"Sister! Sister! Naungek in oxygen tasam petmah a naaksam ahita... A kin theipen in full in hong thuah zok in...!" chia doctor pa kikoukhe kawm a kinoh tak a Nurse hon sap zoh in naungek ka en nawn a, MRI machine sung apat a hon kaihkhiak zoh geih ua votsalua daang kiuhkeuh a ana om ka muh lai sang in a taksa ana mualzaw thamta, a taang nawnkei. Va naih phei deuh in naungek mai dawkna teng ka va en nawn a, ana dup gaita, a mel in hinna himhim a paai nawnkei. Kei muhdan in ka tapa tuh bei khin ahitamai...!!! Himahleh, ka lam-etna a bei theikei.
Ka pa nidang a baan-at (innoculate) leh mi kaap (inject) sekte a nahi. Kum 4 vel ka hih in mi a kaap lai ka baan ka va doh mawk a, aman le ki-test na dia neuchik a kap sekte uh dan in hon nakaap mawk hi. Huai hun lai a antibiotic hoihpen a kithei Penicillin toh kituaklou ka nahih khak ziak in khophawklou a kintak a damdawi inn tut in ka na-om hi.
Kum 9 vel di ka phak in ka gawng law mahmah a, doctor hon entu in TB vei a hon muhkhiak ziak in damdawi '-cillin' tel khat hon kaap uhi. Kituaklou zel ka hih man in chilgial pawt zungzung a khophawklou in ka na om nawn. Huaizoh kum tamlou nung in hichibang damdawi (variant) khat a test na maimai dia neuchik hon kaap uh ka kituahpih louh ziak mah in hichibang dinmun mah ka tuakkha nawn zel hi.
Thumvei si baang, hiai tan hinna piak a om hilel daan ka na hi.
August 10, 2012 ni in kum 1 lel a naupang lai ka tapa damlouhna ziak in doctor ten MRI (Magnetic Resonance Imaging) lak di le poimoh a, naungek taang hetlou a om maimai ngaidi ahihziak in kaap-hikna (sedative) piak a ihmutsak di chi uhi.
Naungek i aangpom a phiaphia lai syringe lianpipi toh kaap-hikna damdawi tampipi honkaap ua, i mitmuh a mitsi diaidiai a hong zoi nilhnelh ua khophawk nawnlou a omlai ki-etna khawlbupi lamdang taktak a i hon sial chiah zaw lungsim a pai hat ut mahmah mai. Kum 3 vel paita in ka tapa upazaw pen a paukhiak zekai deuh ziak a BERA (Brainstem Evoked Response Audiometry) test hon neihsak dek lai un le ka aangpom lai damdawi a kaplup in ana om ngeita hi.
Naungek in khosik bang le nei ahih ziakin hoihtak a tuam lum thitthet in a taksa mun bangzahhiam ah ECG monitor-na di gui kithuah hi. A mai kia dawk in MRI khawlbupi sung ah sawnlut in a omta a, naungek toh kei kia huai room sung ah ka om uhi. A kiang a room ah doctor leh technician ten glass apat gal-et in a hihdite uh hon panta uhi. Khawlbupi hong ging durdur pah mai a, bangtan hiam nung in hong khawl zual a, huaizoh kindeuhmai in hong ging dutdut nawn hi. A vangkim in a gindan hong kikhekkhek mai a, mi piching khophawk a huai khawlbupi sung a va lumte adia le thawmhau huai thei di khop a sawt a hih zihzeh mai uhi.
Minit 15 zoh vel in doctor honglut a, zouta uh ka nasak leh naungek hon kaikhai a, room sung namai lou a vot ahih ziak in leh a kaap-hikna in zoulousim ahi ngei dia naungek hong khuh khe theuhtheuh hi. Naungek khut ah damdawi tui ngou tamlou kaaplut nawn in a ihmusuk nawn pah a, khawlbupi sung ah naungek sawnlut in a gaal khatlam apat hon gingsak zungzung pan nawn uhi.
MRI khawlbupi gei a naungek lungphu leh BP khawng etna hidia ka gintak khat ka na en nilouh a, minit 10 zoh nung di vel in huai a number kigelhte hong kiamsuk hulhul tamai hi. Ka lunghimoh sim laitak in doctor pa kinoh deuh in honglut guih a, kintak a hong off in naungek hon kaikhe nawn hi. Doctor pa mel apat lunghihmohna ka muh ziak in, "Bang chi a?!" chi'n ka va dong pah a, "Oxygen level niam ahi," chih teng a hon dawnkik zoh naungek ka et leh a mai ana daang dilhdelh a om ka mu hi. Huaizoh in nurse duty leh doctor dangte ban ah sawltolawnte hong kisamtuah vengvung tamai ua, oxygen full a diiksak dia a thuah ma geih un naungek taang nawnlou a omlai a mai ka va en nawn hi.
Huai hun a naungek mel ka mitkha ah a mang ngei nawnkei di. Minute khat le kihal man nailou a daang kiuhkeuh pen ana mual gawp khinman, ana dup gawp khinta - ka mitmuh ka mai mahmah a ka tapa khahsuah khinta hi'n ka kingaihtuah!!!
MRI Room a honglutte lak a pilvaang dawm deuh khat in konglam a ana ngakdin hon sawlkhe pah a, naungek bang chi dinmun a om chih thei ut lua hinapi in kongkhak bul apat le ka daak lut ngam nawnkei. Innkong ah a nu le lunghimoh sim lah MRI lazouta ua naungek hon domkhe di uh sa in ana om a, houpih ngamlou in gaal khat apat kongkhak gaalmuh theihna di mun ah lohdi theilou in ka va ding mawk hi.
Naupang doctor leh hichibang case a siampen di a chihteng uh kinoh hehu geuh in va lut chelchul ua, kongkhak a lut-le-pawt hehu toh van chi tuamtuam tawllut zungzung a hon muhtak in a nu le lunghimoh guih ahi ngei dia, "Bangchi a?" chi'n hon dong khong hi. Ka na dawngkik theihlouhtak in a kilehhei a, baang lam nga in a kunsuk a, thumna nei hingei in ka thei. Huaihun a bangmah ka na dawnkik louhtak in a taksa pum teng thakhat a sa suk suak hehu zou ahi chih a nu'n a khonung in hon gen hi.
Naungek hinna humbitna dia 'Code Blue' Medical Emergency puan ahitamai.
MRI room apat a vangkim a hongpawtkhia doctor te kiang a bangchi dinmun hita chia ka na dotten, "Don't worry, the best doctors are taking care of the baby, he'll be allright," chia hon dawnna un hon hehnem zoukei. Naungek kap/khuh ging zalou leh a mel mulou in ka lung a muang thei nawnkei. Doctor omte lak a senior pen khat a hong pawtkhe dia, "We've tried our best. Sorry, we could not resuscitate and lost him," chia hong gen zakkhak di mahmah ahi ka mullit penpen.
Ka kipah ni a ka kouh gige khak louh leh ka dah-lungkham ni a le ka kouh mangngilh khak naak: hinna pe thei tunglam a Pa kia loungal, hiai dinmun ah zaw, kouh di ka nei nawnkei. A nu toh kia ka hi na ua, hon Ompihtu a muanhuai ziakin thawmhau lungzinna khawktawp ah lam-etna leh lungmuanna guk khat bel ka nei lailai hi.
Minute 5 zoh di vel in naungek khuh ging za dan in ka kithei a, lah ka va daak ngam nai tuankei. Hun bangtan hiam minute 10 di vel nung in head nurse in naungek oxygen mask toh kithuah lai hon aangpom khia a, a nung khawng beng theuhtheuh in a zuut sak zel hi. Naungek deldep tak a om himahleh a mel leh taksa ngeina ka muhnawn tak in ka thawmhauna leh mangbatna teng thakhat in a mang guih zou hial.
Kei hon pomsak maidi sa a ka na kilam-et lai in nurse nu'n a kin a kin a 2nd apat 8th floor puaktouhna di lift leh ICU room khat ana awngsak di un hong kikoukhe nawn a, ka lungphu hong kinoh lawguih nawn zel. A nu'n le thil omdan theita ahihman in hong naihphei a, naungek hong hoihpah di ahi chih khawng ka na genpih ngam panta.
Naungek in a khosik ziak a MRI room sung votlua leh kaap-hikna (sedative) thuak zoulou a awm bing gawp a naaksam ahi chih hon hilh ua, a kintheipen a X-ray room a puaklut in om nawn hi. Huaizoh in room awng naipen khat a sial in nebulizer khawng thuah in a awm bing hon kaap vang he hu ua, a nu toh va lut in naungek ka va enkhawm ngam pan uh-a kam leh a muk a si ana baang nipnep mai...
Naungek awmbing hong pha deuhta a chih un kintakin ICU ah hon suan uhi. Huai mun ah dakkal 2 leh a kim di khawng zoh in ward ah hon suan nawn ua, naungek naakna leh awmbing hong hoih matan oxygen tatsatlou in kidiiksak hi.
Hiai teng nitaklam dak 12:30 apat dak 3:30 kakal a thiltung ahi a, MRI room sung a naungek ka muh tawp apat nurse khat in hon pomkhiak matan minute 15 sung di vel a ka thawmhau bang in ka thawmhau in ka lungdong kha ngei naikei.
Ward a ka omlai un guh lam siam (Orthopedic) doctor in ultrasonography result kia pansan in operation i bawl mai di uh chih hon genpih a, a khonung deuh in naupang doctor in MRI a kimkhat tan kia kizouman a hihthak hoih di ahi chi'n hong gen zel. Ka na ut nawnkei bilbel a, guh lam siam doctor toh kihou a MRI hih nawnlou a lampi dang hon ngaihtuah sak di un ka na genpih hi.
Doctor tegel ana houlim ngei ua, naungek khe taklam leh kawngguh kizopna (hip joint) lak a infection ziak a tuisia omte anaai (pus) paaisiat ma a khaih khiakna dia nitak dak 8:00 a OT room puaklut di chih dak 6:00 PM in hon theisak nawn pah zel uhi.
Nitak dak 8 ngak a innkong khawng ka va pawt lai in Delhi a nurse sem ka nau in hon houpih kha geih a, thil omdan ka genpih leh hichibang awmbing a naaksamte 'Bronchospasm' kichi a, second 15 lel a le zekai theih sih-le-hin kikal ahihdan hon genpih hi. Ama sepna chest institute/hospital a hichibang situation khawng ana tuahkhak mun dan uh leh adiak a naungekte a kin mahmah ban ah alehlam tak a hutkhiak bang le pichingte sang a baihlamzaw ahihdan khawng hon genpih a, OT room vanzat kimtak omna sung a naungek puaklut ahih chia le lungmuangtak a omdi'n hon thukhak hi.
Nitak dak 8:20 in doctor pa hong manzou a, ka lunghihmoh a theih ziak in Mumbai a Anaesthetist siampen pa hon sapsak ahihdan leh a kaapthoh hilou a naak a naplup sak lel di ahih dan khawng gen in OT room hon lutsan hi.
Hon awlmoh lawm-le-vualte toh inn nuailam a thuumkawmtak a ka ngak lai un OT room lam ah honsam uh chih thu dakkal kimkhat pha pan minmen di chih phial in hong om nawn pah a, lungphu kinoh tak leh diip kosim kawm in inntunglam ka manoh ngal hi. Bang tuakdi ka hia chih beidong sim tak a ka pai lai in OT room kongkhak ah naungek operation lohchingtak a zoh hita chih thu mi khat in hon na hilh pah a, ka zaang huai mai. Doctor in naungek taksa a tui hoihlou pen in naai ana paai mankei a, aat ngailou, syringe a kihiipkhiak thoh ahihziak a zoubaih ahi uh chih hon hilh hi.
Naungek taksa a tuihoihlou 2.5 cc keleu liakkhiak ahihzoh in a taklam khe hon zan thei pah a, ni thum vel a sun a zan a na salua a akahpih nilouh teng a beita.
Naungekte a pian tuung un a pumpi 90% khawng tui (water) hi a, upat dungzui a kiamsuk hiaihiai in pichingte taksa pumpi 70% khawng tui hipha hi. Hiaizahta mihing taksa a tui om lak a hoihlou neukhachik ana om ziak a hichi lawmlawm haksatna tuahtheih chih khawng ka ngaihtuah chiang in lungsim a suangtuahna tampi omte lak ah hon Siamtu in hon na bawl dik, hon na bawl bukim in hon na bawl fuh namahmah e chih khawng hong om hi.
Naungek' damlouhna diktak muhkhiak ahih chiang a treatment patdi ngak kawm a lungsim ngaihtuahna a om
i) Hiai thute ka nu-le-paten ana simkha thei saam di dinmun a a om khak ua, hon itna uh thupi dan theichiang semsem ka hihdan bang;
ii) Ka taten hiai thute sim thei leh theisiam thei di dinmun a a om hun chiang ua ka itna uh a theihchiang semna di uh leh;
iii) Nu-le-pate sang a hon itzaw i biak tung Pathian om ahi chihte khawng theihtel a phawkkik thak zelzelna dia kigelh ahi hi.
©August 12, 2012 | Ding Guite
[Note: Admin Pu Ding te nau neupen Gavin Siammuan tu Aug 10 in damlouhna ziak in ana ki operation ta a, damdawi inn pawtsan thei naikei mahle uh naungek in leng hoihlam manoh lel, i niteng Thumna te uah phawkni. Hiaithu Pu Ding in naungek nuihging ahon zaknawn tak a ahon suahkhiak ahi. Ahong dampah i deihsak ahi]