Ka muh masa sak penpen a, a limlak a ka muh ahi. Ka muhtung a kipan in hoih ka sa pah ngal a, sapte’n ana gen uh “Love at First Sight” a chih uh kana gingtak khollouh hia, tun chu ka gingta chih vuak hilou in a tak a tuakkha ka hita mai ve. Hoih sa law mahmah ka hihchiang in ka limlak et kuamah theih lou in ka kim ka kiang a kuan hon mu hiam chih khong en gaugau kawm in a guk in huai limlak a omna bu a kipan in ka la khia a, ka kikuah hiau hi. Hoih sa lo mahmah ka hi ding a, ka en chim thei mahmah kei hi. A limlak ka wallet ah ka kuah a, ka chim chang in ka en zel a, kei a lou ding in pampaih ka sa mahmah mai hi.

Ka pawtna khong ah a thei kha di a om dia aw chi in ka guk kan zel hi. Khenkhat in tam thei kei mah leh uh, hoih a hih dan, a etlawm dan leh a dangdangte a hon hilh sek uhi. Huchibang khong ka zak chiang bang in ka lung a nuam in a nuam mawk a, a kua hon theihpih louh in ka nui heuhau kha zel hi. Ka hon thei sau deuhdeuh a, ka deihna a hong pung deuh mai a, ka lung a buai deuhdeuh hi. Kei ka ki-en zel a, amau khong zaw phu khang kei maimai in, chi in ka lungsim ah a hong kilang zel a, manghilh bang ka ut mai hi. Ahia, manghilh ka tup zoh phot leh ka lungsim ah a hong kilang deuhdeuh a, hoih ka sakna leh ka deihna a hong pung zaw in ka thei a, manghilh thei di vual in ka om kei hi. Suisui ka hih chiang in koi a bang chi a, koi a om hiam chihte ka hon theita a, ahihhang in tangtak in kava naih ngam tuan kei hi. Muh khak kinem in a kong khong ah hiam a hihkei leh a gal khong ah, vaphual singgah ne ding bang zen in ka om mai hi. Deih mahmah lengle ka kilam-en ngei kei himhim hi.

Huchihlai in nikhat ka lungsim ah, hichia phu lou chia a om sang in kei le ka hih theih tawk suah in ka kipan di. Midang a di chihna lah hituan lou a, ken le ka deih leh neih thei ka hi chih ka lungsim ah hong pawt hi. Huchi in kei le hihtheih dandan in kong kipingpei khong hi. Kimuh tuah theih na di lampi a hong om pah mai a, kei leng kipak deuh in kimu tuah di nana na chu ka va kuanpah zezen hi. Amun kava tung a kimaituah a kong om tak un, nervous ka hihiam ka thei kei, et leng ka en ngam kei zezen hi. Ahihhang in aman ka mittangtak hon en hi in ka thei hi. Gen ding leng ka thei mahmah kei a, kamkhat leng ka kihou kei uhi. A kim a kiang a omte bang houpih khak in a om kha zezen hi. Ka kimuh masakna pen un zaw midang a ahi lai, hon ngak in hon chih bawl a bang a, ken leng i deihna na na chu, chi in ka ngak trentran mai hi.

Kha bangzah hiam pai nung in ka hong kimu nawn ua, ken leng huai ni chu sih leh sih, dam leh dam aw chi in ka neih tengteng a ma a ding a sitlou khop a phal ka hih dan khong, hoih ka sak dan khong ka gen hi. Huchia ka kigen tuahtuah lai un, a tawp in zaw kei a ding in a hong kihong khong a, KEI A chih ding in a hong omta hi. Hiai ni chiah chu kipak himai. Innlam zuan a pai bang chu feet 5 nuai ki-en vet lou hin maw!!!… huai zan lup ma in ka kithoh pihpih mai a, i mut suah lam leng phok lou khop in ka kithoh pih den hi. Kithohthoh lai ka kisakleh ka i mut san kha hi. Zingkal lam in ka phok nawn a huai nung chuh…..kikhah ut nawn selou himai. Ka lup pih top mai a, a chang in ka kawi zel a, a chang in ka tawp tonton sek hi. Huaizan chu a gen het kei na a, amah le gim mahmah in teh. Zan hak zen a kikawi na in chin kikham teuh lou (aman a kham diam ah). Zingkal hong hi, huai a le omna lamlam a kizui hi zomah lai.

Ka ngai mahmah mai a, amah omlou a om thei lou ka bang hi. Ka hinkhua amah tellou a zat ding chih ka ngaihtuah chiang in a hihtheih chi mahmah kei. Ka hinna hon thununtu amah a hi mai. Kipahna hiam, dahna hiam ka neih chiang in amah kiang ah ka gen zel hi. Aman leng panpih ka ngaih hun in ka lawmte kiang hiam ahihkeh midang kiang khong ah hon panpih theihna ding uh lampi hon ngaituah sak zel a, kipahna thu ka gen chiang in hon kipahpih ding a hon zonpih zel hi. Ka ngaihluat man in inn a ka om chiang khong in amah kia ka chih hun a om zel a, huai chiang in ka innkuante’n hon hehsan mahmah mai uhi. Kholai kei kia khong a ka vak khak chiang bang in, inn a omte kiang ah deihthohtak a ana kem ding in ka thukhak zel hi. Ka omna lamlam ah ka ompih a, ka lupchiang in leng ka kiang a a om kei leh ka i mu thei kei hi. Ka kiang a a omlouh chiang in ka zong zel a, ka kiang a a om chiang in amah khoih khak bang nuam kasa mahmah hi.

Ka hong om khawm sawt deuhdeuh ua, kong kithuah tam deuhdeuh chiang un a hong buai huai dekdek mawk hi. Thil ka gente midang kiang ah a gen sawm zel hi. Ka ngaihlam leh ka deihthoh lam a thei mahmah mai a, a chang in hong kingeksak sek hi. A hong kingeksak chiang in sum senna ding a hong hipah mai a, `10/20 khong alungkim maimai ahi khol kei lai, `100 a kipan a tunglam lam bang a hihchiang in a lungkimna in sawt a daih deuh a, a sum a tawm chiang in tomchikchik a daih zel hi. Sum senna a hong suakpah mai hi. I khem a i suk lungkim louh chiang in houpih zoh in a om het kei a, pau leng a pau ut het kei zomah hi. Bang hiam nna sem dia i sawl chiang inlah sum tel lou in a sem ut mahmah kei hi. A chang in kei a a hihkhak bang ka kisik mahmah mai hi. Ka khemlungkim zohlouh chiang bang in kei a ahihma a ka deih mahmah lai khong ka ngai zezen hi. Tunlah amah tellou in ka hinkhua bukimlou a bang zel a, alehlam tak in lah kei hon nekang di tu a bang zel hi.

Ka hinkhua a na poimoh dan kithei a hichia om na hi hia? A hihkeh kei hon gawttu a pang sawm himhim na hi hiam? Hiai dotnate dawnna ka thei ut mahmah mai. Nang lou inlah ka hinkhua a bukim zou kei a…. Theisiam inla, simthu khat in luangkhawm thei hileng ka ut ngei…Sian in nih gel kal ah bang simthu lel kha hiam aw…??? Aw nang ka MOBILE……….