Thupatna
Mihingte khelhna toh piangkhawm i hihman un Pathian mai ah ngaihdam I nget ding kisam hi. Mahni dikna ziaka hing ding chih hileh a hing taak ding kuamah omkei hang. Tua ahihman in ngaihdamna thupitak Jesu Khrist tungtawn in Pathian in honpeta hi. Tua koppih mite tuh Gingtute/ Khrist nungzuite I hi uhi.
Ngaihtuah mah dih: I vengsung/ Saptuam sung ah Mr & Mrs Lal (min phuahtawm) te tapa 2na Mr Khup (min phuahtawm) khalui in gari in phukha hi. Tua a phukha gari heektu vengkhung lama Mr Thang (min phuahtawm) ahi. Amah nitaklam khat lawmte toh Houlim nopna mun ah sawt va tu lawkha uh ahihman in kham sa a hongtai chiangin khomui zul a naupang kimawlte gari toh phukha hi. Mr Khup ahihleh a ngal guh kitan ahihman in damsung khe langkhat kia toh khosa ding a suak hi. Huan, Mr Thang leh innkuan te’n khatvei va veh ua, himahleh ka khutkhial uh chi in ngaihdam ngetna va nei kiklou uhi. Gingtu hihna ah Mr & Mrs Lal te nupa in ngaihdam ding chih a thei uhi. Himahleh, a tatak in ngaihdam haksa a sa mahmah ding uhi.
Ngaihdamna
Ngaihdamna kichi rong vom pen rong ngou a tat/ phiat mang ding chih hilou hi. Himahleh, ngaihdamna I chih chiangin ‘khutkhialtu in a hihkhelhna kipuang a, a thuaktu in phulak ding himhim a ngaihsutna a kipan sukbei’ chihna ahi. A chihleh bangziaka ngaidam ding ihia? chih dotna a om ngei ding. Bible in bangchibang a ngaidam dingin hon sinsak hiam I ending:
“Kua peuhin kua tungah leng thubuai nei bang hile uchin, kithuakzou chiat in, kingaidam tuah unla, Toupa’n a honngaihdamtak bangin, kingaidam sam un.” – Colossians 3:13
“Huan, kihehpih chiata lainatna neiin om unla, Pathianin Khrista a hon ngaihdam bangin, noumau leng kingaidam tuah chiat un.” – Ephesians 4:32
“Mi a tatleknate uh na ngaihdam uleh, na Pa uh vana omin leng a hongaidam sam ding.” – Matthew 6:14
Bangchi ki ngaihdam ding
Tua ahihman in ki ngaihdam dingdan Bible hon sinsak tuh hiai a nuaia bang ahi.
|
Khutkhialtu hihding |
Thuaktu theih ding |
|
1. Khial ahihdan kiphawk ding. |
1. Manna, haksatna leh thuaknatna puakdan siam ding. |
|
2. Lungsim tawnga kisikna. |
2. Thiltuahte tungtawn a omdan leh kampau ah pilvan ding. |
|
3. Ngaihdamna ngahna dinga kipuanna neih ding. |
3. Hihkhelhna pen pom a, kon ngaidam chih ngam ding. |
|
4. Lungkimsakna dinga kul-te hihsak ding. |
4. Tuabang a thupha tawina pom/ sang ding, a hoihzawng lungput toh kitanauna punsak ding. |
“Ngaihdamna in kihoutheihna ding lampi bawlsak a, kitanauna kiksem neisak hi” – Anon.
Hiai a tunga kipia leh a dang poimoh omte a langnih ua suk buchin tuh ngaihdamna omtheihna dingin a poimoh hi.
Thukhitna
Tua ahihman in, hiai dotna toh mahni chiatin I hihding a kisam om hiam chih kivelthak chiat ni:
1. Kua tunga bang pentak ngaihdam ngen ding kahia?
2. Kua ahia ka ngaihdam zohlouh ding om?
Aziak tuh, mite I ngaihdam theih chiangin Pathian hon itna, a tapa tungtawn a hon ngaihdamna ki theichian seemseem ahihman in.