Kum 1780 in Robert Raikes in ama’ bawl “Gloucester Journal” kici ah Sunday School neih ding hoih a sakthu na gelh masa hi. Tua pen pawlpi tuamtuam pan upate in hoih sa in na thukimpih uh hi. Tua kum a kipan Sunday School I cih hong kipan ahi hi. Robert’ deihna bulpi ahih leh “khangno/naupang factory tuamtuam a nasemte in Nipini a off ni uh a Pasian thu kihilhna hun a ngah theihna ding uh deihna leh ngimna tawh a na pat ahi hi”. Tua a kipan muntuam gamtuam ah pawlpite in Sunday School hong ban hon uh hi. Ei’ lakah zong pawlpi khempeuh in I nei ciat hi.

Tua hunlai a Sunday School in a tupna pen khangno nasemte in laisim dan, lai gelhdan leh Pasian thu a sin theihna ding uh ngimna tawh a phuat uh hi a, tuamah sunzom in tu ciangin zong a tangpi in naupangte Pasian thu, Lai Siangtho thu kihilhna leh Christianity tawh kisai kisinsakna munpi hong suak hi.

Tuhun ciangin, naupang na sem omlo hanga, Nipini simin Sunday School kikahsak ciat hi. Naupangte a kum uh tawh kizui in pawl tuamtuam in kikhen diudeu hi. Beginner pan kipan Senior dong om hi. Senior a zawh uh ciangin, picing ah lut uh hi. Pawlpi pawlkhat in Picing Sunday School zong omsak uh hi.

I theih ciatsa bangin Sunday School pen Pasian thu/Topa Jesu thu leh biakna tawh kisai a doctrine tuamtuam, zuih ding leh zuih loh ding cihte kihilhna hun leh mun ahi hi. Sunday School in a ngimna bulpi tuamah hipah ding hi. Tua bek hilo in gupkhiatna thu kihilhna pen a thupipen dingin ka ngaihsun hi. Ei Christiante’ lunggulh thupipen Pianthakna ahi hi.

Khatvei January 26, 2013 ni a Rev S Neng Za Khup, Director, NECTAR in a thugenna ah gupna thu tawh kisai I san theih hun hibang in gen hi. Naupang kum 0-4 = 1%, kum 04-14 = 85%, kum 15-30 =10% tua leh kum 30 tunglam siah = 04%. Tua bang ahih leh naupang kum 4 leh kum 14 kikalten gupna san ding baih sa mahmah uh cihna hipah hi. Tuabang ahih leh tua kum kikal pen I mawk beisak loh ding thupi mahmah ding hilo hiam?.

Tua hi a, Sunday School naupang a tamzawte pen kum 4 leh kum 15 kikal mite hi tangpi uh hi. Hih hunsung pen Topa Jesu gumpa leh Topa a a san ding uh a baihlam laitak himawk lo hiam. Hih hun ah gupna thu I hilh kha hiam? Sunday School kai ci in la bek sakpih, omdan hoih ding bek genpih, Lai Siangtho kamngah genpihna bek in hun I zang kha hiam? Topa Jesu’ tangthu lel peuh I sinsak hiam? Adam leh Evi, Moses, Samson leh tangthu tuamtuam bek I hilh hiam? Gupna thu I hilh kha hiam? Sunday School siate in eimah leh eimah kidot huai mahmah ka sa hi. Ei a sangsia pen pahphot zong I piangthak takpi hiam? Piangthak lopi, omdan hoih man leh pawlpite’ hong seh man a Sunday School sia hih khak ding lauhuai sa mahmah ing. I mawhpuakna lianlua mahmah ahih lam I phawk kha ngei hiam?.

Khua pawlkhat ah a pianthak leh thak loh genkha loin, khuasung a nungak leh tangval omdan hoih a kitheite Sunday School sangsia dingin kiseh miau hi. Tuate in bangteng sinsak uh hiam kitheihpih khollo thei hi. Thusinbu sunga kigelh teng bek khawng sinsak lel uh hiam?. Gupkhiatna thu zong hilh kei unteh a ci zong i hipah sam het kei hi. Hilh zong hilh thei mahmah kha mawhlo ding uh hi.

Sunday Schoolte ah naupang bangzah in gupna ngah uh hiam cih kigen kha ngei mel lo in, crusade na ah, cialpi na ah, camp ah tuazah tuazah piangthak ci in kigen theizaw hi. Crusade, camp, cialpina a sia a ci ka hi laizang kei hi. Tuate sangin Sunday School ah gupna thu nakpitak a gen ding thupi penpen ding hilo hiam a ci ka hi hi ( I genpih kei ka cihna zong hipah samlo hi).

Tua ahih leh, Sunday school sia dingin kuate semsak/pangsak ding cih thupi mahmah dinga, a tavuan uh zong thupi mahmah hi. A tunga I gen bangin pianthak man hilo, omdan hoih man a Sunday School sangsia dinga I zatte in bang teng sinpih uh hiam cih I kansui ngei hiam? Sunday School pan gupna ngah mi bangzah pha cih I pulak ngei uh hiam?

Hithei hileh Sunday School sangsia dingin (i) Piangthak diktak (ii) Thunget a hat mi (iii) Khamangthang a vei mi (iv) Lai Siangtho zong BD ciang beek a zokhinsate hile uh hoih ding hi (Lai Siangtho sin in, a zo khempeuh zong piangthak kim khollo thei lai cih ngaihsut huai hi).

Tua ahih manin, I Sunday School paipih dan uh en kik leng ci nuam i hi hi. Naupang kum 5 a kipan kum 20 kikalte, kum 15 sung, Sunday School a kah sungun piangthak sak ciat zo leng, I gamah piangthak kibeh lap mahmah ding in um ing. Sum leh tha tampipi bei a Camp, Crusade, Cialpi I cihcihte kisam nawn kei leh kilawm mate. Na ngaihsun ngei hiam?

I mangngilh loh ding khat leuleu pen, ei nu leh pate zong kipiangthak kim deksuai lo ding hi. I nu I pate Christian ahih man uh a ei zong Christian a kicite hilo I hi hiam? Lawm, nang piang thak lo ding hivete aw, hong kici leh lah tangtel sihtan bang ngam ding ngen. Christianity pen phaw/lum a zang kitam mahmah ding hi. I khua sungah bang hangin siatna hici zahta in hong tung hiam? Pasian zahtakna gen loh, nu leh pate zahtakna zong a nei om mel lo hi hang. Ei I pianthak kei leh I tate bangci pianthak mawk ding uh hiam? Kha Siangtho in deihtuamna nei a a sunga va busa ding ahih kei buang leh.

Pawlpi pawlkhat ah Picing Sunday School kici in min bang kilim kan(roll call) mahmah sawnsawn hi. Kumtawp cianga kaitam thaman ngah nop man a hanciam mahmah zong om kha ding hi. A lunglut takpi zong om kha mah ding hi. Ahi zongin, kuamah tua Lai Siangtho sin lunglut lua lo kha ding uh hi. Nipini kikhop loh kilawm kei cihna bek tawh hong kikhawm zong omkha lai ding hi. Tuate in tawp ding kal ngaklah mahmah khathei sawnsawn uh hi. Tua leh Picing Sunday School sia in Lai Siangtho hong sim suk in, puah tuak a saknate Hilhcianbu tuamtuam zangin hilhcianna bawl sam hi. Pawlkhatte’ ading in cimtak huai mahmah kha thei lai hi. Lai Siangtho kamngah hong sinpih hi. Tua zong biakinn pua tun ciangin kuamah in kithei nawnlo thei lai sawnsawn hi.

Tuabang a Nipini I zat bei sangin, Pastorte(Pasian thuthuk/thutak a theite) mah in Sermon limci mahmah/mipite’ nektheih ding genna hun in zangzaw le uh phatuamzaw leh kilawm ka sa hi. Ei’ Pastorte a man kei uh leh zong, I kim I kiangah, Pasian mi zat, thugen siam tam mahmah hi. Upate, thu genthei mello, lawp mellote I ban gensak sangin tuate cial ziau leng bangci? I gensa banga Nipini kikhop loh sangin ci a hong kikhawm khat biakinn sunga lusu/ihmu a a hong tut sangin, tuabang thugen siam, Pasian mizat khat in deihtak hun zang in a zaknop mahmah ding thu gen hileh tuapa/tuanu’ ading in phatuamzaw lo ding hiam? I Nipini zatdante bangci I sa hiam? Puahtuak om I sa hiam?

Ngaihsut huai thu nih eh thu thum:

(i) Naupang kum 4 pan kum 15 kikalte in in Jesu pen gumpa leh Topa a sanbaih sa uh ahih leh, I Sunday school siate a piangthak mah uh hiam? Pianthakna thu a hilh thei mah uh hiam? Sang kah ngeina dan a kahsak pong I hi hiam? Hih kum 10 sungin (Sunday School kai sung) naupang bangzah in gupna a ngah uh hiam?

(ii) Sangsiate piangthak lopi, omdan hoih man a ut leh ut loh hilo a, midang ding a omloh man a I guan mawk ahi uh hiam? Tuate in pianthak dingdan thu lamlah theilo kha thei ding uh hi. Syllabus(Thusinbu) a om bang a Lai Siangtho kamngah, la thak sinpih, Lai Siangtho tangthute sinpih leltak I hi kha kei maw?

(iii) Picing Sunday School kisam in phatuam takpi na sa hiam? Neihtuak mah hi I ci ciat uh hiam? A ngeina dan a kikhawm pong lel I hi uh hiam?

Tua ahih manin pawlpi khempeuh a Sunday School naupangte khempeuh piangthak sak zo peuhmah leng, sum tampipi bei in Cialpi, Crusade, Camp cihbangte vaihawm kisam nawn kei leh kilawm sa ing. Tua bek hilo in I Society zong hong hoih mahmah dingin ngaihsun ing.

Kuamah pawlpi leh mimal kawkna hi peuhmah lo hi. A telsiam dingin Pasian in mimal kim thupha hong pia ta hen. Amen.