Thumapi:

            India Sorkar in tualsuak namte chia akoihte bel ‘Adivasi-te’ ahi uhi. “Adivasi” kichi pen Sanskrit kammal akipan laksawn ahi a, huai omzia bel “Tualsuak Minamte” (Original Peoples) ahihke’h ‘tribal peoples’ genna a zat in om a, amaute pen “Scheduled Tribes” kichi Namte ahi uhi. India State mun tuamtuam a achil akipan ana teeng masa ‘Adivasi’ namte pen tualsuak mi ahi uhi. North-East India, Arunachal Pradesh, Assam, Manipur, Meghalaya, Mizoram, Nagaland leh Tripura ah ahihleh – hiai kammal, “Adivasi” omzia in tualsuak minam hihna genkha mahmah hinapi in, amaute’n ‘Adivasi’ kichih saang in Mangkang pau a “Indigenous (Tribal) Peoples” chih pen adeihzaw uhi.   

Gam Kepbitna:

Manipur Hill Areas huapsung Gam leitang neitu hihna dinmun leh “Tribal Customary Laws & Cultural Rights” kepbitna toh kisai India Daan-Bupi sung ah mumal het lou phing hi. Indian Constitution Art. 371A nuai ah Nagaland Tribal mite dinmun hoihtak a kepbitsak in a om ua; Art. 371G nuai ah Mizoram Tribal mite bitna diing hoihtak in kigelh detdet hi. Manipur Hill Areas District Council Act, 1971 & Rules, 1972 pen Sixth Schedule Provision nuai ah aom kei a; Fifth Schedule Provision nuai ah leng om kichian lou (i.e., Scheduled Areas/Tribal Areas kichi lou inchin, Hill Areas akichi lel hi), lah Indian Constitution, Article 275 nuai ah Scheduled Areas huapsung a hamphatna diing a kibawl, Fifth Schedule Provision kizatna States tuamtuam a Scheduled Tribes-te a diing a hamphatna tuambik bawl a om bangbang, hamphatnate pen banglah kumteng a Phualpi Sorkar akipan Manipur Sorkar in Funds lalut thei leuleu zel ngal…(Hiai pen Tribal Sub-Plan zong akichi hi). Manipur Tribals-te pen India Daan-Bupi sung a Scheduled bangzahna nuai a om hi hiam? Sixth Schedule Provision nuai a lah om lou, Fifth Schedule Provision nuai a leng om chiah lou hileh kilawm…Manipur Singtang Mite (Tribal Peoples) dinmun diktak bel Manipur Pawlam, (Outer Manipur) a om ahi maimah uhi. Article 371C dungzui in “Hill Areas Committee” Manipur State Assembly ah aom diing chih ahi leuleu hi. Manipur Pawlam (Outer Manipur) akipan Manipur Inpi ah mipite ai-oh Palai Tribal MLAs 20 om uhi. Huchi in, Tribal MLAs 20-te’n Manipur Legislative Assembly ah Art. 371C dungzui in “Hill Areas Committee” bawlkhia uhi. Hiai pen Fifth Schedule Provision nuai a “Tribes Advisory Council” toh kibangdan a koih hi hia, hi lou chih pen chiantak a hilhchetna India Daan-Bupi ah kigelh lou zel hi. Manipur singtang mite dinmun diktak buarchuar mahmah asuak hi.

Fifth Schedule nuai ah Scheduled Areas & Scheduled Tribes kivaihawmna enkaitu diing Members 20 saang a tamzaw lou “Tribes Advisory Council” bawlkhiak diing ahi chih India Daan-Bupi sung ah gelhlut in om hi. Himahleh Sixth Schedule Provisions Extended ahihna North-East State khenkhat Assam, Meghalaya, Tripura and Mizoram ah bel Tribes Advisory Council aom kiphamoh lou hi. Tribes Advisory Council sik-le-tang a Hill Areas Committee, Manipur Legislative Assembly in bawl ahi chihna, agelhthoh a muh diing om lou hi. Huaiziak a Fifth Schedule Provision nuai a om loupi a Art. 275 pansan a “Tribal Sub-Plan” paulap a Phualpi Sorkar akipan “Consolidated Fund of India” nuai a ‘grants-in-aid’ Manipur Sorkar in kumteng a sum alaklutte pen “Hill Areas Committee” thuneihna nuai a aom a, huchia Autonomous District Councils in amau District teng a ahawmzak diing thil kilawm hinapi in atheih leng theipha baan lou uh abang maimah hi. Gam leitang toh kisai India Daan-Bupi sung ah “Scheduled Areas” ahihke’h “Tribal Areas” chi a chiamtehna Manipur Tribals mite toh kisai tunitan agelhthoh in om lou hi. “Hill Areas” chi a chiamteh in om lel hi. “Hill Areas” huapsung letdan meel kimkot pen Manipur State pumpi letdan meel kimkot za lak a sawmkua (90%) a lian ahi. Himahleh, gam leitang kepbitna toh kisai Hill Areas Gamgi chiamtehna mumal loutak a kep a om in, achiamtehna laibute nasan Manipur Sorkar in Plain Districts sung ah suanlut in seelbawl leh iimbawl in koimun pentak a koih hi hiam chih nangawn theih haksa asuak maimah hi. Gam-le-Nam, Tribal Customary Laws & Cultural Rights kepbitna ahihke’h humbitna diing toh kisai Sixth Schedule Provisions – Manipur Hill Areas huapsung ah “Extend” a aom a, huchia zat ahih masiah Tribal mipite’n haksatna nasatak kituak touden diing hi. “Gam Kepbitna” lam ah pilvanhuai thu theihtuak tampi petmah om hi. Tua theihtuak tampite tuni a genseng lou diing hi hangh! Milip in atheih dia hoih bel ahi ve..!

Nam Selguk:

          India ah ‘Indigenous (Tribal) Peoples’ – Tualsuak Minamte pen kum za bangzah hiam “Selguk” a om in gammang/gamlak ah inn-le-lou nei in ana khosa nilouh uhi. Nam hihna toh kisai akituam vilvel, pu-pa ngeina leh tawndan kichiantak anei Nam selguk a om: Chin-Kuki-Mizo-Zomite India Mal-Suah gam ah kithehzak in a khosa ua; nelhsiah leh simmoh in aom uhi. Khovel gam tuamtuam a Namdangte toh akituam leh Nam hihna tuambik nei – Customary Laws and Cultural Rights tunitan hoihtak a kembit Minam Selguk, Chin-Kuki-Mizo-Zomi chi a atuamchiat a kiminloh in; mi kibang, pu-pa ngeina leh tawndan kibang, tanglai akipan tunitan zi leh pasal a kinei, Namkhat hihna diktak neisa hinapi, India, Myanmar (Burma) leh Bangladesh ah amaute deihtelna om lou leh alemsakpihna uh leng lakmasak chih himhim om lou in melmakte thahatna tungtawn a thehzak a om in mituam, namtuam bang mai in tu hun nanung ah ateenna uh gam bungsung munchih ah hehpihhuaitak in khosa nitnit uhi.

          Hiai Nam Selguk a om mite khanloh hunhun India, Myanmar leh Bangladesh in bangmah gen-le-sak aneithei kei diing hi. Pre-British hunlai akipan mahni kitoudelh leh kivaihawm a om, “Independent Hill Country” Minam khat, Leeng (Raja or King) anei Nam Selguk ahi uh chih Khangthu Bu a om bang dungzui a, amau-le-amau kichiantak a akiphawkkhiak ua, pheiphung khat khai a kal asuan theih hun uh hong tung diing ahihman in Manipur leh India Sorkar aguktak in apatau mahmah mai uhi. Post-British Period, tunitan hiai Selguk Namte pen Independent Gam koimah ah apu-apa uh khangthu laibu leh khovel Khangthu Bu ah akipiakkhiakna uh chiamtehna muh diing aom kei himhim hi…!!! Amaute gam leh nam kivaihawmna toh kisai a amawl (political innocence) ziak uh hiam, ahihke’h thildang bangziak hiam a gelgawt leh phawklouh a om uh hi hiam chih leng theihbut in aom kei a; himahleh Nam Khat (One Nation) ahi uh chih bel haihvual ahita kei hi. Kum 150 val vengveng British Sorkar in gamkeek sawm a Independent Hill Country ahong dou ekek lai un Tualsuak Minam Selguk, mihangsante’n British Sepaihte dou in, Zogal (1761 – 1919) ana saat uh ahi chih Khovel Khangthu Bu ah haihvual louh a chiamteh in om hi. Tua baan ah, Indian National Army toh pangkhawm in Kidoupi Nihna in zong British Sepaihte i pu-i-pate un ana dou lai uhi. Hiai hun in leng British Sorkar nuai ah akipekhe sam kei uhi.

          Atung a i gen, “Independent Hill Country” pen Independent a koih kawmkawm in, The Bengal Eastern Frontier Regulation 1873 nuai ah pawlam mite hiai gam huapsung a ahong lut diing uh khaamna in Passport sik-le-tang a zat di’n “Inner Line Permit” ana pawkhia in tualsuak Minam Selguk a om mite, amau “Customary Laws & Cultural Rights” Daante toh kituak a kivaihawmna aneihtheihna diing un British Sorkar in “The Chin Hills Regulation 1896” ana bawlsak hi.                 

Khosakna:  

Khosakna leh Sumsinna (Trade, Commerce & Industries) in kizopna hoihtak anei hi. Nektawm zong a khosakna aniam luat chiang in Sumsinna leh Gam-le-Nam kepbitna toh kisai in zong nawngkaina nasatak hon tun thei gige hi. Niteng neek diing zongtawm a, leiba mi’n ahauhluat chiang in mite siikden a om in, mahni mimal ngaihsutna leh sia-le-pha theihna siang azang mumal thei kei himhim diing chih achian hi. Adetdou nekzonna apiantheihna diing in “Zohuan” bawl in mahni kitoudelh theihna chiangtan bek kum teng in gah kipahhuai ngah gige le’ng bel gam kembit i hi diing a, i minam a diing in zong phattuamna tampi aom diing baan ah, Sumsinna lam ah masawnna thupitak eite lak akipan ngei in zong hong piangkhe theipahta diing hi. Neekzonna kizen leh detdou “Zohuan” bawl mi za lak ah sawmnih-le-nga bang Zomite lak ah om hitaleh Gam-le-Nam in bangzahta a phattuampih diing hi hiam! Zomi Economy nasatak in akikheng lamdang ngei diing a, huchi in gam-le-nam itna dik anei mi hong pung semsem in; Zohuan kibawlte tungtawn in Gam-le-Nam kikembit theita diing hi.

Thukhitna:

          Tualsuak Minam Selguk a om, Chin-Kuki-Mizo-Zomi chi in mintuam, ahihhang a gen-le-kawk kibang, namkhat, mikhat, suangtu kibang leh inkuan khat; tunsung khat pan a piang Minam ahihlam uh khovel in bel theichian mahmah napi’n amau sung thu taktak ah ahihleh kitheichian mumal lou in Namkhat ahihna pen uh selguk bang in kigimneih lailai uh abang maimah hi. Hiai ah “Theihna leh Theihkakna” apoimohdan kilangchian petmah hi. Thilkhat peuhpeuh ah “Theihna” lel ahuntawk kei a, “Theihkakna” neih teitei diing kisam hi.

          India ah Mizo min in State khat, Mizoram kichi aom a, Myanmar (Burma) ah Chin State aom bok hi. Mizo leh Chin min a State om pen kipahpihhuai lua bang hinapi in ahihnatak a i gel vengveng aleh bel Mizo leh Chin akichi biikte’n theihna bel nei in, theihkakna hoihtak nei lou phing uh abang maimah hi. Banghang hiam chihleh, Mundang a om (e.g., India-Manipur & Bangladesh) Kuki-Zomi ana kichite dinmun diing gelfel loupi a, amau tumtum a State ana lak mawk pen un, Independent Hill Country sung a inkuan khat a hihna uh kitheihmoh bawl a, mahni angma kia khualna a thilhih abang leltak hi. Tuni a i kiphatmoh uh bang hita diing hiam? Israel mite lak ah Mosi ahihke’h Nehemiah piak in aom ua, ginomna toh makaitu ahihna uh diktat leh chihtakna toh asem buching uhi. Mahatma Gandhi makaihna nuai ah India in Independent angah hi. Khangthu Bu a i muh bang in “Independent Hill Country” aneitu diktak, tualsuak mite’n angahkiknawn theihna diing ua mi muanhuai, Kuki-Zomite makaitu diing piak a om nai lou lailai mah hi’n teh chi a daihsan vengveng theih mawk ahi diam – chi in hiai thugelh simtu kuapeuh kiang ah, apoimoh mahmah sep diing tampi mailam ah om ahihlam theihna leh theihkakna nei chiat diing in “Home-Work” ka hon pia hi.