.35) ahihziakin ahong pianna ding numei leng asiangthou mah ngai ahi.

 

2. Akiniamkhiatna ziak : 

T.38. ah Mari in, “Ngai in, Toupa sikhanu ka hi, na thu bangzel in ka tung ah tung hen” a chi hi. Hiai hun in Mari kisaktheihna leh kiletsakna in adim dingin kagingta hi, aziak ahihleh a ngaihzawngpa toh kikham khin, kisakkholhna tengteng zousiang khinta kiteng ding kia maban ah omlai hinapi in Angel in ava houpih in anakiniam khiakthei a Toupa nasikhanu kahi kichithei hi.

 

Mari siangthoulou in leh ana kiniam khiatlou in kiliansak tak leh kidiksak mahmah in omleh amah ah Jesu piangtheilou ding hi.

 

Tu Khristmas hun in eite sung ah leng Jesu ahong piang theihna din kiniamkhiatna leh siangthouna i poimoh ua, huaite tellou in mi'n i hinkhua uah Khrist mu ngeilou ding uhi.

I hinkhua ah mi'n Khrist amuh theihna ding un ei i siangthou a i kiniamkhiat masak uh apoimoh ding hi.

 

Huaiziakin

Unaute, hiai i Toupa leh i Tanpa Jesu Khris pianni in i Gingtu khalam hinkhua uah, eiten bang phattuamna ina muhloh in ina neihbeh dia ?? 

 

I khotang khoheina uah naungek Jesu batpih in Sianthouna neih i tum di uam ?? Ahihkeh bolhloh taka sianthou louhna toh kidim tou nilouh lai ding ihi di uam ?? 

 

Ban ah, i Toupa Jesu kiniam khiakdan i muh bang un eite hiai Khristmas ni in Kiniamkhiakna hon puak tuanlou a kiletsakna toh khosa toutou lai ding ihi di uam ?? I thuneihnate khong uh suanga innveng innpam, midangte' adia thuakhakpi khonga hehpihna tellou khonga gamtang khasek houh ihi maimah uhia ?? 

 

Toupan hiai Nithupi Khristmas ni tungtawn in kuapeuh lungsim ah thilthak(new thing) hon tun henla, khat le khat tung ah, Ki-itna, Kihehpihna, Kiniamkhiakna leh Sianthouna hon tun hen aw...

Simtute tengteng Toupan honvualzawl chiat hen!

KHRISTMAS CHIBAI LEH ZATNUAM