“A neite’ piak behlap a hi dia; a neiloute’ a neih sunsun u’leng laksak ahi diing”. Hiai k’on gen hang a Bible thu hon sermon vak sawm ka hi zenzen kei. Sermon didan le ka theikei, ka theihna in a chin kei. Ka inn kongte uh Pa Pau kiang ah mikhat in, “Pa Pau, Bible ana sim ou, tukum sung a nasimsuak zoh ngeingei leh sum (500?) ka hon pe diing” chi’n chiam, Pa Pau leng kipaklua, sun-le-zan a nna dang sem manlou zen a Bible sim awl-mawh hihtuak. “Hon chipah le zaw kizou dekta di hiven” chi’n Bible sim diing in hon paisan!
Pa Pau dankhawng in eile Bible sim di man khawng a sum hon chiam khawng om hile zaw Bible sung a thu kigelhte ‘dik hina maizen e!’ ‘Khaih! Hichi’n let le uh nalh zo laileh kilawm maw’ chi a phatna, soisel leh genbeh ding bang kithei zek kha-mawh lou di hi ven, kei gen a phatuam di khawng zaw a hi kholkei lo-na dia, kikamtam lel ahih chiang a….! Tua bel, neulai a kipan a “Bible Thutak ahi” chih ana kithei(tua le thutaklou chihna hilou in), ‘hichi zodeuh leh’ chia soisel leh genbeh na di mawngmawng kithei vetlou, a hoihna khat chuh om veve sa ing. ‘Bible thutak ahi, Pathian hatkhum a gelh ahi’ chitawk mahle hang a bawl/gelhtu-te’ mihing mah hi veve ahih na uah a bukim sipsip I lam-en tuan kei. Sosel leh hichi zodeuh leh chihna ding zong in kipingpa vei hial le bel khat/nih khawng bek zaw kimu khamah in teh. Tua kia lou in leng, Bible lam a siamna neite’n bang soisel leh kalh sawm le uh a kalh leh soisel nang tam theipeuh mah un chia!
Ei khawng in bel I theihlouh luat man in ‘hichi zo-deuh leh’ chih na diing mawngmawng kithei vetlou, kei a dia bel ‘thutak’ petmah diak hi veh aw! A bible kawm(cover), a pek(page) hoih leh hoihlouh(quality) banah, Bible(suakthak) I hauh deuhdeuh u’leh a suaklui te’ a hoih dan ka thei deuhdeuh chihlouh ngal! Bangpeuh Bible hi’n ‘ble’ kei ta leh ‘soisel leh hichi zo-deuhleh’ chi a ana soisel leh phunchiak vakvak theite kha mitaima, fel leh miphaklouhte ana hidaih uh. Ke’n lah ka na ngaisang thethup a! Phunchiak leh soisel ka chihhang a ahoihlou, milungsim leh milungkiak vungvung na dia phunchiak leh soisel hilou in, ‘hichi zo-deuh, khachi zo-deuh leh tuasang a nalh zolai ding hia, tu’n le a nalh lo-na a…’ chi a a hoihlam(positive) leh mikipah leh mipanlak theihna dia soisel nate ka genna dan eihchu… “A hoihlua, a diklua, soisel leh hichi zo-deuh leh chihna di himhim a om kei a ‘perfect’” va chih tetop bangleng a hoihpen ana hikei hial veh aw. A diak in eilawi bang kideihkhop baih mahmah ihih na uah soisel leh ana phunchiak diing om keile bel a khangtou ngei mawngmawng lou di kihi lim veh aw! “Khangtou lou I hihlam I kitheih lelleng khantouhna thupitak ahi” khangtoulou ihih lam uh kithei keilai le hangbel a dan ki-om mahmah lou didan eive!
A bul a Bible tang/chang I gen kha ana dik, diklai leh diktou zellai diing ahih dan ka musuah semsem. Ahi, Bible a kigelh na-na-na zaw Pathian hatkhum a kigelh ana himah ngeingut a, a dik toutou mah ve. En bangchi zawng teng a let leh pei tha-zoh in a thugelh te a neem/dau theitawp in let thakthak mah le hang ‘thudik’ ahihna a dau in a beituan kei diing banah Pathian in leng a thuchiam a dau/da(neem) sak tuankei diing. Huan, Bible in zaw bangkim ana tuumkim tak ahi.
Computer mai(wall paper) dia I Zomi Nam chiamtehna ‘Vaphual’ lim ka koih ua leh papi(putek sim) khat in hongmu, “baang(wall) a taak theih dia lian di’n sawp(print) khele bangzah a bei di, ka deihlua” hongchi ke’n le “ka theikei, denlam chiah ka Ute’(boss) hongpai chiang un hongkan thak in aw” ka chih zoh in hon paisan. Deih taktak zaw hi mah in teh, a khonung sawtlou in hongkan nawn pah a, kouleng a bei di zah ka gen ua leh “kare! Ka sum neih in daihlou, Jobcard loh laak chiah k’ong sawpsak himhim di” chi’n hon paisan zel. A painung in ka ngaihtuah thakthak a, Jobcard lohlaak chiah va chih, Jobcard tung a I kinepna uh lian hina maizen e! Khenleh, ka nuih bang a za dek zozen, ‘I kinepna leh lam-et uh lam-et leh kinepna taak taktak mah a diam?’ chin ka lungsim leh ngaihtuahna in kilkawmteng a dengsuak hiau. “Lam-etna lian; Kinepna thawn” chihkhawng peuh ka lungsim ah hongsuak khemkhem veh! Hiai chiah zaw kei thu hileh sawpkhiak sak pah vitvit a, hoihtak a bawlsak mengmeng a, kei mahmah in a takna di munmun a va taksak ziau ka ut. A kinepna, kinepna taak taktak hi a ka koihlouh man in.
Hiai Jobcard e bang ‘card’ e te khawng zaw hon gensau le ka sawmkei.. I bible tang gen in a genchiang lo fekfek hina lou hia, maw le? Huan, hiai I Bible tang kamteh veuhvauh pen I ngaihtuah thut in zaw ‘sum’ damdeuh kawk a bang maw, himahleh, sum tektek na hi sese kholken teh, kei theih leh gintak dan in. A dik keile zaw a theite’n hon hilh chiang ua!.
Khovel changkan(g) na zaw ihih theih khomkhom un ina boh liklik sam ua, I phakna chiangchiang ua nuam isa huntawk thou ua, I lungsim u’leng a hong dawk tawmtawm mai! Laa lam ah khanlohna mahmah leng I nei(ta) ua, hip-hop bangleng sawngkhat I lak uah hong lar mahmah mahleh tuchiang in zaw theiphaklouh phial ahi ta. Film lam ah Unau Zoute leh Bukpite’n tulai in beihpi a honsuah ua, loh leng a lohching ngei uh I gingta. A film-te uh hon Review sawm ka hikei, kuapeuh in leng I et-khit chiat ngei uh ka lam-en, kei bang a en kha-hak lawi ka hi lai zo-mah di. Hichi dan film hon bawltu-te I phat a, pahtaak huai isa. Lehlam ah, sawiselna tuamtuam a tuah ngei uh I gingta, lungkimna omlouhna khovel a teeng leh khosa lai ihih man un. A hi a, hiai soisel leh mite’ phun khumna tuamtuam te kha zadah mailou a, kivelthak leh kipuahthak a, kibawlhoihna dia zang a, ei-le-ei I ki-et chet thakna dia I zat theih uh kiphamoh mahmah hi veh aw. Huai dan a I ngaih a, a lak dan I siam chiang ua chuuu…himai!
Soisel bangle hoihdeih ziak a soisel ki-om in, gilou himhim le zaw ki-om veve mah e, khovel bukimna chi mai ni! Huan, India Zomite’n ‘Khupching’ chi un chin, Burma Zomite’n ‘Chingkhup’ chi uh! Ei chihna chiat dik kisa. Mi buai nawnlouh nung a a buaibuai lai mah zaw hive hang aw maw, Zomite’ aw…!. Unau Zoute leh Bukpi-te ka nuai-et leh simmawhna hi zenzen lou in, nidang a apau uh I zaktuung a nalh kisa lou lo mahmah, ‘nungak melhoih deuh a pau uh chiik deuh a a hongpau bangzaw a melhoihna beizou ahi haha..’ tukhawng a chu nalh sa-lota himai. Kei bangngial, Kangkap a kipan ka hih dungzui a Paite’ pau lak a leng ‘Lousaau’ pau chiiktak himahle’ng a khenleh Zou pau; changleh Bukpi pau heuhheuh lel kihi dan hi’n maw. A pau uh nak engnalh lua ahih chiang a. Bangteng hileh, hichibang film hon bawltu-te ke’n bel sousang tak in k’on pakta, honsunzom un lan, hong lohching toutou un aw….
Manipur Board nuai ah 100m MIL I nei ua, hiai MIL pen a hun leh munzil a puahphat touhtouh, a thutun bangleng koihbeh cheuhcheuh ahi. Ahihhang in, ke’n zaw ‘himahleh’ chihna di ka nei veve tel ka chi! Class X MIL hon gen diing kaih chu. Bu 3 a kinei a, Paite Pau Sinna, Pau leh Laigelhdan leh Siamsil Thaikawi te ahi. Hiaite MIL I neihtung ua thu kigelhte paihkhiak a om ngeilou hia chih zaw theike’ng, puahphat dungzui a thu kigelhte behlap zel ahi chihbel ka thei. Ka ngaihdan hon genzual le’ng- MIL I neihtung ua Manipur Board in honsutsak ua, a maukhut a om hih dungzui a a mau I zahtak I chi hia ahihke’h maivil I chi zo-diam ah ziak a a maupau(Meitei) a kigelhte eipau a let I hih ua leleng tuchiang a Board in le eikhut a hon pe-khe ta ahihna ah khekkhiak hun lo-ta sa ing! Paite Pau Sinna leh Pau leh Laigelhdan te zaw thutuam in koihta le, Siamsil Thaikawi bang a sung a thukigelh tam zaw Meitei’ aa kilet ahi. Eimi laigelhsiam bangleng I tamtaak u’toh ei’ gelhte mah koih ahoih zaw mai diam? Ka chihna san bel, tua Siamsil Thaikawi a thukigelh tamzaw te Moral om mahmah lou chih dandeuh piansim tam ka sakluat ziak a k’on gen maimai hi! Kamtam man hi!
Khat veivei ka ngaihtuah chiang in laigelh mite’ zaw ‘kamtam leh phunchiak’ deuh hikha di hi ve uh aw khawng ka chi lungsim khemkhem sek a. Kua mah ngaihsak le hi(khol)lou banah, I laigelhpen min sim hia, simlou chihle theihbut hilou, tuahteng se-khe zungzung mai! Sahang ihmu a phawng kha le tamta un teh! Ka lawmte khatle kamtam, misoisel leh phunhaat lua in chin ‘na hichi phun gige tel, tekkun tan dam le chin le nanak phunchiak mah di maw’ khawng ka chi gawpgawp suk a. Pau hetlou khawng a om a, a hong daih melmul chiang bang a le kihong maimah ve aw. Pitek-putek a diak a Pitek phunchiak deuh neite’n bang khat veivei chimtak simna ua a omlouhsan hial chiang a hot a hot huai chi uh eingal…
Zanlam in Unaupa Suan Chin Lal in ‘Numei: Review’ chih a gelh ka sim kha a, Solomon late a hon genkhak leh ken le phawkkhat ka na neitei ngut. Ka lawmte khat in laithon gelh, gelh di tam theizoulou hia chih zaw theihpih ke’ng, a tawpna a “ Solomon late bung huaizah, tang huai a kipan huaitan ana sim ou” chi a gelhzou hiau.
***Nu, Ka Kipak!***
©ZM Tonsing
15/Aug/12