Asia gam a Tangthupha(Gospel) hong po lut te I theih sa mah bang un a tam zaw te European gam apan ahih uh I thei chiat uhi. World Mission Conference July 2013 kha top in South Korea ah neih in om a, tua conference a hoh te'n a thu/report hon piakna ua pan a thugen un ka lungsim hon khoih mah2 khat chuh “Amau apan in (Europe gamte) Tanchinhoih (or Tangthupha) i za ua, tun ah amau Tanchinhoih apoimoh ta uhi.”
Thumasa: I gam ua Tangthupha hong lut dan en zual leng... Wales gam ah halh thakna(revival) thupi tak 1904-1906 kikal in hong tung in huai ah Rev. Watkin R. Roberts in Pathian apan sapna ana ngah hi. Hiai kia hilou in a kum nawn 1907 in England ah Keswick Convention neih in ana om hi, hiai convention ah India gam a Tangthupha a poimoh dan a ngaih khok(stressed) mahmah te lak ua khat ana hi hi.Watkin R Roberts in hiai thu hon theih tak in, India gam a Pathian nasem ding a kalsuan a lunglut mahmah mai hi. Kum 1908 in Dr. Peter Fraser Aizawl, Mizoram ah hon pai in hiai hun ah Watkin R Roberts inle hon zui hi. Bangteng hileh, Watkin R Roberts in Senvawn village chief Kamkholun apan amite Tangthupha hilh ding a ngetna laithon hon mu ngal hi. Watkin Robert inle dawng-na pe pah in Savawma, Thangchhingpuia leh Vanzika te tonpih in 7th May 1910 in Senvawn Village tuh hong tung uh hi. Hiai apan in Watkin R Roberts in tupna nei in ama mission field chuh hon phutkhe ta hi. Hiai mission nasep na tuh amasa pen in Thado Kuki Pioneer Mission kichi a, kongja jaw sem a septheihna ding lam-et na in TKPM pen North East India General Mission(NEIG Mission) chi in khek in om hi.
I gam ua “Tangthupha” hong lutdan sau lou kon gelh malam ziak ahihleh I gam uah Kristian khandan bang chi bang in apai hiam? Khalam ah bang chi bang in I khang tou ua? Puksia lam ihi uh hiam chih mimal a ki ngaihsun di ka deih ziak ahi hi. Thudang sau gen nawnlou in hiai a kon kup nop leh gen nop pen tuh, hun paisa I et kik leh I lak ua “Tangthupha” hong lut na Kum 103 bang pha thei ta, mite hon theih dan a chuh khalam hi’n salam hita leh piching mahmah ta di'n hon koih di uhi. Centenary bang kilawm thei ta ahih tak teh! Kum paisa 2010 in Pathian hehpihna toh Gospel Centenary bang ina lawm khin ta uhi.
Lamka khosung a Kris Saptuam-te kalsuan na te ka et vengveng chiang in thupi in hoih kasa thei mahmah mai hi. Kum teng phial in missionary, pastor leh saptuam nasem ding ahon la zel ua amau te tuh Kris min in a haksa hi'n a nuam hita leh huai te teng2 thuak le poisa lou khop in a nasep na mun ding uah sawl khiak in hong om zel uhi, amau te ziak in Pathian I pahtawi ahi. Langkhat ah I khotang uh en nawn leuleu leng, a dah huai mahmah I gam ua thil hon tung chuh setan biakna 2011 apan(Centenary lawm zou phet a gim le theng man nai lou in) tuailai te lak ah hon uang mahmah mai a, hiai in Saptuam sung kia hilou in I society sung mahmah uh hon sunuam lou zou mahmah hi. Hiai setan biakna toh kisai in church leader hi'n society sung a heutu te'n pan nak tak in hon la in tu chiang in bel zak khak luat in om nawn kei a, ahihhang-in I gam uh I et vengveng leh sualna in hon nuse tuan lou in Sodom leh Gomora bang mai in a siat dan muh thei lai veve. Hiai I khotang siatna toh kisai in Saptuam heutu-te mohsak mawk theih hikei a mimal(individual) in Kristian hih na zar a bang mohpuak ki nei hiam chih iki phok uh hun sa petmah ta ing, achang chiang bang in gingtute'n I pastor or missionary te a nasep na ua panpihna piak dan ki chau ka sak hun bang om. Rom-te 6:15 ah “Bangchi ahita dia le? Dan nuai a omlou a hehpina nuai a i om jiak un i khial diing uh ahi diam? Khial lou hial ding!” chih Paul in ana gelh hi (Rom-te 6:14). Thukhunlui ah bel Dan nuai ah ina om ngei ua ahihhang in tuhun in Hehpihna nuai a om ihi ta uhi. Khatveivei chiang in eite'n Pathian hehpihna zang khial dekdek ihi di uah aw..? Hehpihna a dim Pathian ki nei hina ven chi a khial toutou mai ding ihi di uam?? Ahi peuhmah kei hi. Tua dan a I Kristian hihna pen uh a pai touhtouh leh bel bangmah bulbal omlou suak ding hi, Saptuam te'n bang chi tuk in kal suan in missionary mun tuam, gamtuam ah sawl khiakhia lengle I innkim/innveng te'n hon nuihsan khak lel ding a om khak theih gige dinmun a ki ding hisim ta, ei a sawl khe tute mi'n nou na poimoh masa zaw uh hon chih theih louh na ding in tua ana kalsuan khe sa te I panpih theih na om sun tuh ei mahmah kha lam hi'n taksa lam hita leh iki lam thak zel a akuan khia telak ah tel kei leng-le I ommun khat peuhpeuh a Kris adia palai-te ihih dan(II Kor. 5:20), Kris a nasem hoih sem ding a siam a I omdan I theih thakthak uh kiphamoh petmah hi (Eph. 2:10), huchi ahih ka leh zaw Pathian gam nasep na adia kalsuan khia I unau te min ana chilphih kha ding ua ei adia zum huai petmah ding hi.
Thukhupna di'n Kumpi Solomon gelh Eklijiasti 12:1-14 tan tomkim tak in en zual leng:
Eklijiasti 12:1-7 Na khangdawn lai in, nang hon Siampa theigige in: Lai Siangthou sungah “phawk/thei” chih kammal in gamtat khiatna a gennopna ahi hi. Gentehna in, Pathian in Abraham “phawk/thei” a chihna ahi, Pathian in ama nuntakna a hoihna dingin amah mah in ompih chihna ahi hi (Gen. 19:29). Tua ahih man in hong bawlpa “phawk ding” I chih chiangin ama hong piansak hun a eite' a ding a deihna banga gamtat khiatna ahi. Eite khangnouna toh kituakin Pathian in hinkhua leh hun hoih hun phate zong hong pia hi. Kha siangthou panpihna tawh Pathian “kiphawk” thei a, “mi thak na silh nadingun Jesu thu na zak na ngaih uh chiangin, Jesu a thuman thutak a om mah bangin, tua Toupa kiangah thu na sin un” (Ef. 4:24) a chih mah bangin sihna hong tun ma-in I sep ding kisam hi. Tang 3-7 sung ah, mihingte tek-in sihna lam zuan ihih lam uh muh theih a, ahih hangin I khalam mi uh bel, “niteng in bawl thak in a-om jel hi” (II Kor 4:16) a chih bang in kihehnepna zong I ngah hi.
12:13 Pathian zahtak inla, a thupiakte jui in: hiai lah mi tengteng siam a omna san ahi ngal a: Mihing hinkhua a mawkna-pi ahihna Solomon in limtak in a banbanin hong ettel khit chiangin, a tawpna ah, I hinkhua in omzia a neih theih na ding thu hon mukhia hi. Huai tuh bang hiam ichih leh Pathian zahtakna, ama thu-te iitna leh ama thupiakte man-nate in mihingte hinkhua ah thildang tengteng in a piak theih louh lungkimna leh hiankhua hoihtak piangsak thei hi.
12:14 Pathian in I thil hih tengteng vaihawmna a tun ding ahi: ahoih hi in ahoihlou hitaleh, a guuk a thilhihte nangawn toh: A tawpna penpen ding in Solomon in eite adingin a nanung kammal hon gennop tuh: I gamtatna khempeuh ah, Pathian thukhenna I thuak ding hi. Thu-um mite leh thu-um loute gamtatna a hoih leh a hoih louh a vekpi in Toupa'n hong entel dinga thu hong khen ding hi (II Kor 5:10; Kilaakna 20:12:13). Pathian in thu hon khen ding, Pathian in mimal chiat tungah thukhenna hong tung sak ding chih I theih diu poimoh mahmah hi. Huaiziak in, Pathian hehpihna thudon louin I nialnial leh thukhenna ni chiangin Pathian in eite a mawk mai in hon khoih lou hial ding hi.
Thumapi a I gensa mah bang in I gam uah “thangthu-pha” hon lut na tuh a kum a sim di hileh 103 tak bang pha thei hial ta. Huchi ahih leh I mihin pihte muh in I gamtat ahihke'h kho hei dan in mite'n I hinkhua ah Kris a mu uh hiam chih iki et tel zel poimoh pet mah hi. Tua ahih ka leh zaw a tung a kon gen sa mah bang in missionary tampi sawl khe tu in pang lengle mite'n Europe gamte mah bang a “Amau apan in Tanchinhoih I za ua, tun ah amau Tanchinhoih apoimoh ta uhi” chi a hon nuih san lel ding a ki om kha petmah ding hi. Huai kia hilou in Toupa'n I nasep khempeuh hon entel lai ding a tua te a vaihawm khum a om lai ding hi hang. I khangnou lai hun tamlou I neih sun-te a manpha thei pen leh Pa deihna bang a zang thei di'n Toupa'n simtu-te tengteng hon vualzawl hen aw...