Old is Gold, Golden is Tobacco, Khaini is also Golden Tobacco, Raja Chap Khaini - chih bang zen hikei mah leh 2009 Kum mautam lai a chih di le hituan samlou in, huai kum a Thu kigelh khat nung etkik ding chi kihi phiang san in. I muh patna himhim thil khat peuh chu athak ei a din ahi mai a. A kua sawl ziak hiam le hituanlou in phalna la chih le hisamlou in keimah tumtum a, a Solfa hon vai suk dek ka hi.
Pu Khamkhokam Guite' HINKHO' DAKMUAL : A Gelhtupa' Thumapi kichi zogamonlinedotcom ah ka sim kha hi. A thugelh ka sim khak patna le ahi bok a.. hiai pa le akua a lemluam a, alim(profile pic.) le Havildal Penson di abat bat toh chin ka sim suk leh a Laibu 'HINKHO' DAKMUAL' a chihna san, a deihna ziak hon genna ah Lung Chin khua toh Ngalzang khua kikal a Dakmual kichi apat a Laibu a minvuah ahihdan, banah huai Mual apat idak chiang in Khua leh Gam, mun tuamtuam kimu thei ahih dan hon gen tou a, mitkha ah kilang tualtual zezen hi. Neulai in chi phelphal le huai Dakmual pen zinsuk-zintouh a kitawn kha gige hina pi'n "ka mukhata, ka dak kha ngeita" chih san mailou in van giksim, kitawl sim mah leh huai mun tun dek chiang in tawlnga ut, a kidak ut man in kinoh pai deuh se a, a khen chiang bang in kitai thoh zawzen hi.
Pu ZKK lou deuh Pu KKK bel chikmah a ka muh ngei hihet kei mahleh huai Dakmual kichihna a kei mahmah bang leng ka maitang tektek toh va dak kha ka hih man in ngaihna na riau ka nei hi. Huchi'n ama column Zokhankhual kichi kon phek ta hi(abang gen khial gige), 'Zokhual' ka chihna.
Huchin ka ban ettou touh leh a thulu zatte bang tulai pau in gen di chile a Sab A SAB tuak thei mai.. . dak berbar kom in ka ban 'next' tou zelzel leh 'N U M E I' kichi ka mu thut a ka mittung bang kasat raurau pah hi. Numei chihle tu' hon hiip pah hiin maw! Pu Zokhual in Numei te etlah huai asak dan thu gelh hipeuh mah ven chin maw chin mit-tang bang bem kilkel zen in ka sim suk leh kahase Nu! Nu! settok mahmah Apa Kam theihna mahmah chia, sim nuam lua dik lua ka chi lungsiam a. Ama in hon thei kha leng maw nungak traih didan hon kan mah di hiveng.
Thupatna din Numei ichih pen utleh Rocket Luancher bang hi thei a, a ut chiang in Nap bang in nunmen thei a a heh chiang bang in Sing leh Lou ten le thei in lau uh hileh kilawm bang in hon gen pan hi. Huai kia le hilou Energy Booster le ahi uh ichih behlap di. A khawisiam papa chu a hampha, ice-cream hiam nektheih gimlim chituam tuam bang a a Mood uh dungzui a om thei uh chih dan kawk tak in le Author pun agen kha na lai a om hi.
"Numei bang atel hiam?" Persian te leh Greek te khawvel a mipil vengvek masa a kigen te'n Numei kichi pen~ a Marung-Marang, a Masala, Siing, Aisan, Apple, Theihai, a Gim numtui henhen, leh banglou teng mix a bawl khait ahih uh chi'n hon pantou a. Eimah ve hiai Numei te lawi mongmong SAMAK va chih hial di hi keimahleh Mimak khat. Genhakpi Samson zaithan nemna, Kumpi Solomon bang le haisak zou kha himah mah un. Khawhun(weather) di bang le numei te sa genlawk nuam zaw bang chih hizaw mah lai ei. Pu Benny Khongsai in "Pathien siemkhel Lanu" na chih na mah a abawl khial deuh mah le ahi kha di uh chih ut huai phial. Chihdia lah Pasian in Numei pen hoih tungtuan dia bawl ut ahih man in Pasal pen kizilna dia na bawl masa chih bang hitang hial. Huai ziak mah le ahi diam Melhoih mai na nana a chu Puppet suak kitam mahmah khin thamtham ta. Numei ziakin kithah loh, sihloh, kibal-kikekna pianloh hial theih hun bang le na om zelzel thei hitel in chin. Taj Mahal bang le numei ziak a kitung vevaw ana hitel a.
A Laisiangthou toh hon mekmat laizang leng, Kumpi Solomon bang in le a leel chim theilouh; a sut chimoh kha na hi mawk un. 'Solomon Late' bang i sim suk leh nuam ngaigai vanglak eive. Numei a buaipih lua a ana puksia na mah agelh nehsoh kop mai, Love letter khaw hel cheucheuh dia hoih pipi bang le om ahi, a sim kha nailou ten ana sim pah un na kisik kei di uh.
"A Sen-ngaih......" A zinte uh Van' sawltaakte chi zawzen le lupna ava napnap a leh ihmu kha (nuihlouh theih ahi sekei). Senngaih kichi kha na om tham mah ahia, a mei in a pa hileh khat leh nih gen di ineih chiat uh gintak huai. Ei bang in le CTHS a kailai (class niamlua genlou di) ka miss nu uh hoih sa, melhoih sa lawtel peh mah(?) Sipek khong bun chehchah zawmah lai.. kare! Kare! Star lum dek himei. Skul top chia a gal aman hon zui chih atheihlouhna di tan a va zuigu gige. Stalking na chih te uh ahi di chu.
Ka innsakpa Napolean Bornoparte in a zi Josephine huai a nungak tunglai a Luikhuk a akisil chia asak khaw Aithanglou leh Ai(crab) sawk kingeih a kava etguk sim gige nu Laithon khak sim a Galpi lai a thautang e, abang e phawk zoulou zen a lam taltal chih- bang dang ziak hilou i a angkawi melmuhna leh aw-neem om sun ahihman in laampih lengleng mawk hi. Tektek! Kudung! kadang ! chia'n ging dupdup mahleh huaite chu huai Paneu renron Napolean a ding in Music ahi mai. Numeite tongluan thelnah mai in le lungtai na lianpi tun thei eive chih a chiang mahmah. First I Love Phiau letter imuh masak penpen bang zaw aw nitak ann le kiduh non selou, anntang nou khat save chi hial di lah hikei ven- kipak lua kisa eikia khong kimok nuih heuhau kha baih lam mahmah sawnsawn eive.
"Kawm kim ta pasal sagih neisa...." Hiai tangthu hon gen leh ka mang zak vuatvuat lam ka thei hi, gennei tak le ahi a Paunak bang zen a le zat sek a om hin ka thei. Tanaute khat hon gen khat toh kana mekmat mok a, a khua ua kiteng Zi man di leh khak na akineih dek tak un Nualam ten Belpi khap kua ngait uhi. Huai hunlai a din Belpi khap kua pen vang ahi ding a zongzong mah le uh amu lemtang kei ua Belpi khap giak toh pasal lamte a thum uleh a pomlouh man un kikhen helhawl uh chi khat na om ngei hi. Khap khat in a sap ziak lel a kikhentheih na hi mawk dan eivele. Bangziak a kikhen uh e chia min dong le uh khap khat in sam va chih di lah nalh kei deuh inteh maw.
Ka Pu Socrets leh Ka Pa neu Shakespeare te khong bang le pillua i sak leh a zite uh thununsa, Thaiboi(hand pack) na hi maimah un, numeite zia mah hizel. Himahleh a zite un a hoih lam api kha uh adeh ka chihna chiang bang a om hi, ahihkei aleh lah a zite uh thununna pen mau pilna, siamna dia na la uh le himai thei. Ka Pu Scorets bang in houh "By all means marry; if you get a good wife, you'll be happy. If you get a bad one, you'll become a philosopher. " chi ziah. Eilak a numei giloute bel Nisa thuak leh Akpi hang bang in ana kigen teh hial le hilou maw. U pa, Nu leh Pa enkawl di penpen bang fuih haivek in inn tuampih mawk. Hichi dante pen a pasal thaiboi; a numei lungsim sia chihna himai.
Numei toh kisai thugelh tam nai lawmlawm lou, adiak in eipau bang a muh di a vang abang hi. Huai ziak mah le adiam hiai bang thugelh keimah mimal tak a kana ngaih nat. Thugelh adia le a gelh hak pawl dia ka up hichi bang a melmuh theih a om kia hilou in a nouneel theih lam a gelh le sut a om chih pen paktat huai in i Vernicular khaw koih dia le hoih sa mai ke.
Hiai N U M E I kichi article a sim nailou bang i om leh sim ngeingei chi adiak in Numeite leh Pasalte'n :-) . A gelhtupa'n research na bawl ek a hon gelh ahi deh aw ka chisim a ziak bel huai mipil, milian leh milal te nupa tanchin leh numei toh kisai athugente uh hon gentel sek pen in simnopna behlap diak in a thugelh giksak tuan hi. Author pu laibu 'HINKHO' DAKMUAL' melmu khakei mah leng huai ale atel ngei ka gingta. A thu tuunte- numeite genhak dan, gitlouhdan, a ngaihhuai dan uh, a baihlam dan(a easy dan uh), khem nopdan te hon bang gen suksuk moklou in kua hiam khat in a Main Article mahmah ah sim le uh chih deih na ziak in i genbeh non dah dia, nungak heel bang le a huntak toh kana pot phot mai di aw.
.