Mang Gam (Pasian) nnasemte leh pension hun adihtatna
By Rev. Hangpi Manlun, Moderator, Zou Synod

0. Thumapui: Awle tutung in dihtatna thu gen ding tamtah umlah ah Manggam nna sepna/pension hun a dihtatna thu igen ding uhi. Tualeh tam anuai thu kigente in koima mimal leh pawlpi kawhna leh genna ahisih a, atangpi in igam pumpi en a genna ahi chi kagen lang masa nuom hi.  Khawvel khantou toh kituohin Government lam hileh, Mission lam a nnasemtute adiehin kumlam a upa lamte ading in sepna kipat khawldam hun (pension) hun ang hita hi. Tuami umzie ahileh khangte hing kikhelin huntha ah ilutta uhi china ahita hi.  Tualeh nichin phielin zong local channel leh i News paperte uah pension kiha muding leh zahding jong tam mamata hi. Tualeh igam Mission nnasemte koi pawlpawl zong Pasian mapuina toh kum zakhat phial bang ihing hita uhi. Tuachin a nnasem masate ading in pension hun ahing hipanpanta a, tuban kum 10-zou chieng ngelin, akim khat phiel ki-pensionta ding hi. Tuaziehin ipen kum thu adihtatna poimawna thu igen ding uhi.
1. Paulam chinglou kipaulapte ahileh, ka pien kum dihtah kathei sih chi ahi.
Tam atung a paulap khu tulai hattuom sung a semtu tampite buaina pen ahita hi. Azieh ahileh, semtu khen khatte khun apien kum dihtah gel lou a, a dihloupi gel a sepsawm um thei uhi. Etsahna ding in, hattuom khen khatte in asemtu uh pension na ding in, chini in akhen uhi. A sep hun sung kum sawmli (40) ahisih leh amapien kum, tuami khu anu gilsung akipat tami leitung a apien khiehni apat simin kum sawm guh-le-nga (65) aching masa penpen khu asemtute uh pension hun ding in bikhieh uhi. A khenten ahileh a semtute uh pension hun ding in apien kum, kum sawm guh or sawm guh-le-nga achin chieng ua pension pieh ding chite’n dan-le-dun anei uhi. Tami akipatin tena van zah ahileh, mani pien kum dihtah  china ahimai a, adang ahuop kha sih hi.
Ahin, tuabang ahilaiin, mi khen khatte in thudih kim khat paulapin, kapien kum dihtah kathei sih or kanu kapan na record lou chi’n a pawlpite un achilou bang un Class X, (Academy) apien kum pen apie un azang mawh ua, tuachin saupipi sep sawm bang get leh zah atam mama hi. Adihtahin inu/ipaten pien kum dihtah uh na record sih leuh jong ikanpei tahtah leh ikhanguolpite uh pien kum tungtonte in, ahisih leh koi e khat shi kum, ahisih leh sil thupi khat tun kum leh nidang lai ngel in inu/ipaten tuami mun ilou hawkum apieng na hi chiin jong itheithei ding uhi. Tuaziehin itup tahtah a ikanpei pou leh ipien ni-le-ha dihtahpen thei sih lei jong ikiguolpi khat  pien kum toh hisap/etin ipien kum pen suikhiehthei mama ahi. Tuaziehin, in pien kum theiloute pen Mekizadek bang a pienna menna neilou china ahi ding uhi.
2. Pien kum ni kinei hi. I gensa bang in i pawlpin pension pei kum dia ang pawmsahpen atangpi in, inu gilsung apat leitung a ikiehni asim in or isep kum uh kum uh ani aching masa penpen ahi hi. Ahin akhente pen in Matric (Pawl sawm) i pass kum kipie a, tuakhu igensa bang un ipien kum dihtah uh toh kituoh lou tampi aum ding a, akhente ngel khu apien kum dihtah leh a pawlsawm pass kum pen kum 5 or 10 bang in kikhiathei hi. Tuaziehin ipension na ding in ipien kum dihtahma izah lou ua ahileh adihlou china ahimai hi. Ahin Government record ading in vang i Class X (Academy) kum pen uh gel lei jong khohlou maithei hi  Azieh ahileh i pawlsawm certificate khu i record khat ahi jieh in ahi. Tambang a thudih theina sasa atheilou kipan mai khu khelna leh duamna chikhat ahimai hi. Ei Manggam nnasemte adia bawl ding chi hilou maithei hi. Tualeh, i pawlpi leh lamkaite ikhemzou maithei a, ahin mini ikhem zou lou ding aum a, tuate khu Pasian leh eima khu ikhem thei sih uhi. Azieh ahileh isia-le-phatheina un ang awimaw thou ding hi.  Tualeh Unau Mizoram Presbyterian Church Synod, Senior Executive Secretary lui khat in apien kum dihtah a baptisma tanna record anua mukia jiehin, Sr. Executive Secretary a term beina ding kumni maimai in asaplaiin, ama-le-ama kipuongkhia in, aterm sem zawmlouin a pensionta mai hi. Min tambang in dihtatna gum ngam in ahina uh jong topsan ngam uhi. Etton tah mama hi. Eite lah ah zong mibang zapitah aum dia chi ngaitua tham aching hi.
3. Pension ding kumpen Mission gentahlou government in jong abuaipi mama uhi. India gam ngei ah jong itheisa bang un, India Army staff khat apien kum thu aginlel akai ziehin India gam buppi akiling zou va-ia hi. Pien kum dihlou khu India gam Government nnasemte lah zong mite buaina khat ahi. Atahtahin Mizoram lah ngel ah tuabang a dihlou ding agintatte uh te khu hattuom record bu a en mai uhi. Tualeh akhen dihlou tah sem val kinuatheite khu a pension zou alaw lah tengteng uh akinua lesah mai uhi. Thamlouin pien kum ni-le-thumpi nei thei ahi a, ei lah khat kihingal in. Tuaziehin adihpenma gen ngam khu thudih genna khat ahi hi.
4. Mel-le-kum kituohlou hi. Bangzata in kinaupang sah nuom moh lei jong akhentepen a mel-le-kum kituohlou thei moh hi. Ahisih leh eisang a naupang zaw isang ni, sang thumnate adihtah ziehua apension nua ua, eite izuaugen zieh ua dihlou tah sepsep khah mai ding jong silzau huai leh zum  huai mamapi asuoh hi. Tahsa eisang a naupang jawte sang a  naupang jaw a um mai khu izuadan uh leh sum dudan uh suhlatna hoitah ahimai ding hi.
5. Nehguhna topkhohna ahi lam ngaitua va-ui aw. Etsahna ding in kum khat sung in semtute’n hasawm leh ni law (12 months pay) pawlpin angpia a, koi e khatin ha sawm-le- thumna law nalamaita leh, a kithei leh ki-terminate mai ding ahi. Ahileh na tahsa kum sawm 60 or 65-na chin nua, na zuagen zieh a kum 5 bang zua-le-nal na kinaupang sah jieh a Pasian sumpi i nehmai leh nuom tuolin i leng sih ding a, i-tu-ita khang ah i nehguhna pap hing pohkeh thei ding hi. Tambang lawmlawmin ipension hun tantan a tawmngai kisa vadap sepsep mai khu Peter in Jesu akiman lai panpi kisa atemsau toh amante khat bil asat khiehsah a, Jesun apatat keilou din mun a dinna ahikha ding azau huai mama hi. Tualeh  tambang a umte pen mihing sawl (khem) himailouin Pasian sawl ahi ua, koiman Pasian kisawl jou lou ding hi. Bible in, sum deitah khu suol chin teng bulpi achi a lutna chi khat ahi chi thei vai-ui aw. Tuaziehin, Pasian kung ah damtah i kum chin tan a semthei ding in thum in dihtatna toh nnasem lei Pasian guoljawlna lam tuomtuom ah jong itang mawsih ding hi. Mangpan simtute hingmapui jingta hen.