Thawn Tuang Guite, Tuimang Khua
Chin state buppi sungah Zomi mipil masa ten thu le la ah a mapan zia ka ngaihsut ciangin thuneu sa vet keng. Chin State bup sunga biakna aom masa pen ABM hi a, Chin state sunga Falam, Hakha, Matu, Zomi...cihbang minam ki om hi. Tua hi a Pasian thuzui masa ten ABM pan ZBC ah Zomi mintawh na laihzo uh hi.
Tua bek hilo Zomi minpua Lai Siangtho sang ZTC thupi khat ki neihto lai hi. Chin state bup pen Zomite khut zeekna sungah om khin cihna hi. Zomite vai hawmna nuai ah Chin state bup om ngei hi na pi in, tu hunteh ih om suak sak zo diam? Ih lungsim ah ih koih ngam diam?
Ngapik tui tampi ih hawp aleh Chin state bup zawhna ding lungsim teng ngapik tui in taimang hi kha ding hi. Zawh lohna peuh mah Zomite lungsim hilo hi.
Tedim, Tonzang, Cikha.. huamsung teng pen ih ngahsa ci photni. Chin kici zawdeuh Hakha ten amau kual teng a ngah khinin ngaihsut leuleu ni. Tuatawh hong din khawl peuh mahlo Tedim, Tonzang, Cikha kual tengzong hong ukto nuamlai uh hi. Zomiten ih ngahsa cih ngaihsut ki kal in ih veilam panin khat khat in hong ki guk khiatsak ding lauh huai hi. Tedim khua sungah Zomi mintawh ahilo party zum ki hong a, mi tampi tak lut kici hi. Bang hangin Zomite mah Zomi min apualo party ah lut nopna lungsim nei uh hiam? A hang pen Zomi bup in ngaisut huai takpi hi. Kua ki sapna hi ding hiam?
Zomi sungah ih muan ih suan makai masa ten Chin state bup na zo khin ngei uh hi. Tu hunteh Zomite ngah ding hamphatna pen namdangte khut sung pan a ngahsawn utzaw maw, namdangten a ngahding uh hamphatna Zomite khut sung panin zeek khiasak nuamzaw ding? Hih thu ah Chin adeihten amau khut sung panin Zomite ngah ding hamphatna teng hong zeeksaknuam uh hi. Eite in amau ngah ding hamphatna pen zeeksaknuam dah hang ih ci hiam? Amau hong ci deksuailo uh hi. Eigam ei ukna sung hi, ih cihcih ki kal in amau ei inntual zangah zum hong phut ngamta uh hi. Bang tanin eite ki panta ihiam? Ih din mun pen kimlepaam tawh et khak dihve. Ei zong a thuneu hizaw tuanlo hang aa....
Piancit ten Zomi te tungah huhna hong ngen ( ih muante tung bek ah huhna ki ngen bek) uh aa, pau theilo gamtheilo hi mahleng ki huh giap hi. Kawl kumpi in gal a zawhna dingun Zomite tungah huhna hong gen uh aa, ih zawh pih takpi hi. Zomi lungsim thuneu deklo hi. Ki pat khiat ding haksa ih sa mahmah aa, ki pan taktak leng maban limcii ki ngahto densam hi. Ih lungsim minuai ah om tuansamlo pi ee.
GZA makai teng leh ZCD makai teng zong namdangte tawh ama panna uh ah minuai ah aom te hi deklo uh hi. Ei ki sak theina ding om tuanlo na pi, Pasian in Zomite namdangte' khutzat lel in hong koihlo hi. Namdang tawh ki zop pih khak sunsunten Zomite thudot in hong nei hamtang zaw cihpen a lamdang Pasian itna leh hehpihna taktak hi.
A munmun panin gam leh minam ading ki pang khawmnuam ciat ahih manin GZA ading, ZCD ading sumleh neihsa tawh na semnuam mi om hi. Tua hi aa sum leh paai tawh a thapianuam a panpih ut ten thakhat thu in sum lom khak ding haksa pawl om khading ahih manin kha khat pek khat, peknih a piaden nuam om hi. A munmun ah palai aom zawhleh hoihsem aa, online ZomiDaily.com sung panin piak thei dending hong vai hawmzo lecin uh, kha simin tawmta a pia nuamte ading nuam tuam mahmah ding hi.
Zomi min tawh ki pawlna khempeuh in Zomi ading nasem hoih hi cih na tel nak uhleh amau ki pawlna bek in a maban uh na zomlel uh hen cih lungsim neilo zaw in, ki pawlna khempeuh in thu manpha Zomi te ading a hihna nakleh ki pawlna tengin va sem ngeingai maileng Zomite hamphatna lianzawlo ding hiam? ka na cici hi. Ih lungsim puak zia pen thuneu hetlo ahih manin thuneu leh thulian ah ki pawlna khempeuh in a munmun pan Zomite hamphatna ding ih sep nak leh na mipihte adah kua om peuh mah ding hiam?
Na hoih sep ding cimtak keini, ahun a tun ciangin Zomi lungsim khempeuh a thupitna leitung mi khempeuh in hong thei ding uh hi. Ih lungsim puakzia tiltel te thupi a sa...